Ɉeremi 42 - Bible

Ǹûai dí Zɛlemaya marê kɛ̀ a gɛɛ é Ɣâla fɛli dímɛ̂ni ma

¹ Nya ƃe Karia ǹóŋ Zoanaŋ, Ozariya ǹóŋ, gɔ-kuluƃa-ŋai mɛi-ƃelai da ǹûai kélee

² dí mò ḿâ dîyɛɛi, “Kpera yɛ̂ɛ ye m̀ɛnii kɛ́ kûɛ nyíi kwa ŋ̀wɛ̂lii í gɛ̀ kûɛi! Íɣâlai Yâwɛɛ fɛli kûɛ. Vɛli kúa kpulu-loŋ ŋí kwâa lɛɛi kúmɛni ma. Kú wɔ́lɔ kɛ̀ a kútamaa, kɛ́lɛ, kwaâ lɛ̀ɛ nɔ́ a kúkpulu lôŋ yɛ̂ɛ berei ya kúkâai lai.

³ Íɣâlai Yâwɛɛ fɛli a gɛɛ é berei lɛ́ kûa nyíi kwa pɔ̂ri siâi lai, da m̀ɛnii kwa pɔ̂ri gɛ̂i.”

⁴ Nya ƃe ŋá díwoo su tòo ńyɛ̃ɛ dîai, “À kɛ̀ tí, gɛ̀ ní mɛni lɛ́lɛɛ ká tí. Ŋa pâi Kúɣâlai Yâwɛɛ fɛlîi yɛ̂ɛ berei ká ḿarê kɛ̀ la a gɛɛ ŋá gɛi. Ǹyaŋ m̀ɛnii kélee a pâi môi, ka pâi mɛnîi. Ḿve pâi dɔnɔ kpîŋ lɛɛ̂i pôlu.”

⁵ Dí mò ḿâ dîyɛɛi, “Tɔɔ Yâwɛɛ é kúmaa sêre faa kɛ́ a teniŋ ƃô da tɔ̃yâ-pere à kɛ̀ kwà wàla kúwoli tɔ́ɔ m̀ɛnii ma Kúɣâlai Yâwɛɛ a mò kûai.

⁶ A nɛ̃ɛ ma é kɛ́ a ǹɛ́lɛɛ, kpaa ǹyɔ́mɔɔ, kwa pâi kúwoli tɔɔ̂i Kúɣâlai Yâwɛɛ wóo ma nyíi kú ímarê kɛ̀ a gɛɛ í vɛli kúmɛni mai. M̀ɛnii kélee a pâi kɛ̂i a ǹɛ́lɛɛ à kɛ̀ kwà kúwoli tɔ̂ɔ ŋ̀óo ma.”

Yâwɛɛ è Zɛlemaya ŋɔɣâla-fɛli wooi su tòo

⁷ Ɣele kûu puu tɛɛ́ pôlu ma, Yâwɛɛ è lòno ḿbɔ.

⁸ Nya ƃe ŋá Zoanaŋ, gɔ-kuluƃa-ŋai mɛi-ƃelai da ǹûai kélee tòli.

⁹ Ŋá díkili ŋá pòno ńyɛ̃ɛ dîai, “Eezuɛ Ŋɔɣâlai Yâwɛɛ nyíi ká ńdɛ̀ɛ bɔ́ naa a gɛɛ ŋá m̀arê kɛ́ kámɛ̂ni mai ǹyɛɛi,

¹⁰ ‘À kɛ̀ ka ŋ̀wɛ̂lii kálɛɛ ǹɔii ŋí ma kákaa naai, gɛ̀ ní ŋa pâi káseêi kulâi. Ḿve pâi ǹɛɛ̂i naa káa tóo. Ŋa pâi kásîi ƃɛ́, fa ká wèeŋ. Berei sîi ŋá kákùla maa kɛ̀ lai, aâ gɛ́ malôŋ a too ḿâ a ŋ̀ánaa.

¹¹ Káfe nâa yào Babelɔŋ kaloŋ ma. Ŋ́gaa kákɔlɛ. Ǹyaŋ ŋa pâi kákulâi ŋɔwála-wala laai mu,

¹² kpɛ́ni fêi, ŋa pâi gɛ̂i é káŋɛi malôŋ káa é ǹɛɛ naa ká lí pôlu kápɔ-taai. Ńyãa Yâwɛɛ ƃé mò tí.’

^13-15 “Kɛ́lɛ, káa kpulu loŋ ŋí ka lɛ̀ɛ Zuda lɔii sui, káfe Káɣâlai Yâwɛɛ wóo pìli ká kúla ǹɔii ŋí su. Káfe mò kâa, ‘Kpáo, kwa pâi liî kú sée Ize ƃɛ́i kɔ́ fé naai, kpaa máŋ kú kɔ́ toli-ƃo turu-wóo mɛni, kpaa máŋ puru é kú páa naa.’ À kɛ̀ kà m̀ɛni-ŋai ŋí ƃó tí, gɛ̀ ní Ŋ̀wála-wâla kélee Yâwɛɛ, nyíi gáa a Eezuɛ Ŋɔɣâlai è mò ǹyɛɛ, ‘À kɛ̀ kaâ gbɛtɛ a gɛɛ ká lí Ize,

¹⁶ gɛ̀ ní, gɔ́i tí a pâi kákâai naa. Puru a pâi toôi kâa naa, à kɛ̀ tí ka pâi saâi Ize.

¹⁷ Diai kélee daâ gbɛtɛ díkili ŋá a gɛɛ dí lí Izei, da pâi saâi naa kɔ́ su, puru yêei, kpaa máŋ kɔlɔ-fela su. Díta tɔnɔ kpîŋ fé pâi ƃâloi, kpaa máŋ dítɔnɔ ta é kúla m̀ɛni kpɔ̂lui su nyíi ŋa pâi la naa dîai.’

¹⁸ “Eezuɛ Ŋɔɣâlai Yâwɛɛ ǹyɛɛ, ‘Berei nɔ́ ŋá ńii ŋwàna la Zerusâlɛŋ ma a ŋ̀ánaai, bere nɔ́ ƃé ŋa pâi ńii ŋwânai la diai dîa pâi liî Izei. Ka pâi mɛni mĩli miliɛɛ-ŋa kâai nyii pâi nûa láa kpâlai dâi. Nûa da pâi kákɛ̂i a ɣɛlɛ-maa sɛŋ, dí kálaa síɣe a kpalo-sɛŋ. Káfe ŋɔ́nɔ pâi gwaai ŋí ma kâai kpɔ́ a dɔnɔ kpîŋ.’ ”

¹⁹ Nya ƃe ŋá mò ńyɛ̃ɛi, “Yâwɛɛ aâ mò káa kpulu loŋ ŋí kâa lɛ̀ɛ Zudai a gɛɛ káfe lì Ize. M̀ɛni ma, ŋa kália-woo ƃôi lônii ma

²⁰ a gɛɛ ká káa pɔara mâa kɛ́tɛ kɛ̂i. Ká ḿarê kɛ̀ a gɛɛ ŋá Kúɣâlai Yâwɛɛ fɛli kámɛni ma. Ká Kákono tèe a gɛɛ ká pâi m̀ɛnii kélee kɛ̂i a pâi môi.

²¹ Kɛ́lɛ, ŋaâ m̀ó kâa, ǹyaŋ ka ŋ́oo pilîi. M̀ɛnii Kúɣâlai Yâwɛɛ è mò ḿâ ŋá m̀ó kâai, káfe gɛ̂i.

²² Nyíŋi é lɛ́ɛ kákili ŋá a gɛɛ ka pâi lɛɛ̂i kɔ́ su, puru da kɔlɔ-fela dí kápaa ǹɔii su ƃɛ́i ka pâi liî ká sée naai.”