Ɉeremi 29 - Bible

Zɛlemaya è kɔlɔ tɛ̂ɛ gɔ-sôŋ-ƃelai pɔ́naa Babelɔŋ

¹ Zɛlemaya è kɔlɔ tɛ̂ɛ zâla láa-soŋ-ƃelai, Ɣâla ŋɔlóno kɛ́-ƃelai, ǹúu láa túɛ-ƃelai da ǹûai kélee pɔ́ naa nyíi-ŋai Nɛbukinaza è dí sòŋ a kɔ-sôŋ-ŋa Zerusâlɛŋ é lí a dia Babelɔŋ.

² Zɛlemaya è gɔlɔi ŋí tɛ̀ɛ a tãi díwɔlɔ lì la a ǹûai ŋí Babelɔŋ ǹaa pôlu ma. Dia ƃe kɛ̀ a: Gâloŋ Zɛoasiŋ, Zɛoasiŋ ǹee, ǹúu láa túɛ-ƃelai, da díi kɛ́-ƃelai nyíi-ŋai wɔ́lɔ kɛ̀ Zuda da Zerusâlɛŋ. Dí wɔ́lɔ lì a ǹyɛrɛ tîi kɛ́-ƃelai nyíi-ŋai wɔ́lɔ kɛ̀ Zuda da Zerusâlɛŋ. Dí lì a ǹyɛrɛ kɛ́-ƃelai da gɔli tîi kɛ́-ƃelai nyíi-ŋai kɛ̀ Zerusâlɛŋ.

³ Zɛlemaya è wɔ́lɔ gɔlɔi ŋí tɛ̀ɛ Ilaisa nyíi kɛ̀ a Safaŋ ǹóŋ da Gamaliɛ nyíi kɛ̀ a Ekaya ǹóŋ dí pɔ́, a gɛɛ dí lí la Babelɔŋ. Gâloŋ Zɛdikaya nyíi wɔ́lɔ kɛ̀ Zuda mɛi ƃé ǹûai ŋí tɛ̀ɛ Gâloŋ Nɛbukinaza pɔ́ naa Babelɔŋ. Zɛŋ ƃé gɛ̀ Zɛlemaya kɛ́ gɔlɔi ŋí tɛ̀ɛ a gɛɛ dí lí la Babelɔŋ.

⁴ “Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai a môi gɔ-sôŋ-ŋai nyíi-ŋai Nɛbukinaza è wɔ́lɔ dí sòŋ a kɔ-sôŋ-ŋai dîa ǹyɛɛi,

⁵ ‘Ka pɛ́rɛ-ŋa tɔɔ ká sée ǹɔii su, ká sí-sãa sí, ká díƃa míi.

⁶ Ka nɛyâa da sinâa kula, kálônii-sinaa da lonii-nɛyaa maa sɔlɔ ƃó. Ka ǹɛɛ naa kálônii-nɛyãai dí sirɛ káa, ká lônii sinaai dí nɛyâa káa, dia máŋ dí nîa-pɛlɛɛ-ŋa maa sɔlɔ ƃó. Ka nîa-pɛlɛɛ támaa maa sɔlɔ ƃó Babelɔŋ lɔii su. Káfe kɛ̀ nɔ́ a ká kpulu-loŋ.

⁷ Ka mɛni lɛ́lɛɛ kɛ́ daa-lêei su nyíi ŋá ká tɛ̀ɛ zu a kɔ-sôŋ-ŋai. Ka Yâwɛɛ fɛli daa lêei kpîŋ mɛ̂ni ma. Kpɛ́ni fêi, à kɛ̀ mɛni lɛ́lɛɛ a kɛ̀ daa lêei tí su, káa máŋ ka pâi da sɔlɔ ƃôi.’ ”

⁸ Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai è mò ǹyɛɛi, “Káfe káwoli tɔ̀ɔ Ɣâla ŋɔlóno kɛ́-ƃelai nyíi-ŋai díkaa kásamai dîa. Dífa lâa ká pɛ́lɛ la, kpaa máŋ núu da kpɛ́ni kélee ma nyíi môi a gɛɛ a tínaa-tuɛ mɛni ƃôi. Káfe káwoli tɔ̀ɔ dísee-woo-ŋai dîa.

⁹ Díkaa lɛ́ɛ kɛ̂i a ńaa. Ḿve dí tɛɛ ní. Ńyãa Yâwɛɛ, ńyãa ƃé mò tí.”

¹⁰ Yâwɛɛ è mò ǹyɛɛ, “À kɛ̀ Babelɔŋ a gɛ̀ ká mɛi a kóraŋ buu lɔ́ɔlu mɛi feerɛ, gɛ̀ ní ká malôŋ a pâi ńzoniî ŋákono-teei kíli a pâi toôi ŋá, ŋá pá a káa pôlu ká pɔ́-taai.

¹¹ Ńyãa tɔnɔ nɔ́ ƃé m̀ɛni kpɛtɛɛ kɔ́lɔŋ nyíi gáa ká maa mɛ̂ni mai. Ŋa gbɛtɛ ŋ́gili ŋá a gɛɛ ŋá pá a mɛni lɛ́lɛɛ ká mɛni ma, kɛ́lɛ mɛni kpɔ̂lu fêi. Ŋa pâi gɛ̂i kili-kɛ zu kɛ́ ƃò káyêei ká ɣéniɛi tuɛ-pere mɛni ma.

¹² À kɛ̀ tí, gɛ̀ ní ka pâi ńdôlii. Ka pâi pâi ḿbɔ ká ḿvɛli, ǹyaŋ ŋa pâi káwoo mɛnîi.

¹³ À kɛ̀ tí, gɛ̀ ní ka pâi ŋ́gɔ̂rii a kálii kélee ǹyaŋ ka pâi ŋ́gâai.”

¹⁴ Yâwɛɛ è mò ǹyɛɛ, “Ka pâi ŋ́gâai. À kɛ̀ tí, ŋa pâi lenêi pôlu a káa, ŋá ká sée kákpɔɔi lɔii su. Ŋa pâi ká kulâi ǹɔii-ŋai su ŋá ká tɛ̀ɛ naa kɔ-sôŋ-laa sui, ŋá pá a káa pôlu. Ńyãa Yâwɛɛ ƃé mò tí.”

¹⁵ Ka pâi môi kâa, “Yâwɛɛ a Ɣâla ŋɔlóno kɛ́-ƃela tɛ̀ɛ kú pɔ́ Babelɔŋ.

¹⁶ Kɛ́lɛ m̀ɛnii ká ŋí Yâwɛɛ a môi gâloŋ ma seê-ni Deeƃé ŋɔkâloŋ see-sɛŋ ŋai, da diai lɛ̀ɛ daa lêei su Zerusâlɛŋ, da nyíi-ŋai dífe li ní a dia kɔ-sôŋ-laa sui ǹyɛɛ dîai,

¹⁷ ‘Ŋa pâi kɔ́ toôi dîa, puru é dí páa, ŋá kɔlɔ-fela nyɔ́mɔɔ píli dí sáma dí kɛ́ yɛ̂ɛ fîi wuru-ƃa lûlaa nyíi núu fa pɔ̂ri m̀iî.

¹⁸ Ŋa pâi díkpɛ̂i a ƃóa-sɔ̂kpɔ, puru, da kɔlɔ-fela nyɔ́mɔɔ. Ŋa pâi gɛ̂i ŋ̀éniɛi su lɔii-ŋuŋ-ŋai da dí kâa, dílaa é kpála dîa. Nûa da pâi dísĩa miî a dia, díkɛ ƃò a yao maa-sɛŋ, dí dílaa kɛ́ a ǹaɣa-laa-sɛŋ.

¹⁹ M̀ɛnii ŋí a pâi kɛ̂i a dia kpɛ́ni fêi, dífe díwoli tɔɔ ní ŋ̀orɛ̂-wooi ma nyíi ŋá dɛ̀ɛ a Ɣâla ŋɔlóno kɛ́-ƃelai nyíi-ŋai díkaa a ŋátii kɛ́-ƃelai. Ŋá ŋálono kɛ́-ƃelai tɛ̂ɛ a tãi támaa, kɛ́lɛ, dífe díwoli tɔ̀ɔ ní dîa a dɔnɔ kpîŋ. Ńyãa Yâwɛɛ ƃé mò tí.’ ”

²⁰ M̀ɛni ma ka káwoli tɔ́ɔ Yâwɛɛ wóo ma káai kélee ŋá ká kùla Zerusâlɛŋ ŋá ká tɛ́ɛ kɔ-sôŋ-laa su Babelɔŋ.

²¹ “Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai è m̀ɛnii ŋí ƃó é pîlaŋ Kolaya ǹóŋ Eɣa da Maaseia ǹóŋ Zɛdikaya dîa ǹyɛɛ ǹúu feerɛi ŋí da kɛ̂ lɛ́ɛ Ɣala-woo ƃôi ńaai su, dí kɛ́ mò dîyɛɛ ńaa-woo ká tí. Kɛ́lɛ, ŋa pâi ǹɛ́ɛ Ɣâla-woo ƃó-ƃela feerɛi tí tɛɛ̂i Babelɔŋ kaloŋ Nɛbukinaza pɔ́. Ǹyaŋ a pâi dí paâi ka kélee ká ŋɛ́i túɛ.

²² Ǹúu feerɛi ŋí mɛni a pâi gɛ̂i gɔ-sôŋ-ŋai kùla Zudai dí kɛ́ dífòo dîyɛɛi, ‘Tɔɔ Yâwɛɛ é tûa a yá yɛ̂ɛ berei è tùa la a Zɛdikaya da Eɣa, nyíi-ŋai Babelɔŋ kaloŋ è wɔ́lɔ díkèreŋ a ŋɔŋ.

²³ Ǹûai ŋí dí mɛni nyɔ́mɔ kɛ̀ Eezuɛ-ŋai sáma. Ǹûai ŋí díwulu-wulu kpɛ̀ a díƃarâai dínɛyâai. Díkɛ̀ lɛ́ɛ ɣala-woo ƃôi dîyɛɛ ńyãa ƃé dí tɛ̀ɛ. Ḿve mó ní a gɛɛ dí gɛ́ tí. M̀ɛnii dí gɛ̀i ŋ́gaa a maa sêre.’ Ńyãa Yâwɛɛ ƃé mò tí.”

Simaya è kɔlɔ tɛ̂ɛ Zɛfɛnaya mì

²⁴ Mó Neelaŋ-nuui Simaya ma yɛ̂ɛ

²⁵ Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai ǹyɛɛ, Simaya, í kɔlɔ tɛ̂ɛ Zerusâlɛŋ-ƃelai díkaa a kɔ-sôŋ-ŋai da Maaseia ǹóŋ Zɛfɛnaya nyíi gáa a zâla láa-soŋ nuui da m̀arâa sala láa-soŋ-ƃelai dîɛ. Í mò dîa gɔlɔi sú yɛ̂ɛi,

²⁶ “Zɛfɛnaya, Yâwɛɛ a íkɛ a sâla láa-soŋ-nuu Zioada pɔ́ɔ ŋá. Yá ƃé íkaa Yâwɛɛ Ŋɔpɛ́rɛi mɛi. Ye ƃoo-nuu nyíi kélee a tûa yɛ̂ɛ Ɣâla ŋɔlóno kɛ́-nuui sóŋ. Ǹyée-kwana ɣíri, í doo kpɔnɔ ŋá, í kɔli-yɔlɛ kɛ́tɛ tóo gɔŋ ma.

²⁷ Ye gáa, Zɛlemaya nyíi kùla Anatɔ-taa-leei sui a tûai yɛ̂ɛ Ɣâla ŋɔlóno kɛ́-nuu. Lé mɛni ƃé ífe niî zòŋ ní lai?

²⁸ Zɛlemaya è worɛ̂ tɛ̀ɛ kú pɔ́ naa Babelɔŋ ǹyɛɛ ka pâi nâmui naa. M̀ɛni ma ka pɛ́rɛ-ŋa tɔɔ kákɛ mu. Ka sí-sɛŋ sí a gɛɛ ká m̀á míi.”

²⁹ Nya ƃe zâla láa-soŋ-nuui Zɛfɛnaya è gɔlɔi ŋí lòno Ɣâla ŋɔlóno kɛ́-nuui Zɛlemaya mì.

³⁰ Ǹaa kɛ́ɛ tíi, Yâwɛɛ è lòno ḿbɔ

^31-32 a gɛɛ ŋá ŋ̀orɛ̂-wooi ŋí tɛ́ɛ gɔ-sôŋ-ŋai díkaa Babelɔŋ pɔ́ ǹyɛɛi, “Mɛnii Yâwɛɛ a môi é pîlaŋ Neelaŋ nuui Simaya mai ƃa: Simaya è ɣâla-woo ƃò kâa. Kɛ́lɛ, Yâwɛɛ ǹyɛɛ, ‘Ŋa pâi Neelaŋ nuui Simaya kula ma kɛ̂i tãi kpua yée mu da ŋɔnûai. Ḿve dɛɛ ní a gɛɛ é ɣâla-woo ƃó kâa. Kɛ́lɛ, è lòno yɛ̂ɛ Ɣâla ŋɔlóno kɛ́-nuu, gɛ́ Ɣâla-woo ƃò a lɛ́ɛ-pere. È gɛ̀ ǹûai dí kɛ́ lɛ̀ɛ ŋɔlɛ́ɛ Ɣâla-wooi pôlu. Zuu fé pâi kɛ̂i ma a dɔnɔ kpîŋ. Ǹyaa da ŋɔsuui su-ƃelai dí fé pâi lɛɛ̂i a dífúlu ǹûai sáma dí m̀ɛni lɛ́lɛɛi ŋa pâi gɛ̂i ǹûai dîɛi dí da sɔlɔ ƃó. Kpɛ́ni fêi è ǹûai kɛ̀ a gɛɛ dí tɔ́ɔ ḿâ. Ńyãa Yâwɛɛ ƃé mò tí.’ ”