Ɉeremi 8 - Bible

¹ “M̀aa tãi tí ma, Yâwɛɛ è mò ǹyɛɛ da pâi Zuda kaloŋ-ŋai, ǹɔii mɛi-ƃelai, zâla láa-soŋ-ƃelai, Ɣâla ŋɔlóno kɛ́-ƃelai, da Zerusâlɛŋ-ƃelai kélee kpɔ́ kao kulâi díƃolôŋ su.

² Ǹûai ŋí da kâa vóloi fɛ̀li, ŋáloŋ-foloi, ŋ̀elei su sãai kélee nyíi-ŋai dí díwɛli-ni, dí kɛ̀ tíi kɛ̀ dîɛ, dí kɛ̀ ƃò dípôlu, dí kɛ̀ dífɛ̀lii. Dí díkao kùla dí bú díŋɛi túɛ. Ǹyaŋ dífe pâi díkao ŋáa tɛ̂i gîe ma, kpaa dí díloo. Dí káo a pâi kɛ̂i a kala ǹɔii ma.

³ Ǹúu kpului nyíi pâi lɛɛ̂i ŋ̀wana lɔ̂ɔ nuu-suui nyíi-ŋai ŋá díkùla ƃɛ́i pɔ́ɔ ŋái, a pâi kɛ̂i ŋ̀wɛ̂lii é sáa é tɛ́ɛ la gɛɛ ɣele ma m̀a. Ńyãai ŋ́gáa a Ŋ̀wála-wâla kélee Yâwɛɛi, ńyãa ƃé mò tí.”

Sɔnyɔ̂ŋ da gula maa

⁴ M̀ó dîa yɛ̂ɛ Yâwɛɛ ǹyɛɛi, “À kɛ̀ núu a tòo, a pɔ̂ri mù siɣêi pôlu. À kɛ̀ núu a làŋ, a pɔ̂ri lenêi pôlu.

⁵ Lé ƃé ŋaŋ kɛ̀ ǹûai ŋí da dípôlu tɔɔ ḿâ dífa lène pôlui? Da kánaŋ nɔ́ núu pɛlɛ́ɛ ma dífa kpêra ma.

⁶ Ŋa ŋ́oli tɔ́ɔ dîa a zu kôyaa, kɛ́lɛ dífe niî tɔ̃yâ ƃó ní. Núu da fé niî bôlu tɔɔ ní ŋɔsɔnyɔ̂ŋ ḿâ é mó ǹyɛɛi, ‘Lé ƃé ŋá gɛ́i?’ Díkelee kpɔ́ da tínaŋ a díkpɔ̂ɔi pere yɛ̂ɛ soo a kɛ̀ piliî gɛ̀ lí kɔ́kɔ ɣene-ŋa.

⁷ Ŋɔni kɛ́ɛ yɛ̂ɛ kpála-ŋɔni, ya-ŋɔni, niŋa pôlu-lɛŋkpɛŋ da ŋɔni nyíi a pâ gɛ́ lì tãi kpua yée mui, dí díkula tãi kɔ́lɔŋ. Kɛ́lɛ ŋánûai dífe Yâwɛɛ ŋɔtɔ̂ŋ kɔ́lɔŋ.

⁸ Ka pɔ̂ri môi léŋ kâa kákaa a táre-ƃela, ŋátɔ̂ŋ káa káyêei? Ka gɛ́ gɔlɔ-pɔ̃yɛɛ-ƃelai díkaa nâa lɛ́ɛ kɔlɔ pɔ̃yɛ̂ɛi.

⁹ Kátare-ƃelai ŋí díkaa pâi ŋumɛ̂i. A pâi kɛ̂i a gúlaa a dia dí kɔ́ pɛ̀lɛ a ƃáre. Da dípôlu tɔɔ Yâwɛɛ wóo mà. Gɛ̀ ní, lé tàre ƃé dîai?

¹⁰ Yâwɛɛ è mò a gɛɛ a pâi dípɛrɛ-ŋai tɛɛ̂i díƃarâai pɔ, é pɛ́lɛ díkpâlaŋ-ŋa tíi da dínɛyãai dîa. Ŋa pâi ǹɔii ŋí su-ƃelai kélee su karâi. É síɣe ǹúui guro-tei ma é tóo gɛ́tɛi ma, díkelee díkaa nɔ́ wôya sɛŋ kɔ̂rii. Ɣâla ŋɔlóno kɛ́-ƃelai da zâla láa soŋ-ƃelai dífe a teniŋ ƃô-ƃela.

¹¹ Dífa sále pù ŋánûai dí palai ŋá a ǹɛ́lɛɛ, dí kɛ̀ mò dîa dîyɛɛ, ‘Lii-see é kɛ́ kâa’ nyíi va pɔ̂ri lii-see tɛɛ̂i dí pɔi.

¹² Tãi dí kɛ̀ m̀ɛni nyɔ́mɔɔ-ŋai kɛ̂i lai, dífe kɛ́ ní a díkpaaŋɔɔ a dɔnɔ kpîŋ. Ŋumɛ fé dísoŋ ní a dɔnɔ kpîŋ. M̀ɛni ma, ŋá pâi dí kula maa kɛ̂i, ŋá dítoo ǹɔii ma. Da pâi saâi yɛ̂ɛ ǹúui gbéli-ŋai. Ńyãa Yâwɛɛ, ńyãa ƃé mò tí.”

¹³ “Ŋá kɛ̀ ŋ̀wɛ̂lii a gɛɛ ŋá ŋánûai ŋáa tɛ́ díkîe ma yɛ̂ɛ berei kpâlaŋ-ŋa tíi kɛ́ nuu a ŋɔsí-sãai m̀bá ŋáa tɛ̀ la gîe mai. Kɛ́lɛ díkaa nɔ́ yɛ̂ɛ kpɔmɔ-ƃa kpalaŋ nyíi m̀bá fé ŋai. Díkaa nɔ́ yɛ̂ɛ fîi wuru nyíi m̀bá fé ŋa, ǹáa a kpála m̀ai. M̀ɛni ma, ŋá gɛ̀ núu da kpɛ́ni-ŋa dí pá dí see dímɛi.”

¹⁴ Zuda-ƃelai da pâi môi dîyɛɛi, “Lé mɛni ƃé ká káa seêi la ƃɛ́i? Ka pá kúkelee kú lí daa-lêei nyíi siɣãŋ tínaŋɔ̂ɔi mai su kú lɛ́ɛ naa kú sáa. Kpɛ́ni fêi Kúɣâlai Yâwɛɛ a fáa mà a gɛɛ kú sáa. A ŋ̀ale-maa pú yá sú a dɛ̀ɛ kúpɔ a gɛɛ kú gbele kpɛ́ni fêi, kwa sɔnyɔ̂ŋ kɛ́ la.

¹⁵ Kú kɛ̀ lii-see kɔ̂rii, kɛ́lɛ, kúfe gáa ní. Kú kɛ̀ kɔlɔi pôno kɔ̂rii, kɛ́lɛ, mɛni kpɔ̂lu ƃé pà kúpɔ.

¹⁶ Kwa kúkpɔara-ƃelai dí kɔ́ pɛ̀lɛkɔ soo-ŋai lɛ̂wo-woo mɛnîi Daŋ ŋɔlɔii su. Dísoo sîrɛ-ŋai kɔ́ɔ mu-tìŋ a gɛ̂i ǹɔii kɛ́ kpɛ̃̀liŋ. Da pá a gɛɛ dí ǹɔii su kara da zu-sãa kélee, é máŋ kɛ́ yɛ̂ɛ daa-lee-ŋai da dísu sãai.”

¹⁷ Yâwɛɛ è mò ḿâ, “Í mɛi káa, ŋa pâi kali nyɔ́mɔɔ-ŋa nyíi-ŋai dínyiŋ fa sâlei tɛɛ̂i kásama, ǹyaŋ da pâi ká nyíniî.”

Zɛlemaya líi è tòo pôlu ǹûai maa mɛ̂ni ma

¹⁸ Ńii toɔ̂ɔi pôlu é tɛ́ɛ gɛ̂i ma. Ńii su a kara ŋ́gbonôi.

¹⁹ Ka káwoli tɔ́ɔ! Ŋa ŋánûai wɔ́lɔ-woo mɛnîi ǹɔii gwaa kélee. Ǹûai da mare kɛ̂ɛ kɛ̂i dîyɛɛi, “Yâwɛɛ fé ŋɔ́nɔ Zãiyɔŋ? Zãiyɔŋ ŋɔkâloŋ fé ŋɔ́nɔ naa?” Yâwɛɛ è mò ǹyɛɛi, “Lé mɛni ƃé da ńii ŋwânai la a díɣâla pɔɔkɔŋ-ŋai é pɛ́lɛ díɣâla da kpɛ́ni-ŋai diai?”

²⁰ Ǹûai dí mò dîyɛɛi, “Mii-sɛŋ ŋáa tɛ́ gîe ma tãi a tɛ̂ɛ, vólo-laa ƃóɔɔi a tɛ̂ɛ, kɛ́lɛ kúfe niî ŋuŋ ḿâ ƃô sɔlɔ ƃó ní.”

²¹ Ńii toɔ̂ɔi pôlu é tɛ́ɛ gɛ̂i ma kpɛ́ni fêi, ŋánûai su a kara. Ŋa malôŋ-see ƃôi, ńii toɔ́ɔ pôlu a ŋánaa.

²² Sále fé ŋɔ́nɔ Gilia? Sále-tíi kɛ́-muu fé naa? Lé ƃé kɛ́ ŋánûai dífe ƃâloi?