Izikiɛ 4 - Bible

Berei da pâi Zerusâlɛŋ sonii lai maa ŋɛi-kɛ-maai

¹ “À kɛ̀ tí, núu-kpune ǹóŋ, yé pɛrɛ tɔɔ pɔ̂rɔ-kane siɣe í ǹáa íŋɛi túɛ, í taa-lee pɔɔkɔŋ siɣe m̀a. É kɛ́ yɛ̂ɛ Zerusâlɛŋ.

² Bɔɔkɔŋ mâ kpɛtɛ yɛ̂ɛ sɛŋ ƃé núu da tínaŋɔ̂ɔi mà a gɛɛ dí gula yêei kɛ. Bɔɔkɔŋ ŋí é kɛ́ yɛ̂ɛ pɔrɔ-kane-ŋa ƃé dítinaŋɔɔi daai mâ. Kɔ́kɔ-ƃela díƃûu pɔɔkɔŋ tínaŋ daai mâ. Kɔ́kɔ-ƃala-sirɛ-ŋa pɔɔkɔ̂ŋ tínaŋ daai mâ.

³ Kɔli-ƃela siɣe í dɔɔ káloai yɛ̂ɛ sɛŋ ƃé a kɛ̀ ká ŋa kɔlɛi ka daai. Íŋɛi tínaŋ daai mâ père yɛ̂ɛ sɛŋ ƃé kɔ́kɔ-ƃela da kɛ gula yêei kɛ̂i. Ŋ̀ɛ́i kɛ́ maai ŋí káa Eezuɛ-ŋai mɛ̂ni ma.

⁴ “À kɛ̀ tí, láa íkɔɔ yêe mɛi pere ŋa pâi Eezuɛ-ŋai dísɔnyɔ̂ŋ pûi íŋua. Vólo kûui ya gɛ̂i lâai ƃé pâi kɛ̂i a dísɔnyɔ̂ŋ kula maa kɛ́ tãi ŋɔkóraŋ.

⁵ Yâ pâi kɛ̂i lâai a fólo kûu 390. Ǹyaŋ a pâi ǹɛ́i a gɛɛ ŋa pâi Eezuɛ-ŋai kula maa kɛ̂i a kóraŋ 390. Mɛni ma ya pâi mɔ̃lɛi Eezuɛ-ŋai mɛ̂ni ma.

⁶ Tãi yâ pâi kpɛɛ̂i la ŋ̀ele kûu-ŋai ŋí mai, gɛ̀ ní ya pâi lâai íyee gbeli mɛi pere a gɛɛ í Zuda-ƃelai dímɛni kula maai síɣe. Ya pâi kɛ̂i lâai a fólo buu náaŋ. Vólo kûu-ŋai ŋí dɔnɔ a pâi kɛ̂i kóraŋ tɔnɔ dísɔnyɔ̂ŋ-ŋai kula maa kɛ́ mɛni ma.

⁷ “Naa a kɛ̀ tí, tínaŋ Zerusâlɛŋ kula-yeei kɛ́ɛ maa pɔɔkɔŋ mâ pere yɛ̂ɛ sɛŋ ƃé ya kɛ̀ gula yêei kɛ̂i a íyee fôlo. À kɛ̀ tí, ɣâla-woo ƃó é pîlaŋ ma a nyɔ́mɔ.

⁸ Ŋa pâi í ɣirîi a ɣɛli a gɛɛ ífa lâa tínaŋ la íƃela da kpɛ́ni ma pere é lɛ́ɛ la zu vólo kûui ŋá ǹɛ yâi ŋ̀aa-see é kɛ́.

⁹ “Yé wîi, bale, tɔɔŋ, da lɛŋti é pɛlɛ mile da sipɛ dísiɣe í gélee pú gîe ma sɛŋ fôlo tɔnɔ su í gbɛtɛ a kpólo. Tãi ya pâi kɛ̂i lâai la fólo kûu ŋuŋ saaƃa pôlu buu lɔ́ɔlu mɛi náaŋ (390) yée mui, nya ƃé ya pâi kɛ̂i m̀iî.

¹⁰ M̀ii-sɛŋ nyii ya pâi miî a fólo tɔnɔi ŋɔwiɛ é kɛ́ yɛ̂ɛ kɔpu-feerɛ.

¹¹ À kɛ̀ tí, ǹyái yâ pâi gbelêi fólo tɔnɔ mai é kɛ́ yɛ̂ɛ wâŋ-sane tɔnɔ sinai feere. Ye gélee kpéle nɔ́ a tãi tɔnɔ.

¹² Ye gbóloi kpɛtɛ yɛ̂ɛ berei da bale kpolo kpɛ̂tɛ lai í mii. Ya kɛ̀ gbɛtɛ̂i, gbɛtɛ núu ŋɔli-lɔɔi kpala ŋɔŋ ma ǹûai kélee ŋɛ́i túɛ díkɛ ǹaa kàa.”

¹³ Kpɛ́ni fêi Yâwɛɛ è mò ǹyɛɛi, “Bere ƃé Eezuɛ-ŋai da pâi kɛ̂i dímii-sɛŋ miî la nyii vé pâi kɛ̂i a maa-waa dímii mɛ̂ni ma ǹɔii-ŋuŋ da kpɛ́ni-ŋai su ƃɛ́i ŋa pâi dítɛɛ̂i naai.”

¹⁴ Nya ƃe ŋá mò ńyɛ̂ɛi, “Kpao, Yâwɛɛ Ɣâla! É síɣe ǹoloŋ tãi ma ḿve tá ŋ́gbîŋ maa tĩa kara ní a fɛnɛ-sɛŋ nyii sàa gbɔɔi-yee mai, kpaa máŋ nyii fɛnɛ-sɛŋ da kpɛ́ni è baai da miɛɛi. Naa pôlu ma, ḿve ta fɛnɛ-sɛŋ da mii ní nyii íkɛ yɛ̂ m̀aa fé waa nii.”

¹⁵ Naa pôlu ma, è mò ḿâ ǹyɛɛi, “Ŋa pâi niŋa ŋɔli-lɔɔi tɛɛ̂i ípɔ naa a gɛɛ í gbóloi kpɛtɛ mà núu ŋɔli-lɔɔi pɔ́ɔ ŋa.”

¹⁶ Naa kɛ́ɛ tíi è ŋɔ́nɔ mò ḿâ ǹyɛɛ, “Núu-kpune ǹóŋ, ŋa pâi mii-sɛŋ mɛni wâlai Zerusâlɛŋ. Da pâi kɛ̂i mii-sɛŋ kɔ̂ɔni sɛŋ fôlo su dílɛɛ pâi miî. Da pâi kɛ̂i m̀iî díkɛ díkili-ŋa sìa. Da pâi máŋ kɛ̂i yá kɔɔ̂ni a maloŋ-pere dílɛɛ pâi díkpelei.

¹⁷ Ŋa pâi a nyiŋi a gɛɛ mii-sɛŋ mɛni é wála dîa da kpele-ya. Da pâi kɛ̂i díkîe ni ŋɛ́i kâai a maloŋ-pere díkɛ mɔ̃lɛ dísɔnyɔ̂ŋ-ŋai mɛ̂ni ma.”