Ɉeremi 19 - Bible

Zã́ŋ bîlaŋɔɔi bɔ̂rɔ-leɣi wóloɔi mai

¹ Yâwɛɛ è lòno ḿbɔ ǹyɛɛi, “Lí í pɔ̂rɔ-leɣi yá ǹeɣi-tɔɔ nuui yêei, í Eezuɛ nuu-pɔlɔ-ŋai da-ni é pɛlɛ zâla láa-soŋ-ƃelai láa-tuɛ-ƃelai da-ni dîa,

² ka dîa-ni ká lí ká tɛ́ɛ Pɔsɔɔ siɣãŋ lá ká lí Bɛŋ-inamɔŋ tiŋ-tiŋ su í ŋ̀óo-ŋai ƃó dîa nyíi-ŋai ŋa pâi môi yâi.”

³ Mó dîa yɛ̂ɛi, “Káai a Zuda kaloŋ-ŋai da Zerusâlɛŋ-ƃelai, ka Yâwɛɛ wóo mɛ́ni. Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai ǹyɛɛ ká gáa, ŋ́gaa pâi pâi a mɛni nyɔ́mɔɔ kâa nyíi núu da a dùŋ mɛ̀ni, a pâi kpɛ̃lînii.

⁴ Kpɛ́ni fêi, ǹûai da dípôlu tɔ̀ɔ ḿâ, da gwaai ŋí ma maa-tĩ̂a kara a kéreŋ-sɛŋ kúŋ-nɛ̃ɛ kéreŋɔɔ ɣâla da kpɛ́ni-ŋa dîa, nyíi dínâŋ pɔlɔ-ŋai, Zuda kaloŋ-ŋai é pɛ́lɛ dîa dífe gɔ́lɔŋ. Da núu támaa páa gwaai ŋí ma nyíi-ŋai dísɔŋ fé dîai.

⁵ Da kwaa ma kpɛtɛ Bêe ɣâlai mɛni ma dí kɛ̀ dílônii-sinaai kùla naa a kéreŋ-sala m̀a. Ńyãa fé m̀ɛnii ŋí ƃó ní dîa a gɛɛ dí gɛ́, kpaa ŋá ŋ́gili ŋá sía é pîlaŋ m̀a.

⁶ M̀ɛni ma, Yâwɛɛ è mò ǹyɛɛ tãi káa pâi dífe ŋɔ́nɔ pâi gwaai ŋí ma tôlii a Tofɛ, kpaa máŋ Bɛŋ-inamɔŋ tiŋ-tiŋ, kɛ́lɛ da pâi ǹaa tôlii a núu-paa tiŋ-tiŋ su.

⁷ Ŋa pâi gwaai ŋí ma kɛ̂i a pîleŋ ŋá. Ŋá Zuda da Zerusâlɛŋ dímɛni kpɛtɛɛ-ŋai kélee su kara. Ŋa pâi gɛ̂i dínûai dí lɛ́ɛ kɔ́ su díkpɔara-ƃelai yée mu. Ŋa pâi dípoma tɛɛ̂i ŋ̀ɔni-ŋai pɔ́ díkaa ŋ̀elei sui da vɛnɛ-sãai díkaa ǹɔii mai a dí kɔ́nɔ̃ŋ.

⁸ Ŋa pâi daa-lêei ŋí kɛ̂i a kwaa ma nyɔ́mɔɔ. Nûa da pâi dísĩa miî la, kpɛ́ni fêi, ǹaa a pâi kɛ̂i a ǹyɔ́mɔɔ.

⁹ Ŋa pâi gɛ̂i díkpɔara-ƃelai dí dímaa tínaŋ. Da pâi lɛɛ̂i naa dí kɔ̃́nɔŋ é kpɛ́ɛ. À kɛ̀ tí, da pâi kɛ̂i dínîa-pɛlɛɛi miî é pɛ́lɛ dílaoi-ni dîa.”

¹⁰ Nya ƃe Yâwɛɛ è mò ḿâ a gɛɛ ŋá bɔ̂rɔ-leɣii wólo diai kwa dîa-ni kú kɛ̀ naai, díŋɛi.

¹¹ À kɛ̀ tí, ŋá mó dîa Ŋ̀wála-wâla kélee Yâwɛɛ ǹyɛɛ, “Bere ƃé ŋa pâi ǹûai da daa-lêei su-ƃelai wôloi la yɛ̂ɛ ǹeɣi-tɔɔ-nuui ŋɔpɔ̂rɔ-leɣii a gɛɛ pere fé ŋɔ́nɔ kɛ̀ naa gbɛtɛ́ɛ pôlu mɛni ma. Da pâi ǹûai loôi Tofɛ, kpɛ́ni-fei díloôi da kpɛ́ni fé pâi kɛ̂i ma.

¹² Bere ƃé ŋa pâi tûai la a gwaai ŋí ma da ǹaa-ƃela a gɛɛ ǹaa é ƃóloŋ Tofɛ ma.

¹³ Bɛ́rɛ-ŋai díkaa Zerusâlɛŋ da nyíi-ŋai díkaa a Zuda kaloŋ-ŋai dípɛrɛi, é pɛlɛ bɛ́rɛ-ŋai dîa nyíi-ŋai díkereŋ sɛŋ kúŋ nɛ̃ɛ kèreŋ dítôŋ su ŋ̀âla-ŋai díkaa ŋ̀ele-kɔlɔŋ sui dîai, dí kɛ́ kpele-sɛŋ sama-sɛŋ pù ŋ̀âla-ŋai da-ni dîɛi, da pâi kɛ̂i a dímaa-tĩ̂a karáa yɛ̂ɛ Tofɛ.”

¹⁴ Nya ƃe Zɛlemaya è lène pôlu é kúla Tofɛ ƃɛ́i Yâwɛɛ è dɛ̀ɛ naa a gɛɛ é ɣâla-woo ƃó naai. È tɔ̀ɔ Yâwɛɛ ŋɔpɛ́rɛi láƃerei, é mó ǹûai dîa ǹyɛɛi,

¹⁵ “Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai ǹyɛɛ, ŋa pâi pâi a m̀ɛni ŋáa téɛɛi nyíi kélee ŋá gbɛ̀tɛ é pîlaŋ daa-lêei ŋí ma da zu-ƃela kélee. Kpɛ́ni fêi, díwôlii kpɔ̂lɔɔi. Dífa ŋ̀wɛli dí díwoli tɔ́ɔ ḿâ.”