Ɉeremi 34 - Bible

Ŋ̀worɛ̂-wooi dí mò Zɛdikaya mai

¹ Tãi Babelɔŋ kaloŋ Nɛbukinaza da ŋɔkɔ-kuluƃa-ŋai, ǹɔii ŋuŋ-ŋai kɛ̀ ǹyée mui da núu da kpɛ́ni-ŋa dí kɔ́ pɛ̀lɛ la Zerusâlɛŋ da ǹaa kɔlɛ ma taa-lee-ŋai diai, Yâwɛɛ è lòno ḿbɔ.

² Yâwɛɛ nyíi gáa a Eezuɛ Ŋɔɣâlai è mò ḿâ a gɛɛ ná mó Zuda kaloŋ Zɛdikaya ma ńyɛ̃ɛi, “Ńyãa Yâwɛɛ ŋa pâi daa-lêei ŋí tɛɛ̂i Babelɔŋ kaloŋ pɔ́. A pâi gérenîi kpɔ́ kpái.

³ Ífe pâi púi, kɛ́lɛ, da pâi ísonîi dí ítɛɛ bɔ́. Ka ǹyaa ka pâi kákîe-ni kâai, ka lóno kákîe-ni pɔ́. À kɛ̀ tí, da pâi liî a yá Babelɔŋ.

⁴ Zɛdikaya, íwoli tɔ́ɔ ŋá m̀ɛnii ƃó yá nyíi pâi kɛ̂i a yái. Ífe pâi lɛɛ̂i gɔ́i su.

⁵ Ya pâi saâi íkpɔɔi yee ma. Da pâi nɔ́ íloôi yɛ̂ɛ berei da kâa ínûa pɔlɔ-ŋai nyíi-ŋai kɛ̀ a kâloŋ ǹaa tuɛ-ŋai lôo lai. Da pâi kéreŋ sɛŋ kúŋ nɛ̃ɛ kérenîi ímaa mɛ̂ni ma, yɛ̂ɛ berei nɔ́ da kâa gɛ̀ la ínâŋ pɔlɔ-ŋai mɛ̂ni mai. Da pâi malôŋ see ƃôi dí kɛ́ mò dîyɛɛi, ‘Kúkâloŋ aâ saa.’ Ńyãa Yâwɛɛ ƃé mò tí.”

⁶ Nya ƃe ŋá ŋ̀orɛ̂-wooi ŋí ƃò Gâloŋ Zɛdikaya ma Zerusâlɛŋ

⁷ a tãi Babelɔŋ kaloŋ è kɔ́ pɛ̀lɛ la daa-lêei mai. Tãi tɔnɔi ŋí ƃé gɔ-kuluƃa-ŋai dí kɛ̀ máŋ kɔ̂i la Lakee taa-leei, da Azeka taa-leei pɔ́. Daa-lêe feerɛi ŋí dí kɛ̀ a daa-lêei nyíi-ŋai kɛ̀ a dímaa dínaŋɔɔ a siɣãŋ nyii-ŋai lɛ̀ɛ tɔɔ̂ni Zuda lɔii-kpiniŋ sui.

Eezuɛ-ŋai dí díluɛ-ŋai pɛ̀lɛ

⁸ Gâloŋ Zɛdikaya da ǹûai kɛ̀ Zerusâlɛŋ dí díwoo sèe a gɛɛ dí

⁹ Ibulu-ŋai kɛ̀ a luɛ-ŋai, ŋuŋ maa ƃó, é máŋ kɛ́ yɛ̂ɛ sinâa kpaa máŋ nɛyâa a gɛɛ Eezuɛ nuu da fé kɛ̀ m̀arâŋ Eezuɛ nuu yêei a luɛ.

¹⁰ Nya ƃe ǹúu láa túɛ-ƃelai da ǹûai kélee dí fàa a gɛɛ dí díluɛ-ŋai ŋuŋ-ma ƃó, dífe ŋɔ́nɔ dí kɛ̀ a díluɛ-ŋa. Ǹya ƃé dí díŋuŋ-ma ƃò.

¹¹ Kɛ́lɛ, ǹaa loŋ è kɛ̀ nɔ́ tí, dí dí líi maa fáleŋ, dí ŋɔ́nɔ dísoŋ pôlu a luɛ-ŋa.

¹² Nya ƃe Yâwɛɛ è ḿâ ǹyɛɛi,

¹³ “Ńyãa Yâwɛɛ nyii gáa a Eezuɛ Ŋɔɣâlai, ŋá kpanaŋ-woo kɛ̀ kánâŋ pɔlɔ-ŋai yêei a tãi ŋá díŋuŋ-ma ƃò la ŋá díkula Ize lɔii su ƃɛ́i dí kɛ̀ naa luɛ-laa sui. Ŋá mò dîa a gɛɛ,

¹⁴ kóraŋ lɔ́ɔlu mɛi-feerɛ kélee su, dí díƃarâa Ibulu-nuui nyíi gáa díyêei a luɛ nyíi a tíi kɛ́ dîɛ a kóraŋ lɔ́ɔlu-mɛi-dai ŋuŋ ma ƃó. Kɛ́lɛ, kánâŋ pɔlɔ-ŋai dífe díwoli tɔ̀ɔ ní ḿâ, kpaa máŋ dí m̀ɛnii kɛ́ ŋá mò dîai.

¹⁵ Kɛ́lɛ, gúu feerɛi ŋí yée mu, ká kálii màa fàleŋ ká ńii láa mɛni kɛ́. Ká kélee ká fàa a gɛɛ ká káƃarâai nyíi-ŋai kɛ̀ káyêei a luɛ-ŋai ŋuŋ ma ƃó. Ká m̀ɛnii ŋí maa kpanaŋ-woo kɛ̀ ŋ́ɛi túɛ Ŋ̀âla-pɛrɛ Kɛ́tɛi mu ƃɛ́i ka ḿvɛ̀li naai.

¹⁶ Kɛ́lɛ, ká kálii màa fàleŋ ká ƃâa kula ḿâ. Ká kélee ká ŋɔ́nɔ ǹûai sôŋ pôlu a luɛ-ŋa yɛ̂ɛ berei dí kɛ̀ lai.

¹⁷ M̀ɛni ma, ńyãa Yâwɛɛ ŋá mò a gɛɛ ká ŋ́oo pìli. Káfe káƃarâa Eezuɛ-ŋai ŋuŋ-ma ƃó ní. Mɛni lɛ́lɛɛ ká tí. Gɛ̀ ní ŋa pâi ŋuŋ-ma ƃo tɛɛ̂i kápɔ. A pâi kɛ̂i a ŋuŋ-ma ƃô nyíi pâi gɛ̂i kálɛɛ kɔ́ su, kɔlɔ-fela é káta-ŋa paa kpaa puru. Ŋa pâi gɛ̂i ǹɔii ŋuŋ-ŋai díkaa ŋ̀éniɛi sui dílaa é kpála dîa m̀ɛni-ŋai ŋa pâi gɛ̂i a káai mɛni ma.

^18-19 Zuda da Zerusâlɛŋ tii kɛ́-ƃela kpaya-kpayai, gâloŋ-pɛrɛi lá tii kɛ́-ƃelai, zâla láa soŋ-nuui da ǹúu láa túɛ-ƃelai kélee kpɔ́ dí kpanaŋ-woo kɛ̀ ǹyêei a tãi dí tɛ̀ɛ la niŋa-sîrɛ su téɛɛ kpûa ferɛɛi loai. Kɛ́lɛ, dí ŋákpanaŋ-wooi sîɣe dɔɔ̂i. Dífe m̀ɛi káa ní. M̀ɛni ma, ŋa pâi tûai a ǹûai ŋí yɛ̂ɛ berei dí tùa la a ǹiŋa-sirɛi ŋí.

²⁰ Ŋa pâi dítɛɛ̂i díkpɔara-ƃelai pɔ́ nyii-ŋai ŋ̀wɛ̂lii dí dípaai a gɛɛ dí dípaa. À kɛ̀ tí, da pâi kɛ̂i a ŋɔni-ŋa da fɛnɛ-sãa kɔ́nɔ̃ŋ.

²¹ Ŋa pâi Zuda kaloŋ Zɛdikaya da ŋɔtíi kɛ́-ƃela kpaya-kpayai kélee kpɔ́ tɛɛ̂i diai pɔ́ ŋ̀wɛ́lii dípaai. Ŋa pâi dítɛɛ̂i Babelɔŋ kɔ-kuluƃa-ŋai pɔ́ nyíi-ŋai da kpera kɔ̂i dípɔi.

²² Ŋa pâi ŋ́oo tɛɛ̂i dípɔ naa, ǹyaŋ da pâi lenêi pôlu daa-lêei ŋí su. Da pâi kɔ́ pɛlɛ̂i mà, dí zoŋ, dí géreŋ kpɔ́ kpái. Ŋa pâi Zuda taa-ŋai kɛ̂i dílɛɛ a dí pûŋ yɛ̂ɛ fɛ̃ɛ-kpâlaŋ-su ƃɛ́i núu da fé naai. Ńyãa Yâwɛɛ ƃé mò tí.”