Ɉaan 2 - Bible

Kena nɛni-kula-kuui

¹ Ŋ̀ele-kûui zaaƃa-ɣelei nɛnî-kula-kuu e kɛ̀ Kena Galalii-lɔii su. Zîsɛ ǹee ǹyaŋ e kɛ̀ naa.

² Dí Zîsɛ kpîŋ da ŋɔpôlu-ƃelai tòli nɛni-kula-kuui su.

³ Tãi ŋwã̂aii e kpɛ̀ɛi, Zîsɛ ǹee e mò, ǹyɛɛi, “Ŋwãai fe díyêei.”

⁴ Zîsɛ e mò ma, “Nɛnîi, nàa lɛɛ nɔ ńyêei. Ŋátãi fe niî seri ni.”

⁵ Ǹee e mò ǹyée-mu-ƃelai dîa, ǹyɛɛi, “Ka mɛni nyíi kélee kɛ́ a mò kâai.”

⁶ Kɔni leɣi lɔ́ɔlu mɛi da e kɛ̀ see ni naa Zûu-ŋai dímɛni maa waai kɛ́-mɛni ma, dɔnɔ kɛ́ ya-tiŋ náaŋ soŋ, kpaa ya-tiŋ lɔ́ɔlu mɛi da.

⁷ Zîsɛ e mò dîa, ǹyɛɛi, “Ka neɣi-ŋai lá fɛ́ɛ a yá.” Nya ƃe dí díla fɛ̀ɛ kpɔ́ kiinɛɛ.

⁸ E mò dîa, “Ka nàa da kula ka li la gúu-mɛi-nuui pɔ.” Nya ƃe dí da kùla.

⁹ Tãi gúu-mɛi-nuui e ǹyái kɔɔŋ la nyii a nàa péne a ŋwã̂aii, ve kɛ́ ni a ƃɛi kɔlɔŋɔɔ e kùla naai (berei máŋ ǹyée-mu-ƃelai diai ǹyái kulâi, dí kɛ̀ a gɔ́lɔŋɔɔ lai), gúu-mɛi-nuui e nɛnî-kula-surɔŋ tòli.

¹⁰ Nyɛɛ ma, “Núu kélee a ŋwã̂ai lɛ́lɛɛi tɛ̀ɛ tuɛ. Ǹûai da gbèle a dámaa, à kɛ̀ ti, dí lɛɛ pâi a ŋwã̂aii nyii ve lɛlɛ ni. Kɛ́lɛ, ya ŋwã̂ai lɛ́lɛɛi seêi kɛ́ a lɛɛ zu tãi ŋi a seri.”

¹¹ Zîsɛ ŋɔŋɛi-kɛ-maa-ŋa kɛɛi maa-ŋuŋ ká ŋi e gɛ̀ Kena, Galalii-lɔii su é ŋɔfólo-laai lɛ́, ǹyaŋ ŋɔpôlu-ƃelai dí laa la.

¹² Nyiŋi pôlu ma e yeŋ Kapɔ̂nia da ǹee, ǹeɣe-ni da ŋɔpôlu-ƃelai. Nàa ƃe dí gɛ̀ naa a ɣele-kuu da.

Ŋ̀âla-pɛrɛ Kɛ́tɛi mu kpɛtɛɛi

¹³ Zûu-ŋai Dídɛɛ-mɛi-kuui e nàa lɛ̀ɣɛ, Zîsɛ ǹyaŋ e tɛ̀ Zerusâlɛŋ.

¹⁴ E nûa kàa Ŋ̀âla-pɛrɛ Kɛ́tɛi mu díkɛ niŋa-sirɛ-ŋa kɔlɛ da ƃála-ŋa e pɛlɛ toloŋ-ŋa dîa. Ǹyaŋ zɛŋ-kao maa-faleŋ-ƃelai díkɛ sɛŋ-kao maa faleŋ.

¹⁵ E ɣɛli kpɛ̀tɛ a fáa e díkelee díkpɛ da díƃala-ŋai é pɛ́lɛ niŋa-sirɛ-ŋai dîa dí kula Ŋ̀âla-pɛrɛ Kɛ́tɛi mu. E zɛŋ-kao maa-faleŋ-ƃelai dísɛŋ-kaoi pú e dí teƃele-ŋai pene é bɛ̀lɛ.

¹⁶ E mò dòloŋ-kɔlɛ-ƃelai dîa, ǹyɛɛi, “Ka zãâi ŋi kúla ƃɛ. Káfe pâi Ńâŋ ŋɔpɛ́rɛi kɛ̂i a pɔni-tɔɔ-pɛrɛ.”

¹⁷ E lɛ̀ɛ ŋɔpôlu-ƃelai kíli ŋá a gɛɛ e kɛ̀ a bɔ̃yɛɛ, “Ípɛrɛi maa wɛlii, a pâi ḿbaâi.”

¹⁸ Nya ƃe Zûu-ŋai dí mò ma, “Ŋɛi-kɛ-maai ƃa le ya ǹɛ̂i kûa nyiŋi kɛ́ mɛni mai?”

¹⁹ Zîsɛ e díwoo su tòo, ǹyɛɛi, “Ka Ŋ̀âla-pɛrɛ Kɛ́tɛi ŋi kara, ǹyaŋ ŋa pâi dɔɔ̂i ɣele-kuu saaƃa yée mu.”

²⁰ Nya ƃe Zûu-ŋai dí mò ma, “Ŋ̀âla-pɛrɛ Kɛ́tɛi ŋi tɔɔ e kóraŋ buu náaŋ kao lɔ́ɔlu mɛi da sìɣe. Ya pɔ̂ri dɔɔ̂i ɣele-kuu saaƃa yée mu?”

²¹ Kɛ́lɛ, e kɛ̀ faâi gbîŋ-kponoi ma yɛ̂ɛ Ɣâla-pɛrɛ kɛ́tɛ.

²² E kɛ̀ ti, tãi e mu sìɣe saa-yeei, e lɛ̀ɛ ŋɔpôlu-ƃelai kíli ŋá a gɛɛ Zîsɛ e nyiŋi ƃò. Dí làa a Ŋ̀âla-kɔlɔi da ŋ́ooi ŋi Zîsɛ e mòi.

Zîsɛ è núu kélee kɔ́lɔŋ

²³ Tãi e kɛ̀ la Zerusâlɛŋ Dɛɛ-mɛi Kûui mai, núu támaa dí ǹáa sìɣe a tɔ̃yâ, tãi dí ŋ̀ɛi-kɛ́-maa-ŋai kàa e gɛ̀i.

²⁴ Kɛ́lɛ, Zîsɛ fe laa ni a dîa,

²⁵ kpɛ́ni fêi, e kɛ̀ a núu kélee kɔlɔŋɔɔ, ve kɛ́ ni a núu da wɛ́liɛɛ a gɛɛ é núu-kpune maa sêre-faa kɛ́ ǹyêei, kpɛ́ni fêi, ǹyaa kpîŋ e kɛ̀ a gɔ́lɔŋɔɔ zɛŋ gáa núu kponôi.