Levetekɔ 13 - Bible

Núu kpono ma kɔlɔ-fela maa Tɔ̂ŋ-ŋa

¹ Yâwɛɛ è mò Mose da Eelɔŋ dîa ǹyɛɛ

² à kɛ̀ pala a tèe núu da ḿâ kpaa máŋ mũa kɛ́ tɔ̂ɔ ma, kpaa máŋ gɔlɔ ma kɛ́ kpɔlu-kpɔlu, fɛ̂ɛ dí pá a maa nuui Eelɔŋ pɔ́ kpaa máŋ Eelɔŋ ǹóŋ dɔnɔ nyii gá a zála láa soŋ nuui dɔnɔi.

³ Zâla láa soŋ nuu é balai maa kpɛ̀ɛ. À kɛ̀ gɔlɔ leɣa-ŋai balai sui a kɛ̀ kolêi balai su siŋɔɔ gɛ̀ ní gáa a gbôdo kɔlɔ-fela. Ǹyaŋ zâla laa soŋ nuui a pâi mô a gɛɛ nuui tí maa fé maa ní.

⁴ Kɛ́lɛ à kɛ̀ balai su fé sìŋ ní gɔlɔ leɣai da fé niî kole ní balai su, gɛ̀ ní zâla láa soŋ nuui é maa nuui kúla ŋɔnûai sáma fólo lɔ́ɔlu mɛi feerɛ mɛni ma.

⁵ Zâla láa soŋ nuui a pâi nuui ŋí maa kpɛɛ̂i a vóloi ǹɔ́ɔlu mɛi feerɛ ɣelei. À kɛ̀ a gàa a gɛɛ balai su fé siŋ ni nuui kɔlɔi pere, a maa nuui kúla ŋɔ́nɔ ŋɔnûai sama fólo lɔ́ɔlu mɛi feerɛ mɛni ma.

⁶ Zâla láa soŋ nuui a pâi ŋɔ́nɔ nuui ŋí maa kpɛɛ̂i a vóloi ǹɔ́ɔlu mɛi feerɛ ɣelei. À gàa a gɛɛ balai ŋáa a yenîi gɛ ní gáa nɔ́ a pala kpɛ́ni nyii tèe gɔlɔ ḿâ gbôdo kɔlɔ-fela fêi. Zâla láa soŋ nuui a pâi môi a gɛɛ maa nuui maa waâi ǹyaŋ maa nuui é nɔseɣei waa gɛ̀ ní a pâi kɛ́ a maa waa.

⁷ Kɛ̀lɛ à kɛ̀ balai a ƃɛ̀rɛ naa pôlu ma tãi zâla láa-soŋ-nuui è gàa la é mó a gɛɛ gbôdo kɔlɔ-fela fêi, fɛ̂ɛ é lí pôlu é gbîŋ lɛ́ zâla láa soŋ nuui ma.

⁸ Zâla láa soŋ nuui a pâi maa kpɛɛ̂i ŋɔ́nɔ, ǹyaŋ à kɛ̀ balai a ƃɛ̀rɛ, zâla láa soŋ nuui a pâi môi a gɛɛ maa nuui maa fé waa ní. Gbôdo kɔlɔ-fela káa m̀a.

⁹ À kɛ̀ gbodo kɔlɔ-fela à núu da sòŋ, ká pá a maa nuui zâla láa soŋ nuui pɔ́.

¹⁰ Zâla láa soŋ nuui a pâi maa nuui maa kpɛɛ̂i. À kɛ̀ balai a kɛ̀ kolôi gɔlɔ leɣa-ŋai dí kɛ́ kole zu, vɔ̃i kɛ́ ƃò zu,

¹¹ gɛ̀ ní gbôdo kɔlɔ-fela ká tí nyii a nâa kpanaŋ. Ǹyaŋ zâla láa soŋ nuui a pâi môi a gɛɛ maa nuui maa fé waa ní. Maa nɛ̃ɛi dí gúla ŋɔnûai sáma wɔ́lɔ-wɔlɔ da wɔ́lɔ-wɔlɔ.

¹² À kɛ̀ gbôdoi a ǹúui kpono gwaa kélee síɣe a sɛŋ nyii zâla láa soŋ nuui a pɔ̂ri gâai,

¹³ zâla láa soŋ nuui a pâi nuui maa kpɛɛ̂i ŋɔ́nɔ. À kɛ̀ a gàa a gɛɛ gbôdoi a maa nuui kpono gwaa kélee síɣe a tɔ̃yâ a pâi môi a gɛɛ maa nuui máa waâi. À kɛ̀ gbôdoi a gbono gwaa kélee kole, gɛ̀ ní maa nuui ma waâi.

¹⁴ À kɛ̀ pala a tèe maa nuui kɔlɔ ḿâ, gɛ̀ ní maa fé waa ní.

¹⁵ Zâla láa soŋ nuui a pâi balai maa kpɛɛ̂i. À kɛ̀ balai su a tée, gɛ̀ ní maa nuui maa fé waa ní. Pala ŋûnu káa a núu kpono ma kɔlɔ-fela nyɔ́mɔɔ.

¹⁶ Kɛ́lɛ à kɛ̀ balai a ƃálo, naa kɛ́ kole, fɛ̂ɛ maa nuui é lí zâla láa soŋ nuui pɔ́ naa,

¹⁷ a gɛɛ é m̀aa kpɛɛ̂i. À kɛ̀ balai pɔ́ɔ ŋá a kòle, gɛ̀ ní zâla láa soŋ nuui a pâi môi a gɛɛ maa nuui maa waai, ǹyaŋ a pâi kɛ̂i a maa waa.

¹⁸ À kɛ̀ mûa a tɔ̀ɔ núu da ḿâ a kpɛ̀ɛ,

¹⁹ ǹyaŋ à kɛ̀ ƃɛ́i m̀ûai è kɛ̀ naai naa a kɛ̀ a vɛ́ɛ gɛ́ kole kpaa máŋ naa kɛ̀ kpɔlu-kpɔlu, gɛ̀ ní fɛ̂ɛ maa nuui é lí zâla láa soŋ nuui pɔ́ naa.

²⁰ Zâla láa-nuui a pâi maa kpɛɛ̂i. Ǹyaŋ a gàa a gɛɛ balai su a siŋ, gɔlɔ léɣa-ŋai balai sui a kole kolei, gɛ̀ ní zâla láa soŋ nuui a pâi môi a gɛɛ maa nuui maa fé waa ní. Gɔlɔ-felai káa a gbodo kɔlɔ-fela nyii a zóŋ mũa kpɔ̂lɔŋ sui.

²¹ Kɛ́lɛ à kɛ̀ zâla láa soŋ nuui a m̀aa kpɛ̀ɛ é gáa a gɛɛ gɔlɔ léɣa-ŋai balai sui dífe niî kole ní balai su fé siŋ ní a nâa kɛ́ ƃâloi, zâla láa soŋ nuui a pâi gulâi m̀arâai sáma fólo lɔ́ɔlu mɛi feerɛ mɛni ma.

²² À kɛ̀ balai a ƃɛ̀lɛ, gɛ̀ ní zâla láa soŋ nuui a pâi môi a gɛɛ maa nuui maa fé waa ní. Kɔlɔ fela káa ma.

²³ Kɛ́lɛ à kɛ̀ balai fé ƃɛlɛ ní gáa nɔ́ niî a gɛ́ pere gɛ̀ ní m̀ũai gbɔlɔ̂ŋ káti. Zâla láa soŋ nuui a pâi môi a gɛɛ maa nuui maa waai.

²⁴ À kɛ̀ núu da a gèreŋ maa palai su kɛ́ kole, kpaa máŋ zu kɛ́ kpɔ̀lu-kpɔlu,

²⁵ zâla láa soŋ nuui a pâi maa nuui maa kpɛɛ̂i. Ǹyaŋ à kɛ̀ gɔlɔ leɣa-ŋai balai sui da kɛ̀ kole-kolei balai su siŋɔɔ, gɛ̀ ní gbôdo kɔlɔ-fela káti nyii a zoŋ géreŋ pɔ́ɔi sui. Ǹyaŋ zâla láa soŋ nuui a pâi môi a gɛɛ maa nuui maa fé waa ní. Gbôdo kɔlɔ-fela káa m̀a.

²⁶ Kɛ̀lɛ à kɛ̀ gɔlɔ léɣa-ŋai balai sui dífe niî kole ní, balai su fé siŋ ní ŋ̀á sâai, zâla láa soŋ nuui a pâi maa nuui kulai m̀arâai sáma fólo lɔ́ɔlu mɛi feerɛ mani ma.

²⁷ Zâla láa soŋ nuui a pâi m̀aa kpɛ̂i ŋɔ́nɔ a vóloi ǹɔ́ɔlu mɛi feerɛ ɣelei. À kɛ̀ balai a ƃɛlɛ̂i, gɛ̀ ní gáa a gbôdo kɔlɔ-fela. Zâla láa soŋ nuui a pâi môi a gɛɛ maa nuui maa fé waa ní.

²⁸ Kɛ́lɛ à kɛ̀ balai fé ƃɛlɛ̂i, ŋ̀á sâai gɛ̀ ní kéreŋ pala kpɔlɔŋ nɔ́ káti gôdo fêi. Ǹyaŋ zâla láa soŋ nuui a pâi môi a gɛɛ maa nuui maa waai.

²⁹ À kɛ̀ pala a kɛ̀ kpakolo kpaa máŋ nɛnî ŋûa kpaa máŋ nɛɣɛ̂ŋ mu,

³⁰ zâla láa soŋ nûui a pâi balai maa kpɛɛ̂i. À kɛ̀ balai su siŋɔɔ̂i, gɔlɔ léɣa-ŋai tɔɔ̂ zu tɛi-tɛi gbelêŋɔɔ, gɛ̀ ní zâla láa soŋ nuui a pâi môi a gɛɛ maa nûui maa fé waa ní. Téɣeŋ gbodo káa m̀a nyii a zóŋ ŋûa, kpaa máŋ ǹɛɣɛ̂ŋ mui.

³¹ Ǹyaŋ à kɛ̀ zâla láa soŋ nuui a balai maa kpɛ̀ɛ é gáa a gɛɛ balai su fé siŋ ní, gɔlɔ léŋa-ŋai zui vé tɛ̀ii, gɛ̀ ní zâla láa soŋ nuui a pâi maa nuui kulâi marâi sáma fólo lɔ́ɔlu mɛi feerɛ mɛni ma.

³² Vólo lɔ́ɔlu mɛi feerɛ ɣelei, zâla láa soŋ nuui a pâi maa nuui maa kpɛɛ̂i ŋɔ́nɔ. Ǹyaŋ à kɛ̀ balai fé niî ƃɛ̀rɛ ní gɔlɔ leɣa-ŋai zui dífe kpeleŋ ní, zu fé siŋ ní,

³³ gɛ̀ ní maa nuui a pâi ŋuŋ ma leɣa pûi é ƃɛ́i ma lɛɛ balai káa naai. Zâla láa soŋ nuui a pâi gulâi ŋɔ́nɔ ŋɔnûai sáma fólo lɔ́ɔlu mɛi feerɛ mɛni ma.

³⁴ Zâla láa soŋ nuui a pâi ŋɔ́nɔ balai maa kpɛɛ̂i a vóloi ǹɔ́ɔlu mɛi feerɛ ɣelei. À kɛ̀ vé niî ƃɛrɛ ní, zu fé siŋ ní gɛ̀ ní zâla lâa soŋ nuui a pâi môi a gɛɛ maa nuui maa waâi. Maa nuui a pâi ŋɔseɣei waâi. Ǹyaŋ a pâi kɛ̂i a m̀aa waa.

³⁵ Kɛ́lɛ à kɛ̀ balai a ƃɛ̀rɛ naa pôlu ma tãi dí mò la m̀a a gɛɛ maa waâi.

³⁶ Gɛ̀ ní zâla láa soŋ nuui a pâi maa kpɛɛ̂i ŋɔ́nɔ. À kɛ̀ balai a ƃɛ̀rɛi maa fé nɛ̃ɛ ní zâla láa soŋ nuui é gɔlɔ leɣa kpelêŋɔɔ-ŋai kɔ́ri. Maa nuui maa fé waa ní.

³⁷ Kɛ́lɛ zâla láa soŋ nuui ŋɔkili ŋa siai su a gàa a gɛɛ gɔlɔ leɣa-ŋai balai sui da tɛi, balai a ƃálo, gɛ̀ ní maa nuui maa waai. Ǹyaŋ zâla láa soŋ nuui a pâi môi a gɛɛ ǹúui, kpîŋ maa waâi.

³⁸ À kɛ̀ kpakolo kpaa máŋ nɛnî kɔlɔ gwaa da ma à kɛ̀ kolei,

³⁹ zâla láa soŋ nuui a pâi maa nuui maa kpɛɛ̂i. À kɛ̀ gɔlɔ mbɛ́i kolei ŋɔkolei mu saâi, gɛ̀ ní pɔ́ɔ nɔ́ ká tí gɔlɔ ma. Maa nuui maa waai.

⁴⁰ À kɛ̀ kpakolo ŋuŋ leɣa à kpɛɛ dôŋ su pere, gɛ̀ níi kpólaŋ nɔ́ ká tí. Maa nuui maa waai.

⁴¹ À kɛ̀ kpakolo ŋuŋ leɣa à kpɛ̀ɛ dôŋ lá pere, gɛ̀ ní kpóloŋ nɔ́ ká tí. Maa nuui maa waai.

⁴² Kɛ́lɛ à kɛ̀ gbólaŋ su à kɛ̀ kolei gɛ́ kpɔlu-kpɔlu, gɛ̀ ní gbôdo ká tí a zóŋ gbóloŋ sui.

⁴³ Zâla láa soŋ nuui a pâi maa nuui maa kpɛɛ̂i. À kɛ̀ gbólaŋ su à kɛ̀ kolei mù kpɔlu-kpûluɔɔ,

⁴⁴ gɛ̀ ní gbôdo kɔlɔ-fela ká tí. Zâla lâa soŋ nuui a pâi môi a gɛɛ maa nuui maa fé waa ní. Gbôdo a zóŋ ŋ̀ûa.

⁴⁵ Fɛ̂ɛ gbôdo kɔlɔ-fela nuui é seɣe sâa too ma, vé ŋ̀uŋ su kula, é ǹyée pɛ́lɛ ǹá, é m̀ó ɣelêi pere ǹyɛɛi, “Ḿaa fé waa ní. Ḿaa fé waa ní.”

⁴⁶ Maa nuui maa fé pâi kɛ̂i a ŋ̀wáa tãi nɔ́ gɔlɔ-felai ŋí káa la m̀ai. Vé kɛ̀ m̀ûui su kpaa máŋ m̀arâai sáma.

Dɔ̂ŋ-ŋai bîlaŋɔɔi pûŋ mai

⁴⁷ “À kɛ̀ pûŋ à pɛ̀lɛ seɣe ma, a nɛ̃ɛ ma maa seɣei é kɛ́ a gbɛtɛɛ a sua leɣa kpaa máŋ yee,

⁴⁸ kpaa máŋ seɣe kpûa ma nyii gbɛtɛɛi a yeei, kpaa máŋ sua leɣe kpaa máŋ sua kɔlɔ seɣe, kpaa máŋ seɣe nyii kélee gbɛtɛɛi a sua kɔlɔi,

⁴⁹ a kɛ̀ bûŋ ŋí káa yɛ̂ɛ láa ŋúnu, kpaa máŋ gɛ́ kpɔlu, gɛ̀ ní gáa a pûŋ nyii a taa-taai. Fɛ̂ɛ dí ǹɛ́ zâla láa soŋ nuui ma.

⁵⁰ Zâla láa soŋ nuui a pâi zɛŋ maa kpɛɛ̂i bûŋ káa mai, é maa sɛŋ tí lɔ́ kwaa da ḿâ fólo lɔ́ɔlu mɛi feerɛ mɛni ma.

⁵¹ Zâla láa soŋ nuui a pâi maa sɛŋ maa kpɛɛ̂i ŋɔ́nɔ a vóloi ǹɔ́ɔlu mɛi feerɛ ɣelei. À kɛ̀ bûŋ a taa-taa gɛ̀ ní maa sɛŋ maa fé waa ní, kpɛ́ni fêi sɛŋ kara puŋ káa ma.

⁵² Zâla láa soŋ nuui a pâi gerenii, kpɛ́ni fêi sɛŋ kara pûŋ kâa m̀a, nyii m̀aa nɛ̃ɛ̂i dí zu karâi.

⁵³ “Kɛ̀lɛ à kɛ̀ zâla láa soŋ nuui a maa sɛŋ maa kpɛ̀ɛ é gáa a gɛɛ bûŋ fé niî taa-taa ní maa sɛŋ ḿâ,

⁵⁴ gɛ̀ ní zâla lâa soŋ nuui a pâi môi a gɛɛ dí maa sɛŋ wáa dí ǹɔ́ kwaa da ḿâ ŋɔ́nɔ a fólo lɔ́ɔlu mɛi feerɛ.

⁵⁵ Zâla láa soŋ nuui a pâi zɛŋ ŋí maa kpɛɛ̂i ŋ̀wáa pôlu ma. À kɛ̀ bûŋ ŋɛ́i maa fé niî fáleŋ ní, berei máŋ vé niî taa-taa ní lai, maa sɛŋ maa fé waa ní. Fɛ̂ɛ í maa sɛŋ kéreŋ a nɛ̃ɛ ma bûŋ é kɛ́ bôlu pere kpaa máŋ dúɛ pere.

⁵⁶ Kɛ́lɛ à kɛ̂, zâla láa soŋ nuui a gàa a gɛɛ bûŋ a kɛ́ kpɛɛ̂i zeɣei waa pôlu ḿâ, a pâi zeɣei mbɛ́i teêi ma bûŋ káa naai.

⁵⁷ Ǹyaŋ à kɛ̀ bûŋ a zeɣei sôŋ ŋɔ́nɔ pôlu gɛ́ taa-taa zu, gɛ̀ ní maa seɣei ǹúu-namu é géreŋ.

⁵⁸ Kɛ́lɛ a maa seɣei waa nyii bûŋ káa zui, bûŋ é kpɛ́ɛ zu, maa nɛ̃ɛ̂i é zeɣei kpîŋ waa ŋɔ́nɔ pôlu gɛ̀ ní a pâi kɛ̂i a maa waa.”

⁵⁹ Dɔ̂ŋ-ŋai ká ŋí bîlaŋɔɔi seɣe ma nyii pûŋ a pɛlɛ mai, a nɛ̃ɛ ma kpîŋ maa seɣei é kɛ́ a gbɛtɛɛ a yee, sua leɣa, kpaa máŋ sua kɔlɔ, berei ƃa pɔ̂ri gɔ́lɔnîi la a gɛɛ maa waa kpaa máŋ maa fé waa nii.