Levetekɔ 17 - Bible

Dɔ̂ŋ bîlaŋɔɔi taa-tulɛ paa mɛni mai

¹ Yâwɛɛ è mò Mose ma ǹyɛɛi,

² “M̀ó zâla láa soŋ-ƃelai dîa da Eezuɛ-ŋai kélee, m̀ɛni-ŋai ká ŋí Yâwɛɛ à m̀oi.

³ A kɛ̀ Eezuɛ nuu da kélee a niŋa, kpaa máŋ ƃála, kpaa máŋ ƃoli pâa m̀ûui su kpaa máŋ kwaa da kpɛ́ni ma,

⁴ ǹyaŋ vé pá ní la Yâwɛɛ ŋɔpɛ́rɛi lá a gɛɛ é dɛ́ɛ a sama-sɛŋ Yâwɛɛ pɔ́, gɛ̀ ní maa nuui a ŋãa pú ǹɔii ma. Da pâi maa nuui kulâi ŋɔnûai sáma.

⁵ Nyíŋi su kulâi ƃa zâla kula taa-tulɛ ŋai kélee Eezuɛ-ŋai da kâa bàa kwaa da kpɛ́ni-ŋa mai, fɛ̂ɛ dí pá la zâla láa soŋ puui pɔ́ Yâwɛɛ ŋɔpɛ́rɛi lá a gɛɛ dí gùla a sâla Yâwɛɛ mɛni ma.

⁶ Ǹyaŋ zâla láa soŋ nuui a pâi daa-tulɛi ŋãa kpɛmɛnii ŋ̀âla-teƃelei ma nyii gáa Yâwɛɛ ŋɔpɛ́rɛi lái é ŋ̀úlɔ kéreŋ nyii géreŋ kùŋ lɛ̂lɛɛi Yâwɛɛ mɛni mai.

⁷ Eezuɛ-ŋai dífe kɛ̀ a sɔnyɔ̂ŋ-ƃela dí kɛ́ sâla kùla daa-tûlɛ-ŋai paa ƃoli nyinaŋ ma, díkɛ díwɛli-kɛ-mai lɛ̀ ma. Dɔ̂ŋ ŋí káa dísuui mɛni ma wɔlɔ-wɔlɔ da wɔlɔ-wɔlɔ.

⁸ “Ǹyaŋ m̀ó dîa a gɛɛ Eezuɛ nuu da kélee kpaa máŋ ŋ̀ɔ̃ya-ŋai kélee dísamai nyii pâi kéreŋ sama-sɛŋ kpaa máŋ sâla kulâi,

⁹ vé pá ní a maa sâla kula taa-tulɛi Yâwɛɛ ŋɔpɛ́rɛi lá é gúla Yâwɛɛ ma a sâla, fɛ̂ɛ dí maa nuui kúla ŋɔnûai sáma.

¹⁰ “À kɛ̀ Eezuɛ nuui da kélee kpaa máŋ ŋɔ̃ya nyii gáa kásamai a sua mii nyii ŋ̀ãa káa zui, ńyãa Yâwɛɛ ŋa pâi ńyãa fêi maa nuui mî, ǹyaŋ maa nuui fé ŋɔ́nɔ pâi kɛ̂i a ŋá-nûai da.

¹¹ Fúlu-sɛŋ kélee ŋɔfúlu-laai káa ŋ̀ãa su. Maa mɛni ƃé ŋa dɛ̀ɛ la kápɔ a gɛɛ ká sâla kula la ŋ̀âla-teƃelei ma kásɔnyɔ̂ŋ su mɛni lɛ̂ɛ mɛ̂ni ma. Ŋãa nyii gáa a fúlu-laai a sɔnyɔ̂ŋ siɣe.

¹² Maa mɛni ƃé ŋá mò la Eezuɛ-ŋai dîa da ŋ̀ɔ̃ya-ŋai dísamai a gɛɛ díta fé sua mii nyii ŋ̀ãa káa zui.

¹³ “Eezuɛ nuu da kélee kpaa ŋ̀ɔ̃ya-ŋai dísamai da a sua kpaa máŋ ŋɔni pàa nyii maa waâi fɛ̂ɛ é ŋ̀ãa kúla zu é bú ǹɔii ma é mɛi pɛ́lɛ a pɔ̂rɔ.

¹⁴ Kpɛ́ni fêi fúlu-sɛŋ kélee ŋɔfúlu-laai káa ŋ̀ãa su. Mɛni ma ŋá m̀ó Eezuɛ-ŋai dîa a gɛ́ɛ díta fé sua miî nyii ŋ̀ãa káa zui. Díta a sua miî nyii ŋ̀ãa káa zui maa nuui fé ŋɔ́nɔ pâi kɛ̂i a ŋánûai da.

¹⁵ “Núu da kélee a sua da miî nyii sàa gbɔɔ̂i yêe ma kpaa máŋ fɛnɛ-sɛŋ nyii núu da é báai, é máŋ kɛ́ a Eezuɛ nuui da kpaa máŋ ŋ̀ɔ̃ya nyii gáa dísamai, fɛ̂ɛ maa nuui é ŋɔseɣei wáa é gbîŋ waa, ǹyaŋ vé pâi kɛ̂i a m̀aa waa é lɛ́ɛ la zu ɣele-wulii é kɛ́. Gɛ̀ ní a pâi nâa kɛ́i a m̀aa waa.

¹⁶ À wàla ŋɔseɣei wáa é gbîŋ waa a pâi tɔŋ kpɛ́ maa sɔlɔ ƃôi.”