Ɉeremi 16 - Bible

Yâwɛɛ ŋɔmɛni kpɛtɛɛi é pîlaŋ Zɛlemaya ŋɔfúlu-laai mai

¹ Yâwɛɛ è lòno ḿbɔ ǹyɛɛi,

² “Ífe nɛnî kùla kpaa máŋ ínîa-pɛlɛ-ŋa maa-sɔlɔ ƃó kwaa kɛ́ɛ ŋí ma.

³ Ŋa pâi m̀ɛnii ƃôi yâ nyíi pâi kɛ̂i a ǹîa-pɛlɛɛi dí dímaa sɔlɔ ƃô ƃɛ́i da dí káa-ƃelai.

⁴ Kɔlɔ-fela nyɔ́mɔɔ a pâi dípaâi, núu da fé pâi dímaa ḿâloŋ sèe ƃôi, kpaa máŋ dí díloo. Da pâi dípoma ŋáa tɛ̂i gîe ma yɛ̂ɛ sua-kpô nyíi da bù sí-sɛŋ kɔ́ɔ mùi. Da pâi dípaâi kɔ́ su, kpaa puru é dípaa. À kɛ̀ tí, ŋ̀ɔni-ŋai da vɛnɛ-sãai da pâi dípoma miî.

⁵ “Ífe lɔ̀ bɛ́rɛi mù nyíi da saa mɛ̂ni kɛ̂i naai. Ífe malôŋ sèe ƃò núu kélee da maa mɛ̂ni mà. Ḿve pâi ŋɔ́nɔ lûwa lâai ŋánûai dîa a gɛɛ ŋá líi-seei, kpaa máŋ ŋá ŋáwɛli kɛ́-maai da ŋá ŋɛi-maloŋ kâai lɛ́ dîa.

⁶ Dɔɔ-ƃelai da gôlo-ƃelai díkelee da pâi saâi ǹɔii tɔnɔi su. Kɛ́lɛ, núu da fé pâi dípoma loôi, kpaa máŋ é dímaa mâloŋ sèe ƃó. Núu da fé pâi ŋɔmaloŋ tôo maai lɛ̂i a pɔ́ɔ kɛ́ɛ mà, kpaa máŋ a ŋ̀uŋ ƃóɔɔ.

⁷ Núu da fé pâi mii-sɛŋ da tɛɛ̂i zaa-wɔ̂lɔ kɛ́-ƃelai pɔ́ é dí ŋáa-nɛnɛ zaa-mɛnii ḿâ, kpaa máŋ é yá tɛ́ɛ dípɔ dínâŋ da dílee saa mɛni ma.

⁸ “Ífe lɔ̀ bɛ́rɛi mù ƃɛ́i da kúu kɛ̂i naai. Ka dîa-ni káfe sèe kákîe ma ká mii-sãa mii, kpaa máŋ ká kpele-sãa kpele gîe ma.

⁹ Ka káwoli tɔ́ɔ m̀ɛnii ńyãa, Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai ŋ́gaa môi kâai. Ŋa pâi kálii-nɛ̃ɛ kula mɛ̂ni-ŋai kélee kperâi. Káfe ŋɔ́nɔ pâi nɛnî kula-woo kélee da mɛnîi gwaai ŋí ma. Ka pâi lɛɛ̂i ɣele ma ŋá m̀ɛni-ŋai ŋí kɛ́ káŋɛi.

¹⁰ “Tãi ya pâi m̀ɛnii ŋí ƃôi la dîai, da pâi m̀ôi dîyɛɛi, ‘Lé mɛni ƃé kú gɛ̀ ǹyaa Yâwɛɛ a m̀ɛni kpɔ̂lu sãŋ kɛ́ɛ ŋí lâai la kûai? Lé mɛni nyɔ́mɔɔ ƃé kwa gɛ́i? Sɔnyɔ̂ŋ kɛ́ɛ léŋ ƃé kwa gɛ́ a Kúɣâlai Yâwɛɛ?’

¹¹ À kɛ̀ tí, mó dîa, Yâwɛɛ ǹyɛɛi, ‘Kánâŋ-pɔlɔ-ŋai dí dípôlu tɔ̀ɔ ḿâ, dí kɛ̀ ɣâla-da-kpɛni-ŋa fɛ̀li díkɛ tíi kɛ̀ dîɛ. Dí dípôlu tɔ̀ɔ ḿâ dífe díyee see ní ŋ́oo mu da ŋásɛŋ-lɛɛi.

¹² Kɛ́lɛ, ká tûa a nyɔ́mɔɔ a ńyãa é tɛ́ɛ kánâŋ pɔlɔ-ŋai dîa. Kákelee kpɔ́ káwôlii kpɔ̂lɔi, kásɔŋ nyɔ́mɔɔ, káfa káwoli tɔ̀ɔ ḿâ.

¹³ M̀ɛni ma, ŋá pâi kápiliî ŋá kákula ǹɔii ŋí su ŋá lí a káa ǹɔii su nyíi ka kánâŋ pɔlɔ-ŋai káfe zu-kɔlɔŋ. Ǹaa ƃé ka pâi kɛ̂i naa kákɛ ɣâla-da-kpɛ́ni-ŋa fɛ̀li a kpíni da fólo. Ǹyaŋ ḿve pâi kámalôŋ kâai.’ ”

Eezuɛ-ƃelai da pâi kulâi gɔ-soŋ-laai su

¹⁴ Yâwɛɛ è mò ǹyɛɛi, “Tãi káa pâi ǹûai dífe ŋɔ́nɔ pâi dífôoi a ńyãa Ɣâla ńaa nyíi gáa a gɛ̀ ɣele mâ Ɣalai, a gɛɛ ńyãa ƃa Eezuɛ Ŋɔɣâlai nyíi dí kula Ize lɔii sui.

¹⁵ Kɛ́lɛ, da pâi kɛ̂i m̀ôi dîɛ gɛ̀-ɣele-ma Ɣalai ƃé Eezuɛ-ƃelai kùla ya-ŋua pere lɔii-ŋai da ǹɔii-ŋuŋ da kpɛ́ni-ŋai su ƃɛ́i dí kɛ̀ a dítaa-taa naai, é pá a dia díkpɔɔi lɔii su, nyíi ŋá dɛ̀ɛ dínâŋ pɔlɔ-ŋai pɔi. Ńyãa Yâwɛɛ ƃé mò tí.”

M̀ɛni ŋá téɛɛi nyíi pâi pâi

¹⁶ Yâwɛɛ è mò ǹyɛɛi, “Ŋa pâi yá-kpɛ-ƃela tɛɛ̂i dí pá dí ǹûai ŋí sóŋ. Ŋá loŋso-ŋa tɛ̀ɛ dí lí dí dísoŋ ǹyée kpaya-kpayai da ǹyée pɛlɛɛ-pɛlɛɛi tôŋ su, gɔni wôlo-ŋai su.

¹⁷ Ŋ́gaa m̀ɛnii kélee kâai da gɛ̂i. Dɔnɔ kpîŋ fé kɛ̂i ŋ́ɛi pôlu. Ŋ́gaa dísɔnyɔ̂ŋ-ŋai kélee kâai.

¹⁸ Ŋa pâi díkula-maa kɛ̂i a ŋá-ŋanaa dísɔnyɔ̂ŋ-ŋai da díŋwana lɔ̂ɔ-ŋai mɛ̂ni ma. Kpɛ́ni fêi da ŋálɔii maa-tĩ̂a kara, da nãni pɛ́lɛ ma a díɣâla da kpɛ́ni-ŋa fɛliɛɛi. Da ŋ́gɔ̃lîŋ maa-tĩ̂a kara a ŋ̀âla-da-kpɛ́ni-ŋai nyíi-ŋai díkaa yɛ̂ɛ saa, díƃɛlɛ fé ŋ́goi.”

Zɛlemaya è Yâwɛɛ fɛ̀li a kili kɛ-zu-pere

¹⁹ Yâwɛɛ, yá ƃé ya maa-kɔ̃ɔ, íkɛ wála-wala-laa tɛ̀ɛ ḿbɔ, tãi ŋa kɛ̂ la mɛni kpɔ̂lu sui. Lɔii-ŋuŋ-ŋa da pâi pâi ípɔ-naa díkula ŋ̀éniɛi gwaa kélee ma dí mó yâ dîyɛɛi, “Ŋ̀âla-ŋai kɛ̀ kúnâŋ pɔlɔ-ŋai yêei, dífe kɛ́ ní a tɔ̃yâ ɣâla-ŋa. Díkɛ̀ nɔ́ a ɣâla-pɔkɔɔŋ nyíi-ŋai kɛ̂i fé kɛ́ ní dîai.

²⁰ Núu da a pɔ̂ri gbîŋ ɣala kpɛtɛ̂i? Vé tí a dɔnɔ kpîŋ. Kɛ́lɛ, à kɛ̀ da gɛ̀ tí, gɛ̀ ní dífe a tɔ̃yâ ɣala.”

²¹ Yâwɛɛ è mò ǹyɛɛi, “M̀ɛni ma, ŋa pâi gɛ̂i ǹɔii-ŋuŋ-ŋai díŋa wála-wala-laai kɔ́lɔŋ a ǹɛ́lɛɛ a gɛɛ Ńyãa ƃa Yâwɛɛ.”