Ɉeremi 36 - Bible

Baru è Zɛlemaya ŋɔkɔlɔi lôno Ŋ̀âla-pɛrɛ Kɛ́tɛi mu

¹ Zosaya ǹóŋ Zɛoakiŋ kɛ́ɛ Zuda mɛi a kâloŋ ŋɔkóraŋ ǹáaŋ su, Yâwɛɛ è lòno ḿbɔ ǹyɛɛi,

² “Kɔlɔ-lâa siɣe í m̀ɛnii kélee pɔ̃yɛ ŋa pâi môi yâ nyíi-ŋai ŋá mò é pîlaŋ Eezuɛ, Zuda da ǹɔii-ŋuŋ-ŋai kélee dîai. M̀ɛni-ŋai ŋá mò yâi gélee kpɔ́ pɔ̃yɛ. Gɔ́ɔ pîlaŋ tãi ma Zosaya è kɛ̀ la a kâloŋ é tóo tãi ŋí ma.

³ Ɣele da Zuda-ƃelai da m̀ɛnii mɛ̂ni é pîlaŋ berei ma ŋa ŋ̀wɛ̂li la ŋá m̀ɛni kpɔ̂lu láa la dîai, da pâi dípôlu tɔɔ̂i díŋwana lɔ̂ɔ tua-ŋai dîa. À kɛ̀ tí, ŋa pâi dísu-mɛni lɛɛ̂i díŋwana lɔ̂ɔ-ŋai da dísɔnyɔ̂ŋ-ŋai mɛ̂ni ma.”

⁴ Nya ƃe ŋá Neria ǹóŋ Baru tòli ŋá m̀ɛni-ŋai kélee ƃó mà Yâwɛɛ è mò ḿâi é dípɔ̃yɛ nɔ́ yɛ̂ɛ berei ŋá kɛ̀ môi la m̀ai.

⁵ Ǹaa kɛ́ɛ tíi, ŋá mò mà ǹyɛ̃ɛi, “Dífe ŋɔ̂nɔ fâai ma a gɛɛ ŋá lí Ŋ̀âla-pɛrɛ Kɛ́tɛi mu.

⁶ Kɛ́lɛ, ŋa ŋ̀wɛ̂lii a gɛɛ í lí naa a tãi ǹûai da kɛ̂ ŋɔ́nɔ suŋ siɣêi lai. Tãi ya lî la naai, gɔlɔi ŋí lóno dîɛ ɣelêi pere, a gɛɛ dí m̀ɛni-ŋai mɛ́ni nyíi-ŋai Yâwɛɛ è mò ḿâi. Ǹóno dîe yɛ̂ɛ berei ŋá mò la yâ a gɛɛ í bɔ̃yɛ lai. Ye gɔlɔi ŋí lóno ƃɛ́i ǹûai kélee da nyíi-ŋai kùla dítaa-ŋai su da pɔ̂ri kɛ̂i naa dí kɛ́ íwoo mɛ̀ni.

⁷ Ɣele da, da pâi Yâwɛɛ fɛlîi, dí dípôlu tɔɔ dímɛni nyɔ́mɔ-ŋai dîa. Kpɛ́ni fêi Yâwɛɛ a bíli ƃôi a gɛɛ é ǹíi ŋwána ǹûai ŋí dîa a ŋ̀ánaa.”

⁸ Nya ƃe Baru è Yâwɛɛ wóo lòno nɔ́ Ŋ̀âla-pɛrɛ Kɛ́tɛi mu yɛ̂ɛ berei nɔ́ ŋá mò la mà a gɛɛ é gɛ́ lai.

⁹ Zɛoakiŋ kɛ́ɛ a kâloŋ ŋɔkóraŋ ǹɔ́ɔlui ŋɔɣáloŋ ǹɔ́ɔlu mɛi náaŋ su, ǹûai dí sûŋ sìɣe a gɛɛ Yâwɛɛ é dí malôŋ káa. Ǹûai kɛ̀ Zerusâlɛŋ da diai kùla daa-ŋai su Zudai, díkelee ƃé zûŋ ŋí sìɣe.

¹⁰ Ǹûai kɛ́ɛ díkelee da díwoli tɔ́ɔi, Baru è gɔlɔi lôno é m̀ɛnii kélee lóno nyíi ŋá mò mài. È gɔlɔi ŋí lòno Ŋ̀âla-pɛrɛ Kɛ́tɛi mu Safaŋ ǹóŋ Gɛmɛria ŋɔlôŋpoi su. Gɛmɛria ƃé kɛ̀ a gɔlɔ pɔ̃yɛ nuui gâloŋ mɛ̂ni ma. Ŋɔlôŋpoi è kɛ̀ ŋ̀elei su pere, gɛ́ ƃò Ŋ̀âla-pɛrɛ Kɛ́tɛi ŋɔsiɣãŋ-ninai laƃerei kɔlɛ ma.

Dí gɔlɔi lôno Díi-kɛ ƃela kpaya-kpayai dîɛ

¹¹ Makaya nyíi kɛ̀ a Gɛmɛria ǹóŋ, gɛ́ ƃò ŋɔ́nɔ a Safaŋ ǹóŋ ŋɔlóŋ è gɔlɔi lôno-woo mɛ̀ni Baru mì, é mɛni-ŋai mɛ́ni Yâwɛɛ è mòi.

¹² Nya ƃe è lì gâloŋ-pɛrɛi lá, é lɔ́ gâloŋ ŋɔkɔlɔ-pɔ̃yɛ-nuui ŋɔlôŋpoi su, ƃɛ́i díi kɛ́-ƃela dí kɛ̀ naa ŋuŋ-pîlaŋ sui. Diai ŋí ƃé kɛ̀ naa: Ilisama nyíi kɛ̀ a gâloŋ ŋɔkɔlɔ-pɔ̃yɛ nuui, Simaya ǹóŋ Dilaila, Abɔ ǹóŋ Ɛnatâŋ, Safaŋ ǹóŋ Gɛmɛria, Ananaya ǹóŋ Zɛdikaya da díi kɛ́-ƃela gbéli-ŋai.

¹³ Makaya è m̀ɛni-ŋai kélee è ƃò ǹûai dîa nyii è mɛ̀ni Baru kɛ́ ǹono ǹûai dîɛi.

¹⁴ Nya ƃe díi kɛ́-ƃela kpaya-kpaya ŋai dí Nɛtania ǹóŋ Zeuda nyíi kɛ̀ a Selemia ǹóŋ ŋɔlóŋ, gɛ́ ƃò a Kusi ǹóŋ ŋɔlòŋ ŋɔlòŋ, tôli a gɛɛ é mó Baru ma é pá a gɔlɔi è ǹono ǹûai dîɛi. Baru è pà a gɔlɔi dípɔ.

¹⁵ Dí mò mà dîyɛɛi, “See í gɔlɔi lóno kûɛ.” Nya ƃe Baru è gɛ̀ yɛ̂ɛ berei dí mò la mài.

¹⁶ Tãi è kpɛ̀ɛ la a gɔlɔi lónoɔɔ dîɛi, díkelee dí díkîe-ni ŋɛ́i kàa a yao-pere dîyɛɛi, “Fɛ̂ɛ kú m̀ɛnii ŋí ƃó gâloŋ ma.”

¹⁷ Nya ƃe dí m̀arê kɛ̀ dîyɛɛi, “M̀ó kûa berei í gɔlɔi ŋí pɔ̃yɛ lai. Zɛlemaya ƃé ŋ̀óo-ŋai ŋí ƃò í kɛ́ bɔ̃yɛɛi?”

¹⁸ Baru è díwoo su tòo ǹyɛɛi, “Zɛlemaya ƃé ŋ̀óo-ŋai ŋí ƃò ḿâ ŋá dípɔ̃yɛ yɛ̂ɛ berei nɔ́ è kɛ̀ môi lai.”

¹⁹ Nya ƃe dí mò dîyɛɛi, “Ka Zɛlamaya ka lí ká káloo. Káfe ǹɛɛ naa núu da é kɛ́ a ƃɛ́i kɔ́lɔŋɔɔ ka liî naai.”

Gâloŋ è gɔlɔi kêreŋ

²⁰ Díi kɛ́-ƃela kpaya-kpayai dí gɔlɔi lâai kɛ̀ Ilisama nyíi kɛ̀ a gâloŋ ŋɔkɔlɔ-pɔ̃yɛ nuui ŋɔlôŋpoi su dí lí dí m̀ɛnii kélee su kula gâloŋ ma.

²¹ Nya ƃe gâloŋ è Zeuda tɛ̀ɛ gɔlɔi kânai. Zeuda è lì é gɔlɔi kúla Ilisama ŋɔlôŋpoi su é pá la é ǹóno gâloŋ mî da ŋɔtíi kɛ́-ƃela kpaya-kpayai kɛ̂ gɔ̀lɛi.

²² Tãi dí gɔlɔi lôno lai, è kɛ̀ a kɔ́lɛ-ɣele. Gâloŋ è kɛ̀ seêni ŋɔkɔ́lɛ-ɣele kâloŋ-pɛrɛi mu gɛ́ gɔ́lɛ ƃò ŋɔŋ kɔlɛ.

²³ Zeuda a kâa gɔlɔi gbua da lòno nɔ́, gâloŋ é ǹaa tée mà a ŋɔƃóa-loŋ é bili ŋɔŋ ŋá. È lɛ̀ɛ kpɔ́ gɛ̂i tí é lɛ́ɛ la zu é gɔlɔi kélee kpɔ́ kéreŋ kpái.

²⁴ Kɛ́lɛ, gâloŋ, kpaa máŋ ŋɔtíi kɛ́-ƃelai dɔnɔ kpîŋ fé yao ní kpaa máŋ é ŋɔseɣei fála a gɛɛ é ǹɛ́ a gɛɛ malôŋ toɔ̂ɔii ma gɔlɔi ŋí lóno-woo mɛ̀ni lai.

²⁵ Berei máŋ Ɛnatâŋ, Dilaila da Gɛmɛria dí gâloŋ kperâi-fe la a gɛɛ vé gɔlɔi ŋí kereŋ lai, vé ŋ̀óli tɔɔ ní dîa a dɔnɔ kpîŋ.

²⁶ Nya ƃe gâloŋ è mò ǹóŋ Zeramiɛ ma da Azariɛ ǹóŋ Seraya da Abidîɛ ǹóŋ Seraya da Abidîɛ ǹóŋ-ni dîa a gɛɛ dí kwa ŋɔkɔlɔ-pɔ̃yɛ nuui Baru kú sóŋ. Kɛ́lɛ, maa tãi tí yée mu, Yâwɛɛ è nâa kúlòo.

Zɛlemaya è ŋɔ́nɔ gɔlɔi ǹina pɔ̃yɛ

²⁷ Gâloŋ Zɛoakiŋ kɛ́ɛ a gɔlɔi kéreŋ nyíi ŋá mò Baru ma a gɛɛ é bɔ̃yɛi, Yâwɛɛ è mò ḿâ

²⁸ a gɛɛ ŋá ŋɔ́nɔ gɔlɔi ǹiina pɔ̃yɛ a ŋ̀óo-ŋai tí kɛ́ bɔlɔi su nyii Zuda kaloŋ Zɛoakiŋ è gèreŋ.

²⁹ Yâwɛɛ è mò ḿâ a gɛɛ ŋá mó gâloŋ ma ńyɛ̃ɛi, “Yaâ gɔlɔi kéreŋ, ǹyaŋ í mò Zɛlemaya ma lé mɛni ƃé í gɔlɔi pɔ̃yɛ la yɛ̂ɛ Babelɔŋ kaloŋ a pâi la é ǹɔii ŋí su-kara, é zu-ƃela da daa-tulɛ-ŋai kélee páa.

³⁰ M̀ɛni ma, ńyãa Yâwɛɛ ŋa môi yâ gâloŋ Zɛoakiŋ a gɛɛ ísuui su-nuu da fé pâi kɛ̂i a kâloŋ Deeƃé ŋɔkâloŋ-laai su. Da pâi ípoma pilîi ƃɛ́i a pâi kɛ̂i naa banaŋ ma vóloi kɛ́ tòo m̀a a ɣele-ƃɔɔ, kɔ́lɛ kɛ́ pù ma a gbínii.

³¹ Ŋa pâi íkula ma kɛ̂i é pɛ́lɛ ísuui su-ƃelai dîa da ítii kɛ́-ƃela kpaya-kpayai, zɔnyɔ̂ŋ-ŋai ká gɛ̀i maa mɛ̂ni ma. Yá, kpaa máŋ Zuda ka Zerusâlɛŋ-ƃela káfe káwoli tɔɔ ní ŋália-wooi ma. M̀ɛni ma, ŋa pâi m̀ɛni kpɔ̂lui pɛlɛ̂i kâa ŋa wɔ́lɔ tûa m̀aa mɛ̂ni ƃôi.”

³² Nya ƃe ŋá kɔlɔ nîina sìɣe ŋá dɛɛ ŋákɔlɔ pɔ̃yɛ-nuui Baru pɔ́ é m̀ɛni kélee kpɔ́ pɔ̃yɛ ŋá mò mai yɛ̂ɛ berei ŋá mò la mai. È m̀ɛnii nyíi kɛ̀ gɔlɔi maa-ŋuŋ sui kélee kpɔ́ pɔ̃yɛ yɛ̂ɛ berei ŋá mò la mai nyii Zuda kaloŋ Zɛoakiŋ è gèreŋ. È worɛ̂-wooi sii ŋí nina támaa pɔ̃yɛ é bɛlɛ m̀a.