Levetekɔ 23 - Bible

Ŋ̀âla mɛni-ŋai kɛ́ kûu-ŋai

¹ Yâwɛɛ è m̀o Mose ma a gɛɛ é

² ŋ̀âla mɛni-ŋai kɛ́ kûu-ŋai maa tɔ̂ŋ-ŋai ŋí tɛ́ɛ Eezuɛ-ŋai pɔ́ a tãi da díŋaa tɛ̀ la gîe ma vɛli mɛni mai.

³ Fólo lɔ́ɔlu mɛi da ƃé kayêei tíi kɛ́ mɛni ma. Ká káfii tɔ́ɔ a mɛi feerɛ ɣelei. Káfe tíi da kélee kɛ̀ a maa ɣelei tí, kɛ́lɛ ká káŋaa tɛ́ m̀a ká ḿvɛli ƃɛ́i ka kɛ̀ naai. Ŋ̀ele kûui ŋí káa a ḿbɔɔ.

⁴ Ka Yâwɛɛ ŋɔɣele kûu maa waa-ŋai ŋí kúla a gúla ɣele-ŋai. Ká m̀aa tûŋ too tãi ma.

Dɛɛ mɛi kûui da dɛ́-sɛŋ féu kpolo kuui

⁵ Dɛɛ-mɛi kûui káa a ɣele maa waa Yâwɛɛ mɛni. Ka gɔ́ɔ pîlaŋ a ŋ̀áloŋ maa-ŋuŋ ŋɔfólo puu káo náaŋ ɣele-wulii.

⁶ Ka dɛ́-sɛŋ féu kpoloi maa kûui kɔ́ɔ pîlaŋ a ŋ̀áloŋ ŋɔfólo puu káo lɔ́ɔlu ɣele. Káfe mii-sãa da m̀ii nyii tɛ́-sɛŋ káa zu fólo lɔ́ɔlu mɛi feerɛ yée mu.

⁷ Ka káŋaa tɛ́ gîe ma a gûu-ŋai ŋí kɔ́ɔ pîlaŋ ɣele-ŋai ká ḿvɛli. Káta fé tíi da kélee kɛ̀ a ŋ̀ele-ŋai ŋí da.

⁸ Ka kámii-sãa sama-sãai tɛ́ɛ Yâwɛɛ pɔ́ fólo lɔ́ɔlu mɛi feerɛ yée mu. M̀ɛi feerɛ ɣelei, ka káŋaa tɛ́ gîe ma ká ḿvɛli. Kɛ́lɛ káfe tíi da kélee kɛ̀ a maa ɣelei tí.

^9-10 Yâwɛɛ è m̀o Mose ma a gɛɛ ǹûai da seri ǹɔii su, zí-sãai da pâi zîi naai dí m̀á maa-ŋuŋ tɛ́ɛ zâla láa soŋ nuui pɔ́.

¹¹ Ǹyaa ƃé pâi ǹáa serîi ḿâ a gɛɛ ŋá ńyee sée kámu. A pâi ǹáa serîi ḿâ a Vii-tɔɔ-ɣelei pôlu ma ɣelei.

¹² Vóloi ka kɛ́ m̀ii-sãa sama-sãai ŋí tɛɛ̂i lai ka kéreŋ sâla kula a kóraŋ tɔnɔ ƃala sirɛ-loŋ nyii kpɔrɔ̂ŋ da kélee fé mai.

¹³ Ka felaƃa lɛ́lɛɛ kɔpu náaŋ da gbora sumo a ɔle-wulɔ ka mii-sɛŋ sala kula la. M̀ii-sɛŋ salai ŋí kûŋ a Yâwɛɛ líi làa. Ka ŋ̀wã̂ai sane tɔnɔ pɛlɛ m̀ii-sɛŋ sama-sɛŋ ma máŋ.

¹⁴ Káfe zí-sãai ŋí m̀á da m̀ii a ŋunu, kpaa máŋ ká ŋɔŋ, kpaa máŋ ká gerêŋ ká gbɛ̀tɛ a kpólo ká m̀ii kálɛɛ pâi Ɣâla ŋ̀ɔi tɛɛ̂i bɔ́. Dɔ̂ŋ ŋí káa kákelee kámɛni ma da kálônii kélee wɔlɔ-wɔlɔ da wɔlɔ-wɔlɔ.

Zí-sãa ƃá kula kûui

¹⁵ Vóloi ka kási-sãa m̀á maa-ŋuŋ sama-sãai tɛ̀ɛ la Yâwɛɛ pɔ́ Vii-tɔɔ-ɣelei pôlui mai, ka lɔ́ɔ kûu lɔ́ɔlu mɛi feerɛ lóno naa loai.

¹⁶ Fólo buu lɔ́ɔlu a tɛ̀ɛ Vii-tɔɔ-ɣelei ǹɔ́ɔlu m̀ɛi feerɛi pôlu ma, ka mii-sãa sama-sɛŋ tɛ̀ɛ ŋɔ́nɔ Yâwɛɛ pɔ́.

¹⁷ Káa-lâa kélee su-ƃela dí kpólo kane feerɛ-feerɛ kpɛtɛ dí pá la Yâwɛɛ pɔ́ a sama-sɛŋ kpîŋ-kpîŋ a tɛɛ-ŋa. Ka gbóloi ŋí gane tɔnɔ kpɛtɛ a felaƃa kɔpu náaŋ da gbora. É kɛ́ a kási-sãai m̀á maa-ŋuŋ.

¹⁸ Eezuɛ-ŋai kélee dí kéreŋ sâla kula a ƃala-lonii lɔ́ɔlu mɛi feerɛ nyii-ŋai díkaa a kóraŋ tɔnɔ-tɔnɔi, niŋa naɣa tɔnɔ da ƃála-sirɛ feerɛ Yâwɛɛ ma. Díkɛ a taa-tulɛi nyii-ŋai kpɔrɔ̂ŋ fé diai. Dí díkula a kéreŋ sala da mii-sãa é pɛ́lɛ ŋwã̂ai ma. Zama-sãai ŋí kéreŋ kuŋ lɛ̂lɛɛi a Yâwɛɛ nîa.

¹⁹ Ka ƃoli-sirɛ tɛ̀ɛ máŋ a sɔnyɔ̂ŋ sama-sɛŋ, kóraŋ tɔnɔ ƃala-loŋ feerɛ a kɛ-gîe pôlu sama-sɛŋ.

²⁰ Zâla láa soŋ-nuui a pâi m̀ála lonii feerɛi ŋí siɣêi da gbólo kpuai é dílaa seri ḿâ. Díkaa a sama-sãa maa waa ḿɛni ma.

²¹ Káfe tíi da kélee kɛ̀ a maa ɣelei tí. Ka káŋaa tɛ́ nɔ́ gîe m̀a ḿvɛli mɛni ma. Ka m̀ó kálônii dîa dí dɔ̂ŋ ŋí mɛi káa wɔlɔ-wɔlɔ da wɔlɔ-wɔlɔ ƃɛ́i kélee da kɛ̀ naai.

²² Ka kɛ̀ kási-sãai m̀á kulâi káfe gùla ká seri la ǹɔɔ-laai ma. Zí-sãai pâi kulâi zí-sãa ƃai kuláa pôlu mai káfe gùla. Ka dílɛɛ naa gôlo-ƃelai da ŋ̀ɔ̃ya-ŋai mɛni ma. Ńyãa ƃa Káɣâlai Yâwɛɛ.

Dúru fɛ́ɛ kûui

²³ Yâwɛɛ è m̀o Mose ma ǹyɛɛi,

²⁴ Ŋ̀áloŋ ǹɔ́ɔlu mɛi feerɛi ŋɔfólo maa-ŋuŋ káa a ɣele kûu maa waa ḿɛni ma. Ka túru fɛ́ɛ a maa ɣelei tí ka káŋaa tɛ́ ma ká ḿvɛli.

²⁵ Ka mii-sãa sama-sɛŋ tɛɛ ńyãa Yâwɛɛ pɔ́. Káfe tíi da kélee kɛ̀ a ŋ̀elei tí.

Zɔnyɔ̂ŋ su-mɛni lɛɛ ɣelei maa sâla-ŋai

²⁶ Yâwɛɛ è m̀o Mose ma ǹyɛɛi,

²⁷ “Ŋ̀áloŋ ǹɔ́ɔlu mɛi feerɛ ɣelei káa a sɔnyɔ̂ŋ su mɛni lɛɛ ɣele. Ka kákpîŋ maa waa ká káŋaa tɛ́ gîe ma ka kéreŋ sala kula ńyãa Yâwɛɛ ma.

²⁸ Káfe tíi da kélee kɛ̀ a maa ɣelei tí, kpɛ́ni fêi, ŋ̀elei ŋí káa a ɣele kûu maa waa. Gáa a sɔnyɔ̂ŋ su mɛni lɛɛ ɣele.

²⁹ Ǹúui kélee pâi mii-sɛŋ da miî a ŋ̀elei tí ŋa pâi zu-karâi. Vé pâi wɔ́lɔ kɛ̂i ŋɔnûai sáma.

³⁰ Ǹúui pâi tíi da kɛ̂i a ŋ̀elei tí Yâwɛɛ ǹyaa kpîŋ a pâi maa nuui paâi é gula ŋɔnûai sáma.

³¹ Dɔ̂ŋ ŋí káa kákelee mɛni ma da kálônii ƃɛ́i kélee díkaa naai.

³² Ka m̀ɛi káa é kúla ɣele-wala ma é tóo ɣele-wulii ma a ŋ̀áloŋ ŋɔfólo ǹɔ́ɔlu mɛi náaŋ ɣelei kélee. Gáa a fii-tɔɔ-ɣele maa waa. Káfe sɛŋ da m̀ii kpaa máŋ ká tíi da kɛ́ a m̀aa ɣelei tí.”

M̀ûu-ŋai maa kûui

³³ Yâwɛɛ è m̀o Mose ma ǹyɛɛi,

³⁴ “Ye m̀o Eezuɛ-ŋai dîa a gɛɛ dí m̀ûu-ŋai maa kûui kuláa kɔ́ɔ pîlaŋ a ŋ̀áloŋ mɛi feerɛi ŋɔfólo puu ɣele ká gula fólo lɔ́ɔlu mɛi feerɛ yée mu.

³⁵ Ka káŋaa tɛ́ gîe ma a ŋ̀ele kûu-ŋai ŋí maa-ŋuŋ ɣelei ká Yâwɛɛ fɛli. Káfe kátii-ŋai da kɛ̀ a ŋ̀elei ŋí.

³⁶ Ka mii-sɛŋ sala kula Yâwɛɛ ma a fólo lɔ́ɔlu mɛi feerɛ. Vóloi ǹɔ́ɔlu mɛi saaƃa ɣelei ka kákîŋ maa wáa ká káŋaa tɛ́ gîe ma ká Yâwɛɛ fɛli ká kéreŋ sala kula. Káfe tíi da kélee kɛ̀ a ŋ̀elei tí. Gáa a ɣele kûu maa waa Yâwɛɛ mɛni ma.

³⁷ “Ŋ̀âla mɛni kɛ́ ɣele kuu maa waa-ŋai ká ŋí. Ka káŋaa tɛ́ gîe ma ká Yâwɛɛ fɛli, ká mii-sãa sama-sãa tɛɛ bɔ́, kéreŋ sala sama-sãa, sí-sãa ƃa sama-sãa, ka kéreŋ sâla kula ma, ká ŋwã́a sama-sãa tɛɛ bɔ́ yɛ̂ɛ berei dɔ̂ŋ a m̀o la a gɛɛ ká gɛ̀ a ɣele kûu tɛi-tɛ́i kéleei.

³⁸ Ŋ̀ele kûu-ŋai ŋí ŋ̀aa-see kɛ́ mɛni fé a Vii-tɔɔ-ɣelei maa mɛni maa sãai da, kásama-sãai, kákono tee-ŋai ŋ̀aa-see kɛ́-sãai da ǹii-kula sama-sãai ka dɛ̀ɛ Yâweɛ pɔ́i da.

³⁹ “Ka kpɛ̀ɛ a kási-sãai m̀á kuláa, ka Yâwɛɛ ŋɔkúui ŋí maa pêlei kɛ́ a fólo lɔ́ɔlu mɛi feerɛ. Ka bêlei ŋí kɔ́ɔ pîlaŋ a ŋ̀áloŋ ŋɔfólo puu káo lɔ́ɔlu ɣele. Ŋ̀ele kûui maa-ŋuŋ káa a fii-tɔ̂ɔ-ɣele maa waa.

⁴⁰ Ka kási-sãai m̀á lɛ́lɛɛ-ŋai da-ŋa siɣe, tóu laa-ŋa da wúru lâa-ŋa ká gúui kɔ́ɔ pîlaŋ la ká ƃaa kɛ́-maa tɛ́ɛ la Káɣâlai Yâwɛɛ pɔ́.

⁴¹ Ka gúui ŋí kɛ́ a fólo lɔ́ɔlu mɛi feerɛ kóraŋ tɔnɔ su. Ka guui ŋí kɛ́ ŋ̀áloŋ ǹɔ́ɔlu mɛi feerɛi su Yâwɛɛ mɛni ma. Dɔ̂ŋ ŋí káa kálônii mɛni ma ǹyaŋ fɛ̂ɛ dí m̀ɛi káa díkɛ-ɣeniɛi su a ɣele kélee.

⁴² Káai a Eezuɛ lonii kélee ká kɛ̂ ƃûu-ŋa su a kóraŋ lɔ́ɔlu mɛi feerɛ

⁴³ a gɛɛ kálônii da pɔ̂ri gɔ̂lɔnii tínaa tuɛ pere a gɛɛ tãi Yâwɛɛ è Eezuɛ-ŋai kùla la Ize lɔii sui díkɛ̀ ƃûu-ŋa su. Ǹyaa ƃa Káɣâlai Yâwɛɛ.

⁴⁴ “Bere sîi ŋí su Moses è Ɣâla ŋɔtɔ̂ŋ-ŋai lɛ̀ Eezuɛ-ŋai dîa da ŋ̀ele kûu-ŋai a gɛɛ dí dímɛi kâa nyii gáa a ƃaa kɛ́ maa tɛɛ́ Yâwɛɛ pɔ́i.”