Levetekɔ 14 - Bible

Kpono ma kɔlɔ-fela nuu ƃáloɔɔ maa waa mɛni

¹ Yâwɛɛ è mò Mose ma ǹyɛɛi,

² “Dɔ̂ŋ-ŋai ká ŋí pîlaŋɔɔi kpono-mâ kɔlɔ-fela nuu ma nyii a ƃâloi. Vóloi da kɛ̀ pâi môi la a gɛɛ maa waai da pâi pâi a maa nuui zâla láa soŋ nuui pɔ́.

³ Zâla láa soŋ nuui a pâi maa nuui kulâi m̀ûui su é lí la é maa kpɛɛ. À gɔlɔ-felai a ƃálo.

⁴ Zâla láa soŋ nuui a pâi môi dîa a gɛɛ dí pa a ŋɔni fulu lɛ́lɛɛ feerɛ, sîda wuru-kpua, seɣe kpɔ̂lu mu tɛɣiɛɛ da kpalo.

⁵ Zâla láa soŋ nuui a pâi môi a gɛɛ dí ŋɔnii dɔnɔ paa pɔ̂rɔ leɣi mɛi nyii dí ɣilîŋ ya nina kɔɔ dí bú zui.

⁶ Zâla láa soŋ nuui a pâi ŋ̀ɔnii kpeli siɣêi, sîda wuru-kpuai, zeɣe kpɔ̂lu mu tɛɣiɛɛi da gbaloi é dílɔ ŋ̀ɔnii è baai ŋãa su.

⁷ Zâla láa soŋ nuui a pâi ŋɔni ŋãai kpɛmɛ̂nii nuui ma gɔlɔ-felai è kɛ̀ mai gîei lɔ́ɔlu mɛi feerɛ, é m̀ó a gɛɛ maa nuui maa waai. Gɛ̀ ni a pâi ƃôi ŋ̀ɔni fului ma é koôŋ.

⁸ Ǹyaŋ nuui gɔlɔ-felai è kɛ̀ mai a pâi ŋɔseɣe-ŋai waâi, é gɔlɔ leɣa kélee pú è gbîŋ waa. Naa pôlu ma a pâi pâi pôlu m̀ûui su, kɛ́lɛ vé pâi lɔ̂i gbîŋ pɛrɛi mu é lɛ́ɛ la zu fólo lɔ́ɔlu mɛi feerɛ é tɛ́ɛ.

⁹ Vóloi ǹɔ́ɔlu mɛi feerɛ ɣelei a pâi ŋ̀uŋ leɣa pûi, ǹá lɛɣa da ŋ̀ɛ́i leɣa, é gɔseɣe-ŋai wáa é téla gbîŋ waa. Gɛ̀ ní a pâi kɛ̂i a m̀aa waa.

¹⁰ “Voloi ǹɔ́ɔlu mɛi saaƃa ɣelei a pâi pâi a kóraŋ tɔnɔ ƃala sirɛ feerɛ da kóraŋ tɔnɔ ƃala saa tɔnɔ nyii-ŋai pɔ́ɔ fé diai, lɛ̀ɣɛ pãŋ lɔ́ɔlu sumoɔɔ a ɔle-wúlɔ da ɔle-wúlɔ kɔ̂pu gborâ.

¹¹ Zâla láa soŋ nuui a pâi liî a maa nuui da ŋɔsama-sãai Yâwɛɛ ŋɔpɛ́rɛi láƃelei.

¹² Gɛ̀ ní a pâi m̀ála sirɛ loŋ dɔnɔ siɣêi da ŋ̀úlɔ kɔ̂pu gborâi é dɛɛ a ŋɔsɔnyɔ̂ŋ maa sâla-sɛŋ. A pâi dítɛɛ̂i Yâwɛɛ pɔ́ a zâla sãai gbîŋ-kpîŋ zâla láa soŋ nuui mɛni ma.

¹³ A pâi m̀álai paâi ƃɛ́i a zɔnyɔ̂ŋ sala taa-tulɛi da géreŋ salai maa-taa-tulɛi ŋai pàa naa. A pâi gɛi tí kpɛ́ni fêi, zɛŋ pɔɔ tôo sâla-sɛŋ nyii ga yɛ̂ɛ sɔnyɔ̂ŋ sala-sɛŋ káa a zâla láa soŋ nuui pɔ́ɔ. Ǹyaŋ maa waâi a ŋánaa.

¹⁴ Zâla láa soŋ nuui a pâi daa-tulɛ ŋãai da siɣei é zia ǹúui da maa waai, láa mii yee mɛi wôli kpɛrɛi ma, é da sia naa mii yee gbua kɛ́tɛi kponoi ma da ǹáa mii yee kɔɔ gbua zɛ-kponoi.

¹⁵ Gɛ̀ ní zâla láa soŋ nuui a pâi ŋ̀úlɔi da siɣêi é bú gɔ́ɔ yee ŋá,

¹⁶ é ǹáa mii yee gbuai pîlaŋ ŋ̀úlɔi su nyii gáa gɔ́ɔ yee ŋái, é gbɛ́mɛŋ gîei lɔ́ɔlu mɛi feerɛ Yâwɛɛ ŋɛ́i-tuɛ.

¹⁷ Zâla láa soŋ nuui a pâi ǹyée gbua pîlanii ŋ̀úlɔi su é zia nuui da pâi maa waai ǹáa mii yee mɛi wôli kpɛrɛi ḿâ, é da sia ǹáa mii yee gbua kɛ́tɛi kponoi ma, é da sia ǹáa mii yee kɔɔ gbua zɛ-kponoi ḿâ ŋãai mɛi nyii è zìa gbono ḿâ zɔnyɔ̂ŋ salai mɛ̂ni mai.

¹⁸ Zâla-láa soŋ nuui a ŋ̀úlɔi nyii lɛ̀ɛ ǹyée ŋái pú nuui da maa waai ŋûa. Bere sîi ŋí ƃe zâla láa soŋ nuui a pâi nuui maa sâla kulâi lai la m̀aa waa mɛni ma Yâwɛɛ ŋɛ́i-tuɛ.

¹⁹ “Zâla láa soŋ nuui a pâi zɔnyɔ̂ŋ salai kulâi nuui ŋɔsɔnyɔ̂ŋ su mɛni lɛɛ mɛni mai. Naa pôlu ma a pâi géreŋ salai kula taa-tulɛi paai.

²⁰ Ǹyaŋ zâla láa soŋ nuui a pâi géreŋ salai da m̀ii-sɛŋ salai kulâi ŋâla-teleƃei ma. Berei sîi ŋí su zâla láa soŋ nuui a pâi ǹúui ŋɔsɔnyɔ̂ŋ maa sala kulâi ǹyaŋ ŋɔsɔnyɔ̂ŋ su mɛni a pâi lɛɛ̂i.

²¹ “Kɛ́lɛ à kɛ̀ maa nuui kôloɔɔi, va pɔ̂ri zâla sãai ŋí kélee sɔlɔ ƃôi, é pá nɔ́ a ƃála sirɛ tɔnɔ a ŋɔsɔnyɔ̂ŋ maa sála-sɛŋ nyii gáa a ŋɔsâla-sɛŋ gbîŋ-kpîŋ Yâwɛɛ pɔ́ zâla láa soŋ nuui mɛni ma. É pá a felaƃa pãŋ feerɛ m̀ii-sɛŋ salai kula mɛni ma da ɔle-wúlɔ sane kpura.

²² É pá máŋ a toloŋ feerɛ kpaa máŋ popôo feerɛ. Dɔnɔ kɛ̀ ƃò ŋɔsɔnyɔ̂ŋ salai kula mɛni ma, gbelii kɛ́ ƃo géreŋ salai kula mɛni ma.

²³ Vóli ǹɔ́ɔlu mɛi saaƃa ɣelei, é pá a zãai ŋí zâla láa soŋ nuui pɔ́ Yâwɛɛ ŋɔpɛ́rɛi láƃelei.

²⁴ Zâla láa soŋ nuui a pâi m̀álai da ŋ̀úlɔi siɣêi é dɛ́ɛ Yâwɛɛ pɔ́ a ǹúui ŋɔsama-sɛŋ gbîŋ-kpîŋ zâla láa soŋ nuui mɛni ma.

²⁵ Zâla láa soŋ nuui a pâi daa-tulɛ ŋãai da siɣêi é zia nuui da maa waâi, láa mii yee mɛi wôli kpɛrɛi ḿâ, é da sia ǹáa mii yee gbua kɛ́tɛi kpono ḿâ da ǹáa mii yee kɔɔ gbua zɛ-kponoi.

²⁶ Zâla láa soŋ nuui a pâi ŋ̀úlɔi da pûi ǹyaa kpîŋ gɔ́ɔ yee ŋá.

²⁷ A pâi daa-tulɛi ŋãa da kpɛmɛŋ niî a ǹáa mii yee gbuai giei lɔ́ɔlu mɛi feerɛ Yâwɛɛ ŋɛ́i-tuɛ.

²⁸ Zâla láa soŋ nuui pâi ŋ̀úlɔi nyii lɛ̀ɛ ǹáa mii yee ŋái da siai ƃɛ́i è ŋãai sia naa a m̀aa-ŋuŋ, wôli kpɛrɛi ma, ǹáa mii yee gbua kɛ́tɛi kpono ḿâ da ǹáa mii yee kɔɔ gbua zɛ-kpono ḿâ ƃɛ́i dí zɔnyɔ̂ŋ sala kula taa-tulɛi ŋãa sia naai.

²⁹ Gɛ̀ ní ŋ̀úlɔi kpeli nyii gáa zâla láa soŋ nuui yée ŋái, a pâi bûi ǹúui da maa waâi ŋûa a gɛɛ é ŋɔsɔnyɔŋ maa sâla kula Yâwɛɛ ŋɛ́i-tuɛ.

³⁰ Gɛ̀ ní a pâi sâla kulâi a dòloŋ dɔnɔi kpaa máŋ bopôo dɔnɔi,

³¹ dɔnɔ kɛ́ ƃò zɔnyɔ̂ŋ salai kula mɛni ma, gbelii kɛ́ ƃò géreŋ salai kula mɛni ma bɛlɛɛ m̀ii-sɛŋ sala-sɛŋ ma. Zâla láa soŋ nuui a pâi zãai ŋí kulâi a sâla Yâwɛɛ ma ǹúui da pâi maa waai ŋɔsɔnyɔ̂ŋ mɛ̂ni ma.

³² Dɔ̂ŋ-ŋai ká ŋí é pîlaŋ gbôdo kɔlɔ-fela nuui ma nyii pɔ̂ri fé mì é zâla sãai kélee salɔ ƃôi nyii maa nɛ̃ɛ̂i é gbɛɛi.”

Pûŋ nyii a pɛ̂lɛ pɛ́rɛ kâŋ mai

³³ Yâwɛɛ è mò Mose da Eelɔŋ dîa ǹyɛɛi,

³⁴ “Ka pà Keena lɔii su nyii ŋa pâi dɛɛ̂i kápɔi, ŋa gɛ̀ pûŋ a pɛ̀lɛ bɛ́rɛ-ŋai da kaŋ mâ ka m̀ui,

³⁵ gɛ̀ ní ǹúui bɔ́ɔ ƃa bɛ́rɛi a pâi pâi é m̀ó zâla láa soŋ-nuui ma ǹyɛɛi, ‘Gɛ̂ɛi yɛ̂ɛ ǹyaa ƃe pûŋ a pɛ́lɛ ŋápɛrɛi ma.’

³⁶ Zâla láa soŋ nuui a pâi môi a gɛɛ dí zãai kélee kúla maa pɛrɛi mu é lɛ́ɛ pâi liî naa é maa kpɛɛ̂. À wàla kɛ́ tí zãai kélee pâi kɛ̂i naai, maa fé pâi kɛ̂i a ŋ̀waa zâla láa soŋ nuui a lî é maa pɛ̂rɛi maa kpɛ́ɛ.

³⁷ A pâi bûŋ maa kpɛɛ̂i bɛ́rɛ kaŋ ma. À bûŋ káa liî bɛ́rɛ kâŋ su pere gɛ́ ƃò yɛ̂ɛ láa ŋûnu kpaa máŋ gɛ gbɔ̂lu-kpɔ̂lu,

³⁸ gɛ̀ ní zâla láa soŋ nuui a pâi kulâi bɛ́rɛi mu é ǹáa tɛ́ a fólo lɔ́ɔlu mɛi feerɛ.

³⁹ A pâi pâi ŋɔ́nɔ pôlu a vóloi ǹɔ́ɔlu mɛi feerɛ ɣelei é naa káa. Ǹyaŋ à kɛ̀ bûŋ a tàa-taa bɛ́rɛ kâŋ su pere,

⁴⁰ gɛ̀ ní zâla láa soŋ nuui a pâi môi a gɛɛ gɔni-ŋai nyii bûŋ káa dîa bɛrɛ kâŋ sui dí díkula daai su dí dípili ƃɛ́i ma naa maa fé waa nii.

⁴¹ Fɛ̂ɛ dí bɛ́rɛi su pere kaŋ kélee maa kálaŋ dí maa pɔ̂rɔi píli ƃɛ́i dí bûŋ gɔnii pìli naai.

⁴² Gɛ̀ ní da pâi kɔni nina-ŋai siɣêi dí dílɔ ƃɛ́i bûŋ kɔni-ŋai dí kɛ̀ naai dí naa sia a pɔ̂rɔ nina.

⁴³ “À kɛ̀ bûŋ a pà ŋɔ́nɔ pôlu bûŋ kɔni-ŋai kuláa da bɛ́rɛ kâŋ-ŋai maa kálaŋɔɔ da naa siaa a ninai pôlu ma,

⁴⁴ gɛ̀ ni zâla lâa soŋ nuui a pâi liî é naa káa. À kɛ̀ bûŋ a taa-taa bɛ̂rɛi mu, gɛ̀ ní kwaa ḿâ kara pûŋ ká tí, maa pɛrɛ maa fé waa ní.

⁴⁵ Ǹyaŋ da pâi maa pɛrɛi wôloi dí dɔɔ kɔni-ŋai, ŋ̀úru-ŋai da bɔ́rɔi kélee pílii bɛ́i dí bûŋ kɔni-ŋai da maa pɔ̂rɔi pìli naai.

⁴⁶ Nyíní pôlu ma ǹúui kélee lɔ́ bɛ̂rɛi ŋí mu a tãi zâla láa soŋ nuui è mò la a gɛɛ dí ǹáa tɛɛi, maa nuui tí maa fé pâi kɛ̂i a ŋ̀wáa é lɛ́ɛ la zu ɣele wulii é kɛ́.

⁴⁷ Ǹyaŋ ǹúui pâi nyiî bɛ́rɛi ŋí mu kpaa máŋ é ǹáa mii naai fɛ̂ɛ maa nuui é ŋɔseɣei wáa.

⁴⁸ “Kɛ̀lɛ à kɛ̀ zâla láa soŋ nuui a pà é bɛ́rɛi maa kpɛ́ɛ é gáa a gɛɛ bûŋ fé naa bɛ̂rɛi siaa pôlu ma, gɛ̀ ní a pâi môi a gɛɛ bɛ́rɛi maa waâi, kpɛ́ni fêi, bûŋ aâ kpɛ̀ɛ.

⁴⁹ Zâla láa soŋ nuui a pâi ŋɔni feerɛ siɣêi, sîda wuru-kpuai, seɣe kpɔ̂lu mu tɛɣiɛɛ da kpalo a sâla sãa bɛ̂rɛi maa waa mɛni ma.

⁵⁰ A pâi ŋ̀ɔnii dɔnɔ paâi pɔ̂rɔ leɣi mɛi nyii dí ɣîliŋ ya nina kɔ̀ɔ dí bú zui,

⁵¹ ǹyaŋ a pâi sîda wuru-kpuai siɣêi, gbaloi, zeɣe kpɔ̂lu mu tɛɣiɛɛi da ŋ̀ɔni fului é dílɔ ŋɔni ŋãai su nyii zumoɔɔ̂i a ǹyái bɔ̂rɔ leɣi sui, é gbɛmɛnii kɛ́ bɛ́rɛi ma gîei lɔ́ɔlu mɛi feerɛ.

⁵² Bere sîi ŋí su a pâi bɛ́rɛi maa waâi a ŋɔni ŋãai, ǹyá ninai, ŋ̀ɔni fului, sîda wurui, gbaloi da zeɣe kpɔ̂lu mu tɛɣiɛɛi.

⁵³ Gɛ̀ ní a pâi ƃôi ŋ̀ɔni fului ma é lí. Bere sîi ŋí su a pâi bɛ́rɛi maa sâla kulâi ǹyaŋ a pâi kɛ̂i a maa waa.

⁵⁴ “Dɔ̂ŋ-ŋai ká ŋí bîlaŋɔɔi núu kpono ḿâ kɔlɔ-fela mai. Teɣêŋ kɔlɔ-fela,

⁵⁵ pûŋ nyii a kɛ̀ seɣe mai kpaa máŋ pɛ́rɛ mai,

⁵⁶ pala, mũa, kpaa máŋ núu kɔlɔ ma kpɔ̂lu-kpɔ̂luɔɔ maa kɔlɔ-fela.

⁵⁷ Dɔ̂ŋ-ŋai ŋí ƃe a ǹɛ a gɛɛ ǹúui kpaa máŋ da maa waâi kpaa máŋ maa fé waa ní.”