Ɉeremi 14 - Bible

Ǹɔii a pâi kpâlai a ŋánaa

¹ Yâwɛɛ è lòno Zɛlemaya pɔ́ é pîlaŋ la vóloi mà pâi toôi ǹyɛɛi,

² “Zuda káa wɔ̂lɔi. Ŋɔtaa lêe-ŋai díkaa wôloi. Ŋɔnûai díkaa laâ-ni ǹɔii ma a malôŋ pere, Zerusâlɛŋ kɛ́ wɔ̀lɔ kpɔŋ mâ mɛni ma.

³ Dɔɔ-ƃelai dí díyee mu-ƃelai tɛ̂ɛ yá kɔɔ̂i. Nya ƃe dí lì ǹyá-loai lá dífe yá káa ní naa. Dí lène pôlu a díya-kɔɔ sɛŋ-folo-ŋai a vólo. Dí líi è tòo pôlu díkili ŋá é pú, dí díyee pɛ́lɛ díŋɛi a ŋumɛ pere.

⁴ Kpɛ́ni fêi tuna fé niî pú ní, ǹyaŋ ǹɔii a kpála a ŋánaa. Gbâlaŋ-ŋa-tíi kɛ́-ƃelai líi a too pôlu a ŋánaa da díyee pɛ́lɛ díŋɛi a ŋumɛ pere.

⁵ Ǹoma-saai nyíi a gáa ǹɔɔi sui a ǹóŋ-kwatarai lɛ́ɛ naa a lí, kpɛ́ni fêi, kala da fé naa a gɛɛ é mii.

⁶ Ŋ̀wɛlɛ-sôo-ŋai ǹɔɔi sui, díŋɛi a pú kpɛ́ni fêi díkɔ̃nɔŋ fé ma. Dí káa tɔɔ̂ni ǹyée ma ƃɛ́i kala fé naai, díkɛ dísũa tɛ̀ díkɛ kala kɔ̂ri yɛ̂ɛ berei lɔɔ fɛ̃nɛ-saa da gɛ̀ lai.

⁷ Ŋánûai díwɔ̀lɔ dîyɛɛi, ‘Berei kúsɔnyɔ̂ŋ-ŋai da kú lɛ́ lai, Yâwɛɛ, ye kpɔŋ kûa a gɛɛ ǹûai dí kɛ́tɛ-laai káa. Tãi támaa yée-mu, kwa kú pôlu tɔɔ yâ, kú sɔnyɔ̂ŋ kɛ́ a yá.

⁸ Yá nɔ́ ƃé íkaa a Eezuɛ ŋɔkili-tɔɔ maai. Yá ƃa ǹúui nyíi a kúkùla mɛni kpɔ̂lu su. Lé mɛni ƃé íkaa la yɛ̂ɛ ŋɔ̃ya ƃé gáa ǹɔii sui, yɛ̂ɛ tɛɛ-a-pere nɔ́ ƃé a nyii nɔ́ ǹɔii su a kpíni tɔnɔi?

⁹ Lé mɛni ƃé íkaa la yɛ̂ɛ núu ƃé mɛni a kulâi lai, yɛ̂ɛ kɔ-kuluƃa ƃé pɔri fé mì a gɛɛ é kpɔŋ núu mai? Tɔ̃yâ ma, Yâwɛɛ, íkaa kú kɔlɛ ma. Kúkaa a ínûa. Ífe ípôlu tɔ̀ɔ kûa.’ ”

¹⁰ Zɛlemaya è ŋɔ́nɔ mò nyɛɛ Yâwɛɛ è lòno é pîlaŋ ǹûai dîa ǹyɛɛi, “Díkaa nɔ́ a pìlaŋ gɔ́ɔ-ma-ƃela. Dífa kpîŋ dísia pere maa kpɛ̂ɛ. M̀ɛni ma, ǹíi fé láa ní díyêei. Dí mɛni nyɔ́mɔɔ-ŋai kíli a pâi lɛɛ̂i ŋ̀á. Ǹyaŋ a pâi díkula-maa kɛ̂i dísɔnyɔ̂ŋ-ŋai mɛ̂ni ma.”

¹¹ Nya ƃe Yâwɛɛ è mò ḿâ ǹyɛɛi, “Ífe ḿvɛ̀li dímaa mɛni ma a gɛɛ ŋá kpɔŋ mâa tɛɛ dípɔ.

¹² A nɛ̃ɛ ma kpîŋ dísûŋ siɣe, ḿve pâi ŋ́oli tɔɔ̂i díwɔlɔ-woo ma. A nɛ̃ɛ ma kpîŋ díkereŋ-sala da mii-sɛŋ sala kula, ḿve pâi ńyee seêi dímu. Kɛ́lɛ, ŋa pâi dípaâi a kɔ́, puru su kɛ́tɛ da kɔlɔ-fela nyɔ́mɔɔ.”

¹³ Nya ƃe ŋá mò ńyɛ̃ɛi, “Áa, Ŋ̀wála-wâla kélee Yâwɛɛ, Ɣâla ŋɔlóno kɛ́-ƃelai da m̀ôi ǹûai dîa dîyɛɛi, ‘Kɔ́ fé ŋɔ́nɔ pâi toôi kâa, kpaa máŋ puru é tóo kâa, kpɛ́ni fêi, Yâwɛɛ a góno tée a gɛɛ lii-see nɔ́ ƃé pâi kɛ̂i kâa.’ ”

¹⁴ Kɛ́lɛ Yâwɛɛ è mò ḿâ ǹyɛɛi, “Ɣâla ŋɔlóno kɛ́-ƃelai tí da lɛ́ɛ kɛ̂i a ńaa. Ḿve dítɛɛ ní, kpaa máŋ ŋá mɛni da ƃó dîa a gɛɛ dí m̀ó ńaai su. Zĩ̂a-ŋai díkaa lônoi é pîlaŋ mai, ńyãa fé dɛ̀ɛ ní. M̀ɛnii da m̀ôi, tɔ̃yâ fé zu. Díkpɔɔi kili-ŋa-sia ká tí da m̀ôi.

¹⁵ Ɣâla ŋɔlóno kɛ́ ƃelai nyíi-ŋai mò dîɛ puru da kɔ́ dífe pâi toôi ǹɔii sui, ǹyaŋ ḿve mó ní tíi, Ńyãa Yâwɛɛ ŋa pâi dí paâi a kɔ́ da puru.

¹⁶ Ǹûai nyíi-ŋai da kɛ̂i dîa puru da kɔ́ dífe pâi ŋɔ́nɔ toôi dîai, dia máŋ ŋa pâi dípaâi a puru da kɔ́. Da pâi dípoma piliî bere-ŋai dîa Zerusâlɛŋ taa-leei su. Ǹyaŋ núu da fé pâi kɛ̂i naa é díloo da dínɛyâai, é pɛ́lɛ dílônii-sinaai da dílônii-nɛyãai dîa. Ŋa pâi dífela-fei dísɔnyɔ̂ŋ-ŋai mɛ̂ni ma.”

¹⁷ Yâwɛɛ è ŋɔ́nɔ mò ḿâ a gɛɛ ŋá lóno ǹûai pɔ́ ńyɛ̃ɛi, “Tɔ́ɔ ŋ́ɛi-ya é pú a kpíni da fólo, nyíi gɔ̃yɛŋ fé kɛ̀ ma. Kpɛ́ni fêi da ŋánûai ŋwána kpɔ́ a ŋánaa. Pala kɛ́tɛ kɛ́ ƃò dîa.

¹⁸ Ŋà lì gbâlaŋ ŋá, ŋà ǹûai nyíi-ŋai lɛ̀ɛ gɔ́i sui poma kâa naa. Ŋà lì daai su, ǹûai nyíi-ŋai saâi a purui, ŋa dípoma kâa naa. Ɣâla ŋɔlóno kɛ́-ƃelai da zâla láa-soŋ-ƃelai da dítii-ŋai kɛ̂i, kɛ́lɛ dífe m̀ɛnii kɔ́lɔŋ da gɛ̂i.”

Ǹûai díwɔ̀lɔ Yâwɛɛ ma kpɔŋ mâa mɛni ma

¹⁹ Yâwɛɛ, íyee kuláa Zuda m̀u kélee nɔ́ ƃé tí? Zãiyɔŋ ƃɛlɛ fé íkoi? Lé mɛni ƃé ya mɛni kpɔ̂lu lâai la kûa a gɛɛ ŋí kúfa pɔ̂ri kulâi zui? Kwa lii-see kɔ̂rii, kɛ́lɛ, kúfa mɛni lɛ́lɛɛ sii kélee da sɔlɔ ƃô. Kwa ƃálo-laa kɔ̂rii, kɛ́lɛ mɛni kpɔ̂lu nɔ́ ƃé lâai kûa.

²⁰ Yâwɛɛ, kúsɔnyɔ̂ŋ-ŋai da kúnâŋ pɔlɔ-ŋai díwɔ̂i kíli a too kú ŋá. M̀ɛni ma, kwa nâa m̀ôi a gɛɛ kwa sɔnyɔ̂ŋ kɛ́ a yá.

²¹ Íkili-ŋa sía íkono têe-ŋai mɛ̂ni ma. Ífe ípôlu tɔ̀ɔ kûa. Ífe ƃâa kula íkâloŋ see-sɛŋ maa-waai ma. Íkpanaŋ-wooi í gɛ̀ kúyêei, gíli é lɛ́ɛ íŋa, ífe gàra.

²² Ŋ̀âla-pɔkɔɔŋ-ŋai díkaa ǹɔii-ŋuŋ-ŋai sui, da fa pɔ̂ri gɛ̂i tuna é pú. Ŋ̀ele-kɔlɔŋ fa pɔ̂ri gɛ̂i tuna é pú gbîŋ-yee ma. M̀ɛni ma, yá nɔ́ ƃé kúkili káa yâ, óo Yâwɛɛ, yái íkaa a Kúɣâlai. Kpɛ́ni fêi yá tɔnɔ nɔ́ ƃé ya pɔ̂ri m̀ɛni-ŋai ŋí kɛ̂i.