Ɉeremi 9 - Bible

¹ Eêi kɛ̀ ŋ́uŋ kɛ́ ƃò a ya-ɣɛli-loŋ, ŋ́ɛi-ya kɛ́ pù yɛ̂ɛ yá ƃé ɣilînii, ŋâi pɔ̀ri wɔ̂lɔi a kpíni da fólo ŋánûai dí dípâai maa mɛ̂ni ma.

² Eêi kɛ́ pɛ́rɛ kɛ́ ƃò ńyêei vɛ̃ɛ-kpâlaŋ su ŋɔ̃ya lâai mɛni ma, ŋâi kùla ŋánûai sáma ŋá lí naa, kpɛ́ni fêi, díkaa a ɣâla-da-kpɛ́ni fɛli-ƃela, dí kɛ̀ ƃò a ǹúu-kpului nyíi vé teniŋ ƃô nii.

³ Da dínɛŋ ŋáa tɛ̀ yɛ̂ɛ kerâŋ. Lɛ́ɛ mɛni nɔ́ ƃé a ƃɔ̂lɔ díla ǹɔii su, tɔ̃yâ fêi. Yâwɛɛ è mò ǹyɛɛi, “Kpɛ́ni fêi da kûla nɔ́ mɛni nyɔ́mɔɔ tɔnɔ su dí píli gbéli su. Ǹyaŋ dífe ŋ́gɔlɔŋ a dí Díɣâla.”

⁴ Ka ká mɛi káa a kálâoi-ni. Káfe kákili tɔ̀ɔ kákaayɔɔ-ŋai dîa. Kpɛ́ni fêi, kákaayɔɔ-ŋai díkaa a núu pɛlɛ-ƃela yɛ̂ɛ Zeeka. Ǹyaŋ núu kélee káa a núu láa kara-ƃela.

⁵ Ǹûai kélee kpɔ́ da dílâoi-ni pɛ̀lɛ. Núu da fé naa é tɔ̃yâ ƃó. Da dínɛŋ tɔ́ɔ a lɛ́ɛ kɛ́ɛ. Da sɔnyɔ̂ŋ kɛ̂i nɔ́. Kɛ́lɛ dífii kɛ́ kpɛ̀ɛ a gɛɛ dí dípôlu tɔɔ dísɔnyɔ̂ŋ ma.

⁶ Díkaa nɔ́ ŋwana lɔ̂ɔ ŋáa tɛ̂i gîe mɛi, dí kɛ̀ núu pɛ̀lɛ a tãi kélee. Da nia ḿâ. Yâwɛɛ ƃé mò tí.

⁷ M̀ɛni ma Ŋ̀wála-wâla kélee Yâwɛɛ è mò ǹyɛɛi, “Ŋa pâi dímaa-waai, ŋá su kɔ̂ɔŋ tɛɛ dípɔ. Ḿva pɔ̂ri mɛni da kpɛ́ni kɛ̂i. Kpɛ́ni fêi díkaa a ŋánûa.

⁸ Dínɛŋ káa a tɔ̃a nyíi a núu pàa. Gɛ́ lòno a núu-pɛlɛ pere tèe-tee. Da lôno a lii-see pere dílâoi-ni pɔ. Kɛ́lɛ dí kɛ̀ gbã tèe díperêi dí líi su.

⁹ À kɛ̀ tí, gɛ̀ ní ḿva pɔ̂ri díkula maa kɛ̂i m̀ɛni-ŋai ŋí mɛ̂ni ma? Ŋá pɔ̂ri ŋ̀áa têei. À kɛ̀ tí, ḿva pɔ̂ri tɔɔ̂i ǹɔii-ŋuŋ kɛ́ɛ ŋí ma?”

¹⁰ Ŋá mò ńyɛ̃ɛi, “Ŋa pâi wɔ̂lɔi ǹyée kɛ́tɛi mɛ̂ni ma. Ŋa láɣi vɛ̃ɛ-kpâlaŋ su taa-tulɛi láa mii mɛni ma. Ǹaa a lɛɛ a bûŋ, núu da fa tɛ̂ɛ naa. Núu fa ŋɔ́nɔ ǹiŋa-ŋai wɔ́lɔ-woo mɛni naa. Ŋ̀ɔni-ŋai díkaa ŋ̀elei su díkelee da pú. Vɛnɛ-sãai da lí.”

¹¹ Yâwɛɛ è mò ǹyɛɛi, “Ŋa pâi Zerusâlɛŋ wôloi, ŋá ǹaa kɛ́ a taa-pîleŋ ŋá. Ǹaa a pâi kɛ̂i a fɛnɛ-sãa pɔ́-taai. Ŋa pâi Zuda taa-lee-ŋai kélee lɛɛ̂i a búŋ. Núu da kélee fé pâi seêi naa.”

¹² Ŋá Yâwɛɛ marê kɛ̀ ńyɛ̃ɛi, “Gbɛ̂ɛ ƃé dáreɛ̂i a gɛɛ é m̀ɛni-ŋai ŋí ŋá káa? Maa nûu fé ma. Gbɛ̂ɛ ƃé Yâwɛɛ è mò m̀a a gɛɛ é m̀ɛnii ŋí dùŋ tooi? Maa nûu fé ma. Lé ƃé kɛ̀ ǹɔii a lɛ̀ɛ a bûŋ yɛ̂ɛ fɛ̃ɛ-kpâlaŋ su, núu da líi fé kpele ní a gɛɛ é tɛ́ɛ naai? Núu da fé gɔ́lɔŋ.”

¹³ Nya ƃe Yâwɛɛ è mò ǹyɛɛi, “Kpɛ́ni fêi da dípôlu tɔ̀ɔ ŋátɔ̂ŋ ma nyíi ŋá dɛ̀ɛ dípɔi, dífe díwoli tɔ̀ɔ ní ŋ́oo ma, kpaa dísia a m̀ɛnii ŋá m̀o dîai.

¹⁴ Kɛ́lɛ, dí lɛ̀ɛ díkpîŋ kili-ŋa-siâi pôlu a wolii kpɔ̂lɔ-pere, ǹyaŋ díkaa nɔ́ Bêe ɣalai pôlu yɛ̂ɛ berei dínâŋ pɔlɔ-ŋai díwɔ́lɔ ǹɛ la diai.

¹⁵ M̀ɛni ma, ńyãai a Ŋ̀wála-wâla kélee Yâwɛɛ nyíi gáa a Eezuɛ-ŋai Díɣâlai, ŋa môi a gɛɛ ŋa pâi sɛŋ wã́naa tɛɛ̂i dípɔ a dí kɔ̃́nɔŋ. Ŋá ŋ̀ale-maa tɛ́ɛ dípɔ a díkpele-sɛŋ.

¹⁶ Ŋa pâi dítaa taâi ǹɔii-ŋuŋ-ŋai su nyíi dínâŋ pɔlɔ-ŋai, kpaa máŋ dia kpîŋ dífe zu kɔ́lɔŋ. Ŋa pâi kɛ̂i dípôlu a ƃóa-sɔ̂kpɔ é lɛ́ɛ la zu ŋá díkelee kpɔ́ dípaa.”

Zerusâlɛŋ-ƃelai díwɔ́lɔ kpɔŋ ḿâ mɛni ma

¹⁷ Ŋ̀wála-wâla kélee Yâwɛɛ è mò ǹyɛɛi, “Ka kákili-ŋa sía ká m̀ɛnii nyíi káa gáa kɛ̂i. Ka zaa wɔ̂lɔ kɛ́ nɛyãai tóli dí pá. Ka ǹɛyâai nyíi-ŋai da wɔ̂lɔ a ŋánaai tóli.”

¹⁸ Ǹûai dí mò dîyɛɛi, “Gɛ́ dí pá a m̀aa félaa dípɛlɛ wɔ̂lɔi kú mɛi. A gɛ́ɛ kúŋɛi-ya é pɛ́lɛ pûi. A gɛ́ɛ kúŋɛi-ya é pɛ́lɛ kulâi kúŋɛi gɔ̀lɔŋ su.”

¹⁹ Zerusâlɛŋ-ƃelai da wɔ̂lɔi dîyɛɛi, “Da kú su kara. Ŋumɛ kɛ́tɛ a kú kɛ́. Kpɛ́ni fêi, kwa kula ǹɔii su. Kpɛ́ni fêi, da kúkɛ̂i wólo.”

²⁰ Óo lee-ƃela, ka káwoli tɔ́ɔ Yâwɛɛ wóo ma. M̀ɛnii a m̀ôi é lɛ́ɛ kákili-ŋa. Ka kálônii-nɛyãai téniŋ tɔ́ɔ a wɔ́lɔ kɛ́ pere. Ká kánaa kɔlɛ ma-ƃelai téniŋ tɔ́ɔ a malôŋtoo-maa wɔ́lɔ kɛ́ pere.

²¹ Ka gáa, saa a tɛ́ kúwôna-ŋai lá. A lɔ́ kúkâloŋ pɛrɛ-ŋai mu. A kúnîa-pɛlɛɛ-ŋai paâi daai su, gɛ́ kúsia-a-nina ŋai pàa ǹɔ́ɔ-kpalaŋ-ŋai ŋá.

²² Yâwɛɛ è mò ǹyɛɛi, “Kɛ́ yɛ̂ɛi, ‘Núu poma a pâi kɛ̂i a daa-tâa ǹɔii su yɛ̂ɛ niŋa kpô. A pâi kɛ̂i yɛ̂ɛ mɔlɔŋ a tàa-taa mɔlɔŋ-kpâŋ su mɔlɔŋ tée núu pôlu. Núu da fé naa é díloo.’ ”

²³ Yâwɛɛ è mò ǹyɛɛi, “Ǹúui nyíi dáreɛɛi, vé gíli tɔ̀ɔ ŋɔtárei ma. Ǹúui ŋ̀wála-walaai, vé gíli tɔ̀ɔ ŋɔwála-laai ma. Ǹúui nyíi dɔɔ̂i, vé gíli tɔ̀ɔ ŋɔtɔɔ-sãai ma.

²⁴ Kɛ́lɛ zɛŋ é gíli tɔ́ɔ mai, ǹyaa ƃa Ńyãa Yâwɛɛ, é tela ŋ́gɔlɔŋ a Ɣâla, dáreɛɛ ḿaa mɛ̂ni su. É kɛ́ tela a gɔ́lɔŋɔɔ a gɛɛ ńyãa ƃa Yâwɛɛ nyíi ŋáwɛli kɛ́-maai kpanaŋɔ̂ɔi, ŋ́deniŋ ƃôɔɔ, ŋ́gɛ mɛni ŋá tèe a tɔ̃yâ-pere ǹɔii ŋí su. É kɛ́ a gɔ́lɔŋɔɔ a gɛɛ mɛni-ŋai ŋí ƃé ǹɛ̂lɛɛi a ńîa. Ńyãa Yâwɛɛ ƃé mò tí.”

^25-26 Yâwɛɛ è mò ǹyɛɛi, “Vóloi káa pâi tãi ŋa pâi Ize-ŋai, Zuda-ŋai, Idɔŋ-ŋai, Amɔŋ-ŋai, Môa-ŋai kula maa kɛ̂i la, da diai kélee díseɛɛ káa vɛ̃ɛ-kpâlaŋ su kwaa kôyaa ma nyíi-ŋai da díŋuŋ ƃôi. Dí ǹûai ŋí kélee sèe kpono-mɛi kɛ́lɛ dífa tûa yɛ̂ɛ diai dí seɛɛ̂i kpono mɛi. Ǹûai ŋí da Eezuɛ-ŋai kélee dífa ŋátɔ̂ŋ mɛi kâa.”