Ɉeremi 17 - Bible

Zuda ŋɔsɔnyɔ̂ŋ da gula-maa

¹ Yâwɛɛ è mò ǹyɛɛi, “Zuda-ƃela, da ká sɔnyɔ̂ŋ pɔ̃yɛɛ kákili ŋá a kɔlɔ-pɔ̃yɛɛ-sɛŋ nyíi gáa a kɔli, ǹyíŋ kɛ́ ƃò a dâmaŋ. Dí kásɔnyɔ̂ŋ pɔ̃̀yɛɛ káɣâla-teƃele-ŋai sônɔŋ-su.

² Kánûai díkaa Ŋ̀âla-nɛnii Asira fɛlîi ǹyée-ŋai tôŋ su, ŋ̀uru kpaya-kpayai mu ƃɛ́i ŋɔɣâla teƃele-ŋai káa naa da ŋɔŋɛi kɛ́-maa-ŋai.

³ Ka Ŋ̀âla-nɛnii Asira ŋí fɛ̀li kwaa kélee ma kálɔii su. Ŋa pâi gɛ̂i kákpɔara-ƃelai dí ká kɔ̃liŋ da kátɔɔ-sãai kúla káyêei zɔnyɔ̂ŋ-ŋai ká gɛ̀ kálɔii gwaa kélee mai, mɛni ma.

⁴ Ǹɔii nyíi ŋáwɔlɔ dɛ̀ɛ kápɔ a kákɔ̃lîŋ, vé pâi ŋɔ́nɔ kɛ̂i a kápɔɔ. À kɛ̀ tí, ŋa pâi gɛ̂i ká tíi kɛ́ kákpɔara-ƃelai dîɛ ǹɔii su ƃɛ́i káfe ǹaa kɔ́lɔŋ. Ŋa pâi gɛ̂i tí kpɛ́ni fêi, ŋá lii ŋwânai káa yɛ̂ɛ ŋɔŋ. Ǹyaŋ a pâi kákereniî, va liîŋ.”

Yâwɛɛ a lûwa làa ǹúui da-ŋa dîa, gɛ́ da-ŋa náaŋ làa

⁵ Yâwɛɛ è mò ǹyɛɛi, “Náaŋ káa diai kélee dîa da dípôlu tɔ̀ɔ ḿâi, dí díkili tɔ́ɔ núu-kpune ma, dí díkili tɔ́ɔ núu-kpune ŋɔwála-walaai mai.

⁶ Ǹúu sîi tí káa yɛ̂ɛ kpɔlɔ nyíi gáa vɛ̃ɛ-kpâlaŋ su, nyíi a ƃɔ̂lɔ lɔii kpâla mai, gɛ́ ƃò tɔɔ̂i kpolo-lɔii ma ƃɛ́i sɛŋ da fa ƃɔ̂lɔ naai. Mɛni lɛ́lɛɛ da fé pâi kulâi gbonôi.

⁷ “Kɛ́lɛ, ŋa pâi lûwa lâai ǹúui ma nyíi pâi gíli tɔɔ̂i ḿâi.

⁸ Maa nûui tí káa yɛ̂ɛ ŋ̀úrui nyíi gáa tɔɔ̂i ya-ɣɛli-loŋ kɔlɛi, gɛ́ zame-ŋai lɔ̂ ǹyái mu. Va yâo a fólo-ɣele tãi, kpɛ́ni fêi, ǹáa a kɛ̂ nɔ́ a ŋ̀unu. Vé kpáani à kɛ̀ tuna a wàla pú. À kɛ̂ kpɔ́ nɔ́ ƃâi.

⁹ “Gbɛ̂ɛ ƃa târe núu-kpune ŋɔkili-ŋa-siâi su? Sɛŋ tá fé naa gɛ̀ núu pɛ̀lɛ yɛ̂ɛ ǹyaa. A kɔ̂lɛi kpɔ́ zale fé ma.

¹⁰ Ńyãa Yâwɛɛ ƃa núu líi su kàa, ŋ́gɛ núu líi su kɔ̀ɔŋ. Ŋà núu ŋɔmɛnii ŋá tèe yɛ̂ɛ berei ŋɔkɛ-ɣeniɛi káa lai, yɛ̂ɛ berei a tûa lai.”

¹¹ Ǹúui nyíi a sɛŋ-kao sɔlɔ ƃô a fili perei, gáa yɛ̂ɛ ŋɔni nyíi a m̀araa da kpɛ́ni ɣáloŋ saai. Ǹúu ŋí a pâi ŋɔtɔɔ-sãai su pûi a ǹoloŋ tãi, ǹyaŋ a lɛ̂ɛ a ǹyée fôlo yɛ̂ɛ ƃoo-nuu a ŋɔkɛ-ɣeniɛi kpɛɛ-ŋa tãi.

¹² Kú Ɣâla-pɛrɛ Kɛ́tɛi káa yɛ̂ɛ kâloŋ-see-sɛŋ kɛ́tɛ, nyíi gáa tɔɔ̂i-ni yée kɛ́tɛ tôŋ su é síɣe gɔ́ɔ pîlanii.

¹³ Yâwɛɛ, yá ƃa Eezuɛ ŋɔkili-kɛ-maai. Ǹúui nyíi a bôlu tɔ̀ɔ yâi, a pâi ŋumɛi. Da pâi lániî yɛ̂ɛ da núu láa pɔ̃yɛ muluŋ su, kpɛ́ni fêi, da dípôlu tɔɔ Yâwɛɛ ma, nyíi gáa yɛ̂ɛ ya-ɣɛli-loŋ nyii a fúlu-laa tɛ̀ɛ núu pɔi.

Zɛlemaya è Yâwɛɛ marê kɛ̀ kpɔŋ-ma mɛni ma

¹⁴ Yâwɛɛ, ye ḿalo ḿî, gɛ̀ ní ŋa pâi kɛ̂i a ŋ́gɔlɔi ponoɔɔ. Ŋ́gula mɛnîi, gɛ̀ ní ŋa pâi kɛ̂i a ŋ́uŋ ḿâ ƃóɔɔ. Yá nɔ́ ƃa ǹúui nyíi ŋa ǹáa maa tɛ̂i.

¹⁵ Ǹûai dí mò ḿâ dîyɛɛi, “M̀aa-yao woo-ŋai Yâwɛɛ è kɛ̀ m̀ôi kûai, dítɔɔ̂i kɔ̀ɔ? Tɔɔ é maa-mɛni-ŋai kpîŋ kɛ́ nâa!”

¹⁶ Kɛ́lɛ Yâwɛɛ, ḿve kɛ́ ní ímɛni kpɔ̂lu láa dîa. Ḿve ŋ̀wɛ̂lii a gɛɛ mɛni kpɔ̂lu é láa dîa. Yâwɛɛ í gɔ́lɔŋ, í m̀ɛnii kɔ́lɔŋ ŋa m̀ôi yâi.

¹⁷ Ífe kɛ́ a mɛni kpɔ̂lu ḿɛ̂ni ma. Mɛni kpɔ̂lu a làa ḿâ, yá ƃa ḿaa kɔ̃̂ɔ.

¹⁸ Ƃâa kula diai dîa dítɔɔ̂i ḿâi. Kɛ́lɛ, Yâwɛɛ, ŋ́gula yêei kɛ́. Yao ŋánaa pú díkɔlɔ̂i, kɛ́lɛ, ífe da pù ŋ́gɔlɔi. Mɛni kpɔ̂lu láa dîa í dísu ɣále a gbua-kpua.

Vii-tɔɔ-ɣelei mɛi káa mɛni

¹⁹ Yâwɛɛ è mò ḿâ ǹyɛɛi, “Lí í ŋáworɛ̂-wooi ƃó Ǹûai Dísiɣãŋ-la, ƃɛ́i Zuda kaloŋ-ŋai da tɛ̂ɛ naa dí kɛ́ lɔ̀ kpaa dí kɛ̀ kùla daa lêei sui. À kɛ̀ tí, í lí ziɣãŋ kpéli-ŋai láƃerei Zerusâlɛŋ.

²⁰ M̀ó gâloŋ-ŋai da ǹûai díkaa Zudai dîa, é pɛ́lɛ diai dîa díkaa Zerusâlɛŋ da diai da lɔ̂ ziɣãŋ-ŋai láƃerei a gɛɛ dí díwoli tɔ́ɔ m̀ɛnii mâ ŋa pâi môi.

²¹ M̀ó dîa à kɛ̀ dí díkpîŋ wɛ́li-ni, gɛ̀ ní dífe kpîri sii kélee da sìɣe a Vii-tɔɔ-ɣelei. Dífe sɛŋ da sìɣe dítɛɛ la Zerusâlɛŋ siɣãŋ-ŋai da lá.

²² Kpaa dítĩyɛ da kula dípɛrɛ-ŋai mû a Vii-tɔɔ-ɣelêi. Dífe tíi kɛ̀ a Vii-tɔɔ ɣelêi. Tɔ́ɔ dí m̀ɛi káa a fólo maa-waa, yɛ̂ɛ berei ŋá wɔ́lɔ mò la dínâŋ pɔlɔ-ŋai dîai.

²³ Dínâŋ pɔlɔ-ŋai dífe wɔ́lɔ díwoli tɔ̀ɔ ní ḿâ, kpaa máŋ dí díyee sée ŋ́oo mu, kɛ́lɛ, dí kɛ̀ a díwôlii kpɔ́lɔɔ. Dífe díyee see-ni ŋ́oo mu, kpaa máŋ dí ńdûa-pere maa kɔ́ri.

²⁴ “M̀ó ǹûai ŋí dîa a gɛɛ dí ŋátɔ̂ŋ-ŋai mɛi káa. Dífe kpîri da sìɣe dítɛɛ la ziɣãŋ-ŋai láƃerei a Vii-tɔɔ-ɣelei. Tɔ́ɔ dí Vii-tɔɔ-ɣelei ŋí mɛi káa a fólo maa-waa. M̀ɛni ma dífe tíi da kélee kɛ̀ a ɣelei ŋí.

²⁵ À kɛ̀ tí, díkâloŋ-ŋai da dítii kɛ́-ƃela kpaya-kpayai da pâi tɛɛ̂i a ziɣãŋ-ŋai ŋí láƃerei kâloŋ-wala-wala laa kɛ́ ƃò díyêei yɛ̂ɛ berei Deeƃé è wɔ́lɔ kɛ̀ lai. Gɛ̀ ní da Zuda-ƃela é pɛ́lɛ Zerusâlɛŋ-ƃela dîa, da pâi kɛ̂i seêi soo sia-keleŋ-ŋa su, dí kɛ̀ sèe soo-ŋa mɛi, gɛ̀ ní nûa da pâi kɛ̂i nɔ́ Zerusâlɛŋ a tãi kélee.

²⁶ Nûa da pâi kulâi daa-ŋai su Zuda, da-ni dí kúla Zerusâlɛŋ kɔlɛ ma kpanaŋ-ŋai lá dípa. Da-ni-ŋa da pâi kulâi Bɛŋsima ŋɔkpîniŋ su, da-ŋa díkula ǹyée pɛlɛ-pɛlɛi ma, da-ŋa díkula ǹyée-kpaya-kpayai ma, gbéli-ŋai díkula séɣai-pere Zuda lɔii su. Da pâi pâi a kéreŋ-sala, mii-sɛŋ-sala, kéreŋ-sɛŋ kúŋ-nɛ̃ɛ, da sɛɣɛ-fei sama-sɛŋ Ŋáɣala-pɛrɛ Kɛ́tɛi mu.

²⁷ Kɛ́lɛ, fɛ̂ɛ nɔ́ dí ŋ́oo mɛ́ni, dí Vii-tɔɔ-ɣelei mɛi káa a fólo maa-waa. Dífe kpîri sìɣe dílɔ la, kpaa dí kúla la Zerusâlɛŋ a Vii-tɔɔ-ɣelei. À kɛ̀ da gɛ̀ tí, gɛ̀ ní ŋa pâi ŋɔŋ toôi Zerusâlɛŋ siɣãŋ láƃerei. Ŋɔŋ a pâi gâloŋ-pɛrɛi kéreniî Zerusâlɛŋ, ǹyaŋ núu da fé pâi kɛ̂i naa é ŋɔŋ kpîŋ líiŋ.”