Ɉeremi 21 - Bible

Ɣâla a pâi Zuda da Zerusâlɛŋ dímɛnii ŋáa têei é dí kula maa kɛ́

¹ Ǹaa kɛ́ɛ tíi, Zɛdikaya nyíi kɛ̀ a Zuda kaloŋ è Maakia ǹóŋ Pasuɔ da Maaseia ǹóŋ Zɛfɛnaya nyíi kɛ̀ a zâla sâla láa-soŋ-nuui tɛ̂ɛ ḿbɔ naa a gɛɛ dí mó ḿâ a gɛɛ ŋá Yâwɛɛ marê kɛ́ dímaa mɛ̂ni ma.

² Dí pà ḿbɔ dîyɛɛ ḿâi, “Yâwɛɛ marê kɛ́ é kpɔ́ŋ kûa, kpɛ́ni fêi, Gâloŋ Nɛbukinaza nyíi gáa Babelɔŋ a kɔ́ pɛ́lɛ kûa. Tãi da Yâwɛɛ a pâi ŋɔŋɛi-kɛ-maai da kɛ̂i yɛ̂ɛ berei a kâa gɛ̀ lai a gɛɛ Nɛbukinaza é lene pôlu.”

³ Zɛlemaya è díwoo su tòo ǹyɛɛ dîa ka mó Zɛdikaya ma kâa,

⁴ Yâwɛɛ nyíi gáa a Eezuɛ-ŋai Díɣâlai ǹyɛɛ, “Ŋa pâi kákɔ-kɔ-sãai nyíi kákaa kɔ̂i la Babelɔŋ kaloŋ da ŋɔnûai pɔ́i, nyíi-ŋai da tínaŋ kátaai mai, ŋá seêi kâa. Ŋa pâi pâi a dia daai su kásama.

⁵ Ńyãa kpîŋ ŋa pâi kɔ̂i kápɔ a ŋáwála-wala-laai kélee kpɛ́ni fêi, ńii ŋwânai kâa a ŋánaa.

⁶ Fúlu-sãa kélee gáa daai ŋí sui, ŋa pâi gélee paâi, a nɛ̃ɛ ma é kɛ́ a núu kpaa taa-tulɛ. Kɔlɔ-fela nyɔ́mɔɔ a pâi dípaâi.

⁷ Ǹaa pôlu ma, ŋa pâi Zuda kaloŋ Zɛdikaya, ǹyée mu-ƃelai da daa lêei su-ƃelai nyíi-ŋai dífe pâi lɛɛ̂i gɔlɔ-felai, ƃóa-sɔ̂kpɔ da puru díyee mui, tɛɛ̂i Babelɔŋ kaloŋ Nɛbukinaza pɔ́ da díkpɔara-ƃelai nyíi-ŋai dítɔɔ̂i diai. Nɛbukinaza a pâi dípaâi a ƃóa-sɔ̂kpɔ. Vé pâi dímalôŋ kâai. Vé pâi dítɔnɔ kpîŋ lɛɛ̂i.

⁸ “M̀ó dîa Yâwɛɛ ǹyɛɛi, ‘Ŋ́gaa sâa fúlu-laa da saa sêei ká ŋɛ́i a gɛɛ ká kánîa siɣe zu.

⁹ Ǹúui nyíi pâi lɛɛ̂i daa lêei ŋí sui, a pâi lɛɛ̂i ƃóa-sɔ̂kpɔ, puru, kpaa máŋ kɔlɔ-fela nyɔ́mɔɔ yée mu. Kɛ́lɛ, ǹúui nyíi pâi kulâi banaŋ mâ é gbîŋ tɛɛ Babelɔŋ-ŋai pɔ́i, a pâi lɛɛ̂i ɣele ma. Ŋɔfúlu-laai a pâi kɛ̂i a ŋɔfela-fei.

¹⁰ Kpɛ́ni fei, ŋaâ ŋ́ɛi sée daai ŋí ma a mɛni kpɔ̂lu. Ḿve pâi mɛni lɛ́lɛɛ da kɛ̂i naa. Ŋa pâi dɛɛ̂i Babelɔŋ kaloŋ pɔ́. A pâi naa kéreniî. Ńyãa Yâwɛɛ ƃé mò tí.’ ”

Yâwɛɛ a pâi Zuda kaloŋ-ŋai dímɛnii ŋá têei

¹¹ Zɛlemaya è lì a ŋ̀óo tuɛ-pere ǹyɛɛ, “M̀ɛni ma, m̀ó Zuda kaloŋ-pɛrɛi mâ yɛ̂ɛ ma íwoli tɔ́ɔ Yâwɛɛ wóo ma,

¹² ‘Káai a Deeƃé ŋɔsuui su-ƃelai, Yâwɛɛ ǹyɛɛ ká tɔ̃yâ mɛni kɛ́ a ɣele kélee. Diai ǹûai da dífilîi, ka dí kúla yêei kɛ́. A wàla kɛ́ tí, ŋa pâi ńii ŋwânai kpɔ́ yɛ̂ɛ ŋɔŋ nyíi va nîiŋ, ká ŋwãna-lɔ̂ɔi mɛni ma.

¹³ Zerusâlɛŋ, yá ƃé íkaa see-ni ǹyéei tôŋ su, diŋ-tiŋ mɛi yɛ̂ɛ kɔnii, íkɛ mò yɛ̂ɛ, núu da fa pɔ̂ri íyee mɛi ɣâlei, kpaa máŋ núu da fa pɔ̂ri pâi ƃɛ́i íkaa naai? Kɛ́lɛ ŋa pâi a gɛɛ ŋá kɔ́ ípɔ.

¹⁴ Ŋa pâi í kula maa kɛ̂i yɛ̂ɛ berei ítûa-pere káa lai. Ŋa pâi ŋɔŋ toôi íkâloŋ-pɛrɛ-ŋai dîa nyíi pâi gélee kéreniî da ǹaa kɔlɛ ma sãai kéleei. Ńyãa Yâwɛɛ ƃé mò tí.’ ”