Ɉeremi 1 - Bible

¹ È kɛ̀ a tãi tɔnɔ da, Yâwɛɛ è lòno nalôŋ tɔnɔ pɔ́ nyíi da kâa kɛ̀ m̀a Zɛlemaya. Zɛlemaya ŋí è kɛ̀ a zâla láa-soŋ nuui dɔnɔ ǹóŋ nyíi da kâa kɛ̀ mà Ɛkaya. Ɛkaya ǹyaŋ è kùla taa tɔ̂nɔ da su nyíi da kɛ̂ mà Anatɔɔi. Anatɔɔi è kɛ̀ a Bɛŋsima ŋɔlɔii kpîniŋ su taai dɔnɔ.

² Yâwɛɛ è wɔ́lɔ lòno bɔ́ a tãi Amɔŋ ǹóŋ Zosaya è wɔ́lɔ kɛ̀ la a kâloŋ Zuda lɔii mɛi ŋɔkóraŋ buu-kao saaƃai su.

³ Zɛlemaya è ŋɔ́nɔ kɛ̀ Ɣâla-woo ƃôi a tãi Zosaya ǹóŋ Zɛoakiŋ è wɔ́lɔ kɛ̀ la a kâloŋ Zuda lɔii kpiniŋ mɛi. È lɛ̀ɛ naa é lɛ́ɛ la zu góraŋ puu-kao tɔnɔi Zosaya ǹóŋ Zɛdikaya è wɔ́lɔ kɛ̀ la a kâloŋ é kpɛɛ. Zɛlemaya è lɛ̀ɛ Ɣâla-woo ƃôi é lɛ́ɛ la zu dí Zerusâlɛŋ soŋ a kɔ́ m̀aa kôraŋ tí ŋɔɣáloŋ ǹɔ́ɔlui su.

Yâwɛɛ è Zɛlemaya tòli

⁴ Yâwɛɛ è lòno ḿbɔ ǹyɛɛi,

⁵ “Ŋá lɛ́ɛ pâi íkpɛtɛ̂i ílee koo-ƃɔ̂lɔŋ su, ŋá kɛ̀ a íkɔlɔŋɔɔ. Ílee é lɛ́ɛ pâi ímaa sɔlɔ ƃôi, ŋá ísìɣe zu, ŋá ílɛ a ɣâla-woo ƃó núu ǹɔii ŋuŋ-ŋai dîa.”

⁶ Nya ƃe ŋá ŋ̀óo su tòo ńyɛ̂ɛi, “Ŋ̀wála-wâla kélee Yâwɛɛi, í gɔ́lɔŋ a gɛɛ ḿva pɔ̂ri lônoi, kpɛ́ni fêi, ŋ́guro têi a gɛɛ ŋá lóno ǹûai pɔ́.”

⁷ Kɛ́lɛ, Yâwɛɛ è mò ḿâ ǹyɛɛi, “Ífe kɛ̀ yɛ̂ɛ íkuro têi. Lí kpɔ́ ǹûai kélee pɔ́ ŋa pâi ítɛɛ̂i naai, í m̀ɛnii ƃó ŋa pâi m̀ôi yâ a gɛɛ í m̀ó dîai.

⁸ Ífe yào dîa, kpɛ́ni fêi, ŋa pâi kɛ̂i ípôlu ŋ́gɛ ímɛi kâa. Ńyãai ŋ́gaa a Yâwɛɛ, ńyãa ƃé mò tí.”

⁹ Nya ƃe Yâwɛɛ è ǹyée sìa ǹá-gbɔ ma ǹyɛɛ ḿâi, “Ŋaâ ŋ́oo pú íla a gɛɛ í lóno.

¹⁰ Ye gɔ́lɔŋ a gɛɛ ŋa sâa í tɛɛ̂i a ŋáwala-walai lɔii-ŋuŋ-ŋa da kâloŋ-laa-ŋa pɔ́ naa a gɛɛ í ŋáworɛ̂-wooi ƃó dîa. Ŋ̀orɛ̂-wooi ŋí ƃa a gɛɛ da pâi da-ŋa ƃúlenii, dí da-ŋa kula, dí da-ŋa yee mɛi ɣále, dí da-ŋa su-kara, dí da-ŋa tɔɔ, dí da-ŋa sí.”

Zĩ̂a feerɛi

¹¹ Nya ƃe Yâwɛɛ è lòno ḿbɔ ǹyɛɛi, “Zɛlemaya, lé ƃé í gàai?” Ŋá mò m̀a ńyɛ̂ɛi, “Amɔŋ-wuru woŋo.”

¹² Nya ƃe Yâwɛɛ è mò ḿâ ǹyɛɛi, “Í kwaa kâa a ǹɛ́lɛɛ, kpɛ́ni fêi, ŋ́gáa ƃɛ́ a gɛɛ ŋá lɛ́ɛ ƃɛ́ ŋ́oo ŋ̀aa sèe é kɛ́.”

¹³ Nya ƃe Yâwɛɛ è ŋɔ́nɔ lòno ḿbɔ a tãi veerɛ ɣelêi ǹyɛɛi, “Lé ƃé ya gâai?” Ŋá mò m̀a ńyɛ̂ɛi, “Ŋa leɣi kâai gɛ́ nɛ̀ŋ, ǹá liɛ́ɛ séɣai-pere ǹáa bɛ̂rɛ ma.”

¹⁴ Yâwɛɛ è mò ḿâ ǹyɛɛi, “Mɛni kpɔ̂lu a pâi kulâi yá-ŋua pere é láa ǹɔii ŋí su-ƃela dîa,

¹⁵ kpɛ́ni fêi, ŋa pâi yá-ŋua pere kaloŋ-ŋai kélee kpɔ́ tôli dí pá dí díkâloŋ sèe-sɛŋ-ŋai sée Zerusâlɛŋ ŋɔsíɣaŋ láƃerei, dítinaŋ m̀a, dí ŋɔ́nɔ tínaŋ Zuda ŋɔtaa lêe-ŋai dîa.

¹⁶ Ŋa pâi ŋánûai kula-maa kɛ̂i díŋwana-lɔ̂ɔi mɛ̂ni ma. Kpɛ́ni fêi, da dípôlu tɔɔ ḿâ. Da sâla kula ɣâla da kpɛ́ni-ŋa dîa, dí kɛ̀ díkpîŋ kpɛtɛ-sãai fɛ̀li a díɣâla.

¹⁷ M̀ɛni ma, ye ímu siɣe, í lî ím̀ɛnii ŋa pâi m̀ôi yâi í gélee ƃó dîa. Ífe yào a dɔnɔ kpîŋ, a wàla kɛ́ tí, ŋa pâi gɛ̂i íyao kpɔ́ a ŋánaa a tãi ya pâi kɛ̂i la dísamai.

¹⁸ Ŋaâ sâa íkponôi kpanaŋ yɛ̂ɛ taa-lêe nyíi m̀aa tínaŋɔ̂ɔi a siɣãŋ. Íkaa sâa yɛ̂ɛ kɔli nyíi dɔɔ̂i. Íkaa yɛ̂ɛ ƃara pɛ̂rɛ-kaŋ nyíi dɔɔ̂i Zuda kaloŋ-ŋai díyee-mu-ƃelai, zâla láa-soŋ-ƃelai, da diai kélee díkaa ǹɔii sui dîa.

¹⁹ Da pâi kɔ̂i ípɔ, kɛ́lɛ díyee fé pâi pɔrîi yâ. Kpɛ́ni fêi ńyãai ŋ́gáa a Yâwɛɛ, ŋa pâi ímɛi kâai, ŋa íkula yêei kɛ́.” Ńyãai ŋ́gáa a Yâwɛɛ, ńyáa ƃé mò tí.