Ɉeremi 7 - Bible

Zɛlemaya è ɣâla-woo ƃo Ŋ̀âla-pɛrɛ Kɛ́tɛi mu

¹ Yâwɛɛ è mò Zɛlemaya ma ǹyɛɛi,

² “Tɔɔ zĩɣaŋ lá Yâwɛɛ Ŋɔpɛ́rɛ Kɛ́tɛi láƃerei í ŋ̀orɛ̂-wooi ŋí ƃó ǹûai dîa, yɛ̂ɛ dîa káai a Zuda-ƃelai, káai pà ƃɛ́ ká kɛ́ Ɣâla fɛlii, ka Yâwɛɛ wóo mɛni.

³ Ŋ̀wála-wâla kélee Yâwɛɛi nyíi gáa a Eezuɛ-ŋai Díɣâlai ǹyɛɛ, ká kátûa-pere pɛ́ŋ-pɛlɛ. À kɛ̀ tí, ŋa pâi ǹɛɛ̂i naa ká sée ǹɔii su.

⁴ Káfe kákili tɔ̀ɔ ǹúu pɛlɛ-woo-ŋai ŋí dîa a gɛɛ ka pâi ƃálo-laa sɔlɔ ƃôi zu nyíi nûa da mò dîyɛɛi, ‘Yâwɛɛ ŋɔpɛ́rɛi ká ŋí. Yâwɛɛ ŋɔpɛ́rɛi ká ŋí. Yâwɛɛ ŋɔpɛ́rɛi ká ŋí.’

⁵ “À kɛ̀ ka kátûa-pere pɛ́ŋ pɛ̀lɛ a tɔ̃yâ, kátûa a kákîe-ni a teniŋ ƃô pere,

⁶ à kɛ̀ ka wàla tûa a ŋ̀ɔ̃ya-ŋai, da diai dínâŋ-ni dífe mai, kpaa a bɔɔ-nɛyãai a nyɔ́mɔɔ, kpaa ká núu páa ƃɛ́ nyíi ŋuŋ fé mai, à kɛ̀ ka wàla ɣâla-da-kpɛ́ni-ŋa fɛli, a kákpîŋ lii ŋwàna,

⁷ gɛ̀ ni, ŋa pâi ǹɛɛ̂i naa ká sée ƃɛ́ ǹɔii ŋí su nyíi ŋáwɔ́lɔ dɛ̀ɛ kánâŋ pɔlɔ-ŋai pɔ́ wɔ́lɔ-wɔ́lɔ da wɔ́lɔ-wɔ́lɔi.

⁸ “Kɛ́lɛ, à kɛ̀ kákili tɔɔ̂i nɔ́ ǹúu pɛlɛ-woo-ŋai ŋí dîa a gɛɛ mɛni da fé pâi ká kɛ̂i kpɛ́ni fêi, Ŋ̀âla-pɛrɛ Kɛ́tɛi káa ƃɛ́, vé pâi kpɔŋ ḿâ tɛɛ̂i kápɔi.

⁹ Ka pɔ̂ri ŋúma kɛ̂i, ká núu páa, kákɛ ɣâla da kpɛ́ni-ŋa fɛ̀li, kákɛ ká fòo a lɛ́ɛ pere, kákɛ kéreŋ-sɛŋ kúŋ-nɛ̃ɛ kèreŋ Bêe ma, kákɛ ƃò ɣâla-da-kpɛ́ni-ŋa pôlu nyíi-ŋai káfe dí kɔ́ pɛ̀lɛlɔŋ,

¹⁰ ká pá kátɔɔ ŋ́ɛi túɛ bɛ́rɛi ŋí mu, nyíi ńaa seɛ̂ɛi m̀ai kákɛ mò kâa, ‘Kúŋuŋ mâ ƃôɔɔi’ ká kɛ̀ lì ŋɔ́nɔ pôlu ká mɛni nyɔ́mɔɔ kɛ́ɛi su?

¹¹ Ŋápɛrɛi ŋí káa nâa a ŋúma-ƃela kɛ̂i ká ŋɛ́i? Yâwɛɛ è mò ǹyɛɛ ńyãa kpîŋ ŋaâ ǹaa káa.

¹² Lí Silo ƃɛ́i kɛ̀ a ḿbɔ naa a m̀aa ŋuŋ í gáa berei ŋá ǹaa kɛ̀ lai kpɛ́ni fêi, Eezuɛ-ŋai dí sɔnyɔ̂ŋ kɛ̀ naa.

¹³ Yâwɛɛ è mò ǹyɛɛ, kpɛ́ni fêi, kâa m̀ɛni-ŋai ŋí kɛ́i, berei ŋá lòno la kápɔ gîe mɛi a gɛɛ káfe gɛ̀ tíi, káfe ká wóli tɔɔ ní ḿâ. Tãi ŋá ká tòli lai, káfe ŋ́oo su too ni.

¹⁴ M̀ɛni ma, ŋa pâi m̀ɛni tɔnɔi ŋá gɛ̀ a Siloi da kɛ̂i a ŋápɛrɛi nyíi kákili tɔɔ̂i mai da gwaai ma ƃɛ́i ŋáwɔ́lɔ ǹaa tɛ̀ɛ kánâŋ-pɔlɔ ŋai pɔ́ wɔ́lɔ-wɔ́lɔi.

¹⁵ Ǹyaŋ ŋa pâi kákpɛ̂i ŋ́ɛi túɛ yɛ̂ɛ berei ŋá wɔ́lɔ gɛ̀ la a ká káayɔɔ-ŋai nyíi-ŋai díkaa a Ifiraŋ ŋɔsuui su-ƃelai. Ńyãa Yâwɛɛ ƃé mò tí.”

Ǹûai dí Yâwɛɛ woo pìli

¹⁶ Yâwɛɛ è mò ǹyɛɛi, “Ífe pɛ̀lɛ a ŋ́gɔɔ ǹûai ŋí mɛ̂ni ma, kpaa máŋ í dímaa lôno kɛ́, kpɛ́ni fêi, ḿve pâi ŋ́oli tɔɔ̂i íwoo ma.

¹⁷ Ífe m̀ɛnii kâai da gɛ̂i Zuda taa-lee-ŋai su da bere-ŋai ma Zerusâlɛŋ?

¹⁸ Ǹîa-pɛlɛɛi da gɔ̀i ŋáa tɛ̂i ma, dínâŋ-ni díŋɔŋ tóo mà, ǹɛyâai dí kɛ́ félaƃai kîiŋ, dí kɛ̀ kpólo kpɛ̀tɛ ŋ̀ele-kɔlɔŋ-su kaloŋ nɛnii mî, dí kɛ̀ kéreŋ-sɛŋ sala kùla ɣâla da kpɛ́ni-ŋa dîa a gɛɛ dí gɛ́ ŋá ńii ŋwána.

¹⁹ Gáa díkili ŋá ńyãa ƃé da ńii ŋwânai? Kpao. Dia kpîŋ ƃé díkaa díkpîŋ kɛ̂i wúlee.

²⁰ M̀ɛni ma, ńyãai a Ŋ̀wála-wâla kélee Yâwɛɛi, ŋa pâi ŋá lii ŋwânai kélee pûi dîa gwaai ŋí ma. Ŋa pâi ńii ŋwânai ǹûai da daa-tulɛ-ŋai dîa, ŋa níi ŋwána ŋ̀úru-ŋai, gbâlaŋ da ŋ̀úru-ƃa-ŋai díkaa ǹɔii mai dîa. Ŋálii ŋwânai a pâi díkereniî, m̀aa ŋɔŋ fa nîiŋ.”

²¹ “Ńyãai a Ŋ̀wála-wâla kélee Yâwɛɛ nyíi gáa a Eezuɛ-ŋai Díɣâlai, ŋa môi a gɛɛ ká kákereŋ sama-sɛŋ da kásâla-sãai kélee pú gîe ma ká mii.

²² Kpɛ́ni fêi, vóloi ŋá ká kùla la Izei, fé m̀ó ní kánâŋ pɔlɔ-ŋai dîa a gɛɛ díkereŋ-sama-sɛŋ da sâla kula ḿâ.

²³ Kɛ́lɛ dɔ̂ŋ ŋá dɛ̀ɛ dípɔi ƃa, ‘Ka ŋ́oo mɛ́ni, gɛ̀ ní ŋa pâi kɛ̂i a Káɣâlai, káaŋ kákɛ ƃò a ŋánûa. Ka tûa yɛ̂ɛ berei ŋá ǹɛ la kâai, gɛ̀ ní ká kɛ̀ ɣéniɛi a pâi kɛ̂i a ǹɛ́lɛɛ.’

²⁴ Kɛ́lɛ, dífe ŋ́oo mɛni ní, kpaa máŋ dí díwoli tɔ́ɔ ḿâ. Kɛ́lɛ dítùa a dínîa-pere. Dí liî su kpanaŋɔ̂ɔi a mɛni nyɔ́mɔɔ kɛ́ɛ. Díkɛ lí pôlu pere dífa lî tuɛ-pere.

²⁵ É síɣe tãi ma kánâŋ pɔlɔ-ŋai díwɔ́lɔ kùla la Izei é tóo sâai ma, ŋa wɔ́lɔ kɛ́ nɔ́ ŋálono kɛ́-ƃelai tɛɛ̂i dípɔ naa a tãi kélee.

²⁶ Kɛ́lɛ, dífa díwoli tɔ̀ɔ ḿâ, kpaa dí ŋ́oo mɛni. Kɛ́lɛ da kɛ̂ nɔ́ ŋuŋ-su kpânaŋ kulâi. Da mɛni nyɔ́mɔɔ ŋánaa kɛ́ a tɛɛ dínâŋ pɔlɔ-ŋai dîa.”

²⁷ “M̀ɛni ma, ye ŋ̀óo-ŋai ŋí kélee ƃó dîa. Kɛ́lɛ, dífe pâi díwoli tɔɔ̂i yâ. Ya pâi dí tôlii, kɛ́lɛ, dífe pâi íwoo su toôi.

²⁸ M̀ó dîa yɛ̂ɛ ‘Ǹɔii ŋí ƃé vé ŋ̀óli tɔɔ ní Ŋɔɣâlai Yâwɛɛ ma. Dífa díyee sèe sɛŋ lɛ́ɛ mu. Tɔ̃yâ a láŋ ǹá. Tɔ̃yâ a tée kpɔ́ ǹá-gbɔ ma.’ ”

M̀ɛni nyɔ́mɔɔi dí kɛ̀ gɛ̂i Inɔ Tiŋ-tiŋ sui

²⁹ “Ka káŋuŋ ƃó ká káŋuŋ-leɣa pili. Ka wɔ́lɔ kpɔ́ ǹyée kpaya-kpayai dîa, kpɛ́ni fêi, Yâwɛɛ a ǹyée kúla ká mu, a bôlu tɔɔ kâa, káai a ǹúu-suui nyíi ǹíi ŋwânai kâai.

³⁰ “Zuda-ƃelai da mɛni nyɔ́mɔɔ kɛ́ ŋ́ɛi túɛ. Da dísãâ ƃɛlɛ kpɛɛ ŋ́goi sée ŋápɛrɛi mu da m̀aa tĩ̂a kara.

³¹ Da Tofɛ ɣalai fɛli kwaa ma kpɛtɛ Bɛŋ-Inɔ Tiŋ-tiŋ su dí kɛ̀ dílônii-sinaai da dílônii nɛyãai kûla naa a kéreŋ sala. Ḿve m̀ɛnii ŋí ƃó ní a gɛɛ dí gɛ́, kpaa ŋá ŋ́gili-ŋa sía é pîlaŋ m̀a.

³² M̀ɛni ma, Yâwɛɛ è mò a gɛɛ tãi káa pâi dífe ŋɔ́nɔ pâi ǹaa tôlii a Tofɛ, kpaa Bɛŋ-Inɔ Tiŋ-tiŋ. Da pâi ǹaa tôlii a Ǹúu-paa Tiŋ-tiŋ kpɛ́ni fêi, da pâi saa loôi ǹaa gwaa kélee kwaa dá mà fé ŋɔ́nɔ pâi kɛ̂i naa saa loo mɛ̂ni ma.

³³ Ǹûai ŋí poma a pâi kɛ̂i a ŋɔni-ŋai da vɛnɛ-sãai kɔ̃́nɔŋ ǹyaŋ núu da fé pâi kɛ̂i naa é díkpɛ.

³⁴ Ŋa pâi lii-nɛ̃ɛ da pêle kɛ́ɛ kperâi Zuda taa-ŋai kélee su da Zerusâlɛŋ pere-ŋai kélee ma. Núu da fé pâi nɛnî kpaa surɔ̂ŋ kula pêre-woo mɛnîi kpɛ́ni fêi, núu da fé pâi lɛɛ̂i ǹɔii su.”