Ɉeremi 35 - Bible

Zɛlemaya da Leka ŋɔsuui su-ƃelai

¹ Tãi Zosaya ǹóŋ Zɛoakiŋ è kɛ̀ la a kâloŋ Zuda lɔii mɛi, Yâwɛɛ è lòno ḿbɔ ǹyɛɛi,

² “Lí Leka ŋɔsuui su-ƃelai pɔ́ naa í lóno dípɔ, í pá a dia Ŋ̀âla-pɛrɛ Kɛ́tɛi ŋɔlôŋpo-ŋai dɔnɔ su, í ŋwãai tɛɛ dípɔ.”

³ Nya ƃe ŋá Leka ŋɔsuui su-ƃelai kélee kpɔ́ tòli. Diai ŋá dítôlii ƃé kɛ̀ a: Zaazana nyíi kɛ̀ a Zɛlemaya ǹóŋ. Zɛlemaya tí ǹâŋ láa ƃé kɛ̀ a Abazinia, é pɛ́lɛ ǹêɣe da ǹônii-sinaai dia.

⁴ Ŋá pà a dia Ŋ̀âla-pɛrɛ Kɛ́tɛi mu. Nya ƃe ŋá lì a dia Idalia ǹóŋ Ana nyíi kɛ̀ a Ɣâla ŋɔlóno kɛ́-nuui ŋɔpôlu-ƃelai dílôŋpoi su. Lôŋpoi ŋí è kɛ̀ Saluŋ ǹóŋ Maaseia ŋɔlôŋpoi mɛi-pere. Maaseia ŋí è kɛ̀ kpɔ́ a tíi kɛ́-nuu kɛ́tɛ Ŋ̀âla-pɛrɛ Kɛ́tɛi mu. Lôŋpoi ŋí è kɛ̀ díi kɛ́-ƃela kpaya-kpayai da-ni díwɔ̂i kɔlɛ ma.

⁵ Nya ƃe ŋá ŋwã̂ai gonoŋ-ŋai sêe díŋɛi túɛ da kɔɛɛ-ŋa, ńyɛ̃ɛ dîa, “Ka da kpele.”

⁶ Kɛ́lɛ, dí ŋ́oo su tòo dîyɛɛi, “Kúfa ŋwã̂ai kpèle. Kúnâŋ pɔlɔi Zonada nyíi kɛ̀ a Leka ǹóŋ è mò kûa a gɛɛ kwa kúsuui su-ƃelai da kúfe wɔ́lɔ ŋwã̂ai kpèle.

⁷ È ŋɔ́nɔ mò kûa a gɛɛ kúfe pɛ́rɛ-ŋa tɔ̀ɔ, kpaa máŋ kú kpâlaŋ ŋá tii-ŋa kɛ́, kpɔmɔ-ƃa kpalaŋ, kpaa máŋ kú ǹyá. È mò kûa a gɛɛ kúkɛ nɔ́ sua-kɔlɔ pɛrɛ-ŋa mu a gɛɛ kú namu ǹɔii su nyíi kúkaa naa yɛ̂ɛ ŋɔ̃ya-ŋai.

⁸ M̀ɛni-ŋai Zonada è mò kûai, kwa kúyee sée kpɔ́ gélee mu. Kúa kpîŋ kúfe niî ŋwã̂ai kpele ní. Kúnɛyâai, kúlônii-sinaai da kúlônii-nɛyãai dia máŋ dífe niî ŋwã̂ai kpele ní.

^9-10 Kúfa pɛ́rɛ-ŋa tɔ̀ɔ a gɛɛ kúkɛ mù. Kwa nyîi nɔ́ sua-kɔlɔ-pɛrɛ-ŋa mu. Kpɔmɔ-ƃa kpalaŋ fé kúyêei. Kpâlaŋ, kpaa máŋ kú sí-sɛŋ da sí kúkɔnɔ̃ŋ mɛni ma. M̀ɛni-ŋai kúnâŋ pɔlɔi Zonada è wɔ́lɔ mò kûai, kúfe niî da sìɣe ní dɔɔ̂i.

¹¹ Kɛ́lɛ, tãi Gâloŋ Nɛbukinaza è tòo la ǹɔii sui, kú gbɛ̀tɛ a gɛɛ kú pá Zerusâlɛŋ a gɛɛ kú kúla Babelɔŋ da Siria kɔ-kuluƃa-ŋai yêei. Zɛŋ ƃé gɛ̀ kúkaa la Zerusâlɛŋ.”

^12-13 Nya ƃe Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai è mò a gɛɛ ŋá lí ŋá mó Zuda da Zerusâlɛŋ-ƃelai dîa ńyɛ̃ɛi, “Ńyãa Yâwɛɛ ŋá kámarê kɛ̀ ńyɛɛ kâa lé mɛni ƃé káfe káwoli tɔɔ ní la ḿâ, da m̀ɛnii ŋá m̀o kâai.

¹⁴ Zonada ŋɔsuui su-ƃelai da ŋ̀óo ŋ̀aa-see kɛ́. É síɣe tãi tí ma é seri tãi ŋí ma ŋa lòno la kápɔi dífe niî ŋwã̂ai kpele ní yɛ̂ɛ berei è wɔ́lɔ mò la dîai. Kɛ́lɛ, ŋ́gaa nɔ́ wɔ́lɔ lônoi kápɔ káfa ŋ́oo m̀ɛni.

¹⁵ Ŋ́gaa nɔ́ wɔ́lɔ ŋátii kɛ́-ƃelai tɛɛ̂i ká pɔ́ naa da ŋálono kɛ́-ƃelai dí kɛ̀ mò kâa a gɛɛ kákpera káŋwana lɔ̂ɔ tuai ma ká mɛni lɛ́lɛɛ kɛ́. Dí ká lia-woo ƃò a gɛɛ káfe ɣâla da kpɛ́ni-ŋa fɛ̀li kpaa máŋ kátíi kɛ́ dîɛ, a gɛɛ kákɛ ǹɔii su nyíi ŋá dɛ̀ɛ kápɔ da kánâŋ pɔlɔ-ŋai. Kɛ́lɛ, káfe káwoli tɔ̀ɔ ní ḿâ a dɔnɔ kpîŋ.

¹⁶ Zonada ŋɔsuui su-ƃelai da díwoli tɔ̀ɔ m̀ɛnii ma dínâŋ pɔlɔi è mò dîai. Kɛ́lɛ, káfe káwoli tɔ̀ɔ ní ḿâ.

¹⁷ M̀ɛni ma, Ńyãai a Ŋ̀wála-wâla kélee Yâwɛɛ, nyíi gáa a Eezuɛ Ŋɔɣâlai, ŋa pâi pâi a m̀ɛni kpɔ̂lui ŋá ŋ́gono tèe a gɛɛ ŋa pâi pâi la Zuda da Zerusâlɛŋ-ƃelai dîai. Ŋa pâi nyíŋi kɛ̂i, kpɛ́ni fêi, káfe káwoli tɔɔ ní m̀ɛnii ma ŋá mò kâai. Káfe káyee see ní ŋ́oo mu a tãi ŋá kátòli lai.”

¹⁸ Nya ƃe ŋá mò Leka ŋɔsuui su-ƃelai dîa a gɛɛ Ŋ̀wála-wâla kélee Yâwɛɛ, nyíi gáa a Eezuɛ Ŋɔɣâlai a môi ǹyɛɛ, “Ká káwoli tɔ̀ɔ m̀ɛnii ma kánâŋ pɔlɔi Zonada è mò kâai, ká tûa yɛ̂ɛ berei è mò lai, ká m̀ɛni-ŋai kélee ŋ̀aa sèe kɛ̀ yɛ̂ɛ berei è mò lai.

¹⁹ M̀ɛni ma, ńyãai a Ŋ̀wála-wâla kélee Yâwɛɛ, nyíi gáa a Eezuɛ Ŋɔɣâlai, ŋá ŋ́gono tèe Leka ǹóŋ Zonada yêei a gɛɛ tíi kɛ́-sinaa fé pâi wɔ́lɔ kpɛɛ̂i ŋɔsuui su ńyãa Yâwɛɛ ŋátii-ŋai kɛ́ mɛni ma.”