Ɉeremi 38 - Bible

Dí Zɛlemaya pìli ya-loa folo su

¹ Mataŋ ǹóŋ Sifatia, Pasuɔ ǹóŋ Gidalia, Makaya ǹóŋ Pasuɔ da Selemia ǹóŋ Zuwuka ni dí m̀ɛni a gɛɛ ŋá kɛ̀ môi ǹûai dia a gɛɛ,

² Yâwɛɛ aâ mó ǹyɛɛ, “Ǹúui nyíi pâi lɛɛ̂i Zerusâlɛŋ, a pâi lɛɛ̂i kɔ́ su, puru, kpaa máŋ kɔlɔ-fela é baa. Kɛ́lɛ, ǹúui nyíi pâi liî é gbîŋ tɛɛ Babelɔŋ-ŋai pɔ́i, dífe pâi baâi, kɛ́lɛ a pâi lɛɛ̂i ɣele ma.”

³ Ŋá ŋɔ́nɔ kɛ̀ môi dîa a gɛɛ Yâwɛɛ ǹyɛɛ, “Ŋa pâi daa-lêei ŋí tɛɛ̂i Babelɔŋ kɔ-kuluƃa-ŋai pɔ́. Da pâi ǹaa sônii.”

⁴ Nya ƃe díi kɛ́-ƃela kpaya-kpayai dí lì gâloŋ pɔ́ dîyɛɛ mai, “Fɛ́ɛ nɔ́ kú ǹaloŋ ŋí páa. Ǹóno sîi a gɛ̂i, a gɛ̂i gɔ-kuluƃa-ŋai díkaa daa-lêei sui díkili fa pɔ̂ri kulâi dí kɔ́ kúmɛni ma. Gáa ǹóno tɔnɔi ŋí kɛ̂i ǹûai kélee pɔ́ nyíi-ŋai díkaa daai sui. Ǹóno-woo fé kpɔŋ mâa tɛɛ̂i ǹûai pɔ́. Kɛ́lɛ, gáa nɔ́ dí líi toôi pôlu.”

⁵ Gâloŋ Zɛdikaya è mò ǹyɛɛ, “Mɛni lɛ́lɛɛ ká tí. Ka tûa la yɛ̂ɛ berei ka ŋ̀wɛ̂lii lai. Ḿva pɔ̂ri ká kperâi.”

⁶ Dí ńzòŋ dí ɣɛli kpulɔ̂ŋ ḿâ dí ḿbîlaŋ díi kɛ́-nuui Makaya ŋɔya-loai su nyíi kɛ̀ bɛ́rɛi lá-ƃerei. Yá fé kɛ́ ní ǹyá-loai su. Kɛ́lɛ pâra nɔ́ ƃé kɛ̀ zu. Nya ƃe ŋá ƃɔ̀ bâraai su.

⁷ Ǹaa kɛ́ɛ tí, nalôŋ tɔnɔ nyíi da kɛ̂ mà Ɛbemelɛi è lì gâloŋ pɔ́ naa tãi è m̀ɛnii ŋí m̀ɛni lai, é mó m̀a a gɛɛ daâ ḿbîlaŋ ǹyá-loai su. Tãi ŋí yée mu, gâloŋ è kɛ̀ ŋuŋ-pîlaŋ su Bɛŋsima ŋɔsiɣãŋ lá-ƃerei. Ɛbemelɛ è kɛ̀ a gâloŋ ŋɔpɛ́rɛi mɛi káa-nuui nyíi kùla Itiopia lɔii sui.

⁸ Ɛbemelɛ è lì Bɛŋsima ŋɔsiɣãŋ lá-ƃerei ǹyɛɛ gâloŋ ma,

⁹ “Tɔɔ mûu, m̀ɛnii zinâai daâ gɛ̂i vé lɛ́lɛ ní. Daâ Zɛlemaya pîlaŋ ǹyá-loai su ƃɛ́i a pâi lɛɛ̂i naa é sáa a purui, kpɛ́ni fêi, mii-sɛŋ da fé daai su.”

¹⁰ Nya ƃe è mò Ɛbemelɛ ma a gɛɛ é kpakolo saaƃa síɣe dí pá dí ŋ́gula ǹyá-loai su fa lâa saa la naa.

¹¹ Ɛbemelɛ da ǹûai dí lì zãâ lâai kɛ́-loŋpoi su dí seɣe sâa-ŋa siɣe naa dí gbulɔ̂ŋ ɣɛli ma dí ǹyeŋ ḿâ ǹyá-loai su.

¹² Dí mò ḿâ a gɛɛ ŋá zeɣei láa ŋ́gbûmuŋ a gɛɛ ŋ̀ɛlii fa lâa ŋ́wana la. Ŋá gɛ̀ yɛ̂ɛ berei dí mò la ḿâi.

¹³ Nya ƃe dí ŋ́àla, dí ŋ́gula ǹyá-loai su. Nyíŋi pôlu ma, dí nâa ḿbìli gbini-pɛrɛi mu gɔ-kuluƃa-ŋai dípɛrɛi lá.

Zɛdikaya è Zɛlemaya marê kɛ̀

¹⁴ Ǹaa kɛ́ɛ tí, Gâloŋ Zɛdikaya é mò a gɛɛ dí lí a ńyãa Ŋ̀âla-pɛrɛ Kɛ́tɛi lá-ƃerei zaaƃa-ɣelêi lá. È mò ḿâ ǹyɛɛ, “Ŋa pâi ímarê kɛ̂i í zu-kula ḿî a tɔ̃yâ-pere.”

¹⁵ Ŋá ŋ̀óo su tòo ńyɛ̃ɛ m̀ai, “À kɛ̀ ŋà dɔ̃yâi ƃò yâ, ya pâi ḿbaâi. Ǹyaŋ, ŋá máŋ ília-woo ƃó, ífe pâi íwoli tɔɔ̂ii ḿâ.”

¹⁶ Nya ƃe Gâloŋ Zɛdikaya è góno tèe ńyêei loo-pere su, ǹyɛɛ ḿâi, “Ŋa ḿvoo a gɛ̀ ɣele-ma Ɣalai, Ŋ̀âlai nyíi a fúlu-laa tɛ̀ɛ kúpɔi yêei, a gɛɛ ḿve pâi ípaâi, kpaa máŋ ŋá ítɛɛ ǹûai pɔ́ nyii-ŋai ŋ̀wɛ̂lii dí ípaai.”

¹⁷ Gɛ́ɛ tíi, ŋá mò Zɛdikaya ma a gɛɛ Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai ǹyɛɛ, “À kɛ̀ yà íkpîŋ tɛ̀ɛ Babelɔŋ kaloŋ ŋɔtíi kɛ́-ƃelai pɔ́, dífe pâi ípaâi. Dífe tela pâi daai ŋí kérenîi. Gɛ̀ ní, ka ínûai ka pâi lɛɛ̂i ɣele ma.

¹⁸ Kɛ́lɛ, à kɛ̀ ífe íkpîŋ tɛɛ ní Babelɔŋ-ŋai pɔ́, da pâi daai kêrenîi. Ífe pâi pûi díyêei.”

¹⁹ Kɛ́lɛ, gâloŋ è ŋ́oo su tòo ǹyɛɛi, “Kúlɔii ŋí su-ƃelai nyíi-ŋai da díkpîŋ tɛɛ Babelɔŋ-ƃelai pɔ́i, ŋa yaôi dîa. Da pâi ńzonîi dí ńdɛɛ dípɔ dí ḿɔ̃lɛ.”

²⁰ Ŋá mò mà, “Dífe pâi ítɛɛ̂i dípɔ. Ŋa pɛlɛ̂i a íkɔɔ a gɛɛ í íwoli tɔ́ɔ Yâwɛɛ ŋɔworɛ̂-wooi ma. Gɛ̀ ní, m̀ɛnii kélee a pâi kɛ̂i a ǹɛ́lɛɛ ímɛni ma, ílɛɛ a ífulu.

²¹ Kɛ́lɛ, m̀ɛnii nyíi pâi kɛ̂i, Yâwɛɛ a ǹɛ́ ḿâ zĩ̂a su à kɛ̀ yà wàla íkpîŋ tɛ̀ɛ.

²² Zĩ̂ai tí su, Zuda nɛyãai nyíi-ŋai lɛ̀ɛ gâloŋ-pɛrɛi lái, ŋá nûa kàa dí kɛ́ lì a dia Babelɔŋ kaloŋ ŋɔtíi kɛ́-ƃelai pɔ́ naa. Íwoli tɔ́ɔ m̀ɛnii ma dí kɛ̀ môi dí kɛ́ɛ liî a diai: ‘Gâloŋ ŋɔwɛli kɛ́-ma ƃelai dí bɛ̀lɛ, díyee è tɛ̀ɛ mà. Ǹyaŋ gɔ́ɔ aâ nâa kánaŋ bârai su Ŋɔwɛli kɛ́-maa-ƃelai da tée mà.’ ”

²³ Ŋá ŋɔ́nɔ m̀ɛnii ŋí da pɛ̀lɛ ma ǹyɛ̂ɛi, “Da pâi ínɛyâai da ínîa-pɛlɛɛi sônii dí lí a dia Babelɔŋ-ŋai pɔ́. Ǹyaŋ ífe pâi pɔrîi pûi díyêei. Babelɔŋ kaloŋ a pâi ísonîi a luɛ. À kɛ̀ tí, da pâi daa lêei ŋí kérenîi kpɔ́ kpái.”

²⁴ Zɛdikaya è ŋ́oo su tòo ǹyɛɛ, “Ífe mò núu da ma a gɛɛ kwa yá kúkɛ̀ zɛpɛ sii ŋí pûi. Mɛni da fé pâi íkɛ̂i.

²⁵ À kɛ̀ díi kɛ́-ƃelai da m̀ɛni a gɛɛ kúkɛ̀ zɛpɛ pûi, gɛ̀ ní da pâi pâi dí ímarê kɛ́ lé mɛni ƃé kwa yá kú kɛ̀ môi. Da pâi díwoo miî íyêei a gɛɛ dífe pâi ípaâi à kɛ̀ yà m̀ɛnii kélee ƃò dîa.

²⁶ M̀ó nɔ́ dîa a gɛɛ í kɛ̀ ŋ́gbera fêi a gɛɛ ḿve ŋɔ́nɔ ípìli kpini-pɛrɛ mu a gɛɛ ílɛɛ naa ísaa.”

²⁷ Nya ƃe díi kɛ́-ƃelai dí pà dí ḿarê kɛ́. Kɛ́lɛ ŋá díwoo su tòo nɔ́ yɛ̂ɛ berei gâloŋ è mò la ḿâi. Dífe pɔri ní mɛni da kɛ̂i a ńyãa, kpɛ́ni fêi, núu da fé m̀ɛnii mɛni ní kú kɛ̀ môi.

²⁸ Kɛ́lɛ, ŋá lɛ̀ɛ gɔ-kuluƃa-ŋai dípɛrɛi lá gbini-pɛrɛi mu é lɛ́ɛ la zu dí Zerusâlɛŋ soŋ.