Levetekɔ 18 - Bible

Lɔ-pɔrɔŋ pere sîi nyɔ́mɔɔ su

¹ Yâwɛɛ è mò Mose ma nyɛ̂ɛi

² “M̀ó Eezuɛ-ŋai dîa yɛ̂ɛi, ńyãa ƃa Yâwɛɛ, Káɣâlai.

³ Káfe tùa yɛ̂ɛ Ize-ƃelai nyii ŋai ka kɛ̀ dílɔii sui. Káfe tùa yɛ̂ɛ Keena-ƃelai nyii-ŋai ŋa pâi a káa dílɔii sui. Káfe pîlaŋ díkɔɔ pɔɔi.

⁴ Ka ŋátɔ̂ŋ-ŋai mɛi káa ká mɛni-ŋai kɛ́ ŋa môi kâai. Ńyãa ƃa Yâwɛɛ, Káɣâlai.

⁵ Maa mɛni ma ka ŋátɔ̂ŋ-ŋai mai kâa ká mɛni-ŋai kɛ́ ŋa môi kâai. Ka pâi káfulu-laai maa kɔ̃ɔi a m̀ɛni-ŋai ŋí kɛ́ɛ. Ńyãa ƃa Yâwɛɛ.”

⁶ “Káta kélee fé lɔ-pɔ̂rɔŋ kɛ̀ a gáa-yɔɔ. Ńyãa ƃa Yâwɛɛ.

⁷ Ífe ƃâa kùla ínâŋ ma a í kɛ́ɛ í lɔ-pɔ̂rɔŋ kɛ́ a ílee. Gáa a íkpîŋ lee, ífe ƃâa kùla m̀a.

⁸ Ífe lɔ-pɔ̂rɔŋ kɛ̀ a ínâŋ ŋɔnɛyâai da. Gáa a ƃaa kula maa ínâŋ mɛni ma.

⁹ Ífe lɔ-pɔ̂rɔŋ kɛ̀ a ísaaƃɔlɔ, a nɛ̃ɛ ma kpîŋ é kɛ́ a ínâŋ ǹóŋ nɛnî nyii ka ǹyaa kálee fé tɔnɔ kpaa máŋ ílee ǹóŋ nɛnî nyii ka ǹyaa kánâŋ fé tɔnɔ̀ɔi, a nɛ̃ɛ ma kpîŋ ka ǹyaa dí ká maa sɔlɔ ƃò kwaa tɔnɔ ma kpaa máŋ dí m̀aa sɔlɔ ƃó kwaa da kpɛ́ni ma.

¹⁰ Ífe lɔ-pɔ̂rɔŋ kɛ̀ a íloŋ ǹóŋ nɛnî. Gáa a ƃaa kula maa íkpîŋ mɛni ma.

¹¹ Ífe lɔ-pɔ̂rɔŋ a ínâŋ ŋɔgàa ǹyêei loŋ nɛnî. Ǹyaa máŋ gáa a ísaaƃɔlɔ.

¹² Ífe lɔ-pɔ̂rɔŋ kɛ̀ a ínâŋ záaƃɔ̂lɔ. Gáa a ínâŋ ŋɔ̀kaa-yɔɔ.

¹³ Ífe lɔ-pɔ̂rɔŋ kɛ̀ a ílee ǹeɣe kpaa ǹîa nɛnî. Ǹyaa máŋ gáa a ílee ŋɔkáa-yɔɔ.

¹⁴ Ífe lɔ-pɔ̂rɔŋ kɛ̀ a ínâŋ leɣe kpaa ǹîa surɔ̂ŋ ŋɔnɛnî. Gáa a ílee.

¹⁵ Ífe lɔ-pɔ̂rɔŋ kɛ̀ a íloŋ ŋɔnɛnî.

¹⁶ Ífe lɔ-pɔ̂rɔŋ kɛ̀ a ílêɣe kpaa máŋ ílîa ŋɔnɛnî.

¹⁷ Ífe lɔ-pɔ̂rɔŋ kɛ̀ a nɛnî da ǹóŋ nɛnî. Ífe tela lɔ-pɔ̂rɔŋ kɛ̀ a maa nɛnii ǹóŋ loŋ nɛnî. Gáa a tua pere nyɔ̂ŋ.

¹⁸ Ífe í nɛnîi lêɣe kùla a nɛnî tãi nɔ́ ínɛnîi káa niî la ɣele mai.

¹⁹ Ífe lɔ-pɔ̂rɔŋ kɛ̀ a nɛnî tãi ǹyée a kɛ́ la ɣelêi. Maa nɛnii maa fé waa ní.

²⁰ Ífe lɔ-pɔ̂rɔŋ kɛ̀ a surɔ̂ŋ da kpɛ́ni ŋɔnɛnî. A pâi gɛ̂i ímaa fa kɛ̀ a ŋ̀waa.

²¹ Káfe kâlonii da kùla a kéreŋ sâla káɣâlai Molɛ ma a gɛɛ ka ƃâa kula Káɣâlai Yâwɛɛ ma.

²² Núu da fé lɔ-pɔ̂rɔŋ kɛ̀ a m̀arâŋ surɔ̂ŋ yɛ̂ɛ a kɛ̀ lɔ-pɔ̂rɔŋ kɛ̂i a nɛnî. Ɣâla fé mɛni kɛ́ɛ ŋí wɛli ní.

²³ Surɔ̂ŋ kpaa máŋ nɛnî da fé lɔ-pɔ̂rɔŋ kɛ̀ a lɔɔ fɛnɛ-sɛŋ da. Gáa a tùa pere nyɔ̂ŋ nyii a gɛ̀ ímaa fa kɛ̀ a ŋ̀wáai.

²⁴ “Kámaa fé pâi kɛ̂i a ŋ̀waa à kɛ̀ ka mɛni-ŋai ŋí da kɛ̀. Ǹɔii-ŋai ŋa zu-ƃela kpɛ̂i ká-ŋɛi tuɛi, bere ƃé dí kɛ̀ tûai la nyii gɛ̀ dímaa fé waa nii.

²⁵ Dítûa pere è gɛ̀ ǹɔii maa fé kɛ́ ní a ŋ̀waa. Mɛni ma Yâwɛɛ a díkula maa kɛ̂i é gɛ́ ǹɔii é bôlu tɔɔ dîa.

²⁶ Fɛ̂ɛ ka ŋátɔ̂ŋ-ŋai mɛi káa ka ńdûa pere maa kɔ́ri. Káfe m̀ɛni nyɔ́mɔɔ-ŋai ŋí da kɛ̀ káai a Eezuɛ-ŋai kpaa máŋ ŋ̀ɔ̃ya-ŋai díkaa kásamai.

²⁷ M̀ɛni-ŋai ŋí ƃe ǹûai kɛ̀ ǹɔii mai dí kɛ̀ gɛ̂i ǹyaa ƃe gɛ̀ ǹɔii maa fé kɛ́ ní a ŋ̀waa.

²⁸ À kɛ̀ ka da kɛ̀, ǹɔii a pâi ƃôlu fêi káa yɛ̂ɛ berei è gɛ̀ la a ǹûai kɛ̀ naa kátuɛi.

²⁹ Kpɛ́ni fêi, ǹúui kélee a m̀ɛni-ŋai ŋí da kɛ̀i vé pâi ŋɔ́nɔ kɛ̂i a ŋánûai da.

³⁰ “Mɛni ma ka ŋátɔ̂ŋ-ŋai mɛi káa ká ńdûa pere-ŋai maa kɔ́ri káfe mɛni-ŋai ŋí da kɛ̀ a gɛɛ kámaa é kɛ́ a ŋ̀waa. Ńyãa ƃa Yâwɛɛ, Káɣâlai.”