Levetekɔ 24 - Bible

Laŋpo-ŋai mɛi káa mɛni

¹ Yâwɛɛ è m̀o Mose ma ǹyɛɛi,

² “M̀ó ǹûai dîa dí pá a ɔle-wúlɔ maa waa lɛ́lɛɛ laŋpo-ŋai mɛni ma Ɣâla ŋɔsua-kɔlɔ seɣe pɛrɛi mu mɛni ma.

³ Ɣele-wulii a kɛ̀ Eelɔŋ é laŋpo-ŋai ŋí tɔ́ɔ é dísee Gono-tee Gãlai seeni Gwaa ma Waai ma perêi seɣei ŋɛ́i-tuɛ. Nyiŋi káa a tɔ̂ŋ ǹyaŋ fɛ̂ɛ dí mɛi káa a tãi kélee.

⁴ Fɛ̂ɛ Eelɔŋ é laŋpo-ŋai ŋí sée dísee wuru-ŋai ŋá nyii-ŋai díkpɛtɛ̂i a gôoi díɣɛli ma gɛ́ dímɛi kàa díkɛ soŋ Yâwɛɛ ŋɛ́i-tuɛ.

Gbóloi gáa Ɣâla mɛni mai

⁵ “Felaƃa kɔpu buu feerɛ káo náaŋ síɣe í kpólo kpua buu feerɛ kpɛtɛ la.

⁶ Díkpɛ̃yâŋ ɣɛli ma feerɛ-feerɛ teƃelei ŋá, ǹɔ́ɔlu mɛi da é kɛ́ ƃò ɣɛli tɔnɔ ma, m̀ɛi da kɛ́ ƃò gbeli ma. Dímɛi pɛ́lɛ a gôo Yâwɛɛ ŋɛ́i-tuɛ.

⁷ Kúŋ sɛŋ kúŋ nɛ̃ɛ pú ma teƃelei ŋá a gɛɛ gɛ́ ƃò a kili too ŋ̀á sama-sɛŋ Yâwɛɛ mɛni ma.

⁸ Fɛ̂ɛ gbóloi ŋí é kɛ́ teƃelei ŋá Yâwɛɛ ŋɛ́i-tuɛ a Vii-tɔ̂ɔ ɣelei kélee. M̀ɛnii ŋí ƃé Eezuɛ-ŋai díkɛ gɛ̂i wɔlɔ-wɔlɔ da wɔlɔ-wɔlɔ.

⁹ Gbóloi ŋí káa a Eelɔŋ pɔ́ɔ da ǹônii, nyaŋ fɛ̂ɛ dí mii gwaa maa waai ma. Gáa a m̀ii-sɛŋ maa waa mɛni kpanaŋɔɔ da gùla Yâwɛɛ m̀a a sâla, zâla láa soŋ-ƃelai mɛni ma.”

Tɔŋ kpɛ́-maa sã̂a ŋɔkɔɔŋ-maa

¹⁰ Tãi tɔnɔ è kɛ̀ naa Ize naloŋ tɔnɔ da ǹóŋ-surɔ̂ŋ nyii è maa sɔlɔ ƃò Eezuɛ nɛni tɔnɔ mai da Eezuɛ nyaŋkpa tɔnɔ da dí laa-sâa kɛ̀ m̀ûui su.

¹¹ Eezuɛ nɛnii ŋí ǹóŋ è Ɣâla làraŋ é ǹáɣaŋ. Dí ǹyaŋkpai ŋí sòŋ dí pá la Mose pɔ́. Ǹyaŋkpai ŋí ǹee láa ƃe kɛ̀ a Selomi. Selomi ǹâŋ láa ƃe kɛ̀ a Diburi. Diburi è kɛ̀ a Daŋ ŋɔsuui su nuui da.

¹² Dí dòo ŋɛi-gao kpɔnɔ ŋá m̀ûui su dí maa kpɛ̂ŋ kɛ́ dí gáa m̀ɛnii Yâwɛɛ a pâi m̀ôi dîa a gɛɛ dí gɛ́ lai.

¹³ Nya ƃe Yâwɛɛ è m̀o Mose ma ǹyɛɛi,

¹⁴ “M̀ó ǹûai dîa dí kúla la m̀ûui su dí lí la díkpɔŋ gîe ma kwaai ḿa, diai kélee ŋ̀óo mɛnii dí díyee pɛ́lɛ ŋ̀ûa dí fáa ma a gɛɛ bere ƃé è m̀o la. A kɛ̀ tí, gbɔŋ su-ƃelai kélee dí zɔɔ a kɔni é lɛ́ɛ la zu é sáa.

¹⁵ M̀ó dîa a gɛɛ núu da a Ɣâla naɣaŋ bere ƃe da pâi gɛ̂i la a maa nuui.

¹⁶ Ŋɔ̃ya kpaa máŋ Eezuɛ nuu da a Ɣâla ǹaɣaŋ ǹûai kélee da pâi maa nuui sɔɔ̂i a kɔni é lɛ́ɛ la zu é sáa.

¹⁷ “Núu da a m̀arâŋ pàa dí baa ǹyaa máŋ.

¹⁸ Núu da a m̀arâŋ nuu ŋɔtaa-tulɛi da pàa fɛ̂ɛ maa nuui é daa-tulɛi vela-fei kɛ́. Fúlu-laa pɔɔ-tooi ƃa fúlu-laa.

¹⁹ “Núu da a mɛni ŋánaa kɛ̀ a m̀arâŋ nuu bere kpɔ́ nɔ́ è gɛ̀ tí lai dí gba kula nɔ́ tí ma ǹyaa máŋ.

²⁰ À kɛ̀ gao ƃe è ŋ̀ale, dí gao ɣále. À kɛ̀ è ŋ̀ɛ́i-gao dɔnɔ wòlo, dí ŋ̀ɛ́i-gao tɔnɔ wólo. A kɛ̀ è ǹyíŋ tɔnɔ ɣále dí ŋ̀ɔi dɔnɔ ɣále ǹyaa máŋ. Mɛni ŋánaa sii kélee a gɛ̀ a m̀arâŋ nuui dí gba kula nɔ́ tí maa nuui ma.

²¹ Núu da a fɛnɛ-sɛŋ da pàa nyii vé a bɔ́ɔi a bɔɔ-too tɛɛ. Kɛ́lɛ núu a núu pàa dí maa nuui páa ǹyaa máŋ.

²² Dɔ̂ŋ ŋí káa káai a Eezuɛ-ŋai kámɛni ma da ŋ̀ɔ̃ya-ŋai díkaa kásamai, kpɛni fêi, ńyãa ƃa Káɣâlai Yâwɛɛ.”

²³ Mose kɛ́ɛ a kpɛɛ dɔ̂ŋ tɛɛ̂i Eezuɛ-ŋai pɔ́i, dí kùla a ǹalôŋ m̀ûui su dí lɛ́ɛ zɔɔ̂i a kɔni é lɛ́ɛ la zu é sáa. Dɔ̂ŋ-ŋai Ɣâla è dɛ̀ɛ Eezuɛ-ŋai pɔ́ Mose sârai, dí ŋ̀aa-see kɛ̀.