Ɉeremi 23 - Bible

Gili-kɛ-zui gáa tínaa tuɛ-pere mɛni mai

¹ Kpalo ƃêlaai ǹúu-mɛi-ƃelai dîa nyíi-ŋai Yâwɛɛ ŋɔnûai kɛ̀ dítaa-taa dí kɛ̀ làŋ.

² M̀ɛnii ŋí ƃé Yâwɛɛ nyíi gáa a Eezuɛ Ŋɔɣâlai è mò é pîlaŋ ǹúu-mɛi-ƃelai dîa nyíi gáa a sɛŋ dí ŋɔnûai mɛi káai ǹyɛɛi, “Káfe ŋánûai mɛi kâai. Ka díkpɛ, ka dítaa-taa. M̀ɛni ma, ŋa pâi kákula ma kɛ̂i m̀ɛni nyɔ́mɔɔ sii ŋí mɛ̂ni ma.

³ Ŋa pâi ŋánûai ŋáa lɛɣɛ̂i díkîe ma nyii-ŋai dítaa-taai ǹɔii-ŋuŋ da kpɛ́ni-ŋai sui, ŋá pá a dia dípɔ-taai. Da pâi nîa-pɛlɛɛ-ŋa sɔlɔ ƃôi, dítama.

⁴ Ŋa pâi dímɛi-ƃela seêi a gɛɛ dí dímɛi káa. Ŋánûai dífe ŋɔ́nɔ pâi yaôi, kpaa máŋ núu-da é dímaa yáo. Dí tɔnɔ kpîŋ da vé pâi lánîi. Ńyãa Yâwɛɛ ƃé mò tí.”

⁵ Yâwɛɛ è mò ǹyɛɛ, “Tãi a pâi, maa tãi tí, ŋa pâi téniŋ ƃô kaloŋ siɣêi nyíi pâi kulâi Deeƃé ŋɔsuui sui. A pâi kɛ̂i a gâloŋ nyíi pâi ŋánûai mɛi kâai a táre-pere, gɛ́ tùa a táre-pere. A pâi pâi a tɔ̃yâ làa ǹɔii gwaa kélee ma.

⁶ Tãi a pâi kɛ̂i la a kâloŋ, Zuda-ƃela da pâi ŋuŋ-maa ƃô sɔlɔ ƃôi. Lii-see kɛ́ ƃò Eezuɛ-ƃela yêei. Da pâi dôli a, ‘Yâwɛɛ ƃa kúƃalo-laai.’ ”

⁷ Yâwɛɛ è mò ǹyɛɛi, “Tãi káa pâi, m̀aa tãi tí, núu-da fé ŋɔ́nɔ pâi vôoi a ńaa a gɛɛ gɛ̀-ɣele mâ Ɣalai ƃé Eezuɛ-ƃelai kùla Ize lɔii su.

⁸ Kɛ́lɛ, da pâi dífôoi a ńaa dí mó a gɛɛ gɛ̀-ɣele mâ Ɣalai ƃé Eezuɛ-ƃelai kùla yá-ŋua-pere-ƃelai yêei, é pɛ́lɛ ǹɔii-ŋuŋ-ŋai dí kɛ̀ a dítaa-tâa zui, su. Gɛ̀ ní da pâi seêi díkpɔɔi lɔii su.”

M̀ɛnii Zɛlemaya è mò é pîlaŋ Ɣâla ŋɔlóno kɛ́-ƃelai dîai

⁹ Ńii toɔ̂ɔi pôlu, ŋ́gɛ kpɛ̃̀liŋ Yâwɛɛ mɛni ma, ŋɔwóo maa waai mɛni ma. Ŋ́gaa nɔ́ yɛ̂ɛ núu ƃa lɔɔ kpéle, núu nyíi a ŋwã̂ai támaa kpéle, ǹyée a tɛɛ mai.

¹⁰ Ǹɔii láa fɛ̂ɛi a ǹûai nyíi-ŋai téniŋ ƃô fé díyêei é pîlaŋ Yâwɛɛ mai. Da tûa nɔ́ a ŋwana lɔ̂ɔ-pere, dí kɛ́ tíi nyɔ́mɔɔ kɛ̀ a díwala-wala laai. Kpɛ́ni fêi Yâwɛɛ a ǹɔii fôoi, ǹɔii a kpála, ǹûai dí kɛ́ malôŋ-see ƃò.

¹¹ Yâwɛɛ è mò ǹyɛɛi, “Ɣâla ŋɔlóno kɛ́-ƃelai da zâla láa-soŋ-ƃelai dífe ŋɔ́nɔ a ɣâla-ƃela. Ŋá dísòŋ dí kɛ̀ ŋwana lɔ̂ɔ tùa-ŋa kɛ̀ Ŋ̀âla-pɛrɛ Kɛ́tɛi kpîŋ-kpiŋ mu.

¹² Bere-ŋai da pâi tɛɛ̂i lai, zu a pâi kɛ̂i a ǹaa-lâa, zu kpíniɛɛ. Ŋa pâi gɛ̂i díkarêŋ dí tóo. Ŋa pâi mɛni kpɔ̂lu lâai dîa. Tãi ŋa pâi díkula maa kɛ̂i lai, ká pâi ǹaa kâai. Ńyãa Yâwɛɛ ƃé mò tí.

¹³ Ŋa zɔnyɔ̂ŋ káa nyíi Ɣâla ŋɔlóno kɛ́-ƃelai da gɛ̂i Sameriai. Díkaa lônoi Bêe ɣalai láai su, ǹyaŋ da gɛ́ ŋánûai dámaa da kula berei ma.

¹⁴ Kɛ́lɛ, ŋa gáa a gɛɛ Ɣâla ŋɔlóno kɛ́-ƃelai díkaa Zerusâlɛŋ díwɔ̂i tɛɛ̂i. Da wulu-wulu kɛ̀, dí kɛ́ lɛ́ɛ kɛ̀. Da kpɔŋ mâa tɛ̀ɛ nûa pɔ́ a gɛɛ dímɛni nyɔ́mɔ kɛ́, a gɛɛ núu da fé kpèra ŋwana lɔ̂ɔ-tua kɛ̂i. Díkelee dísɔŋ nyɔ̂mɔɔi nɔ́ yɛ̂ɛ Sodɔŋ da Gomora-ƃela.

¹⁵ “M̀ɛni ma, m̀ɛnii ńyãa Ŋ̀wála-wâla kélee Yâwɛɛi ŋá mó é pîlaŋ Ɣâla ŋɔlóno kɛ́-ƃelai dîa Zerusâlɛŋ ƃa: Ŋa pâi wúru ŋwánaa tɛɛ̂i dípɔ dí mii, ŋá ŋ̀ale-maa tɛ́ɛ dípɔ dí gbele. Kpɛ́ni fêi dûai nyíi-ŋai m̀ɛlɛ fé ŋ́goi, da dáa-taa ǹɔii gwaa kélee ma.”

¹⁶ Ŋ̀wála-wâla kélee Yâwɛɛ è mò Zerusâlɛŋ-ƃelai dîa ǹyɛɛi, “Káfe káwoli tɔ̀ɔ Ɣâla ŋɔlóno kɛ́-ƃelai dîa. Díkaa kili-kɛ-zu fòlo tɛɛ̂i kápɔ. Díkaa nɔ́ lônoi é pîlaŋ m̀ɛnii ma da díkili ŋá siâi lai. Kɛ́lɛ, m̀ɛnii da môi kâa, vé a ŋ́oo.

¹⁷ Diai kélee ŋ́oo pìlii, da m̀ôi dîa a gɛɛ mɛni da fé pâi kɛ̂i. Díkɛ mò ŋ̀ólii kpɔ̂lɔ-ƃelai dîa a gɛɛ mɛni kpɔ̂lu da fé pâi lâai dîa.”

¹⁸ Ŋá mò, “Ɣâla ŋɔlóno kɛ́-ƃelai ŋí dɔnɔ kpîŋ fé niî táre ní Yâwɛɛ ŋɔlîa-wooi su. Dí ta dɔnɔ kpîŋ fé niî ŋɔworɛ̂-wooi mɛni ní kpaa é táre zu. Dífe niî ŋ̀óo mɛni ní kpaa dí díwoli tɔ́ɔ m̀ɛnii ma a m̀ôi.

¹⁹ Ŋɔlii ŋwânai káa yɛ̂ɛ fãa. Gáa yɛ̂ɛ fãa kɛ́tɛ nyíi a tɛ̂ɛ ŋ̀wana lɔ̂ɔ-nuui ŋuŋ-mɛi a lii ŋwâna-pere

²⁰ ǹyaŋ va kpêra é lɛ́ɛ la zu m̀ɛnii a ŋ̀wɛ̂lii é gɛ́i, é kɛ́. Tãi tí a sèri, ŋɔnûai da pâi târei zu a ǹɛ́lɛɛ.”

²¹ Yâwɛɛ è mò ǹyɛɛ, “Ḿve ɣâla ŋɔlóno kɛ́-ƃelai ŋí tɛ̀ɛ ní, kɛ́lɛ dí lì. Ḿve worɛ̂-woo tɛ̀ɛ ní a dia, kɛ́lɛ dí lòno ńaai su.

²² Eê kɛ̀ dí kɛ́ ƃò a ńii-su mɛni kɔ́lɔŋɔɔ, gɛ̀ ní dîi pâi ŋáworɛ̂-wooi ƃôi ŋánûai dîa, dí gɛ́ ŋánûai dí díyee kúla ŋwana lɔ̂ɔ-mɛni su, díkpera ŋ̀wana lɔ̂ɔ-tuai kɛ̂i, da gɛ̂i.

²³ “Ŋ́gaa a Ɣâla nyíi gáa kwaa kélee ma. Ḿve nɔ́ kwaa tɔ̂nɔ ma.

²⁴ Núu da fa ǹoo ƃɛ́i ḿve naa kɔ́lɔŋ. Káfe gɔ́lɔŋ a gɛɛ ŋ́gaa kwaa kélee ma, é kpîŋ kɛ́ a ŋ̀elei su, kpaa máŋ ǹɔii ma?

²⁵ M̀ɛnii ǹɛ́ɛ ɣâla lòno kɛ́-ƃelai tí dí mò a ńaai, ŋá gélee kɔ́lɔŋ. Dí mò a gɛɛ ŋá worɛ̂ tɛ̀ɛ a dia nyiî-pere.

²⁶ Tãi ɣɛɛlu yée mu ƃé ɣâla ŋɔlóno kɛ́-ƃelai tí da pâi kɛ̂i lɛ́ɛ kɛ̂i la ŋánûai dîa a ǹɛ́ɛ-ŋai da gbɛ̀tɛ díkili ŋái?

²⁷ Da gâai nɔ́ yɛ̂ɛ dísee-wôo-ŋai da pâi gɛ̂i ŋánûai dí nia ḿâ yɛ̂ɛ berei dínûa pɔlɔ-ŋai díwɔ́lɔ gɛ̀ la dí kɛ́ tìnaŋ Bêe ɣalai pɔ́ naa perei.

²⁸ Tɔɔ ɣâla-ŋɔlóno kɛ́-nuui nyíi see ƃôi, é m̀ó a gɛɛ è see ƃô, kɛ́lɛ ɣâla-ŋɔlóno nuui nyíi ŋáworɛ̂-wooi mɛ̂nii, tɔɔ é m̀ó a teniŋ ƃô pere. Ya pɔ̂ri kala kɔɔ̂ni léŋ wîi ma?

²⁹ Ŋáworɛ̂-wooi káa yɛ̂ɛ ŋɔŋ da kpɔ́-kpɔ nyíi a kɔni-ŋa wòlo a gbûa-kpûai.

³⁰ Ńdɔɔ̂i ɣâla ŋɔlóno kɛ́-ƃelai dîa nyíi-ŋai da díkîe-ni wóo sìɣe dí kɛ́ mò dîyɛ ŋ́oo ƃei.

³¹ Ńdɔɔ̂i ɣâla ŋɔlóno kɛ́-ƃelai dîa nyíi-ŋai da díkpɔɔi woo ƃò, dí kɛ́ mò a gɛɛ ŋ́oo ƃei.

³² Ńyãa Yâwɛɛ ńdɔɔ̂i ɣâla ŋɔlóno kɛ́ ƃelai dîa nyíi-ŋai da díkpîŋ sèe-woo-ŋa ƃò nyíi ǹáa fɛ̂ɛi a lɛ́ɛi. Da zee-woo-ŋai ŋí ƃò a gɛɛ dí gɛ́ ŋánûai díkula berei ma a dílɛɛ-ŋai da dí tɛ̀ ŋɛ́i-woo ŋai. Ḿve mó ní a gɛɛ dí lí. Ḿve dítɛɛ ní a gɛɛ dí lí. Dífa pɔri kpɔŋ mâa sii kélee da tɛɛ̂i ŋánûai pɔ́. Ńyãa Yâwɛɛ ƃé mò tí.”

Yâwɛɛ Ŋɔkpîri

³³ Yâwɛɛ è mò ḿâ ǹyɛɛi, “Zɛlemaya, à kɛ̀ ǹûai ŋí dɔnɔ, kpaa ɣâla ŋɔlóno kɛ́-nuui dɔnɔ, kpaa sâla láa-soŋ-nuu a ímarê kɛ̀ ǹyɛɛ, ‘Worɛ̂-woo kpanaŋɔɔ lé kɛ́ɛ ƃé Yâwɛɛ è dɛ̀ɛ a yai?’ M̀ó mà yɛ̂ɛ, ‘Yá ƃa Yâwɛɛ ŋɔkpîri, ǹyaŋ a pâi ípilîi.’

³⁴ À kɛ̀ ŋánûai dɔnɔ, sâla láa soŋ-nuu, kpaa ɣâla ŋɔlóno kɛ́-nuu a ŋ̀óoi ŋí ƃò, ‘Yâwɛɛ ŋɔkpîrii,’ ŋa pâi maa nûui kula maa kɛ̂i da ŋánûai.

³⁵ Kɛ́lɛ núu kélee é ǹáoi da ŋɔkáayɔ-ŋai marê kɛ́ ǹyɛɛ, ‘Yâwɛɛ è kɛ̀ ǹyɛɛ lé? Yâwɛɛ ŋɔmɛni su too-wooi ƃa lé?’

³⁶ M̀ɛni ma dífe ŋɔ́nɔ wɔ́lɔ mò dîyɛɛ, ‘Yâwɛɛ ŋɔkpîrii,’ kpɛ́ni fêi, à kɛ̀ núu da a mò tí, gɛ̀ ní ŋa pâi ŋáworɛ̂-wooi kɛ̂i a kpîri m̀ɛni ma. Ǹûai da Díɣâlai wóo ŋá ƃɔ́, nyíi gáa a gɛ̀-ŋ̀ele ma Ɣalai, Ŋ̀wála-wâla kélee Yâwɛɛi.

³⁷ Zɛlemaya, ye ɣâla ŋɔlóno kɛ́-ƃelai marê kɛ, ‘Yâwɛɛ è m̀ɛnii su-too léŋ káyêei? Yâwɛɛ è kɛ̀ ǹyɛɛ lé?’

³⁸ Ǹyaŋ à kɛ̀ da wàla ŋ́oo mɛ́ni dí mó dîyɛɛ, ‘Yâwɛɛ ŋɔkpîrii,’ gɛ̀ ní m̀ó dîa a gɛɛ,

³⁹ ŋa pâi dísiɣêi ŋá dípili kpɔ́ kwaa kôyaa ma. Ŋa pâi gɛ́i tí a dia é pɛ́lɛ daa lêei ma ŋá dɛ̀ɛ dípɔ da dínâŋ-pɔlɔ-ŋai.

⁴⁰ Ŋa pâi díŋumɛi, ŋá ƃâa kula dîa nyíi dífe wɔ́lɔ pâi niâi mai.”