Ɉeremi 12 - Bible

Zɛlemaya ŋɔmɛni láa wooi

¹ Zɛlemaya è Yâwɛɛ ma ǹyɛɛi, “Yâwɛɛ, tãi ŋa mɛni da pú la íŋɛi, yá zu tòo nɔ́ a teniŋ ƃô-pere. Kɛ́lɛ, ŋa mɛni da pûi íŋɛi. Lé mɛni ƃé ŋ̀wana lɔ̂ɔ-ƃelai da ƃûu ƃò lai? Lé mɛni ƃé diai laa-laa fé díyêei dí kɛ̀ ɣéniɛi a kɛ̂ la a gɔlɔ saá mai?

² Ya dísi, dísame a ǹɔii sóŋ, da ƃɔlɔ dí kɛ̀ ƃà. Da ílaa maa tɛ̀ nɔ́ a díla-gbɔ. Kɛ́lɛ í maa mɛ̂ni fé dí líi su.

³ Óo Yâwɛɛ, í ŋ́gɔ́lɔŋ. Ya ŋ́gâa íkɛ ŋákili-ŋa-siâi bîlaŋɔɔi yâi su kɔ̀ɔŋ. Ye díɣala yɛ̂ɛ ƃála ƃé da liî la bàa mɛ̂ni ma. Dí pûi kɛ́ díkpîŋ yee ma dípaa mɛni ma.

⁴ Tãi ɣɛɛlu ƃé ǹɔii a pâi gɛ̂i la maloŋ tôo maa su, galai kɛ́ kpàla nɔ́ ǹɔii su? Kpɛ́ni fêi, ǹûai díkaa ǹɔii sui, dísɔŋ nyɔ̂mɔɔi. Vɛnɛ-sãai da ŋ̀ɔni-ŋai da saa. Ǹaa pôlu ma, ǹûai da môi dîyɛɛi, ‘Vé pâi m̀ɛnii kâai kwa gɛ̂i.’ ”

⁵ Yâwɛɛ è mò ǹyɛɛi, “À kɛ̀ í ǹûai kpɛ́ dí kɛ̀ ƃò dí kɔ́ɔ ŋá ífe dísoŋ ní, ya pɔ̂ri soo kpɛ̂i í zòŋ? À kɛ̀ íkaa siâi kwaa ponoɔɔ ma, íkɛ tòo, Lé ƃé yà pâi gɛ̂i ŋ̀olâai su Zɔdiŋ Ya-leei kɔlɛi?

⁶ Ílîa-ni kpaa máŋ íkpɔɔi kaayɔɔ-ŋai, da ípɛlɛ̂i. Da ǹûai tóli a gɛɛ dí tɔ́ɔ yâ. Ífe íkili tɔ̀ɔ dîa a nɛ̃ɛ ma kpîŋ dí wóo lɛ́lɛɛ ƃó yâ.”

Yâwɛɛ ŋɔnûai malôŋ è zòŋ

⁷ Yâwɛɛ è mò ǹyɛɛi, “Ŋa ḿbôlu tɔɔ ŋápɛrɛi ma. Ŋa ńyee kúla ŋ́gɔ̃̂liŋ mu, Ŋa pâi ŋáwɛli kɛ́-maa-nuui tɛɛ̂i gbɔara-ƃelai pɔ́.

⁸ Ŋ́gɔ̃liŋ a kɛ́ ŋ́ɛi yɛ̂ɛ yala-sulu ƃé wolâai. A kpêɣei ḿâ. M̀ɛni ma, m̀ɛlɛ fé ŋ́goi.

⁹ Ŋ́gɔ̃̂liŋ fé yɛ̂ɛ ŋɔni nyíi a maraŋ ŋɔni mii. Ŋɔni mii ŋɔ̂ni da kpɛ́ni-ŋa da pá da tínaŋ ma. Lí í vɛnɛ-sãai kélee pú gîe ma, í pá a dia a gɛɛ dí ŋ́gɔ̂liŋ kélee míi.

¹⁰ Ƃála-mɛi káa-ƃela támaa da ŋá kpɔmɔ ƃá-kpalaŋ su kara. Da ƃɔ́rɔŋ ŋákpâlaŋ ŋá sãai dîa. Da pâi ŋákpâlaŋ ŋá lɛ́lɛɛi kɛ̂i é lɛ́ɛ a bûŋ, kɛ̂i fé ma.

¹¹ A pâi kɛ̂i a lɔii nyíi núu fé pâi kɛ̂i zu, gɛ́ wɔ̀lɔ ḿâ a gɛɛ da ǹɛɛ a lɔii nyɔ́mɔɔ. Ǹɔii a lɛɛ a bûŋ, núu da fé naa, é kpáaŋ maa mɛ̂ni ma.

¹² Núu paa-ƃela da kulâi vɛ̃ɛ-kpâlaŋ su dípa ǹɔii su. Da pâi kɛ̂i a Yâwɛɛ ŋɔƃóa-sɔkpɔi dí ǹûai kélee páa, é síɣe ǹɔii ƃéla dɔnɔ ma é tóo gbéli ma. Núu da fé pâi kɛ̂i ɣele ma lii-see su.

¹³ Dí wîi sì, kɛ́lɛ ŋalêŋ ƃé da pâi dêei. Da pâi tíi kɛ̂i a ŋánaa, kɛ́lɛ dífe pâi sɛŋ da sɔlɔ ƃôi zu. Tãi da pâi dísi-sãai têei lai, ŋumɛ a pâi dí kɛ̀i, kpɛ́ni fêi, Yâwɛɛ a ǹíi ŋwána dîa a ŋánaa.”

Yâwɛɛ è gono-tee Eezuɛ kɔlɛ ma-ƃelai yêei

¹⁴ M̀ɛnii Yâwɛɛ è mò é pîlaŋ kúkɔlɛ ma-ƃela sɔŋ nyɔ́mɔɔ-ŋai dîa nyíi Eezuɛ lɔii su karai nyíi ŋá dɛ̀ɛ dípɔi ƃa, “Ŋa pâi dí wêenii yɛ̂ɛ kala ŋá díkula díkpɔɔi lɔii su. Ǹyaŋ ŋa pâi Zuda-ƃelai kulâi dísama.

¹⁵ Kɛ́lɛ, tãi ŋa pâi kpɛɛ̂i la a díkulaa naai, ŋa pâi ŋɔ́nɔ dímalôŋ kâai, ŋá pá a dia pôlu díkpɔɔi lɔii su tɛi-tɛi.

¹⁶ Tãi tɔnɔ da dí wɔ́lɔ Bêe ɣâlai fɛli-pere lɛ̀ ŋánûai dîa díkɛ dífòo a ǹáa. Kɛ́lɛ à kɛ̀ da ŋánûai díɣâla fɛli-perei maa kɔ̂ri a ǹɛ́lɛɛ, díkɛ dífòo a ńaa dîyɛɛi, ‘À kɛ̀ nɔ́ Yâwɛɛ káa ɣele ma a tɔ̃yâ,’ gɛ̀ ní, ŋa pâi díkɛ̂i kɛ̂i m̀a ŋánûai sáma.

¹⁷ Kɛ́lɛ, à kɛ̀ lɔii-ŋuŋ da fé pâi ŋ̀óli tɔɔ̂i ḿâ, gɛ̀ ní ŋa pâi dí wêenii yɛ̂ɛ kala ŋá dí su kara kpɔ́ kpúŋ. Ńyãa Yâwɛɛ ƃé mò tí.”