Ɉeremi 5 - Bible

Zɛlemaya è lòno é pîlaŋ Zerusâlɛŋ ŋɔsɔnyɔ̂ŋ ma

¹ Ka kɛ́ tɛ̂i, ka kɛ́ yeŋ Zerusâlɛŋ pere-ŋai dîa. Ka ká kɔlɛ ma káa, ká mɛni maa kpɛ́ɛ. Ka ǹɔ́ɔ tɔ̀ɔ kwaa-ŋai ma káa, à kɛ̀ ka pâi núu da kâai naa, nyíi a tûa a teniŋ ƃô perei, nyíi a dɔ̃yâi ŋ̀aa-see kɛ̀ Ɣâla ŋ̀ɛ́i. À kɛ̀ tí, Yâwɛɛ a pâi Zerusâlɛŋ ŋɛ́i malôŋ kâai.

² Berei ka ká fòo la kâa, “Tãi nɔ́ Yâwɛɛ káa la ɣelêi mai,” kɛ́lɛ ka ká fòo a lɛ́ɛ-pere.

³ Tɔ̃yâ ma, Yâwɛɛ káa teniŋ ƃô laa kɔ̂rii. È ká lòkwa, kɛ́lɛ káfe káwoli tɔɔ ní m̀a. Káfe fáa ní ma a gɛɛ ká mɛni maa kɔ́ri. Káŋuŋ su a kpanaŋ kpɔ́ yɛ̂ɛ kɔni. Ǹyaŋ káfe niî kápôlu tɔ̀ɔ ní kásɔnyɔ̂ŋ-ŋai dîa.

⁴ Nya ƃe ńyɛ̂ɛi “Gôlo-ƃelai da diai dífa mɛni ŋá kaai, dia nɔ́ ká ŋí. Kpɛ́ni fêi da tûa nɔ́ a ƃoo-pere. Dífe Yâwɛɛ ŋɔperei kɔ́lɔŋ, dífe tela Díɣâlai ŋɔtɔ̂ŋ kɔ́lɔŋ.

⁵ Ŋa pâi nâa liî ǹúu láa túɛ-ƃelai pɔ́ ŋá lóno dípɔ. Tɔ̃yâ ma, dia ƃé Yâwɛɛ tûa-pere kɔ́lɔŋ nyíi gáa a m̀ɛnii Ɣâla a ŋ̀wɛ̂lii.” Kɛ́lɛ díkelee da fáa m̀a da díyee kúla Yâwɛɛ ŋɔwála-wala laai mu da ŋ̀óo pí lî.

⁶ M̀ɛni ma, yala-sulu-ŋa da pâi kulâi ǹɔɔi sú dí dípaa. Bala-ŋa da pâi kulâi vɛ̃ɛ-kpâlaŋ su dí pá dí dípaa. Kɔ́li-ŋa da pâi díyee-ŋa ƃôi dítaa-ŋai su. À kɛ̀ núu da a tòo dísama, da pâi vála fâlai. Kpɛ́ni fêi dísɔnyɔ̂ŋ a táma, da dípôlu tɔ́ɔ Ɣâla mà a tãi kélee.

⁷ Yâwɛɛ è dímarê kɛ̀, “Ŋa pâi ká sɔnyɔ̂ŋ su-mɛni lɛɛ-pere kɛ̂i lɛ́ŋ? Kánîa-pɛlɛɛi da dípôlu tɔɔ ḿâ, dí kɛ́ ɣâla-ŋa fɛ̀li nyíi-ŋai dífe a tɔ̃yâ ɣalai. Ŋá dí kɔ̃́nɔŋ kùla dí píla, kɛ́lɛ dí kɛ̀ nɔ́ wulu-wulu kɛ̂i. Díkɛ kîrɛ sìɣe wulu-wulu kɛ́-ƃela dípɛrɛ-ŋai lá.

⁸ Dí káa yɛ̂ɛ soo-sirɛ kɛ́tɛ lɛ́lɛɛ-ŋa nyíi-ŋai kɛ̀ a dílaa-fɛɛ a wulu-wulu kɛ́ mɛni, dí kɛ̀ ƃò dílaoi-ni dínɛyâai pôlu.

⁹ À kɛ̀ tí, ḿva pɔ̂ri díkula maa kɛ̂i m̀ɛni-ŋai ŋí mɛ̂ni ma? À kɛ̀ lɔii-ŋuŋ da à dûa sii ŋí kɛ̀, ḿva pɔ̂ri gula maa kɛ̂i?

¹⁰ Ka lí díkpɔmɔ-ƃa kpalaŋ ŋá ká da-ni su kara. Kɛ́lɛ káfe gélee kpúŋ su kàra. Díwoŋo-ŋai nɔ́ ƃé ká dée dîa kpɛ́ni fêi, dífe a Yâwɛɛ pɔ́ɔ.

¹¹ Eezuɛ da Zuda-ƃelai da dípôlu tɔ́ɔ kpɔ́ ḿâ a zu kɛ́tɛ. Ńyãa Yâwɛɛ ƃé mò tí.”

Yâwɛɛ è ǹyée kùla Eezuɛ mu

¹² Da lɛ́ɛ támaa kɛ́ a pîlaŋ Yâwɛɛ ma da m̀ó dîyɛɛi, “Vé pâi sɛŋ da kɛ̂i. Mɛni nyɔ́mɔɔ da fé pâi kú kɛ̂i. Púru fé pâi toôi kûa kpaa kɔ́ é pá kûa.

¹³ Ɣâla ŋɔlóno kɛ́-ƃelai díkaa nɔ́ yɛ̂ɛ fãa. Ɣâla ŋɔwóoi fé ŋɔ́nɔ dí lá. M̀ɛni ma m̀ɛnii dí mòi, a pâi kɛ̂i a dia.”

¹⁴ M̀ɛni ma m̀ɛnii Ŋ̀wála-wâla kélee Yâwɛɛ è m̀oi nya ƃa: “Kpɛ́ni fêi da m̀ɛni-ŋai ŋí ƃó tíi, ŋa pâi ŋ̀óo kɛ̂i íla a ŋɔŋ, ŋá ǹûai ŋí kɛ́ a kɔi. À kɛ̀ tí, ŋɔŋ a pâi díkêrenii.”

¹⁵ Yâwɛɛ è mò ǹyɛɛ, “Káai a Eezuɛ-ƃelai, ŋa pâi ká kpɔara-ƃela kulâi lɔii su kôyaa su ŋá pá a dia dí kɔ́ pɛ̀lɛ pɛ́lɛ kâa. Da pâi kɛ̂i kpɔ́ a lɔii pɔlɔ-pɔlɔɔ. Ká fé pâi kɛ̂i díwoo mɛnîi, káfa târe díwoo su.

¹⁶ Dí kɔ́kɔ-ƃelai da núu paa dífaa ŋ̀ɛ́i malôŋ kàa.

¹⁷ Da pâi ká sí-sãa ƃai ká ŋ̀áa tɛ̀ gîe mai miî é pɛ́lɛ kámii-sãai dîa. Da pâi ká lônii-sinaai da ká lônii nɛyãai paâi. Da pâi káƃala kpulu-ŋai da ká taa-tulɛ-ŋai miî. Da pâi ká kpɔmɔ-kpalaŋ-ŋai da ká fîi wuru-ŋai miî. Gɔ-kuluƃa-ŋai da pâi dítaa maa kɔ́naŋɔɔ-ŋai nyíi ŋai díkili tɔɔ̂i m̀ai su karâi a ƃóa-sɔkpɔ-ŋa.”

¹⁸ Yâwɛɛ è mò ǹyɛɛi, “Ŋ̀ele-ŋai tí yée mu, ḿve pâi ŋánûai kélee kpɔ́ paâi.

¹⁹ Ǹyaŋ à kɛ̀ da ímarê kɛ̀ lé mɛni ƃé ŋá m̀ɛni-ŋai ŋí kɛ̀ la a diai, m̀ó dîa yɛ̂ɛ, ‘Berei ká kápôlu tɔ̀ɔ la m̀ai kákɛ ɣâla da kpɛ́ni-ŋa fɛli la ká lɔii sui, m̀ɛni ma ka pâi kɛ̂i tíi kɛ̂i nûa da kpɛ́ni-ŋa dîɛ lɔii da kpɛ́ni su nyíi vé a káwɔ̂i.’ ”

Ɣâla è ŋɔnûai lia-woo ƃò

²⁰ Yâwɛɛ è mò ǹyɛɛi, “Mó Zeeka ŋɔsuui su-ƃelai dîa, m̀ó dia:

²¹ Ka káwoli tɔ́ɔ káai táre fé káŋuŋ su ka tûa nɔ́ a ƃoo-perei, káai káŋɛi-gao káa kâa, kɛ́lɛ káfa kwaa kâai, káwoli kɛ́ ƃò kâa, kɛ́lɛ káfa mɛni mɛ̂nii.

²² Ńyãa ƃa Yâwɛɛ, lé mɛni ƃé káfa ƃaa-kɛ-ma tɛ̂ɛ la ḿbɔi? Lé mɛni ƃé káfa kpɛ̃̂liŋ la ŋ́ɛi túɛi? Ŋá ŋaya kɛ̀ a yúo ŋɔgɔ̃yɛŋ-pere, gáa a gɔyɛŋ-pere kpanaŋɔɔ nyíi va pɔ̂ri maa tíyeniî. Ǹyuoi a pɔ̂ri túmo-tumoi, kɛ́lɛ, va pɔ̂ri naɣînii m̀ɛi. Ǹyái ŋɔzikɛ-zikɛi a pɔ̂ri toôi, kɛ́lɛ, va pɔ̂ri tɛɛ̂i gɔyɛŋ-perei mɛi.

²³ Kɛ́lɛ, kákaa a nûa ŋuŋ-su kpanaŋɔɔ nyíi-ŋai da dí pôlu tɔɔ ḿâ. Ka tínaŋ ka kápôlu tɔɔ ḿâ.

²⁴ Káfe kákili-ŋa sia ní a gɛɛ ká ƃaa-kɛ-ma tɛ́ɛ ḿbɔ, berei ŋá dunai maa-ŋuŋ da gbɛɛ-ŋai tɛ̀ɛ la ká pɔ́ é gɛ́ ká mii-sãa támaa sɔlɔ ƃó a kóraŋ kéleei.

²⁵ Kɛ́lɛ, kásɔnyɔ̂ŋ-ŋai da ká kpéra m̀ɛni-lɛ́lɛɛ-ŋai ŋí sɔlɔ ƃôi.

²⁶ “Ŋ̀wana lɔ̂ɔ-ƃela díkaa ŋánûai sáma. Da dílòo díperêi yɛ̂ɛ núu a díɣaŋ làa ŋɔni-ŋa perei a gɛɛ é dísoŋ lai.

²⁷ Berei tí loŋso a ŋɔsiɣâŋ láa fɛ̂ɛ la a ŋɔni-ŋai, bere nɔ́ ƃé da dípɛrɛ-ŋai láa fɛ́ɛ la a wôya sãa. Zɛŋ ƃé a gɛ́ wála-wala laa támaa káa díyêei dítɔɔ a ŋ̀ánaa,

²⁸ da dílaa mîi, díkpaya-kpaya. Díŋwana lɔ̂ɔ tua-ŋai kɔ̃́yɛŋ fé ma. Dífa tûa a dee-loŋ-ŋai a teniŋ ƃô pere, kpaa dítûa a zã́a a diai díkaa mɔ̃lɛi.

²⁹ “Kɛ́lɛ, Ńyãa Yâwɛɛ ŋa pâi díkula ma kɛ̂i m̀ɛni-ŋai ŋí mɛ̂ni ma. Ŋa pâi mɛni kpa kulâi ǹɔii-ŋuŋ ŋí dîa.

³⁰ M̀ɛni maa-pɔlɔ-pɔlɔɔ da laa-kpala-maa mɛni-ŋa da kɛ́ ǹɔii ŋí su.

³¹ Ɣâla ŋɔlóno kɛ́-ƃelai dífa ŋɔ́nɔ mɛni da kpɛ́ni ƃò, fɛ̂ɛ dílɛɛ kɛ́. Zâla láa-soŋ-ƃelai da tûa nɔ́ yɛ̂ɛ ƃerei Ɣâla ŋɔlóno kɛ́-ƃelai da kɛ́ dîa ka tûa lai, ǹyaŋ ŋánûai dífa díyee kùla díwoo mu. Kɛ́lɛ, lé ƃé da pâi gɛ̂i à kɛ̀ m̀ɛni-ŋai ŋí kélee a seri gɔ̃yɛŋ mai?”