Ɉeremi 37 - Bible

Zɛdikaya è Zɛlɛmaya marê kɛ̀

¹ Babelɔŋ kaloŋ Nɛbukinaza è wɔ́lɔ Zosaya ǹóŋ Zɛdikaya kɛ̀ a kâloŋ Zuda lɔii mɛi Zɛoakiŋ ǹóŋ Zɛoasiŋ pɔ́ɔ ŋá.

² Kɛ́lɛ Zɛdikaya, kpaa máŋ ŋɔtíi kɛ́-ƃelai da ǹûai kélee dífe díwoli tɔ̀ɔ ní ŋ̀orɛ̂-wooi ma Yâwɛɛ è dɛ̀ɛi.

³ Nya ƃe Gâloŋ Zɛdikaya è Selemaya ǹóŋ Zeuka da Maaseia ǹóŋ Zɛfɛnaya nyíi kɛ̀ a zâla láa-soŋ-nuui tɛ̀ɛ a gɛɛ dí ḿarê kɛ́ a gɛɛ ŋá Kúɣâlai Yâwɛɛ fɛli kúlɔii mɛ̂ni ma.

⁴ Tãi ŋí dífe niî kɛ̀ ḿbili ní gbini-pɛrɛi mu. Ŋá kɛ̀ a ŋ́uŋ-ma ƃóɔɔ ŋ́gɛ nîi sìa-sia ǹûai sáma.

⁵ Tãi ŋí ƃé Babelɔŋ kɔ-kuluƃa-ŋai dí kɛ̀ la a dítinaŋɔɔ Zerusâlɛŋ ma. Kɛ́lɛ tãi Babelɔŋ kɔ-kuluƃa-ŋai dí m̀ɛni la a gɛɛ Ize kɔ-kuluƃa-ŋai daâ Ize gɔyɛŋ-perei naɣîŋ da kɛ́ pâi, Babelɔŋ kɔ-kuluƃa-ŋai dí lène pôlu.

⁶ Nya ƃe Yâwɛɛ nyíi gáa a Eezuɛ Ŋɔɣâlai è mò ḿâ

⁷ a gɛɛ ŋá mó Zɛdikaya ma ńyɛ̃ɛi, “Ize kɔ-kuluƃa-ŋai díkaa pâi a gɛɛ dí kpɔ́ŋ kâa. Kɛ́lɛ, da pâi lenêi pôlu.

⁸ Gɛ̀ ní Babelɔŋ kɔ-kûluƃa-ŋai da pâi pâi ŋɔ́nɔ pôlu dí pɛ́lɛ daa-lêei ŋí ma dí zoŋ, dí géreŋ kpɔ́ kpái.

⁹ Ńyãa Yâwɛɛ, ŋa kália-woo ƃôi a gɛɛ káfe kákpîŋ pɛ̀lɛ kákɛ kákili ŋá sìa a gɛɛ Babelɔŋ kɔ-kuluƃa-ŋai dífe ŋɔ́nɔ pâi pâi pôlu. Tɔ̃yâ ma, díkaa pâi pôlu.

¹⁰ A nɛ̃ɛ ma kpîŋ ká Babelɔŋ kɔkuluƃa-ŋai yée mɛi ɣále, diai nɔ́ lɛɛi dia ƃa ǹûai nyíi-ŋai ká díŋwàna dí kɛ́ ƃò lâani dísua-kɔlɔ pɛrɛi-ŋai mui, da pâi dímu siɣêi dí daa-lêei ŋí kéreŋ kpɔ́ kpái.”

Dí Zɛlemaya sòŋ dí bili kpini-pɛrɛ mu

¹¹ Babelɔŋ kɔ-kuluƃa-ŋai dí lène pôlu dí kúla Zerusâlɛŋ, kpɛ́ni fêi, Ize kɔ-kuluƃa-ŋai dí nâa kɛ̀ lɛɣɛ̂i a dia.

¹² Nya ƃe ŋá nâa kɛ̀ kulâi Zerusâlɛŋ ŋ́gɛ lì Bɛŋsima lɔii kpiniŋ su a gɛɛ ŋá ŋɔsãâi nyíi-ŋai kɛ̀ kúkaa-laa kɔ̃lîŋ sui, síɣe.

¹³ Kɛ́lɛ, tãi ŋá sèri la Bɛŋsima ŋɔsiɣãŋ lá-ƃerei, gɔ-kuluƃai nyíi kɛ̀ ǹaa mɛi kâai ǹáa ƃé kɛ̀ a Irizai, è kɛ̀ naa. Iriza ǹâŋ ƃé kɛ̀ a Selemaya. Ǹâŋ ŋɔnàŋ láa ƃé kɛ̀ a Ananaya. Iriza è ŋ́gbèra a gɛɛ ḿve tɛ̀ɛ. È mò ḿâ ǹyɛɛi, “Íkaa pûi a gɛɛ í lí Babelɔŋ-ŋai pɔ́ naa.”

¹⁴ Ŋá ŋ̀óo-su tòo ńyɛ̃ɛi, “Vé tí! Ḿve liî dípɔ naa.” Kɛ́lɛ, vé ŋ̀óli tɔɔ ní ḿâ. Nya ƃe è ńzòŋ é lí a ńyãa dímɛi-ƃelai pɔ́ naa.

¹⁵ Nya ƃe dí dílii ŋwàna kpɔ́ a ŋ̀ánaa dí ńokwa dí ḿbili gɔlɔ pɔ̃yɛ-nuui Zonetaŋ ŋɔpɛ́rɛi mu, nyíi kɛ̀ a gbini-pɛrɛi a maa tãi tíi.

¹⁶ Dí ńɔ̀ kpɔ́ ǹɔii mu-pere loŋpoi su, ƃɛ́i ŋá kɛ̀ naa a tãi su kôyaai.

¹⁷ Ǹaa kɛ́ɛ tíi, Gâloŋ Zɛdikaya è ŋ́orɛ̂ tɛ̀ɛ ǹyɛɛ ŋá lí gâloŋ-pɛrɛi lá é ḿarê kɛ́ loo-pere su ǹyɛɛ, “Yâwɛɛ è worɛ̂ da tɛ̂ɛ?” Ŋá mò ma ńyɛ̃ɛi, “Óoi. Da pâi ítɛɛ̂i Babelɔŋ kaloŋ pɔ́.”

¹⁸ Nya ƃe ŋá m̀arê kɛ̀ ńyɛ̃ɛ mai, “Lé tɔŋ ƃé ŋá gàra é pîlaŋ yâ, ítii kɛ́-ƃelai kpaya-kpayai, kpaa máŋ ǹɔii-lonii nyii a gɛ́ da ḿbili la kpini-pɛrɛ mu m̀ɛni mai?

¹⁹ Mí ƃé íɣâla ŋɔlóno kɛ́-ƃelai díkaa naai nyíi-ŋai mò yâ Babelɔŋ kaloŋ fé pâi kɔ́ pɛlɛ̂i yá kpaa máŋ ǹɔii ŋí mai?

²⁰ Gâloŋ, ye íwoli tɔ́ɔ ŋ́oo ma, í m̀ɛnii kɛ́ ŋa pâi ímarê kɛ̂i m̀ɛni mai. Kperâ yɛ̂ ífe ŋɔ́nɔ ḿbili kpini-pɛrɛ mu Zonetaŋ ŋɔpɛ́rɛi mu. Ya gɛ̀ tí, gɛ̀ ní ŋa pâi saâi naa.”

²¹ Nya ƃe Gâloŋ Zɛdikaya è gɛ̀ dí ḿbili kpini-pɛrɛ mu ŋɔkɔ-kuluƃa-ŋai dípɛrɛi mu. Ǹaa ƃé ŋá kɛ̀ naa. Ɣele kélee da kâa ŋ́gɔ̀ a gbóloi nyíi da kâa gbɛ̀tɛ gbólo kpɛtɛ-pɛrɛi mui. Dí lɛ̀ɛ gɛ̂i tí é lɛ́ɛ la zu kpólo é kpɛ́ɛ daa lêei su.