Ɉeremi 25 - Bible

Ǹûai kpɔara-ƃelai nyíi-ŋai kùla yá-ŋua-perei

¹ Ŋ̀orɛ̂-wooi ŋí ƃé Yâwɛɛ è dɛ̀ɛ a Zɛlemaya é pîlaŋ Zuda-ƃelai dîa. Yâwɛɛ è ŋ̀orɛ̂i ŋí tɛ̀ɛ a tãi Zɛoakiŋ nyíi kɛ̀ a Zosaya ǹóŋ, è wɔ́lɔ kɛ̀ la a kâloŋ Zuda lɔii mɛi ŋɔkóraŋ ǹáaŋ su. Ǹyaŋ góraŋ ŋí ƃé kɛ̀ a Nɛbukinaza ŋɔkóraŋ maa-ŋuŋ a tãi díwɔlɔ gɛ̀ la a kâloŋ Babelɔŋ mɛi.

² M̀ɛnii ŋí ƃé Zɛlemaya è mò Zuda da Zerusâlɛŋ-ƃelai kélee dîa:

³ “Yâwɛɛ a m̀ɛni tɔ̂nɔi ŋí ƃó ḿâ gîei kpɛ́-kpɛɛ kóraŋ buu-feerɛ kao-saaƃa yée mu. É síɣe tãi ma Amɔŋ ǹóŋ Zosaya è kɛ̀ la a kâloŋ é tóo tãi ŋí ma ŋa lônoi lai. Ǹyaŋ Zosaya ŋɔkâloŋ-laa koraŋ buu káo saaƃai su ƃé ŋá pɛ̀lɛ la ŋ̀orɛ̂-wooi ŋí ƃôi la kâa. Ŋ́gaa nɔ́ niî m̀ɛni tɔ̂nɔi ŋí ƃôi kâa. Kɛ́lɛ káfe niî káwoli tɔɔ ní ḿâ.

⁴ Yâwɛɛ a ǹyée-mu-ƃelai nyíi-ŋai díkaa a ŋɔlóno kɛ́-ƃelai tɛ́ɛ kápɔ naa gîe mɛi dí kɛ́ lòno kápɔ. Kɛ́lɛ, káfe niî káyee sèe ní ŋ̀óo mu a dɔnɔ kpîŋ, kpaa máŋ ká káwoli tɔ́ɔ dîa.

⁵ Ǹyaŋ Ɣâla ŋɔlóno kɛ́-ƃelai tí dí mò kâa a gɛɛ ká kpera kátûa-pere nyɔ̂ŋ-ŋai dîa. Ka kpera mɛni nyɔ́mɔɔ kɛ̂i a gɛɛ ká lɛ́ɛ ǹɔii su nyíi Yâwɛɛ è wɔ́lɔ dɛ̀ɛ kánûa-pɔlɔ-ŋai pɔ́ a gɛɛ é kɛ́ a dípɔɔ wɔ́lɔ-wɔlɔi.

⁶ Káfe lɛ̀ɛ ɣâla da-kpɛ́ni-ŋa pôlu. Kpaa máŋ kákɛ dífɛ̀li. Ńyãai ŋ́gaa a Yâwɛɛi, káfe ńii ŋwána mɛni kɛ̀ a ɣâla da-kpɛ́ni-ŋa fɛliɛɛ nyíi-ŋai ká díkpɛ̀tɛ a káyeei. Kà wàla dí fɛ́li, ḿve pâi kákula maa kɛ̂i.

⁷ Kɛ́lɛ, káfe káwoli tɔ̀ɔ ní dîa a dɔnɔ kpîŋ. Kɛ́lɛ, ká ńii ŋwána mɛni kɛ̀ a ɣâla da-kpɛ́ni-ŋa fɛliɛɛ nyíi-ŋai ká díkpɛ̀tɛ a káyeei. M̀ɛni ma ŋa pâi ká kula maa kɛ̂i.

⁸ “Ŋ̀wála-wâla kélee Yâwɛɛ è mò ǹyɛɛi,

⁹ ‘Tãi nɔ́ káfe káwoli tɔ̀ɔ ní ḿâi, ŋa pâi yá-ŋua-pere kɔkɔ́-ƃelai kélee da ńyee mu-nuui Nɛbukinaza nyíi gáa a Babelɔŋ kaloŋ tôlii ŋa pá a dia dí kɔ́ pɛ́lɛ Zuda ma da ŋɔnûai. Da pâi kɔ́ pɛlɛ̂i ǹɔii-ŋuŋ-ŋai díkaa kákɔlɛ mai dia. Ǹyaŋ a kɛ̀ tí, ŋa pâi Zuda da gɔlɛ ma lɔiii-ŋuŋ-ŋai su-ƃela kélee kpɔ́ kpúŋ paâi ŋá ǹaa lɛɛ a bûŋ wɔ́lɔ-wɔ́lɔ. Tãi ǹûai da pâi ǹaa kâai lai, dí láa a pâi kpâlai dîa. Ǹaa a pâi kɛ̂i a yao-maa kwaa ma, ǹûai díkɛ díŋuŋ mɛi tée lono kɛ̀.

¹⁰ Ŋa pâi gɛ̂i núu da fa ŋɔ́nɔ lii-nɛ̃ɛ pele-woo mɛni naa. Núu da fé ŋɔ́nɔ pâi nɛnî, kpaa surɔ̂ŋ kula pêle kɛ́-woo mɛnîi naa, kpaa máŋ núu da é mii-sɛŋ sia tîŋ mɛni naa. Ǹyaŋ núu da fé ŋɔ́nɔ pâi lâŋpo tɔɔ̂i naa.

¹¹ Da pâi Zuda su karâi, naa é lɛ́ɛ a fɛ̃ɛ-kpâlaŋ su. Ǹɔii-ŋai ŋí su-ƃela kélee kpɔ́ da pâi kɛ̂i luɛ-laa su Babelɔŋ kaloŋ yée-mu a kóraŋ buu lɔ́ɔlu-mɛi feerɛ.

¹² Kɛ́lɛ góraŋ buu lɔ́ɔlu-mɛi feerɛi tí a kpɛ̀ɛ, ŋa pâi Babelɔŋ kaloŋ da ŋɔlɔii su-ƃelai kélee kpɔ́ kula-maa kɛ̂i dítua-pere nyɔ̂ŋ mɛ̂ni ma. Ŋa pâi dílɔii lɛɛ̂i a fɛ̃ɛ-kpâlaŋ su wɔ́lɔ-wɔlɔ.

¹³ M̀ɛni kpɔ̂lui nyíi kélee ŋá m̀aa mɛ̂ni ƃò Zɛlemaya ma gɔlɔi ŋí sui, ŋa pâi gélee kpɔ́ lâai Babelɔŋ ma.

¹⁴ Ŋa pâi gɛ̂i Babelɔŋ-ƃelai dí luɛ-tii kɛ́ kâloŋ wála-walaa támaa yée-mu lɔii-ŋuŋ da kpɛ́ni-ŋa su. Ŋa pâi díkula-maa kɛ̂i yɛ̂ɛ berei nɔ́ dí tùa la a káai.’ ”

Ɣâla a pâi ǹɔii-ŋuŋ-ŋai dímɛnii ŋá têei

¹⁵ Eezuɛ Ɣalai Yâwɛɛ è mò ǹyɛɛ, “Ŋá lii ŋwânai káa yɛ̂ɛ ŋwã̂ai ŋí gáa gbele-kɔɛɛi ŋí sui. Zoŋ í lí la í dɛɛ ǹɔii-ŋuŋ-ŋai pɔ́ nyíi-ŋai ńii ŋwânai dîai a gɛɛ dí gbele.

¹⁶ Tãi da pâi ŋá lii ŋwânai ŋí kpelêi lai, a pâi dí kɛ̂i. Ǹyaŋ da pâi kɛ̂i siâi tàka-taka dí kɛ́ kàreŋ yɛ̂ɛ ƃoo-ƃela, kpɛ́ni fêi, ŋ́gaa pâi kɔ́ toôi dísama.”

¹⁷ Nya ƃe ŋá gbele-kɔɛɛi sôŋ Yâwɛɛ yêei ŋá lí la ŋá ŋwã̂ai tɛ́ɛ ǹɔii-ŋuŋ-ŋai pɔ́, ŋá dí kɛ́ dí gbele.

¹⁸ Ŋá ŋwã̂ai ŋí ŋáa kɔ̀lɛ Zerusâlɛŋ da Zuda taa-lee-ŋai su-ƃelai kélee dîa é pɛ́lɛ Zuda kaloŋ-ŋai da dítii kɛ́-ƃelai dîa dí gbele a gɛɛ dítaa-ŋai dílɛɛ a pîleŋ ŋá. Ŋá gɛ̀ tí a gɛɛ ǹûai da ǹaa kàa dílaa é kpála dîa dí dísĩa mii a dîa, dílaa kɛ́ ƃò a nãaŋ lâa kɛ́-sɛŋ é lɛ́ɛ la zu é seri sâai ŋí ma.

¹⁹ Ŋa ŋɔ́nɔ gɛ̀ Ize lɔii su kaloŋ-ŋai da dítii kɛ́-ƃelai dí Yâwɛɛ ŋɔlii ŋwânai da kpele é pɛ́lɛ dílɔii su-ƃelai kélee dîa.

²⁰ Ŋá gɛ̀ ŋ̀ɔ̃yai-ŋai kɛ̀ Izei dí da kpéle, é pɛ́lɛ Uzi kaloŋ ma. Ǹaa pôlu ma, Felesia kaloŋ-ŋai da-ŋa nyíi-ŋai kùla daa lêe-ŋai ŋí sui: Asikɛlɔŋ, Geza, Ɛkulɔŋ da ǹûai nyíi-ŋai lɛ̂ɛ Asɔdɔi dí da kpèle.

²¹ Ŋá ŋɔ́nɔ gɛ̀ ǹɔii-ŋûŋ-ŋai ŋí su-ƃelai, Idɔŋ, Môa é pɛ́lɛ Amɔŋ ǹônii dia dí da kpele máŋ.

²² Ǹaa kɛ́ɛ tí, ŋá da tɛ̀ɛ Taya da Sidɔŋ kaloŋ-ŋai pɔ́, é pɛ́lɛ gâloŋ-ŋai kɛ̀ ǹyái koo mâ lɔii-ŋai su.

²³ Ŋá ŋɔ́nɔ da tɛ̀ɛ ǹûai pɔ́ kɛ̀ Dedaŋ, Tema, da Buzi taa-ŋai sui. Ŋá da tɛ̀ɛ diai kélee pɔ́ da díŋuŋ ƃôi.

²⁴ Gâloŋ-ŋai kùla Arebia, dí da kpèle. Gâloŋ-ŋai kùla vɛ̃ɛ-kpâlaŋ sui, dí da kpèle.

²⁵ Ŋá ŋɔ́nɔ da tɛ̀ɛ Ziŋri, Elaŋ, da Midia kaloŋ-ŋai pɔ́.

²⁶ Ŋá da tɛ̀ɛ gâloŋ-ŋai kɛ́ yá-ŋua-pere nyíi-ŋai dí kɛ̂i è kɛ̀ a gbuáa da nyíi-ŋai dí kɛ̂i è kɛ̀ a gôyaai díkelee dípɔ tɛi-tɛi. Ŋá gɛ̀ kpɔ́ gâloŋ lɔii-ŋai nyíi kélee díkaa ɣele mai dí Yâwɛɛ ŋɔlii ŋwânai da kpele. Kɛ́lɛ, Babelɔŋ kaloŋ ƃé pâi kɛ̂i a ǹúui gbɛɛ-ŋai é Yâwɛɛ ŋɔlii ŋwânai da kpele.

²⁷ Nya ƃe Ŋ̀wála-wâla kélee Yâwɛɛ nyii gáa a Eezuɛ Ŋɔɣâlai è mò ḿâ a gɛɛ ŋá m̀ó ǹûai dîa ńyɛ̃ɛ Yâwɛɛ ǹyɛɛ, “Ka kákpele a ŋwã̂ai nyíi gáa gbele-kɔɛɛi ŋí sui é kákɛ ká kákɔŋ píli, ka tóo káfa ká mu sìɣe. Kpɛ́ni fêi ŋa pâi kɔ́ toôi kásama.

²⁸ À kɛ̀ da wàla gbele-kɔɛɛi sóŋ íyêei dí díkpele, m̀ó dîa a gɛɛ Ŋ̀wála-wâla kélee Yaawɛi ǹyɛɛ fɛ̂ɛ ká kákpele gbele-kɔɛɛi ŋí su.

²⁹ Ye gáa, ŋa pâi mɛni kpɔ̂lu lâai Zerusâlɛŋ ma nyíi ŋá ńaa sèe mai. Gáa íkili ŋá a gɛɛ ḿve pâi íkula maa kɛ̂i? Kpao! Ŋa pâi gɛ̂i tí! Ŋ̀wála-wâla kélee Yâwɛɛi è mò ǹyɛɛ a pâi kɔ́ toôi kpɔ́ núu kélee ma ŋ̀éniɛi su gwaa kélee.

³⁰ “M̀ɛni ma, Zɛlemaya, ye ŋ̀óo-ŋai ŋí ƃó dîa. Kɛ́ dîa: ‘Yâwɛɛ a pâi lâɣii kpɔ́ ŋ̀ele-kɔlɔŋ su é ŋɔ́nɔ láɣi kpɔ́ ŋɔpɛ́rɛi-maa-waai mu. A pâi kpɔ́ lâɣii ǹɔii-ŋuŋ-ŋai dîa a ŋánaa. A pâi lâɣii kpɔ́ yɛ̂ɛ nûa ƃé kpɔmɔ-ƃa siâi a gɛɛ dí gɛ́ a ŋwã̂ai. A pâi lâɣii kpɔ́ ǹûai kélee díkaa ɣele mai dí ŋ̀óo mɛ́ni.

³¹ Ǹáɣi-woo a pâi siâi kpɔ́ ǹɔii gwaa kélee ma. Yâwɛɛ a ǹɔii-ŋai kélee sɔŋ láa. A pâi díkelee kpɔ́ dímɛnii ŋá têei. À kɛ̀ tí, a pâi ŋ̀wana lɔ̂ɔ-ƃelai paâi kɔ́ su. Yâwɛɛ ƃé mò tí.’ ”

³² Ŋ̀wála-wâla kélee Yâwɛɛ è mò a gɛɛ mɛni kpɔ̂lu a nâa pâi táa-tâai ǹɔii-ŋuŋ-ŋai kélee su. M̀ɛni kpɔ̂lui ŋí a pâi pâi yɛ̂ɛ fãa kɛ́tɛ a kɛ̀ kulâi lɔii su kôyaa su.

³³ Maa tãi tí ma, diai Yâwɛɛ a pâi dípâai, dípoma a pâi kɛ̂i a dáa-taa ǹɔii gwaa kélee ma. Núu da fé pâi kɛ̂i naa é dísaa wɔ̂lɔ kɛ́ kpaa é dísaa lóo. Kɛ́lɛ dípoma a pâi kɛ̂i a dáa-tâa ǹɔii ma yɛ̂ɛ kpó.

³⁴ Káai a ǹúu láa-tuɛ-ƃelai, ka wɔ́lɔ. Ka too ǹɔii mâ ká wɔ́lɔ kákɛ kìliŋ, kákɛ làɣi a ŋánaa. Tãi aâ nâa seri a gɛɛ díka páa. Ka pâi kɛ̂i a kátaa-tâa ǹɔii ma yɛ̂ɛ pɔ̂rɔ-leɣi kàlaŋ.

³⁵ Kwaa ma fé pâi kɛ̂i naa a gɛɛ ǹúu láa-tuɛ-ƃelai dí díloo naa. Dífe pâi pɔrîi pûi.

³⁶ Ŋá kɛ̀ ǹúu láa-tuɛ-ƃelai láɣi-woo mɛnîi. Ŋá kɛ̀ ǹûai láa-tuɛ-ƃelai wɔ́lɔ-woo mɛnîi ɣelêi-pere, kpɛ́ni fêi Yâwɛɛ è kɛ̀ dílɔii su karâi.

³⁷ Ǹyaŋ ǹɔii nyíi-ŋai kɛ̀ a dí líi seɛɛi, Yâwɛɛ a pâi ǹíi ŋwânai, é ǹaa lɛɛ a pîleŋ ŋá.

³⁸ Yâwɛɛ a pâi kulâi daa-ŋai su yɛ̂ɛ yala-sulu a kula ǹoôi. À kɛ̀ tí, a pâi dílɔii su karâi. A pâi kɔ́ maa-pɔlɔ-pɔlɔɔ toôi dísama. Kpɛ́ni fêi ǹíi ŋwânai a maa pɔlɔ-pɔlɔɔ.