Ɉeremi 22 - Bible

Ŋ̀orɛ̂-wooi Zɛlemaya è lì la Zuda kaloŋ-pɛrɛi mu-ƃelai pɔi

^1-2 Yâwɛɛ è mò ḿâ a gɛɛ ŋá lí Zuda gâloŋ-pɛrɛi lá. Gâloŋ ŋí è kɛ̀ a Deeƃé ŋɔsuui su nuu. Yâwɛɛ è ńdɛ̀ɛ naa a gɛɛ ŋá lóno gâloŋ pɔ́ da ŋɔtíi kɛ́-ƃela kpaya-kpayai, é pɛ́lɛ Zerusâlɛŋ-ƃelai dîa a gɛɛ dí díwoli tɔ́ɔ m̀ɛnii mâ Yâwɛɛ è mó ḿâi.

³ “Ńyãa Yâwɛɛ ŋa môi kâa a gɛɛ ká tɔ̃yâ mɛni da mɛni-sãa kɛ́. Diai ǹûai da dífilîi, ka dí kúla yêei kɛ́. Káfe tua-nyɔ̂ŋ kɛ̀ a ŋɔ̃́ya, tee-loŋ, kpaa máŋ pɔɔ-nɛyaa. Káfe núu da pàa gwaa-ma-waai ma nyíi vé mɛni nyɔ́mɔ da kɛ́ nii.

⁴ À kɛ̀ m̀ɛnii ŋí ŋa môi kâai, kà gɛ̀, gɛ̀ ní Deeƃé ŋɔsuui su-ƃela da pâi wɔ́lɔ kɛ̂i nɔ́ a kâloŋ-ŋa. Da dítii kɛ́-ƃela kpaya-kpayai da pâi kɛ̂i seêi soo-ŋa mɛi dí kɛ̀ sèe soo-sia kêleŋ-ŋa su dí kɛ́ lɔ̀ dí kɛ́ kùla gâloŋ-pɛrɛi ŋí mu.

⁵ Kɛ́lɛ, à kɛ̀ ka wàla káwoli tɔ́ɔ m̀ɛni-ŋai ŋí ŋá môi kâai dîa, gɛ̀ ní ŋa ḿvôoi a ńyãa kpîŋ ńaa a gɛɛ Zerusâlɛŋ a pâi wôloi, ǹaa é lɛ́ɛ a pîleŋ ŋá. Ńyãa Yâwɛɛ ƃé mò tí.

⁶ “Zuda kaloŋ-pɛrɛi lɛ̂lɛɛi kpɔ́ ŋ́ɛi yɛ̂ɛ berei Gilia lɔii káa lai, kpaa yɛ̂ɛ berei Lɛƃanɔŋ yee kpaya-kpayai káa lai. Kɛ́lɛ, ŋa pâi ǹaa kɛ̂i a lɔii pûŋ ƃɛ́i núu da kélee fé pâi seêi naai.

⁷ Ŋ́gaa nûa tɛɛ̂i naa dí ǹaa su-kara. Da pâi pâi a díyuɔ̂-ŋai dí dípɛrɛ yée-mu-wuru lɛ́lɛɛ mɛni kpanaŋɔɔ-ŋai tée nyíi-ŋai díkaa a sîda wuru kpono-ŋai dí díkereŋ.

⁸ “Ǹaa à kɛ̀ tí, ŋ̀ɔ̃ya-ŋa nyii-ŋai kulâi lɔii da kpɛ́ni-ŋa sui, da pâi kɛ̂i tɛɛ̂i naa dí kɛ̀ díkîe-ni marê kɛ̀ lé mɛni ƃé Ńyãa Yâwɛɛ ŋá m̀ɛni-sãŋ ŋí kɛ̀ la a taa-lêe kɛ́tɛ kɛ́ɛ ŋii.

⁹ À kɛ̀ tí, da pâi zu toôi dîyɛ kpɛ́ni fêi, dí dípôlu tɔ̀ɔ gbanaŋ-wooi ma nyíi dí gɛ̀ ńyãai ŋ́gaa a Díɣâlai ńyêei, dí kɛ́ ɣâla da kpɛ́ni-ŋa fɛ̀li, dí kɛ́ tíi kɛ̀ dîɛ.”

Zɛlemaya ŋɔworɛ̂-wooi é pîlaŋ Zoazi ma

¹⁰ Zuda-ƃela, káfe wɔ̀lɔ gâloŋ Zosaya mɛni ma nyíi a saai. Káfe malôŋ-see ƃò zaa mɛ̂ni ma. Kɛ́lɛ, ka wɔ́lɔ kpɔ́ a ŋánaa ǹóŋ Zoazi mɛni ma. Da liî la kwaa kôyaa ma, ǹyaŋ vé ŋɔ́nɔ pâi pâi pôlu. Vé ŋɔ́nɔ pâi ŋɔlɔii kâai nyíi dí maa-sɔlɔ ƃô zui.

¹¹ Yâwɛɛ è lòno é pîlaŋ Zosaya ǹóŋ Zoazi ma nyíi lɛ̀ɛ ǹâŋ pɔ́ɔ-ŋa a kâloŋ Zuda mɛi ǹyɛɛi, “A kula ƃɛ́ a lí ǹyaŋ vé ŋɔ́nɔ pâi pâi pôlu ƃɛ́.

¹² A pâi saâi ǹɔii su ƃɛ́i da liî la naai. Ǹyaŋ vé ŋɔ́nɔ pâi ǹɔii ŋí kâai.”

Zɛlemaya ŋɔworɛ̂-wooi é pîlaŋ Zɛoakiŋ ma

¹³ Kpalo ƃêlaai ǹúui ma nyíi a ŋɔpɛ́rɛi tɔ̂ɔ a wôya mɛni, nyíi a da pù ma a fili-pere, nyíi a gɛ̀ m̀arâi dí tíi kɛ̀ mì kpɛ́ni-kpɛnii, ǹyaŋ va dífela-fei.

¹⁴ Kpalo ƃêlaai ǹúui ma nyíi a mò ǹyɛɛ, “Ŋa pâi kâloŋ-pɛrɛ tɔɔ̂i ŋ́gbîŋ mɛni ma, ŋá ŋ̀elei su-pere loŋpo-ŋai kɛ́ a gɛ́tɛ.” M̀ɛni ma, a wôna-ŋa kula mà, é bɛ́rɛi mu-pere kpɛtɛ a sîda wuru ƃela-ŋa, é bɔ̃yɛɛ tóo a gbɔluɔɔ.

¹⁵ À kɛ̀ ya pɛ́rɛ tɔ̀ɔ a sîda wuru, gɛ̀ ní a pâi íkɛ̂i a kâloŋ lɛ́lɛɛ, kpɛ́ni fêi, ípɛrɛi lɛ̂lɛɛi é tɛ́ɛ ǹûai díwɔ̂i ma? Ínâŋ è ŋɔkɛ-ɣeniɛi kɛ̀ a lii-nɛ̃ɛ é seri gɔ̃yɛŋ ma. È kɛ̀ a téniŋ ƃô-nuu, zã́a. M̀ɛni ma gɛ́ mɛ̂ni kélee è ƃûu ƃò.

¹⁶ È gôlo-ƃelai dímɛnii ŋá tèe a téniŋ ƃô-pere, ǹyaŋ ŋɔkɛ-ɣeniɛi è kɛ̀ a ǹɛ́lɛɛ. Nyíŋi ƃé a nɛ̀ a gɛɛ núu è ŋ́gɔlɔŋ.

¹⁷ Kɛ́lɛ sɛŋ kɔ́riɛɛ a fili-pere nɔ́ ƃé íŋɛi káa ma, íkɛ nûa pàa nyii-ŋai dísɔŋ fé dîai, íkɛ ǹûai sôŋ a ŋwana lɔ̂ɔ-pere.

¹⁸ M̀ɛni-ŋai ŋí ƃé Yâwɛɛ è mò é pîlaŋ Zosaya ǹóŋ Zɛoakiŋ ma, nyíi kɛ̀ a kâloŋ Zuda lɔii sui. “Núu da fé pâi malôŋ-see ƃôi zaa mɛ̂ni ma, kpaa é m̀ó, ‘Lé mɛni kpɔlu ƃè ŋí, ǹaoi, lé mɛni kpɔlu ƃè ŋí!’ Núu da fé pâi wɔ̂lɔi ŋuŋ-su, kpaa é wɔ́lɔ a ɣelêi-pere ǹyɛɛ, ‘Óo ŋákâloŋ! Óo ŋánuu-namui!’

¹⁹ Yɛ̂ɛ berei da wɛlɛ-sôo lòo lâi, bere nɔ́ ƃé da pâi ǹoôi la. Da pâi ŋ̀âlai, dí bili dí doo Zerusâlɛŋ siɣãŋ pôlu-pere.”

Zɛlemaya ŋɔworɛ̂-wooi é pîlaŋ Zerusâlɛŋ ŋɔmɛnii ŋá tee mɛni ma

²⁰ Zerusâlɛŋ-ƃela, ka lí Lɛƃanɔŋ ká láɣi. Ka lí Basãŋ lɔii su ká wɔ́lɔ. Ka tɔɔ Môa yêei mâ ká tóli ƃó, kpɛ́ni fêi, da kákpɔŋ mâa-ƃelai yée mɛi ɣále.

²¹ Tãi ká kɛ̀ a kátɔɔ lai, Yâwɛɛ è lòno kápɔ, kɛ́lɛ, káfe káwoli tɔɔ ní a dɔnɔ kpîŋ. M̀ɛni sîi ŋí ƃé ká kɛ̀ gɛ̂i kákɛ-ɣeniɛi su. Káfe pɔri ní káwoli tɔɔ̂i Yâwɛɛ wóo ma.

²² Vãai a pâi koônii a kálaa túɛ-ƃelai, dí kákpɔŋ mâa-ƃelai sóŋ a kɔ-sôŋ-ŋa, dí ƃâa kula kátaa lêei ma a ŋumɛ-pere, m̀ɛni nyɔ́mɔ-ŋai ká gɛ̀i mɛ̂ni ma.

²³ Ká kɛ̀ a ká ŋuŋ-ma ƃóɔɔ sîda-ŋai sáma ká gùla Lɛƃanɔŋ, ka pâi kɛ̂i a ká malôŋɔɔ, zɛŋ-soli maai ŋí a pâi kɛ̂i yɛ̂ɛ nɛnî a kɛ̀ koi-tee su.

Ɣâla è Zɛoasiŋ ŋɔmɛnii ŋá tèe

²⁴ Nya ƃe Yâwɛɛ è lòno Zɛoakiŋ ǹóŋ Zɛoasiŋ pɔ́ nyíi kɛ̀ a Zuda kaloŋ ǹyɛɛi, “Tãi nɔ́ ńyãa ƃa gɛ̀ ɣele-ma Ɣalai, eêi kɛ̀ íkɛ ƃò kpîŋ a gâloŋ gbonoi íkɛ ƃò ńaa-mii-yee ma, ŋâi í kùla ńyee ma,

²⁵ ŋá ítɛɛ ǹûai pɔ́ ya yaôi dîai, diai ŋ̀wɛ̂lii dí ípaai. Ŋa pâi ítɛɛ̂i Babelɔŋ kaloŋ Nɛbukinaza da ŋɔkɔ-kuluƃa-ŋai pɔ́.

²⁶ Ŋa pâi ka ílee kátɛɛ̂i kɔ-sôŋ-laa su. Ka pâi liî ǹɔii su ƃɛ́i dífe káta maa sɔlɔ ƃó ní naai. Ǹyaŋ káfeerɛ ka pâi saâi naa.

²⁷ Ka pâi kɛ̂i ŋ̀wɛ̂lii ká pá pôlu ǹɔii ŋí su, kɛ́lɛ, pere dɔnɔ kpîŋ fé pâi kɛ̂i naa ká lene pôlu.”

²⁸ Ŋá mò ńyɛ̃ɛ, “Ká káa tûai a Gâloŋ Zɛoasiŋ yɛ̂ɛ pɔ̂rɔ-leɣi sàa nyíi núu da fé ŋ̀wɛ̂lii lé mɛni ma? M̀ɛnii ŋí ƃé da ŋɔnîa-pɛlɛɛi da liî la a dia kɔ-sôŋ laa su ǹɔii su nyíi dífe ǹaa kɔ́lɔŋ?”

²⁹ Óo lɔii, lɔii, lɔii! Íwoli tɔ́ɔ m̀ɛnii mâ Yâwɛɛ a m̀ôi:

³⁰ “Ǹalôŋ ŋí ŋɔmɛnii ŋáteɛ̂ɛi a gɛɛ ŋɔnîa-pɛlɛɛi dísaa, é kɛ́ a ǹúui nyíi gɛ́ mɛni da kélee ŋ̀aa sèe fé kɛ̂i. Zuu da fé pâi kɛ̂i ma é kɛ́ Zuda mɛi a Deeƃé pɔɔ-ŋa nuu. Ńyãa Yâwɛɛ ƃé mò tí.”