Ɉeremi 41 - Bible

¹ Maa kôraŋ tí ŋɔɣáloŋ lɔ́ɔlu-mɛi feerɛi su, nalôŋ tɔnɔ nyíi da kâa kɛ̀ ma Isimɛi è pà. Isimɛi ŋí ǹâŋ láa ƃé kɛ̀ a Nɛtatiɛ. Nɛtatiɛ ǹyaŋ è kɛ̀ a Ilisama ǹóŋ. Ilisama è kɛ̀ a gâloŋ ŋɔsuui su nuui da, gɛ́ ƃò ŋɔ́nɔ a díi kɛ́-nuu kɛ́tɛi dɔnɔ. Isimɛ da kpakolo puu dí lí Mesipa Gidalia pɔ́ naa nyíi kɛ̀ a gâloŋ. Tãi da dîa-ni dí kɛ̀ dílaa miî lai,

² Isimɛ da gbakolo puui ni dí dípili-kpãai kùla dîa dí Gidalia pàa.

³ Isimɛ è ŋɔ́nɔ Eezuɛ-ƃelai kélee pàa kɛ̀ Mesipai da Babelɔŋ kɔ-kuluƃa-ŋai.

⁴ Gedalia paá pôlu ma-ɣelei núu da kélee é lɛ́ɛ pâi gɔ́lɔnîi,

⁵ kpakolo buu lɔ́ɔlu mɛi-saaƃa dí kùla Sɛkɛŋ, Silo da Sameria. Ǹûai ŋí dí díla-leɣa pù dí díseɣe-ŋai fála-fàla dîa dí díkpîŋ ŋwána-ŋwàna. Dí kɛ̀ liî a mii-sɛŋ da kéreŋ sɛŋ kúŋ nɛ̃ɛ a gɛɛ dí dɛ̀ɛ Ŋ̀âla-pɛrɛ Kɛ́tɛi lá.

⁶ Nya ƃe Nɛtatiɛ ǹóŋ Isimɛ è kùla Mesipa a gɛɛ é dí perei tɔ̀ɔ. È kɛ̀ wɔ̂lɔi gɛ́ lì ǹyɛɛ dîai, “Ka pá ká Aikaŋ ǹóŋ Gidalia káa.”

⁷ Kɛ́lɛ dí kɛ́ɛ da tɛ́ daai sui, Nɛtatiɛ ǹóŋ Isimɛ da ŋɔnûai dí dípàa dí dípoma píli ya-loa tɔnɔ su.

⁸ Kɛ́lɛ kpakolo puu è kɛ̀ ǹúu-kpului ŋí sáma. Dí mò Isimɛ ma dîyɛɛi, “Kpera yɛ̂ ífe kúpàa! Wîi, bale, ɔle-wulɔ da kɔ̃́iŋ-wulɔ káa kúyêei ǹoo-perei ǹɔɔi su.” Nya ƃe è tèe dípôlu.

⁹ Nya-loai nyíi Isimɛ è ǹûai poma pîli zui ƃé kɛ̀ a ǹya-loai kɛ́tɛi nyíi gâloŋ Asa è wɔ́lɔ dèe a tãi Eezuɛ kaloŋ Basa è wɔ́lɔ kɔ́ pɛ̀lɛ la m̀ai. Isimɛ è ǹya-loai ŋí láa fɛ̀ɛ kpɔ́ a poma.

¹⁰ Nya ƃe è gâloŋ ǹônii-nɛyãai sôŋ a kɔ-sôŋ-ŋa da ǹûai kélee kɛ̀ Mesipai. Ǹûai ŋí ƃé Babelɔŋ kɔ-kuluƃa kɛ́tɛi è wɔ́lɔ da Gidalia ni lɛ̀ɛ ǹɔii mɛi. Isimɛ è dísòŋ a kɔ-sôŋ-ŋa é lí a dia Amɔŋ lɔii-kpiniŋ su-pere.

¹¹ Kɛ́lɛ Kɛria ǹóŋ Zoanaŋ da gɔ-kuluƃa-ŋai mɛi-ƃelai dí m̀ɛni nyɔ́mɔɔ sãŋ Isimɛ è gɛ̂i tuŋ mɛ̀ni.

¹² Nya ƃe da díkɔ-kuluƃa-ŋai dí lɛ̀ɛ Nɛtatiɛ ǹóŋ Isimɛ pôlu a gɛɛ dí kɔ́ pɛ́lɛ m̀a. Dí lɛ̀ɛ bôlu dí zoŋ bóa kɛ́tɛi ma kɛ̀ Giƃiɔŋ kɔlɛ mai.

¹³ Tãi Isimɛ ŋɔkɔ sôŋ-ŋai dí Zoanaŋ da gɔ-kuluƃa-ŋai kàa la dí kɛ́ pâi, dí lène pôlu a lii-nɛ̃ɛ,

¹⁴ dí kɛ̀ lì dípɔ naa pere.

¹⁵ Kɛ́lɛ Isimɛ da ŋɔnûai ǹɔ́ɔlu-mɛi saaƃa dí pù Zoanaŋ yêei dí lí Amɔŋ-ŋai dílɔii su.

¹⁶ Nya ƃe Zoanaŋ da gɔ-kuluƃa-ŋai mɛi-ƃelai kɛ̀ bôlui dí nâa ǹûai Isimɛ è dísòŋ Mesipa a kɔ-sôŋ-ŋai Gidalia saá pôlu mai sîɣe. Ǹûai ŋí dí kɛ̀ a kɔ-kuluƃa-ŋa, nɛyâa, nîa-pɛlɛɛ, da nɛyâa mɛi káa-ƃela.

^17-18 Kɛ́lɛ ǹûai ŋí dí kɛ̀ yaôi Babelɔŋ-ƃelai dîa, kpɛ́ni fêi, Isimɛ è Gidalia pàa nyíi Babelɔŋ kaloŋ è nɛ̀ a ǹɔii-mɛi káa-nuui. Nya ƃe dí nâa Ize perei sîɣe a gɛɛ dí pú Babelɔŋ-ƃelai yêei. Díkɛɛ liî Izei, dí kpèra Sîaŋ ƃɛ́i ǹaa káa Bɛpeleɣɛ̃ɛ kɔlɛ mai.