Ɉeremi 11 - Bible

Zuda è gbanaŋ-wooi kâra

¹ Nya ƃe Yâwɛɛ è lòno Zɛlemaya pɔ́ ǹyɛɛi,

² “Ye gbanaŋ-woo kɛ́ɛ maa wooi ŋí mɛ́ni a gɛɛ í mó Zuda da Zerusâlɛŋ-ƃelai dîa.

³ M̀ó dîa yɛ̂ɛ Yâwɛɛ nyíi gáa a Eezuɛ-ŋai Díɣâlai ǹyɛɛ kpalo ƃélaai diai dîa dífe pâi díwoli tɔɔ̂i gbanaŋ-woo kɛ́ɛ maa wooi ŋí ma,

⁴ nyíi ŋá wɔ́lɔ mò kánâŋ pɔlɔ-ŋai dîa a tãi ŋáwɔlɔ díkùla la Ize-lɔii sui. Ŋá wɔ́lɔ díkùla vulɛ-ŋɔŋ su. Ŋá mò dîa a gɛɛ dí ŋ́oo mɛ́ni, dí m̀ɛni-ŋai kɛ́ nyíi-ŋai ŋá mò dîai. M̀ɛni ma, m̀ó ŋánûai dîa ŋa pâi kɛ̂i a dí Ɣâla

⁵ a gɛɛ ŋá gbèe-lɔi nyíi ŋá wɔ́lɔ ḿvòo la dínâŋ pɔlɔ-ŋai yêei ŋàa sèe é kɛ́. A gɛ́ɛ ŋa pâi lɔii lɛ́lɛɛ tɛɛ̂i nyíi sí-sɛŋ a kpɛ̂tɛ naa a tãi kéleei.” Nya ƃe ŋa zu tòo ńyɛ̂ɛi, “Yâwɛɛ tɔɔ é kɛ́ tí.”

⁶ Ǹaa kɛ́ɛ tíi, Yâwɛɛ è mò ǹyɛɛ, “Ŋ̀óo-ŋai ŋí ƃó Zuda taa-lee-ŋai kélee su, é pɛ́lɛ Zerusâlɛŋ taa-leei gwaa kélee ma. Ka gbanaŋ-woo-kɛ́ɛ ŋí maa wooi mɛ́ni, ká ŋàa sèe kɛ́.

⁷ Kpɛ́ni fêi, tãi ŋá kánâŋ pɔlɔ-ŋai kùla la Izei, ŋá dí lia-woo ƃò gîe mɛi, é tóo sâa ma, ńyɛ̃ɛ dîa ka káwoli tɔ́ɔ ŋ́oo ma.

⁸ Kɛ́lɛ, dífe ŋ́oo mɛni ní, kpaa máŋ dí díwoli tɔ́ɔ ḿâ. Díkelee dí tùa nɔ́ yɛ̂ɛ berei díwôlii kpɔ̂lɔ maa kili-ŋa sia nyɔ́mɔɔi káa lai. M̀ɛni ma ŋá pá dípɔ a dɔŋ kpɛ́-maai kélee gáa gbanaŋ-wooi su nyii ŋá mò dîa a gɛɛ dí gɛ́ kɛ́lɛ dífe gɛ́ nii.”

⁹ Yâwɛɛ è ŋɔ́nɔ mò ḿâ ǹyɛɛi, “Wôya mɛni kpɛtɛɛ káa Zuda da Zerusâlɛŋ-ƃelai sáma.

¹⁰ Da ŋɔ́nɔ tínaŋ dínâŋ pɔlɔ-ŋai dímɛni nyɔ́mɔɔ tɔnɔi pɔ́, nyíi-ŋai dífe wɔ́lɔ díwoli tɔɔ ní ḿâi. Da tínaŋ, dí kɛ́ ɣâla da kpɛ́ni-ŋa fɛli. Eezuɛ-ŋai da Zuda-ƃelai daâ ŋákpanaŋ-wooi kara nyíi ŋáwɔ́lɔ gɛ̀ dínâŋ pɔlɔ-ŋai yêei.

¹¹ M̀ɛni ma, ŋa pâi pâi a mɛni nyɔ́mɔɔ dîa nyíi dífe pâi pɔrîi kulâi zu. A nɛ̃ɛ ma díwɔlɔ ḿâ, ḿve pâi ŋ́oli tɔɔ̂i dîa.

¹² À kɛ̀ tí, gɛ̀ ní Zuda taa-leei su-ƃelai da Zerusâlɛŋ-ƃelai da pâi liî dí wɔ́lɔ ŋ̀âla-ŋai dí kɛ̀ kéreŋ-sãa kúŋ nɛ̃ɛ kéreniî dîai pɔ́. Kɛ́lɛ, ŋ̀âla-ŋai dífe pâi díƃâloi dí díkula dímɛni kpɔ̂lui su.

¹³ Kpɛ́ni fêi, káai kákaa Zudai, káɣâla-ŋai tâmaai yɛ̂ɛ berei kátaa lêe-ŋai díkaa lai. Ká ŋumɛ ɣâla-teƃele-ŋai ká dɔ̀ɔ Bêe ɣalai mɛni mai, dâmaai yɛ̂ɛ bere-ŋai díkaa Zerusâlɛŋ.

¹⁴ M̀ɛni ma, ífe ɣâla-fɛli ǹûai ŋí mɛ̂ni ma. Kpaa íwɔ́lɔ, í dímaa pɛlɛ a gɔ́ɔ kɛ́. Kpɛ́ni fêi, ḿve pâi ŋ́oli tɔɔ̂i dîa a tãi da pâi kɛ̂i la mɛni kpɔ̂lu sui.”

¹⁵ Yâwɛɛ è mò ǹyɛɛi, “Lé ƃé ŋáwɛli kɛ́-maa nuui káa gɔ̂rii ŋápɛrɛi mu ǹyaŋ gɛ́ mɛni nyɔ́mɔɔ kɛi? Va pɔ̂ri kɛ̂i tí. Sâla kuláa da kono-tee kpanaŋɔɔ kɛ́ɛ da pɔ̂ri íkulâi m̀ɛni kpɔ̂lui su nyíi gáa pâi? Da pɔ̂ri fúlu-laa tɛɛ̂i kápɔ ká maa koi-nɛ̃ɛ kula? Vé tí a dɔnɔ kpîŋ.

¹⁶ Tãi tɔnɔ ŋá wɔ́lɔ kátòli a ɔle-wuru nyíi ǹáa è kɛ̀ a ŋ̀únu, ḿba lɛ́lɛɛ kɛ́ ƃó ŋá. Kɛ́lɛ ŋa nâa ŋálii ŋwânai tɛ́ɛ nyíi pâi ŋ̀úrii ŋí kérenîi da ŋ̀oŋo-ŋai kéleei.

¹⁷ “Ńyãai a Ŋ̀wála-wâla kélee Yaawɛ nyíi Eezuɛ da Zuda síi, ŋaâ gbɛtɛ a gɛɛ ŋá mɛni kpɔ̂lu láa kâa. Kpɛ́ni fêi, káai a Zuda da Zerusâlɛŋ-ƃelai ka mɛni nyɔ́mɔɔ kɛ́, ká kɛ́ ńi ŋwàna. Kpɛ́ni fêi ká kɛ̀ kéreŋ-sãa kúŋ-nɛ̃ɛ kérenîi Bêe ɣalai ma.”

Dí mɛni nyɔ́mɔɔ kpɛ̀tɛ é pîlaŋ Zɛlemaya ma

¹⁸ Nya ƃe Yâwɛɛ è dímɛni kpɛtɛɛ nyɔ́mɔɔi lɛ̀ ḿâ ŋá m̀ɛnii kɔ́lɔŋ dí kɛ̀ gɛ̂i.

¹⁹ Kɛ́lɛ, ŋá kɛ̀ yɛ̂ɛ ƃála-loŋ ŋumɛɛ nyíi dí kɛ̀ liî la bàa mɛ̂ni mai. Ḿve kɛ́ ní a gɔ́lɔŋɔɔ a gɛɛ m̀ɛnii ŋí tɔɔ̂i ḿâ. Díwôya mɛni kpɛ̀tɛ dí kɛ́ mò dîyɛɛi, “Kwaa ŋ̀úrii da ḿba dísu kara, kwaa bàa kú gula ǹúu-fulu-ŋai sáma, a gɛɛ ǹáa fa lâa kɛ́ la ɣele ma.”

²⁰ Kɛ́lɛ, óo Ŋ̀wála-wâla kélee Yâwɛɛi, yái ya mɛni-ŋa tèe a teniŋ ƃô perei, íkɛ núu líi da gíli su kɔ̀ɔŋ, tɔɔ ŋá í mɛni kpa kuláai pɔ́ɔ káa dîa, kpɛ́ni fêi, ŋ́ɛi káa í mɛni ŋá téɛɛi perêi.

²¹ Nya ƃe Yâwɛɛ è ŋ́oo su tòo é pîlaŋ ǹûai díkaa Anatɔi nyíi-ŋai kɛ̀ ŋ̀wɛ̂lii dí ḿbaa dîa ǹyɛɛi, “Ífe ɣâla-woo ƃò dîa Yâwɛɛ láai su, ya gɛ̀ tí, da pâi í paâi.”

²² M̀ɛni ma, Ŋ̀wála-wâla kélee Yâwɛɛ è mò ǹyɛɛi, “Tɔ̃yâ ma, ŋa pâi díkula maa kɛ̂i. Dí nyáŋkpa-ŋai da pâi lɛɛ̂i kɔ́ su, puru é dílônii-sinaai da dílônii-nɛyãai páa.

²³ Dí tɔnɔ kpîŋ fé pâi lɛɛ̂i, kpɛ́ni fêi, ŋa pâi pâi a mɛni nyɔ́mɔɔ Anatɔ-ƃelai dîa, nyíi pâi kɛ̂i a dímɛni-ŋa-teɛɛi maa kôraŋ.”