Ɉeremi 20 - Bible

Laa sâa è tòo Zɛlemaya da Zâla láa-soŋ-nuui Pasuɔ díloai

¹ Tãi Imɛ ǹóŋ Pasuɔ nyíi kɛ̀ a sâla láa-soŋ nuu, gɛ̀ ƃò ŋɔ́nɔ a Ŋ̀âla-pɛrɛ Kɛ́tɛi mɛi káa nuu kɛ́tɛi è m̀ɛni-ŋai mɛ̀ni la nyíi ŋá kɛ̀ môi,

² è gɛ̀ dí ńokwa, dí ńdoo yɔlɛ ŋá Bɛŋsima ŋɔsiɣãŋ láƃerei mɛi-pere ŋɔi-la, Ŋ̀âla-pɛrɛ Kɛ́tɛi kɔlɛ ma.

³ Bôlu ma ɣelei, Pasuɔ kɛ́ɛ a ŋ́gula ǹyɔlɛi-ŋai, ŋá mò mà ǹyɛ̃̂ɛi, “Yâwɛɛ fé ílaa sèe ní a Pasuɔ. Ǹáai a zèe yâi ƃa, ‘Yao Kɛ́tɛ Káa Kwaa Kélee Ma.’

⁴ Yâwɛɛ ǹyaa kpîŋ a mó ǹyɛɛ, ‘Ŋa pâi íkɛ̂i a yao kɛ́tɛ íkpîŋ mɛni ma da íƃarâai. Ya pâi kɛ̂i naa díkpɔara-ƃelai dí kɛ̀ dípaa a ƃóa-sɔkpɔ-ŋa. Ŋa pâi Zuda-ƃela kélee kɛ̂i Babelɔŋ yée-mu. A pâi dísonîi a kɔ-sôŋ-ŋa é lí a dia ŋɔlɔii su, é da-ni paa.

⁵ Ŋa pâi ǹɛɛ̂i naa díkpɔara-ƃelai dí daa-lêei ŋí su tɔɔ-sãai kélee kpɔ́ síɣe. Da pâi zu-sãa kélee kpɔ́ siɣêi é pɛ́lɛ ǹûai kɔ̃lîŋ kélee da Zuda kaloŋ-ŋai dílaai-kɛ̂i-sãai dîa dí lí a dia Babelɔŋ.

⁶ Mɛni a kpèra yâ Pasuɔ, da pâi liî a yá é pɛ́lɛ íkayɔɔ-ŋai kélee dîa Babelɔŋ. Ǹaa ƃe ya pâi saâi naa dí íloo naa ka íƃarâai nyíi-ŋai íkɛ̀ lɛ́ɛ támaa kɛ̂i dîai.’ ”

Zɛlemaya è wɔ̀lɔ Yâwɛɛ ma

⁷ Yâwɛɛ, í ḿbɛ̀lɛ, ŋ́gili-ŋa é tɛi. Íwala-walaai é tɛ́ɛ ḿâ. Íyee a tɛ̀ɛ ḿâ. Ǹûai kélee da ɣɛ́lɛ-maa kulâi ŋ́gbonôi. Da lɛ̂ɛ ɣɛ̂lɛi ḿâ é lɛ́ɛ la zu ɣele wûlii é kɛ́.

⁸ Tãi kélee ŋa lôno lai, fɛ̂ɛ ŋá wɔ́lɔ, ŋá láɣi, ńyɛ̂ɛi, “Laa-sâa! Su-kara!” Yâwɛɛ, da ńaa nyɔ́mɔ ƃôi, dí kɛ̀ ɣɛ́lɛ-maa kula ŋ́gbonôi a tãi kélee, kpɛ́ni fêi, ŋa íwooi ƃôi.

⁹ Kɛ́lɛ, à kɛ̀ ŋà mò, “Ŋa pâi niâi Yâwɛɛ ma, ḿve ŋɔ́nɔ lòno é pîlaŋ ǹáa ma.” Gɛ̀ ní íwooi a kɛ̂ yɛ̂ɛ ŋɔŋ ƃé ŋ́gereniî ŋ́gbonôi. Ŋa kɔ̂ a gɛɛ ŋá ńii maa sóŋ, kɛ́lɛ pere kélee da fa kɛ̂ naa.

¹⁰ Ǹûai kélee da kɛ̂ m̀ôi ninîŋ-woo su dîyɛɛi, “Yao kɛ́tɛ káa kwaa kélee ma! M̀ɛni ma, kwaa zɔ̀ŋ láa ǹúu-mɛi-ƃelai ŋɛ́i!” Ńaôi-ni kpîŋ da tɔɔ ḿâ. Da m̀ó dîyɛɛi, “Tãi da kwa pɔ̂ri bɛlɛ̂i, gɛ̀ ní kwa pâi zoniî kúmɛni kpa kula m̀a.”

¹¹ Kɛ́lɛ, Yâwɛɛ, íwala-walaai, ítɔɔ̂i kpanaŋɔɔ, íkɛ ƃò ḿbôlu. M̀ɛni ma diai ŋ̀wɛ̂lii dí mɛni ŋánaa kɛ́ a ńyãai, da pâi fɛɣɛ̂i. Ŋumɛ a pâi dísoniî wɔ́lɔ-wɔ́lɔ da wɔlɔ-wɔlɔ, kpɛ́ni fêi, dífe pâi mɛni lɛ́lɛɛ sɔlɔ ƃôi, ŋ̀umɛi pâi dípaâi, núu da fé pâi niâi m̀a.

¹² Ŋ̀wála-wâla kélee Yâwɛɛi, ya núu su kɔ̀ɔŋ a tɔ̃yâ pere. Í m̀ɛnii kɔ́lɔŋ gáa dí líi su, da díkili ŋái. M̀ɛni ma, tɔɔ ŋá íkaa í mɛni kpa kula ŋ́gbɔara-ƃelai dîa, kpɛ́ni fêi, ŋa ŋámɛnii láa íŋɛi.

¹³ Ka wule tóo Yâwɛɛ ma! Ka Yâwɛɛ láa maa tɛ́! A ǹúu dòo-mu-ŋai kùla ŋ̀wana lɔ̂ɔ-ƃelai díwala-walai mu.

¹⁴ Kpalo ƃelâi ŋ̀elei mâ díwɔlɔ ḿaa-sɔlɔ ƃô lai! Nia vóloi ma ńee è wɔ́lɔ ḿaa-sɔlɔ ƃô lai!

¹⁵ Kpalo ƃelâi ǹúui ma nyíi pà a ḿaa sɔlɔ ƃó tùŋ ńâŋ pɔ́ ǹyɛɛ mai, “Surɔŋ-loo ƃè. Yaâ lóŋ-surɔŋ maa sɔlɔ ƃó!”

¹⁶ Tɔɔ ǹúui tí é kɛ́ yɛ̂ɛ daa-lee-ŋai Yâwɛɛ a zu kàra va gíli-ŋa siai. Tɔɔ é sɛŋ-soli maa wɔlɔ-woo mɛni a ɣele ƃɔ̂i tãi, da fólo-maa-laa kɔ̀ tùŋ,

¹⁷ kpɛ́ni fêi, è ǹɛɛ naa ŋá tɛ́ tâai. Gɛ̀ ní ńee-koo-ƃɔlɔŋ eê kɛ̀ nɔ́ a ḿolôŋ.

¹⁸ Lé mɛni ƃé dí ḿaa sɔlɔ ƃô lai? A gɛ́ nɔ́ ŋ́gɛ ƃò mɛni kpɔ̂lu da lii-too pôlu su, ŋ́gɛ ŋákɛ-ɣeniɛi kɛ̀ nɔ́ ŋumɛ-pere su.