Ɉeremi 39 - Bible

Dí Zerusâlɛŋ sòŋ

¹ Zɛdikaya kɛ́ɛ a kâloŋ Zuda lɔii mɛi ŋɔkóraŋ ǹɔ́ɔlu mɛi náaŋ ŋɔɣáloŋ buui su ƃé Babelɔŋ kaloŋ Nɛbukinaza da ŋɔkɔ kuluƃa-ŋai kélee dí pà la dí kɔ́ pɛ́lɛ Zerusâlɛŋ ma.

² Tãi Zɛdikaya è kɛ̀ la gâloŋ-laai su ŋɔkóraŋ puu-kao tɔnɔi ŋɔɣáloŋ ǹáaŋ ŋɔfólo lɔ́ɔlu-mɛi-náaŋ ɣele ƃé dí ziɣãŋ wôlo la Zerusâlɛŋ ma.

³ Díkɛɛ da Zerusâlɛŋ soŋ, Babelɔŋ kaloŋ ŋɔtíi kɛ́-ƃela kpaya-kpayai dí tɛ̀ Zerusâlɛŋ dí sée ziɣãŋ sâmai ŋɔi lá. Diai kɛ̀ naai dia ƃa: Nɛga Sarizɛ, Saŋga Nebo, Sasisiŋ Nɛga Sarizɛ é pɛ́lɛ Sarizɛ gbélii ma.

⁴ Tãi Gâloŋ Zɛdikaya da ŋɔkɔ-kuluƃa-ŋai dí m̀ɛnii ŋí naa kàa lai, dí kɛ̀ kɔ̂i a gɛɛ dí pú a gbínii dí kúla daai su. Nya ƃe dí tɛ̀ɛ a gâloŋ ŋɔpɛ́rɛi kɔlɛ pere dí tɛ́ɛ a ziɣãŋ lá-ƃerei pere nyíi kɛ̀ ziɣãŋ feerɛi loai dí pú dí lí diŋ-tiŋ su Zɔdiŋ Ya-leei ma pere.

⁵ Kɛ́lɛ Babelɔŋ kɔ-kuluƃa-ŋai dí pɛ̀lɛ dí kpɛ̂i é lɛ́ɛ la zu dí Zɛdikaya soŋ diŋ-tiŋ su Zɛleko kɔlɛ ma. Nya ƃe dí lì la Gâloŋ Nɛbukinaza pɔ́ naa Lebila taa-leei su nyíi kɛ̀ Ama lɔii kpiniŋ sui. Ǹaa ƃé Nɛbukinaza è ŋɔmɛnii ŋá tèe naa.

⁶ Lebila ƃé Nɛbukinaza è Zɛdikaya ǹônii-sinaai kélee kpɔ́ pàa naa Zɛdikaya ŋɛ́i-tuɛ. È ŋɔ́nɔ Zuda tii kɛ-ƃela kpaya-kpayai kélee kpɔ́ pàa kpɔlɔwɔ.

⁷ Ǹaa pôlu ma, è Zɛdikaya ŋɛ́i gao veerɛ wòlo é yɔlɛ tòo ǹeŋei é dɛ̀ɛ Babelɔŋ.

⁸ Ǹaa kɛ́ɛ tíi, Babelɔŋ kɔ-kuluƃa-ŋai dí gâloŋ pɛrɛi kêreŋ da ǹûai díwɔ̂-ŋai. Dí ziɣãŋ wôlo máŋ nyii kɛ̀ a dínaŋɔɔ Zerusâlɛŋ mai.

⁹ Nya ƃe Nɛbuzaradaŋ da nyíi kɛ̀ a gɔ-kuluƃa-ŋai mɛi nuui è nâa ǹûai kpéli-ŋai kélee sòŋ a kɔ-sôŋ-ŋa da diai yâo ma dí díkpîŋ tɛɛ bɔ́i, é lí a díkelee Babelɔŋ.

¹⁰ Ǹûai nyíi-ŋai Nɛbuzaradaŋ è dí lɛ̀ɛ Zudai ƃé kɛ̀ a gôlo-ƃelai nyíi-ŋai dí kɔ̃liŋ da fé kɛ́ ní mai. Nya ƃe è lɔii-ŋa da kpɔmɔ-ƃa kpalaŋ-ŋa tɛ̀ɛ dípɔ.

Dí Zɛlemaya ŋuŋ-ma ƃò

¹¹ Gâloŋ Nɛbukinaza è ŋɔkuluƃa-ŋai mɛi-nuui Nɛbuzaradaŋ tɛ̀ɛ ǹyɛɛ,

¹² “Lí í Zɛlemaya kɔ́ri, ímɛi káa. Ífe mɛni ŋánaa sii da kɛ̀ la. Kɛ́lɛ m̀ɛnii nyíi kélee a mò yâi, gɛ́ mì.”

¹³ Nya ƃe Nɛbuzaradaŋ da díi kɛ́-ƃela kpaya-kpayai, Nɛbusabaŋ da Nɛga Sarizɛ é pɛ́lɛ díi kɛ́-ƃela kpaya-kpayai kpéli-ŋai dîa kɛ̀ Babelɔŋ.

¹⁴ Dí pà dí ŋ́gula gɔ́kuluƃa-ŋai dípɛrɛi lá kpini-pɛrɛi mu. Dí ńdɛ̀ɛ Aikaŋ ǹóŋ Gɛdalia pɔ́ naa, nyíi kɛ̀ a Safaŋ ǹóŋ ŋɔlòŋ a gɛɛ é ḿɛi káa é lɛ́ɛ la zu ŋá seri ḿbɔ-taai ńɛŋ-kpɛlɛɛ. Nya ƃe kwa ǹûai kú lɛ̀ɛ naa.

Kili-kɛ-zu káa Ɛbemelɛ mɛni ma

¹⁵ Tãi ŋá kɛ̀ niî la gbini-pɛrɛi mu gɔkuluƃa-ŋai díkpini-pɛrɛi mui, Yâwɛɛ è mò ḿâ,

¹⁶ a gɛɛ ŋá m̀ó Itiopia ǹúui Ɛbemelɛ ma a gɛɛ Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai ǹyɛɛ, “Yɛ̂ɛ berei nɔ́ ŋá mò lai, ŋa pâi daai ŋí su karâi. Ǹaa fé pâi ƃûu ƃôi. Ǹyaŋ à kɛ̀ m̀ɛnii ŋí a kɛ̀, ya pâi kɛ̂i naa í ǹaa káa.

¹⁷ Kɛ́lɛ, ńyãa Yâwɛɛ, ŋa pâi ímaa kɔ̃ɔ̂i. Dífe pâi ítɛɛ̂i diai pɔ́ ya yaôi dîai.

¹⁸ Ŋa pâi ímɛi kâai. Dífe pâi ípaâi. Ífulu-laai a pâi lɛɛ̂i íyêei a ífela-fei, kpɛ́ni fêi, í íkili tɔ̀ɔ ḿâ. Ńyãa Yâwɛɛ ƃé mò tí.”