Levetekɔ 21 - Bible

Zâla Láa soŋ-ƃelai Maa Waa mɛni

¹ Yâwɛɛ è mò Mose ma ǹyɛɛi, “M̀ó Eelɔŋ ǹônii nyii-ŋai díkaa a zâla láa soŋ-ƃelai dîa a gɛɛ dífe pêle kɛ̀ saa kûu su. Da gɛ̀ tí dífe pâi kɛ̂i a dímaa waa.

² Fɛ̂ɛ ǹúui saai a kɛ̀ a zâla láa soŋ-nuui kpîŋ ǹee, kpaa máŋ ǹâŋ, ǹóŋ nɛnî, kpaa ǹóŋ surɔ̂ŋ, ǹîa surɔ̂ŋ, kpaa máŋ ǹêɣe surɔ̂ŋ,

³ kpaa máŋ záaƃɔ̂lɔ nyii da ǹyaa díkaa pɛ́rɛ tɔnɔ mu surɔ̂ŋ fé ǹyêei. (A pɔ̂ri nyíŋi kɛ̂i nɔ́ zaaƃɔlɔ mɛni ma nyii pâi gɛ̂i maa fé pâi kɛ̂i a ŋ̀waai.)

⁴ À kɛ̀ a lì núu da saa kûu su nyii da ǹyaa díkaai nɔ́ nɛnî káa ŋɔpere su, m̀aa fé pâi kɛ̂i a ŋwaa.

⁵ Zâla láa soŋ nuui da fé ŋ̀uŋ gwaa da ma leɣa pu, ǹáa leɣa kpaa máŋ é pɔ́ɔ kɛ́ gɔlɔ gwaa da ma nyii pâi ǹɛ̂i a gɛɛ a malôŋ toɔɔ̂i ma ŋɔnúu da saa mɛni mai.

⁶ Fɛ̂ɛ zâla láa soŋ-ƃelai díkɛ a dímaa waa Díɣâlai ŋɛ́i, dífe ƃâa kùla ǹáa ma, kpɛ́ni fêi, dia ƃé da m̀ii-sɛŋ sala sãai kêreŋ Yâwɛɛ mɛni ma. M̀ɛni ma, fɛ̂ɛ dí kɛ́ a dímaa waa.

⁷ Dífe wulu-wulu kpɛ́ nɛnî kùla kpaa máŋ ǹɛnîi nyii surɔ̂ŋ mɛni kɔ́lɔŋ. Dífe tela ǹɛnîi kula nyii ŋɔsurɔ̂ŋ a ǹɛɛi, kpɛ́ni fêi, dímaa waai Díɣâlai ŋɛ́i.

⁸ Fɛ̂ɛ ká zâla láa soŋ-ƃelai síɣe a dímaa waa kpɛ́ni fêi, dia ƃé da m̀ii-sɛŋ salai kula sãai kêreŋ Yâwɛɛ mɛni ma. Ńyãai a Yâwɛɛ nyii kámaa waai, Ḿaa waai.

⁹ À kɛ̀ zâla láa soŋ-nuui da ǹóŋ nɛnî a gbîŋ kɛ̀ a wulu-wulu kpɛ̂ nɛnî, gɛ̀ ni a ƃâa kula ǹâŋ ma. Fɛ̂ɛ dí géreŋ a ŋɔŋ é sáa.

¹⁰ Zâla láa soŋ-nuui kɛ́tɛi nyii da wulɔ pú ŋ̀ûa, da m̀aa waa, da zâla láa soŋ seɣei tɛ́ɛ bɔ́i, é kɛ́ ŋ̀uŋ su kulâi, vé ŋɔseɣei fâla a gɛ́ɛ malôŋ sèe ƃôi ŋɔnúu da saa mɛ̂ni ma.

¹¹ Vé lɔ́ bɛ́rɛi mu nyii saa káa naai, a nɛ̃ɛ ma kpîŋ è kɛ́ a ǹâŋ kpaa máŋ ǹee. À gɛ̀ tí m̀aa fé pâi kɛ̂i a ŋ̀waa.

¹² Vé tela kula zua kɔlɔ seɣe pɛrɛ maa waai mu nyii pâi pâi a laa kâra Ɣâla ŋɔpɛ́rɛi mu, kpɛ́ni fêi, da wúlɔ pú ŋ̀ûa Ɣâla ŋɔtíi kɛ́ mɛni ma. Ńyãa ƃa Yâwɛɛ.

¹³ É nɛnî kúla nyii vé surɔ̂ŋ mɛni kɔ́lɔŋ.

¹⁴ Vé pɔ́ɔ nɛni kula kpaa máŋ ǹɛnîi nyii ŋɔsurɔ̂ŋ a ǹɛɛi, kpaa máŋ ǹɛnîi nyii maa fé waa nii, kpaa máŋ wulu-wulu kpɛ́ nɛnî. Kɛ́lɛ é nɛnî kula ŋɔnûai sáma nyii vé surɔ̂ŋ mɛni kɔ́lɔŋ,

¹⁵ a wàla kɛ́ tí ŋɔnîa-pɛlɛɛi nyii-ŋai maa nɛ̃ɛi dí kɛ́ a dímaa waai, dímaa fé pâi kɛ̂i a ŋ̀waa. Ńyãa ƃa Yâwɛɛ nyii m̀aa waai.”

¹⁶ Yâwɛɛ è mò Mose ǹyɛɛi,

¹⁷ “M̀ó Eelɔŋ ma a gɛɛ ǹóŋ nyii gɔ̃liŋɔɔi vé mii-sɛŋ sala kula Ɣâla ma. Dɔ̂ŋ ŋí káa ŋɔsuui kélee mɛni ma wɔlɔ-wɔlɔ da wɔlɔ-wɔlɔ.

¹⁸ Ǹúui nyii kélee gɔ̃liŋɔɔi vé pà ŋ̀âla-teƃelei kɔlɛ, a nɛ̃ɛ ma é kɛ́ a ŋɛi pu nuu, kpaa máŋ kɔɔ pu nuu, kpaa máŋ ŋowo da kôyaa é tɛ́ɛ m̀arâai dîa máŋ nuui nyii ŋowo da teɛɛi m̀ai,

¹⁹ kpaa máŋ nuui sɛŋ ŋánaa é gɛ̀ gɔ́ɔ kpaa máŋ ǹyée mai,

²⁰ kpaa máŋ kpîri-kpaŋ namu, kpaa máŋ kunu nuu, kpaa máŋ nuu nyii kɔlɔ fela káa ŋɛ́i, kpaa máŋ gbono mai, kpaa máŋ nuu nyii gbaŋ-kao fé zui.

²¹ Eelɔŋ nyii gáa a zâla láa soŋ-nuui ǹóŋ nyii gɔ̃liŋɔɔi vé pà a gɛɛ é Yâwɛɛ ŋɔmii-sɛŋ sala-sɛŋ kéreŋ.

²² A pɔ̂ri mii-sɛŋ sala-sɛŋ da mîi nyii maa waai Yâwɛɛ mɛni mai.

²³ Kɛ́lɛ vé pà zeɣe-ƃelai nyii sɛlɛnii kɔlɛ gwaa ma waai ŋɛ́i tuɛ kpaa máŋ ŋ̀âla-teƃelei kɔlɛ. À gɛ̀ tí gɛ̀ ní a ƃâa kula ŋá kwa ma waai ḿâ. Ńyãa ƃa Yâwɛɛ nyii dímaa waai.”

²⁴ Nya ƃe Mose è m̀ɛni-ŋai ŋí ƃò Eelɔŋ ma da ǹônii é pɛ́lɛ Eezuɛ-ŋai kélee dîa.