Ɉeremi 10 - Bible

Tɔ̃yâ Ɣala fɛliɛɛ da ɣâla-pɔkɔɔŋ fɛli mɛ̂ni

¹ Eezuɛ-ƃela, ka káwoli tɔ́ɔ Yâwɛɛ wóo ma.

² Yâwɛɛ ǹyɛɛi, “Káfe ǹɔii-ŋuŋ da kpɛ́ni-ŋai dítûa-perei maa kɔ̂ri. Kpaa máŋ ká yao ŋ̀ɛi-kɛ-maa ŋai díkaa ŋ̀elei sui dîa, berei máŋ lɔii-ŋuŋ da kpɛ́ni-ŋai da yâo la dîai.

³ Kpɛ́ni fêi, ǹûai tûa-pere fé a tɔ̃yâ. Da wúru tèe ǹɔɔi su, ŋ̀úru-saa-ƃelai dítíi kɛ́ m̀a a yuɔ̂ a díyee.

⁴ Dí m̀aa ɣíri a káne da gôo. Dí gbamo gîe ma a kpɔ́-kpɔ da nêre-ŋa a gɛɛ vé kula dɔɔ̂i.

⁵ Díɣâla-pɔɔkɔŋ ŋai díkaa yɛ̂ɛ maa-yao sɛŋ nyíi da dɔ̀ɔ zûai sui. Dífa lôno. Fɛ̂ɛ núu é lí a dia, kpɛ́ni fêi, dífa pɔ̂ri siâi. Káfe yao dîa, kpɛ́ni fêi, dífa pɔ̂ri mɛni nyɔ́mɔɔ kɛ̂i a káa, kpaa máŋ dí mɛni lɛ́lɛɛ kɛ́ kâa.”

⁶ Óo Yâwɛɛ, sɛŋ da fé naa é kɛ́ yɛ̂ɛ yá. Ímaa pɔlɔ-pɔlɔɔi, ǹyaŋ ílaa maa tûŋ wála-walaai.

⁷ Yái íkaa a ǹɔii-ŋuŋ-ŋai díkâloŋ, gbɛ̂ɛ ƃé va yâo yâi? Ǹɛ̂lɛɛi kú ƃaa kɛ́-maa tɛ́ɛ ípɔ. Dáre-ƃelai kélee ǹɔii-ŋuŋ-ŋai su, daa-ŋai kélee sámai, núu da fé naa é kɛ́ yɛ̂ɛ yá.

⁸ Da tûa a ƃoo-pere, dífa mɛni ŋá kàa. Dísɛŋ lɛ́-nuui ƃa ŋ̀âlai nyíi dí gbɛ̀tɛ a wúru nyíi kɛ̂i fé mai.

⁹ Dí pâ a káne-fũa nyíi dí kùla la Sipîŋ da gôo-fũa nyíi dí kùla la Ufai. Yɛrɛ kɛ́-ƃela da gôo-ɣale-ƃela ƃé díkpɛ̀tɛ. Díseɣe-ŋai káa a kâloŋ kɔŋ mâ-seɣe, nyíi gáa a seɣe kpɔ̂lu-mu-tɛɣɛɛ. Seɣe-sɔlɔ-ƃela lɛ́lɛɛ ƃé zeɣe-ŋai ŋí kpɛ̀tɛ.

¹⁰ Kɛ́lɛ, Yâwɛɛ ƃa dɔ̃yâ Ɣâlai. Ǹyaa ƃé gáa a gɛ̀-ɣele-ma Ɣalai da ŋ̀ɔlɔ-wɔ́lɔ Kaloŋ. A ńii ŋwàna, ǹɔii a pû zu. Lɔii-ŋuŋ da fa pɔ̂ri tɔɔ̂i ŋɔlii ŋwânai ŋɛ́i túɛ.

¹¹ M̀ó dîa yɛ̂ɛi, “Ŋ̀âla pɔɔkɔŋ-ŋai nyíi-ŋai dífe ŋ̀elei da ǹɔii kpɛtɛ níi, Ɣâla a pâi dí su karâi díkula ŋ̀éniɛi su.”

Dí laa-maa tɛ̂ wule too Ɣâla ma

¹² Kɛ́lɛ, Ɣâla ƃé ǹɔii kpɛ̂tɛ a ŋɔwála-wala laai. É ŋ̀éniɛi kpɛ̀tɛ a ŋɔtárei. È ŋ̀ele-kɔlɔŋ fùlomo a ŋɔmɛni ŋá káai.

¹³ Tãi a lôno lai, ŋ̀elei su a dùa, ǹyái nyíi gáa ŋ̀elei sui, a kpêɣe. A gɛ̀ ŋ̀ele-kɔlɔŋ-kolei é síɣe ŋ̀éniɛi kpɛɛ-ŋa. A ŋ̀ele-gbana ŋɔmãla-mãlai kɛ̀ da tuna dípa, é fãa kula ǹâai kɛ̂i.

¹⁴ Núu da fé táre ní. Mɛni-ŋa-kaa fé dí yêei. A ŋumɛ láa gôo kpɛtɛ-ƃelai ŋɛ́i. Kpɛ́ni fêi, dí pɔɔkɔŋ-ŋai díkaa a lɛ́ɛ ɣâla-ŋa. Dífe a dífulu.

¹⁵ Kɛ̂i fé dîa. Díkaa nɔ́ a ɣɛ́lɛ-maa sãa. Tãi mɛni-ŋa-teɛɛ a pâi pâi la dímɛni mai, da pâi dí su karâi.

¹⁶ Kɛ́lɛ Zeeka Ŋɔɣâlai fé yɛ̂ɛ ŋ̀âla-pɔɔkɔŋ-ŋai ŋí. Kpɛ́ni fêi, ǹya ƃé sɛŋ kélee kpɛ̀tɛ, é pɛlɛ Eezuɛ-ŋai dîa nyíi-ŋai díkaa a bɔɔi. Ǹáa ƃa Ŋ̀wâla-wala kélee Yâwɛɛ.

Gɔ-soŋ mɛnii nyíi gáa pâi

¹⁷ Káai dí ká sòŋ, ka kákɔ̃liŋ-ŋai kélee síɣe a gɛɛ ká kúla ǹɔii ŋí su.

¹⁸ Yâwɛɛ è mò ǹyɛɛ, “Tãi ŋí yée mu, diai díkaa ǹɔii ŋí sui, ŋa pâi díɣâlai ŋá díkula naa. Ǹyaŋ ŋa pâi pâi a lii-too pôlu dípɔ nyíi da pâi gíli kɔ́lɔnîi.”

¹⁹ Ǹûai dí mò dîyɛɛi, “Kpalo ƃélaai kûa kúsɛŋ sôli-maai mɛ̂ni ma. Kúpalai fa kpɛ̂ɛ. Kɛ́lɛ kú mò kúkpîŋ ma a gɛɛ kú maa kɔlɔ-fela ká ŋí. Fɛ̂ɛ kú kúyee sée mu.

²⁰ Kúpɛrɛ-ŋai da wólo. Kúɣɛli-ŋai da tée. Kúnîa-pɛlɛɛi da kula kú kɔlɛ mâ. Kúfa ŋɔ́nɔ díkâa. Núu da fé naa é kúpɛrɛ-ŋai tɔ́ɔ ŋɔ́nɔ. Núu da fé naa é kúkɛ̂i kpɛtɛ.”

²¹ Ŋá mò dîa ńyɛ̃ɛi, “M̀ala-mɛi káa-ƃelai dífe táre ní, ǹyaŋ dífa Yâwɛɛ marê kɛ̀ é díteniŋ tɔɔ. M̀ɛni ma, dífa ƃûu ƃò. Díƃala-kpului a táa-taa.

²² Ka káwoli tɔ́ɔ dùŋ-ŋai dîa. Tùŋ káa kulâi yá-ŋua-pere lɔii su. Ǹyaŋ Zuda taa-ŋai kélee da pâi lɛɛ̂i a bûŋ. Da pâi kɛ̂i nɔ́ a fɛnɛ-sãa kɛ̂i.”

²³ Óo Yâwɛɛ, ŋá gɔ́lɔŋ a gɛɛ núu kpune ŋɔkɛ ɣéniɛi fé gbîŋ wála-wala laai su. Núu-kpune fa pɔ̂ri gbîŋ mɛni kpɛtɛ̂i a ǹɛ́lɛɛ a gɛɛ é mɛi káa.

²⁴ Ŋ́deniŋ tɔ́ɔ a pere lɛ́lɛɛ Óo Yâwɛɛ, a teniŋ ƃô laa. Ífe gɛ̀ a í lii ŋwânai. Ífa lâa ńɛɛ lâ kpɛ́ni-kpɛni.

²⁵ Ílii ŋwána ǹɔii-ŋuŋ-ŋai dîa nyii-ŋai dífe íkɔlɔŋ, da ǹûai nyíi-ŋai dífa ílaa tolii. Kpɛ́ni fêi, dia ƃé da Eezuɛ su kara. Da zu kara kpɔ́ kpóŋ-kpoŋ. Da ǹɔii kɛ́ a lɛ́ɛ a bûŋ.