Levetekɔ 1 - Bible

Dɔ̂ŋ-ŋai bîlaŋɔɔi kéreŋ sâla kuláa mai

¹ Yâwɛɛ kɛ́ɛ ŋɔsua kɔ̂lɔ seɣe pɛrɛi mui, è Mose tòli ǹyɛɛ mai,

² “M̀ó Eezuɛ-ŋai dîa nyɛ̂ɛ, à kɛ̀ núu da à kɛ̀ pâi a taa-tûlɛ sama-sɛ̂ŋ Yâwɛɛ pɔ́, fɛ̂ɛ é gúla ǹyaa kpîŋ ŋɔtaa-tûlɛ-ŋai sáma.

³ À kɛ̀ ŋɔsama-sɛŋ káa a kéreŋ sama-sɛŋ nyii è gùla ŋɔniŋa-ŋai samai, fɛ̂ɛ maa niŋai é kɛ́ a zirɛ nyii pɔ́ɔ fé mai. É maa salai kúla Yâwɛɛ ŋɔsua kɔ̂lɔ seɣe pɛrɛi gbôŋ lá a gɛɛ Yâwɛɛ é ǹyée sée mu.

⁴ É ǹyée pɛ́lɛ géreŋ sama-sɛŋ ŋuŋ ma a gɛɛ Yâwɛɛ é ǹyée sée zama-sɛŋ mu-maa-nuui ŋɔsɔnyɔ̂ŋ su mɛni lɛɛ mɛni ma.

⁵ Gɛ̀ ní a pɔ̂ri daa-tûlɛi paâi Yâwɛɛ ŋɛ́i-tuɛ. Eelɔŋ ǹônii, nyii-ŋai díkaa a zala-laa-soŋ-ƃelai dí daa-tulɛi ŋãa kpɛ́mɛŋ ŋ̀âla-teƃelei kpono ma dínaŋ ma Yâwɛɛ ŋɔsua kɔ̂lɔ seɣe pɛrɛi láƃelei.

⁶ É géreŋ sama-sɛŋ kɔlɔ kúla é zua su tée a gbua-kpûa.

⁷ Zâla láa-soŋ-nuui Eelɔŋ ǹônii dí ŋɔŋ tóo ŋ̀âla-teƃelei ŋá, dí kɔi pú ŋ̀á yɛ̂ɛ berei maa nɛɛ̂i dí gɛ́ lai.

⁸ Eelɔŋ ǹônii nyii-ŋai díkaa a zâla láa-soŋ-ƃelai dí zua kpua-kpuai, ŋuŋ da ŋ̀úlɔ pú gîe mɛi ŋɔŋ ŋá ŋ̀âla-teƃelei ŋá yɛ̂ɛ berei maa nɛ̃ɛ̂i dí gɛ́ lai.

⁹ Kɛ́lɛ dí goi sãai da gbɔ̂rɔ-ŋai maa wáa a yá. Zâla láa-soŋ-nuui é gélee kéreŋ ŋ̀âla-teƃelei ŋá a kéreŋ sâla-sɛŋ nyii géreŋ kuŋ lɛ̂lɛɛi Yâwɛɛ mɛni mai.

¹⁰ “À kɛ̀ ŋɔkéreŋ sama-sɛŋ káa a ƃála kpaa ƃoli, é kɛ́ a zirɛ nyii pɔ́ɔ fé mai.

¹¹ É ƃolii kpaa m̀álai ŋí páa yá ŋûa-pere ŋ̀âla-teƃelei kɔlɛ Yâwɛɛ ŋɛ́i-tuɛ. Eelɔŋ ǹônii nyii-ŋai díkaa a zâla láa-soŋ-ƃelai dí daa-tûlɛi ŋãa kpɛ́mɛŋ dí dínaŋ ŋ̀âla-teƃelei kpono ma.

¹² Zâla láa-soŋ-nuui é zuai su tée-têe, é maa kpûa-kpuai síɣe, ŋuŋ da ŋ̀úlɔ é dípu ŋɔŋ ŋá ŋ̀âla-teƃelei ŋá yɛ̂ɛ berei maa nɛɛ̂i é gɛ́ lai.

¹³ Kɛ́lɛ dí goi sãai da gbɔ̂rɔ-ŋai maa wáa a yá. Zâla láa-soŋ-nuui é gélee kéreŋ ŋ̀âla-teƃelei ŋá a kéreŋ sâla-sɛŋ nyii géreŋ kuŋ lɛ̂lɛɛi Yâwɛɛ mɛni mai.

¹⁴ “À kɛ̀ géreŋ sama-sɛŋ a pâi la Yâwɛɛ pɔ́i gáa a ŋɔni, fɛ̂ɛ é kɛ́ a tòloŋ kpaa máŋ popôo.

¹⁵ Zâla láa-soŋ-nuui é pá a ŋɔnii ŋ̀âla-teƃelei ma é gɔŋ kpĩlaŋ é gula gônoi é ŋuŋ láa ŋ̀âla-teƃelei ŋá é géreŋ é tela ŋãa kpɛ́mɛŋ ŋ̀âla-teƃelei kpono ma.

¹⁶ É gɔ̂rɛ da ǹéɣa kúla ma é bíli ŋ̀âla-teƃelei kɔlɛ vóloi kulâi-pere ƃɛ́i da ǹuui pili naai.

¹⁷ É zóŋ a goôŋ veerɛ é zu-ƃéla, kɛ́lɛ vé gula ŋ̀á. Zâla láa-soŋ-nuui é géreŋ gɔi mɛi ŋɔŋ ŋá ŋ̀âla-teƃelei ŋá. Gáa a kéreŋ sama sɛŋ kuŋ nɛ̃ɛ Yâwɛɛ mɛni ma.”