Ɉeremi 33 - Bible

Kili-kɛ-zu maa kono-tee

¹ Yâwɛɛ è ŋɔ́nɔ lòno Zɛlemaya pɔ́ a tãi veerɛ ɣelei a tãi è kɛ̀ la gbìni-pɛrɛi mu gɔ-kuluƃa-ŋai dípɛrɛi lái.

² Yâwɛɛ nyíi ŋ̀éniɛi kpɛ̀tɛ é zee a zee-perei, Yâwɛɛ nyíi ǹáa ƃa Yâwɛɛi, è mò ḿâ ǹyɛɛi,

³ “Ńdoli a tãi kélee, ǹyaŋ à kɛ̀ tí, ŋa pâi íwoo su toôi. Ŋa pâi loo mɛni kpaya-kpaya-ŋa ƃôi yâ nyíi-ŋai ífe mɛni da kɔ́lɔŋ é pîlaŋ dîai.

⁴ Ńyãa Yâwɛɛ nyíi gáa a Eezuɛ Ŋɔɣâlai, m̀ɛnii ká ŋí ŋa môi é pîlaŋ Zerusâlɛŋ pɛrɛ-ŋai da gâloŋ pɛrɛ-ŋai dîa nyii-ŋai ká dí wòlo a gɛɛ ká daa-lêei maa kɔ̃ɔ a tãi dí pɛ̀lɛ la daa-lêei mai.

⁵ Babelɔŋ kɔ-kuluƃa-ŋai da pâi kɔ̂i dí bɛ́rɛ-ŋai ŋí láa fɛ́ɛ a ǹûai poma da pâi dí paâi a ŋá lii ŋwânai, kpɛ́ni fêi, ŋa ḿbôlu tɔɔ daa-lêei ŋí ma ŋɔsɔnyɔ̂ŋ da ŋɔŋwana lɔ̂ɔi mɛni ma.

⁶ Kɛ́lɛ, ŋa pâi daa-lêei ŋí da zu-ƃela kélee ƃâloi, ŋá dí kɔlɔi pono. Ŋa pâi dí líi seêi a zu-kɛ́tɛ, ŋá dímɛi káa.

⁷ Ŋa pâi gɛ̂i Zuda da Eezuɛ dí ƃûu ƃó, ŋá dí kɛ́ yɛ̂ɛ berei dí wɔ́lɔ kɛ̀ la a bɔlɔi.

⁸ Ŋa pâi zɔnyɔ̂ŋ-ŋai dí gɛ̀ a ńyãai kulâi dia, ŋá dísu-mɛni lɛɛ dísɔnyɔ̂ŋ-ŋai da dítɔɔ mâ tuai kélee mɛni ma.

⁹ Zerusâlɛŋ-ƃelai da pâi lii-nɛ̃ɛ kulâi, dí ƃâa kɛ́ ḿâ, dí ŋáfolo-laai maa tɛ́. À kɛ̀ tí, ŋ̀éniɛi su-ƃelai kélee da pâi yaôi dí kɛ́ kpɛ̃liŋ tãi da pâi m̀ɛni lɛ́lɛɛ-ŋai ŋá gɛ̀ Zerusâlɛŋ, maa tûŋ mɛnîi lai, da berei Zerusâlɛŋ a pâi ƃûu ƃôi lai.”

¹⁰ Yâwɛɛ è mò ǹyɛɛ, “Nûa da kɛ̂i dîɛ gwaai ŋí ma káa a fɛ̃ɛ-kpâlaŋ su. Núu da fé ƃɛ́, kpaa máŋ taa-tulɛ. Ǹyaŋ nyíŋi káa a tɔ̃yâ. Zuda taa-ŋai da Zerusâlɛŋ pere lee-ŋai díkaa a bûŋ. Ífa núu da kpaa máŋ taa-tulɛ da kàa naa. Kɛ́lɛ, ka pâi ŋɔ́nɔ gwaai ŋá ma woo mɛnîi.

¹¹ Ka pâi lii-nɛ̃ɛ woo-ŋa mɛnîi naa ɣelêi-pere. Ka pâi kɛ̂i nɛnî kula kûu su wule-ŋa mɛnîi a ɣelêi-pere, dí kɛ́ lii-nɛ̃ɛ wule too a tãi da pâi kɛ̂i pâi la a sɛɣɛ-fei sama-sãa Ŋ̀âla-pɛrɛ Kɛ́tɛi mui. Da pâi m̀ôi dîyɛɛi, ‘Ka sɛɣɛ-fei tɛɛ Ŋ̀wála-wâla kélee Yâwɛɛ pɔ́, kpɛ́ni fêi, zɔŋ lɛ̂lɛɛi, ŋɔwɛli kɛ́-maa kɔ́yɛŋ fé ma.’ Ŋa pâi gɛ̂i ǹɔii ŋí é ƃûu ƃó yɛ̂ɛ berei è wɔ́lɔ kɛ̀ lai. Ńyãa Yâwɛɛ ƃé mò tí.”

¹² Ŋ̀wála-wâla kélee Yâwɛɛ è mò ǹyɛɛ, “Ǹɔii ŋí nyíi gáa yɛ̂ɛ fɛ̃ɛ-kpâlaŋ su ƃɛ́i núu da kpaa máŋ fɛnɛ-sãa da fé naai, ǹaa a pâi kɛ̂i nâa a kwaa ma ƃɛ́i kala a pâi kɛ̂i naa a gɛɛ m̀ála mɛi-kaa-ƃelai dí kɛ́ díƃala-ŋai ŋáa kɔ̀ŋ la.

¹³ M̀ala mɛi-kaa-ƃelai da pâi ŋɔ́nɔ kɛ̂i díƃala-ŋai lônoi daa-ŋai su ǹyée lɔii su, ǹyée kwára-pere kpiniŋ-ŋai su, Bɛŋsima ŋɔlɔii kpîniŋ su da nyíi-ŋai Zuda lɔii kwára-pere kpiniŋ su nyíi-ŋai dítinaŋɔ̂ɔi Zerusâlɛŋ ma da Zuda taa-ŋai kélee. Ńyãa Yâwɛɛ ƃé mò tí.”

¹⁴ Yâwɛɛ è mò ǹyɛɛ, “Vóloi káa pâi, tãi ŋa pâi ŋákono-teei nyíi ŋá gɛ̀ Eezuɛ da Zuda-ƃelai yêei ŋaa-see kɛ̂i lai.

¹⁵ Maa tãi tí ma, ŋa pâi kâloŋ lɛ̂i é kula Deeƃé ŋɔsuui su nyíi pâi kɛ̂i a teniŋ ƃô nuui. Gâloŋ kpîŋ a pâi tûai a teniŋ ƃô da tɔ̃yâ-laa pere ǹɔii gwaa kélee ma.

¹⁶ Ǹûai díkaa Zuda da Zerusâlɛŋ da pâi ŋuŋ ma ƃô sɔlɔ ƃôi. Núu da fé ŋɔ́nɔ pâi dímaa yaôi. À kɛ̀ tí, da pâi daa lêei tôlii a ‘Yâwɛɛ ƃa tɔ̃yâ-laa tɛ̀ɛ kú pɔ́.’

¹⁷ Ńyãa Yâwɛɛ, ŋá ŋ́gono tèe a gɛɛ Deeƃé ŋɔsuui su nuu nɔ́ ƃé wɔ́lɔ pâi kɛ̂i a kâloŋ Eezuɛ.

¹⁸ Sâla láa-soŋ-ƃela da pâi kulâi nɔ́ wɔ́lɔ Liiva ŋɔsuui su nyíi-ŋai pâi kɛ̂i tíi kɛ̂i ḿî, dí kɛ́ kéreŋ sala, mii-sɛŋ sala, da sala-ŋa kula ḿâ.”

¹⁹ Yâwɛɛ è mò ḿâ ǹyɛɛ,

²⁰ “Ŋá kpanaŋ-woo kɛ̀ gbínii da ɣele ƃɔ́ɔi dîɛ a gɛɛ dí kɛ́ nɔ́ a dítãi. Ǹyaŋ berei gbanaŋ-wooi tí káa niî la dɔɔ̂i,

²¹ bere sîi tɔnɔi tí nɔ́ ƃé ŋá kpanaŋ-woo kɛ̀ la Deeƃé yêei a gɛɛ ŋɔsuui su nuu nɔ́ ƃé wɔ́lɔ pâi kɛ̂i a kâloŋ. Bere sîi ŋí nɔ́ ƃé ŋá kpanaŋ-woo kɛ̀ la ŋɔ́nɔ a gɛɛ sâla láa-soŋ-ƃela da pâi nɔ́ wɔ́lɔ kɛ̂i kulâi Liiva ŋɔsuui su. Ǹyaŋ da pâi kɛ̂i nɔ́ wɔ́lɔ tíi kɛ̂i ḿî. Gbanaŋ-woo-ŋai ŋí dífa wɔ́lɔ sìɣe dítɔɔ̂i.

²² Ŋa pâi gɛ̂i ńyee mu-nuui Deeƃé ŋɔsuui su é kɛ́tɛ da zâla láa-soŋ-nuui kùla Liiva suui sui. Dísuui su a pâi kɛ̂tɛi kpɔ́ yɛ̂ɛ yúo ma ŋãya da bɛ́mɛlɛŋ-kao-ŋai nyii núu da fa pɔ̂ri dí lônoi.”

²³ Yâwɛɛ è mò ḿâ ǹyɛɛ,

²⁴ “Yaâ gɔ́lɔŋ a gɛɛ nûa da môi dîɛ ŋà ńyee kúla Eezuɛ nuu suu feerɛi mu nyii ŋá dí sìɣe zui? M̀ɛni ma da dípôlu tɔɔ ŋánûai dîa, dífa ŋɔ́nɔ díkàa a lɔii-ŋuŋ.

²⁵ Kɛ́lɛ ńyãa Yâwɛɛ, ŋá kpanaŋ-woo kɛ̀ kpíni da ɣele-ƃɔɔ díyêei, ŋá tɔ̂ŋ kpɛ̀tɛ nyíi a ǹɔii da ŋ̀elei su mɛi kâai.

²⁶ Ǹyaŋ berei nɔ́ ŋá m̀ɛni-ŋai ŋí kɛ̀ la a tɔ̃yâi, bere nɔ́ ƃé ŋa pâi ŋákpanaŋ-wooi nyíi ŋá gɛ̀ Zeeka ŋɔsuui da ǹyée-mu ǹúui Deeƃé ŋɔsuui yêei kɛ̂i la. Ŋa pâi Deeƃé ŋɔsuui su nuu tɔnɔ siɣêi a gɛɛ é kɛ́ Eberaɣɛ̃ɛ, Aise da Zeeka suui su-ƃelai mɛi. Ŋa pâi ŋá ǹûai ŋɛ́i malôŋ kâai, ŋá ŋɔ́nɔ gɛ́ díƃûu ƃó.”