Ɉeremi 43 - Bible

Dí lì a Zɛlemaya Ize lɔii su

¹ Ŋá nâa m̀ɛni-ŋai kélee ƃò ǹúai dîa nyíi-ŋai Díɣâlai Yâwɛɛ è ńdɛ̀ɛ a gɛɛ ŋá m̀ó dîai.

² Ǹaa kɛ́ɛ tíi, Osîya ǹóŋ Azaria, Zoanaŋ nyíi kɛ̀ a Karia ǹóŋ da ŋ̀ɛi tɛ̂-sinaai dí mò ḿâ dîyɛɛi, “Íkaa lɛ́ɛ kɛ̂i. Kúɣalai Yâwɛɛ fé ítɛɛ ní a gɛɛ í m̀ó kûa a gɛɛ kúfe lì Ize lɔii su.

³ Kɛ́lɛ Neraya ǹóŋ Baru ƃé ítɛ̀ɛ a gɛɛ í tɔ́ɔ kûa. A gɛ̂i tí a gɛɛ Babelɔŋ-ƃelai dí pá dí kúyee-mɛi ɣále dí kúpaa kpaa máŋ dí lí a kúa Babelɔŋ.”

⁴ M̀ɛni ma, é máŋ kɛ́ yɛ̂ɛ Zoanaŋ, gɔ-kuluƃa-ŋai mɛi-ƃelai, kpaa máŋ ǹûai, dí tɔnɔ da fé ŋ̀óli tɔɔ ní Yâwɛɛ wóo ma a gɛɛ dí lɛ́ɛ Zuda a dɔnɔ kpîŋ.

⁵ Nya ƃe Zoanaŋ da Gɔ-kuluƃa-ŋai mɛi-ƃelai dí ǹûai kélee sìɣe lɛ̀ɛ Zudai dí lí a dia Ize lɔii su. Dí lì máŋ a ǹûai nyíi-ŋai lène pôlu Zuda dí kúla ǹɔii-ŋuŋ da kpɛ́ni-ŋai su ƃɛ́i dí kɛ̀ a dítaa-taa naai.

⁶ Dí lì a zinâai, ǹɛyâai, ǹîa-pɛlɛɛi da gâloŋ ǹônii-nɛyãai. Dí lì a ǹûai nyíi-ŋai Babelɔŋ kɔ-kuluƃa-ŋai mɛi-nuui Nɛbuzaradaŋ è wɔ́lɔ dí lɛ̀ɛ Zerusâlɛŋ Gidalia yée mui, é pɛ́lɛ kwa Bâru kûa.

⁷ Dí Yâwɛɛ wóo pìli dí lí kpɔ́ Ize lɔii su taa-lêe tɔnɔ su nyíi da dòli a Tapaɣee.

⁸ Nya ƃe Yâwɛɛ è mò ḿâ ǹyɛɛi,

⁹ “Kɔni-kao kpaya-kpaya-ŋa siɣe í díloo bɔ̂rɔ-yoloi-mu Tapaɣee kaloŋ pɛrɛi ŋɛ́i-tuɛ daa-lêei su. Tãi ya kɛ̀ m̀ɛnii ŋí kɛ̂i lai, ǹɛɛ naa Eezuɛ-ƃelai da-ni dí íkaa gɛ̂i.

¹⁰ À kɛ̀ tí, m̀ó dîa a gɛɛ Ńyãai ŋ́gaa a Ŋ̀wála-wâla kélee Yâwɛɛ, Eezuɛ Ŋɔɣâlai, ŋa pâi pâi a ńyee mu-nuui Nɛbukinaza, Babelɔŋ kaloŋ gwaai ŋí ma. A pâi ŋɔkâloŋ ƃuui tɔɔ̂i ƃɛ́ gɔni-ŋai ŋí mɛi nyii ŋá mò yâ a gɛɛ í dí lóoi.

¹¹ A pâi pâi é Ize-ƃelai yée mɛi ɣále. Diai kélee gáa a sɛŋ kɔlɔ-fela é dípaai, da pâi lɛɛ̂i kɔlɔ-fela yée mu. Diai nyíi kélee gáa a sɛŋ dí dísoŋ a kɔ-sôŋ-ŋai, da pâi dísonîi a kɔ-sôŋ-ŋa. Diai nyíi kélee gáa a sɛŋ dílɛɛ kɔ́ sui, da pâi lɛɛ̂i kɔ́ su.

¹² Ŋa pâi ŋɔŋ toôi Ize ɣala-ŋai dípɛrɛ kpaya-kpayai dîa. Babelɔŋ kaloŋ a pâi díɣala-ŋai kérenîi, kpaa máŋ é lí a dia. Babelɔŋ kaloŋ Nebukinɛza a pâi Ize ma ɣɛ̂ɛi kpɔ́ yɛ̂ɛ berei tí ƃála mɛi-kaa-nuu a nãya ɣɛ̂ɛ la ŋɔseɣei ma nyii m̀ála-ŋai da ǹɛɛ mai. A pâi Ize yée mɛi ɣâlei bere sîi ŋí su, é lí yɛ̂ɛ wála-wala nuu.

¹³ A pâi Ɛliopole ŋɔpɔɔkɔ̂ɔŋ maa-waai wôloi nyii gáa Ize, é ŋɔ́nɔ Ize-ƃelai díkpɛtɛ ɣâla-ŋai díɣâla-pɛrɛ kpaya-kpayai kélee kéreŋ.”