Levetekɔ 19 - Bible

Dɔ̂ŋ-ŋai bîlaŋɔɔi maa waa-laa da tɔ̃ya-laa mai

¹ Ǹyaŋ Yâwɛɛ è mò Mose ma ǹyɛɛi,

² “M̀ó Eezuɛ-ŋai dîa a gɛɛ dí kɛ́ a dímaa waa yɛ̂ɛ berei ǹyãai a Díɣâlai Yâwɛɛ ḿaa waâi lai.

³ Fɛ̂ɛ kákelee ká ƃaa kɛ́ maa tɛ́ɛ kánâŋ-ni da kálee-ni pɔ, ka ŋáfii-tɔɔ ɣelei maa tɔ̂ŋ-ŋai mɛi káa. Ńyãa ƃa Yâwɛɛ, Káɣalai.

⁴ “Káfe kápôlu tɔ̀ɔ ḿâ ká tínaŋ Ɣâla da kpɛ́ni ŋa pɔ́ naa. Káfe Ɣâla da kpɛ́ni-ŋa kpɛ̀tɛ kákpîŋ mɛni ma. Ńyãa ƃa Yâwɛɛ, Káɣâlai.

⁵ “Ka kɛ̀ pâi lii-see sala kulâi, ka ŋátɔ̂ŋ-ŋai mɛi káa a gɛɛ ŋá ńyee see kásâla-sɛŋ mu.

⁶ Fɛ̂ɛ ka ǹyii-see salai maa suai mii a zâlai kula ɣele kpaa máŋ bôlu ma ɣelei. Da a lɛ̀ɛ vóloi zaaƃa ɣelei a seri, ka géreŋ.

⁷ Ka da miî a vóloi zaaƃa ɣelei, gɛ̀ ní m̀aa fé waa ní, ǹyaŋ fé pâi ńyee seêi maa sâla-sɛŋ tí mu.

⁸ Ǹúui kélee a da miî gɛ̀ ní maa nuui a sɔnyɔ̂ŋ kɛ́, kpɛ́ni fêi, zɛŋ maa waai Yâwɛɛ mɛni mai a gáa nɔ́ kpɛ́ni-kpɛni, ǹyaŋ maa nuui fé ŋɔ́nɔ pâi kɛ̂i a ŋɔnûai da.

⁹ “Káfe kámɔlɔŋ tèe ka seri la nɔɔ lâai ma. Káfe tela m̀ɔlɔŋ zêre tèe.

¹⁰ Káfe kási sãai m̀á kélee kùla ŋ̀á. Káfe tela nyii-ŋai da tooi ɣɛ̀ɛ. Ka dílɛɛ naa gôlo-ƃelai mɛni ma da ŋ̀ɔ̃ya-ŋai. Ńyãa ƃa Yâwɛɛ, Káɣâlai.

¹¹ “Káfe ŋuma, fili kpaa máŋ lɛ́ɛ kɛ̀ kákîe-ni dîa.

¹² Káfe káfoo a ńaa a lɛ́ɛ a gɛɛ ká ƃâa kula mâ. Ńyãa ƃa Yâwɛɛ.

¹³ “Káfe káƃarâŋ nuu ŋuŋ mɛi tée tûa kɛ̀ la, kpaa máŋ ká vili. Kátii kɛ́-ƃelai dífela-fei fé nyîi kâa.

¹⁴ Káfe woli-tiniŋ nuu làraŋ, kpaa máŋ ká sɛŋ da láa ŋɛi-pu nuu perêi a gɛɛ é karêŋ la é tóo. Kɛ́lɛ ka yao ḿâ. Ńyãa ƃa Yâwɛɛ.

¹⁵ “Káfe mɛni-saa ƃò a wôya pêre. Káfe tɔɔ golo nuui pôlui kpaa máŋ ká yao dɔɔ nuui ḿâ, kɛ́lɛ ka dímɛnii ŋá tée a tɔ̃ya pere.

¹⁶ Káfe lɛ́ɛ tuŋ taa-taa é pîlaŋ káƃarâŋ nuu ma. Káfe wôya sere faa kɛ̀ a káƃarâŋ nuu láa nyii pâi gɛ̂i ǹɛwo su é karai. Ńyãa ƃa Yâwɛɛ.

¹⁷ “Kpɔara fé kɛ̀ kálii su káƃarâŋ nuui mɛni ma, kɛ́lɛ ka káloai kpɛtɛ ka dîa-ni a gɛɛ ŋɔsɔnyɔ̂ŋ mɛni da fé lɛ̀ɛ kâa.

¹⁸ Káfe mɛni kpâ kùla, kpaa máŋ mɛni nyɔ́mɔɔ é kɛ́ kálii su káƃarâŋ nuu mɛni ma, kɛ́lɛ ka kákɔlɛ ma ǹúui wɛ́li yɛ̂ɛ káa kpîŋ. Ńyãa ƃa Yâwɛɛ.

¹⁹ “Ka ŋátɔ̂ŋ-ŋai mɛi káa. Káfe ǹɛ̂ɛ naa kátaa-tulɛ-ŋai zîi feerɛ dí tɛ́. Káfe sí-sɛŋ sii feerɛ sí kakpalâŋ tɔnɔ ŋá. Káfe seɣe tòo kâa nyii gbɛtɛɛi a yee sîi feerɛi.

²⁰ “À kɛ̀ luɛ nɛnî da a kɛ̀ núu da yêei a ǹyée a ŋɔnɛnî nyii vé niî maa sɛŋ kɔlɛ ní kpaa máŋ é ŋuŋ maa ƃô tɛɛ bɔ́, surɔ̂ŋ da kpɛ́ni a lɔ-pɔloŋ kɛ̀ a nuɛ nɛnii ŋí, nuɛ nɛnii da zurɔ̂ŋ nyii lɔ-pɔlɔŋ kɛ̀ lai da pâi tɔ̀ŋ kpɛ́ maa sɔlɔ ƃôi. Dífe pâi dípaâi, kpɛ́ni fêi ǹuɛ nɛnii fé niî ŋuŋ maa ƃô sɔlɔ ƃó ní.

²¹ Zurɔ̂ŋ ɣelei a pâi pâi a ƃára-sirɛ Yâwɛɛ ŋɔpɛ́rɛi lá sɔnyɔ̂ŋ sala kula mani ma.

²² Ǹyaŋ zâla-laa soŋ nuui a pâi sâla kulâi a m̀ála sirɛi ŋí zurɔ̂ŋ ŋɔsɔnyɔ̂ŋ su mɛni lɛɛ mani ma nyii è gɛ̀ a Yâwɛɛi. Ǹyaŋ ŋɔsɔnyɔ̂ŋ su mɛni a pâi lɛɛ̂i.

²³ “Ka pà Keena lɔii ma ká sí-sɛŋ sii támaa sí naa káfe m̀á da miî kóraŋ saaƃa yée mu. Díƃa maa fé pâi kɛ̂i a ŋ̀waa kóraŋ saaƃai yée mu.

²⁴ Górâŋ ǹáa ɣelei su ka pá a zí-sãai m̀á kélee ḿbɔ a sɛɣɛ fêi sama-sãa, Ńyãa Yâwɛɛ ḿaa mɛ̂ni ma.

²⁵ Góraŋ ǹɔ́ɔlu ɣelei su, ka kási-sãai m̀á mii. À kɛ̀ ka gɛ̀ tí, kási-sãai da pâi ƃâi a dámaa. Ńyãa ƃa Yâwɛɛ, Káɣâlai.

²⁶ “Káfe fɛnɛ-sɛŋ da miî nyii ŋ̀ãa káa zui. Káfe póniŋ kɛ́ mɛni kélee da maa kɔ́ri kpaa máŋ wúlu kɛ́ pere.

²⁷ Káfe kánɛɣɛ̂ŋ-mu-leɣa kpaa máŋ kála leɣa pù.

²⁸ Káfe kákɔlɔ da tèe ma nyii pâi ǹɛ̂i a gɛɛ kánuu da a saa kpaa máŋ ka ŋɔ̃yâŋ saa kâa. Ńyãa ƃa Yâwɛɛ.

²⁹ “Káfe ƃâa kùla káloŋ nɛyãai dîa a dítɛɛ a gɛɛ dí kɛ́ a wulu-wulu kɛ́ nɛyaa ǹûai díɣâla fɛli kwaa-ŋai ma. Ka gɛ̀ tí, ka pâi tínanii Ɣâla da kpɛ́ni-ŋa pɔ́ naa pere, ǹyaŋ ǹɔii láa a pâi fɛɛ̂i a sɔnyɔ̂ŋ.

³⁰ Ka Vii tɔɔ ɣelei maa tɔ̂ŋ-ŋai mɛi káa, ƃaa-kɛ-maa kɛ́ ƃo káyêei gwaai ma mɛni ma ka ḿvɛli naai. Ńyãa ƃa Yâwɛɛ.

³¹ “Káfe li tɛli kpɛ́-ƃela pɔ́ naa kpaa máŋ diai diɛ da lòno saa-ƃela pɔ́i. Ka gɛ̀ tí kámaa fé pâi kɛ̂i a ŋ̀waa ŋ́ɛi-tuɛ. Ńyãa ƃa Káɣâlai, Yâwɛɛ.

³² “Ka ƃaa kɛ-maa tɛ́ɛ kánuu pɔlɔ-ŋai pɔ́, ka yao mâ, Ńyãa ƃa Yâwɛɛ.

³³ “Káfe tûa nyɔ́mɔɔ kɛ̀ a ŋ̀ɔ̃ya-ŋai díkaa kásama kálɔii sui.

³⁴ Ka ŋ̀ɔ̃ya-ŋai síɣe a káta, ká díwɛli yɛ̂ɛ káa kpîŋ, kpani fêi, káa máŋ ka kɛ̀ a ŋɔ̃ya-ŋa Ize lɔii su. Ńyãa ƃa Káɣâlai, Yâwɛɛ.

³⁵ “Káfe wôya kɛ̀ mɛni saa ƃóɔɔ kpaa máŋ pɔni tɔɔ̂ su.

³⁶ Káfe wôya kɛ̀ a kápɔni sãai kɔɔ̂ŋ kɔli-ŋai, ka kápɔni sãai kɔɔ̂ŋ a teniŋ ƃô pere. Ńyãai ƃa Káɣâlai, Yâwɛɛ nyii kákùla Ize lɔii sui.

³⁷ Ka ŋátɔ̂ŋ-ŋai kélee mɛi káa, ká mɛni-ŋai kélee kɛ́ ŋa mò kaai. Ńyãa ƃa Káɣâlai, Yâwɛɛ.”