Levetekɔ 22 - Bible

Zama-sãai m̀aa waai maa mɛni

¹ Yâwɛɛ è mò Mose ma ǹyɛɛi,

² “M̀ó Eelɔŋ ma da ǹônii a gɛɛ dífe ƃâa kùla ńaa maa waai ma. Mɛni ma dí ƃâa kɛ́ zama-sãa maa waa-ŋai ma nyii Eezuɛ ŋai da zìɣe zu ḿaa mɛni mai. Ńyãa ƃa Yâwɛɛ.

³ M̀ó dîa à kɛ̀ dílônii da nyii maa fé waa níi a pà zama-sãa maa waai kɔlɛ nyii Eezuɛ-ŋai dí zìɣe zu ḿaa mɛni mai, maa nuui fé ŋɔ́nɔ wɔ́lɔ pâi tíi kɛ̂i mî ŋ̀âla-teƃelei ma. Ńyãa ƃa Yâwɛɛ.

⁴ “Eelɔŋ ǹóŋ nyii kélee gbôdo káa mai, kpaa máŋ yá a kula mai é ŋásama-sãai maa da mii é lɛ́ɛ la zu maa é wáa. Eelɔŋ ǹóŋ da fé lɛɣɛ sɛŋ da ma nyii a lɛɣɛ saa ḿa, kpaa máŋ nuui ma yá a kulâi mai,

⁵ vé tela lɛ̀ɣɛ tɔara-sɛŋ, kpaa máŋ núu da ma nyii m̀aa fé waa ní pere sîi kélee da sui.

⁶ Zâla láa soŋ nuui nyii kélee a lɛ̀ɣɛ zãai ŋí da ḿa nyii maa fé waa níi, maa nuui fé pâi kɛ̂i a maa waa é lɛ́ɛ la zu ɣele-wulii é kɛ́, nyaŋ vé pâi zama-sãa maa waai da mîi fɛ̂ɛ é gbîŋ maa waa.

⁷ Ɣele-wulii à kɛ̀ gɛ̀ ní maa nuui maa waai a pɔ̂ri zama-sãa maa waai da miî, kpɛ́ni fêi, gɔnɔ̃ŋ ká tí.

⁸ Dífe sua da mîi nyii sàa gbɔɔ̂i yee ma kpaa máŋ m̀arâŋ fɛnɛ-sɛŋ è baâi. Da gɛ̀ tí maa sɛŋ a pâi gɛ̂i dímaa fa kɛ́ a ŋ̀waa. Ńyãa ƃa Yâwɛɛ.

⁹ “Fɛ̂ɛ zâla láa soŋ-ƃelai dí ŋátɔ̂ŋ-ŋai mɛi káa ŋá dɛ̀ɛ dípɔi. Da wàla gɛ́ da pâi saâi díkpîŋ sɔnyɔ̂ŋ su, kpɛ́ni fêi, da ƃâa kula ńaa ḿa. Ńyãa ƃa Yâwɛɛ nyii dímaa waai.

¹⁰ “Ǹúui vé a zâla láa soŋ-ƃelai dísuui su nuui dai vé zama-sãa maa waai da mîi. Zâla láa soŋ-ƃelai da ŋɔŋɔ̃ya kpaa máŋ ŋɔtíi kɛ́ nuu da fé zama-sãai maa waai da mîi.

¹¹ Kɛ́lɛ Zâla láa soŋ-nuui ŋɔluɛi nyii è ǹya a gbɔ́ɔi sɛŋ-kao kpaa máŋ nyii dí maa sɔlɔ ƃô zâla láa soŋ-nuui kpîŋ ŋɔpɛ́rɛi mui a pɔ̂ri zama-sãa ŋí da miî.

¹² À kɛ̀ sâla láa soŋ-nuu da ǹóŋ-nɛni a surɔ̂ŋ kùla nyii vé a sâla láa soŋ-nuui, maa lôŋ-nɛnii fa pɔ̂ri zama-sãa maa-waai ŋí da miî.

¹³ Kɛ́lɛ sâla láa soŋ-nuu da ǹóŋ nɛni nyii bɔ̂ŋ a saai kpaa máŋ bɔ̂ŋ a ǹɛɛ a pá pôlu gáa-ƃelai pɔ́ bɔrɔŋ ǹyaa tɔnɔi, a pɔ̂ri zâla sãa maa waai da miî nyii ǹâŋ a zɔlɔ ƃoi. Zâla láa soŋ-ƃelai dísuui su-ƃelai nɔ́ ƃé da mii-sãai ŋí da m̀ii.

¹⁴ “Ǹúui vé a zâla láa soŋ-ƃelai dísuui su-nuui da a zâla sãa maa waai ŋí da m̀ii, fɛ̂ɛ é vela-fei kɛ́ é tela gbua buu feerɛ láa ma.

¹⁵ Zâla sãa maa waa-ŋai Eezuɛ-ŋai da gùla Yâwɛɛ mai, sâla láa soŋ-nuu da fé maa tĩa kàra,

¹⁶ ǹyaa ƃa dí ǹɛɛ naa ǹúui maa fé nɛ̃ɛ ní é da mii é da tɛɛ bɔ́. Ǹúui maa fé nɛ̃ɛ é da mii a mìi a mɛni kula maa sɔlɔ ƃò, kpɛni fêi, Ńyãa Yâwɛɛ ƃe zâla sãai maa waai.”

¹⁷ Yâwɛɛ è m̀o Mose ma a gɛɛ é dɔ̂ŋ-ŋai,

¹⁸ ŋí tɛ́ɛ Eelɔŋ da ǹônii pɔ́ da Eezuɛ-ŋai kélee. Ǹyɛɛ ma Eezuɛ-ŋai da, kpaa máŋ ŋ̀ɔ̃ya-ŋai dísamai da a kɛ̀ kéreŋ sâla kulâi ḿâ, a nɛ̃ɛ ma é kɛ́ a kono têe sala kpaa máŋ gili kula sala, pɔ́ɔ da fé kɛ́ maa taa-tulɛi ḿâ kpaa máŋ gɔ̃liŋɔɔ.

¹⁹ É kɛ́ a taa-tulɛ sirɛ nyii è gùla ŋɔniŋa-ŋai sáma, kpaa máŋ ŋɔƃála-ŋai sáma, kpaa máŋ ŋɔƃoli-ŋai sámai ŋá lɛ́ɛ pâi ńyee seêi m̀u.

²⁰ Núu da fé sâla kùla ḿâ a taa-tulɛ kɔ̃liŋɔɔ. Ńyãa Yâwɛɛ fé pâi ńyee seêi maa sâla-sɛŋ tí mu.

²¹ Núu da à kɛ̀ kɛ-gîe pôlu sâla kulâi ḿâ, maa nuui fé maa sala taa-tulɛi kɛ̀ a taa-tulɛ nyii gɔ̃liŋɔɔi, a nɛ̃ɛ ma é kɛ́ a kono têe sala kpaa máŋ gili kula sala maa ŋaa-see kɛ́ɛ. À kɛ̀ a gɔ̃liŋɔɔ fé pâi ńyee seêi mu.

²² Núu da fé taa-tulɛ da kùla ḿâ a sâla nyii gɔ̃liŋɔɔi yɛ̂ɛ taa-tulɛ ŋɛ́i púɔɔ, ǹyée kpaa máŋ gɔ́ɔ ɣalɛ́ɛ kpaa máŋ pɔ́ɔ kɛ́ ƃò ma kpaa máŋ yá kɛ́ kùla m̀a, kpaa máŋ téeŋ kɔlɔ-fela, kpaa máŋ pala kpɔrɔŋ kɛ́ ƃò m̀a. Káfe mii-sɛŋ sala kùla ŋ̀âla-teƃelei ḿâ a taa-tulɛ sìi kɛ́ɛ tí.

²³ Ka pɔ̂ri gili kula sala-sɛŋ kulâi ḿâ a taa-tulɛ nyii maa kpôrɛɛi, kpaa máŋ gbono ŋá fé pɔ̂ri níi. Kɛ́lɛ káfe gɛ̀ a gono têei ŋ̀aa sèe kɛ́ sala-sɛŋ.

²⁴ Káfe sâla kùla Yâwɛɛ ma a fɛnɛ-sɛŋ sirɛ da nyii gbâŋ-kao wôloɔɔi, deɛɛ, m̀éla-ƃelaa, kpaa máŋ valaai. Maa fé wàa ní kálɔii mɛni ma.

²⁵ Káfe fɛnɛ-sɛŋ da kùla Káɣâlai ḿâ a sâla nyii ká gùla lɔii da kpɛni sui. Maa fɛnɛ-sɛŋ ḿaa fé waa ní. Mvé pâi ǹyée sèe m̀u.

²⁶ Nya ƃe Yâwɛɛ è ŋɔ́nɔ m̀o Moses ma ǹyɛɛi,

²⁷ Ka kɛ̀ pâi niŋa-loŋ kpaa ƃála-loŋ kpaa máŋ ƃoli-loŋ kulâi a kéreŋ sala Yâwɛɛ ma é lɛ́ɛ ǹee kpono ma é kɛ́ a fólo lɔ́ɔlu mɛi feerɛ. Ka gula a zâlai a vóloi mɛi saaƃa ɣelei. A kɛ̀ tí a pâi ǹyée seêi mu.

²⁸ Káfe niŋa-saa, ƃála-saa, kpaa máŋ ƃoli-saa da kùla a sâla da ǹóŋ a fólo tɔnɔ.

²⁹ Kà kɛ̀ sɛɣɛ̂-fee sala kulâi Yâwɛɛ ma ka gɛ̀ yɛ̂ɛ berei dɔ̂ŋ a m̀o lai. A pâi ǹyée seêi mu.

³⁰ Káfe da seêi kɛ̀ é lɛ́ɛ la zu ɣele é ƃɔ́.

³¹ Yâwɛɛ è m̀o dîa naa pôlu ma ǹyɛɛi, “Ka ŋátɔ̂ŋ-ŋai mɛi káa. Ńyãa ƃa Yâwɛɛ.

³² Káfe ńaa maa tĩ̂a kàra. Ka gɔ́lɔŋ a gɛɛ ŋ́gaa a maa wâa Ɣâla. Ńyãa ƃa Yâwɛɛ. Ńyãa ƃa kámaa wàa.

³³ Ŋá kákùla Ize lɔii su a gɛɛ ŋá kɛ́ a Káɣâla. Ńyãa ƃa Yâwɛɛ.”