Levetekɔ 2 - Bible

Dɔ̂ŋ-ŋai bîlaŋɔɔi mii-sɛŋ sâla kuláa mai

¹ À kɛ̀ núu da à kɛ̀ pâi a mii-sɛŋ sama-sɛŋ Yâwɛɛ pɔ́, é kɛ́ a felaƃa fũa lɛ́lɛɛ. É ɔle-wulɔ pú ma da kéreŋ-sɛŋ kúŋ nɛ̃ɛ,

² é pá la Eelɔŋ ǹônii pɔ́ nyii-ŋai díkaa a zâla láa soŋ-ƃelai. Zâla láa soŋ-nuui é ǹyée láa fɛ́ɛ tɔnɔ kula zu da ɔle-wulɔi é pɛ́lɛ géreŋ-sɛŋ kúŋ nɛ̃ɛi kélee ma é géreŋ a zãai kélee pɔɔ ŋa tôo ŋ̀âla-teƃelei ŋá nyii géreŋ kúŋ lɛ̂lɛɛi Yâwɛɛ mɛni mai.

³ M̀ii-sɛŋ sama-sɛŋ nyii a lɛ̂ɛi, gáa a Eelɔŋ pɔ́ɔ da ǹônii sinaai. Gáa a sama-sɛŋ maa wáa Yâwɛɛ mɛni ma kpɛ́ni fêi, gáa a zama-sɛŋ dí dɛ̀ɛ Yâwɛɛ pɔ́i da.

⁴ À kɛ̀ ísama-sɛŋ káa a mii-sɛŋ nyii í gbɛ̀tɛ a kpóloi, é kɛ́ a kpólo nyii tɛ́-sɛŋ fé zui zumoɔɔ a ɔle-wulɔ kpaa máŋ kpólo ƃêla fɛ̀ŋ-fɛŋ nyii tɛ́-sɛŋ fé zui ɔle-wulɔ siáa ma.

⁵ À kɛ̀ mii-sɛŋ sama-sɛŋ káa a kpólo nyii í gbɛ̀tɛ kpólo kpɛtɛ pâne sui, é kɛ́ a gbóloi nyii í gbɛ̀tɛ a ǹɛ́lɛɛ zumoɔɔ a ɔle-wulɔ nyii tɛ́-sɛŋ fé zui.

⁶ Zu ɣále a gbua-kpûa í ɔle-wulɔ pú mà. Gáa a mii-sɛŋ sama-sɛŋ.

⁷ Ǹyaŋ à kɛ̀ ísama-sɛŋ káa a mii-sɛŋ sama-sɛŋ nyii í gbɛ̀tɛ pânei, é kɛ́ a kpólo nyii í gbɛ̀tɛ a felaƃa fũa lɛ́lɛɛ ɔle-wulɔ kɛ́ ƃò ma.

⁸ Ya pá a m̀ii-sɛŋ sama-sɛŋ Yâwɛɛ pɔ́, dɛ́ɛ zâla láa soŋ-nuui pɔ́ é lí la ŋ̀âla-teƃelei ma.

⁹ Ǹyaŋ zâla láa soŋ-nuui a pâi zama-sɛŋ ŋí da kulâi ma é gɛ́ a zãai ŋí kélee pɔ́ɔ ŋa tôoi é géreŋ ŋ̀âla-teƃelei ŋá, nyii géreŋ kuŋ lɛ̂lɛɛi Yâwɛɛ mɛni mai.

¹⁰ Mii-sɛŋ sama-sɛŋ nyii a lɛ̂ɛi, gáa a Eelɔŋ pɔ́ɔ da ǹônii sinaai. Gáa a sama-sɛŋ maa wáa Yâwɛɛ mɛni ma kpɛ́ni fêi, gáa a zama-sɛŋ dí dɛ̀ɛ bɔ́i da.

¹¹ Mii-sɛŋ sama-sɛŋ ya pâ la Yâwɛɛ pɔ́i, tɛ́-sɛŋ fé kɛ̀ zu. Ífe kéreŋ mii-sɛŋ sama-sɛŋ tɛ̀ɛ Yâwɛɛ pɔ́ nyii tɛ́-sɛŋ káa zui, kpaa máŋ kɔ̃́iŋ wûlɔ.

¹² Ísi-sãai m̀á maa-ŋuŋ nyii ya pâ la Yâwɛɛ pɔ́ a sama-sɛŋ, ya pɔ̂ri kɔ̃́iŋ-wûlɔ da tɛ́-sɛŋ pɛlɛ̂i ma kɛ́lɛ ífe gèreŋ ŋ̀âla-teƃelei ŋá a kéreŋ-sɛŋ kúŋ nɛ̃ɛ Yâwɛɛ mɛni ma.

¹³ Kpolo lîyeŋ pú m̀ii-sɛŋ sama-sãai kélee dîa. Ífe nɛ̀ɛ naa kpolo lîyeŋ nyii gáa a gbanaŋ-wooi ŋɔŋɛi kɛ́-maa ka Yâwɛɛ káloai, é kpɛ́ɛ ímii-sɛŋ sama-sãai dîa. Ímii-sɛŋ sama-sãai kélee kpɛtɛ a kpolo lîyeŋ.

¹⁴ Ƃa kɛ̀ pâi a m̀ii-sɛŋ maa-ŋuŋ a mii-sɛŋ sama-sɛŋ Yâwɛɛ pɔ́, é kɛ́ a mii-sɛŋ ŋɔŋɔ́ɔ.

¹⁵ Ɔle-wulɔ pú ma da kéreŋ sɛŋ kúŋ nɛ̃ɛ. Gáa a mii-sɛŋ sama-sɛŋ.

¹⁶ Zâla láa soŋ-nuui é zama-sɛŋ ŋí géreŋ ŋ̀ɔi kúla zu nyii gáa a zãâi kélee pɔ́ɔ ŋá tôoi é pɛ́lɛ géreŋ sɛŋ kúŋ nɛ̃ɛi kélee ma é díkereŋ. Gáa a kéreŋ sama-sɛŋ Yâwɛɛ mɛni ma.