Izikiɛ 13 - Bible

Ŋ̀âla-wooi nyii bîlaŋɔɔi ǹɛ́ɛ-ɣâla-woo ƃó ƃelai dîa

¹ Yâwɛɛ è lono ḿbɔ ǹyɛɛi,

² “Núu-kpune ǹóŋ, ye ɣâla-woo ƃó é pîlaŋ Eezuɛ-ŋai díɣâla-ŋɔlôno-kɛ ƃelai dîa nyii ŋai da kɛ díkpîŋ ɣâla-woo ƃoi. M̀o dîa a gɛɛ dí díwoli tɔ́ɔ Yâwɛɛ m̀a.”

³ M̀o dîa yɛ̂ɛ Ŋ̀wála-wâla kélee Yawɛɛi ǹyɛɛi, “Kpalo ƃêlaai ǹɛ́ɛ-ɣala-woo ƃó-ƃelai ŋí dîa nyii-ŋai da díkpîŋ zĩ̂a-ŋa kpɛ̀tɛ a díkpîŋ mɛni kpɛtɛɛi ǹyaŋ dífe zĩ̂a káa nii.

⁴ Káai a Eezuɛ-ŋai, káɣâla-woo ƃó-ƃelai kɛ̂i fé m̀a yɛɛ kɛlɛ̂ŋ-ŋa ƃé díkaa taa-lêe pileŋ ŋá.

⁵ Dífa lí ƃɛi-ŋai ziaŋ a wólo naai, kpaa máŋ díziaŋ ŋai tɔ́ɔ dí dínaŋ Eezuɛ-ŋai dîa a dímaa kɔ̃ɔ sɛŋ a tãi kɔ́ a pa lai kpaa máŋ tãi Yâwɛɛ ŋɔɣelei a pá lai.

⁶ Da lɛ́ɛ zĩ̂a-ŋa kàa. Díkɛ lɛ́ɛ-ɣâla-woo ƃo. Da kɛ mòi diɛi díkaa ŋ̀óo su kulâi, kɛ́lɛ ḿva dítɛɛ. À kɛ̀ tí, díkɛ gâai yɛ̂ɛ sɛŋ ƃé m̀ɛnii da môi a pâi kɛ̂i a tɔ̃yâ.

⁷ M̀o dîa yɛ̂ɛi, zĩ̂ai ká gàai vé a tɔ̃yâ. M̀ɛnii ŋai ká môi gáa a lɛ́ɛ. Ká mò kâa díkaa a ŋ́oo, kɛ́lɛ ḿve nîi mɛni da ƃó ní kâa!”

⁸ M̀ɛni ma Ŋ̀wála-wâla kélee Yâwɛɛi è mò dîa ǹyɛɛi, “Kpɛ́ni fêi kákaa lɛ́ɛ-ɣala-woo ƃôi, kákɛ lɛ́ɛ-zĩ̂a-ŋa kaai, ńdɔɔ̂i kâa. Ńyãai a Ŋ̀wála-wâla kélee Yâwɛɛi ŋ́oo ká tí.

⁹ Ŋa pâi ǹɛ́ɛ-ɣala-woo ƃó-ƃelai da ǹɛ́ɛ-zĩa káa-ƃelai kula maa kɛ̂i. Dífe pâi kɛ̂i ŋá mɛni-kpɛtɛ-ƃelai sáma, kpaa máŋ dílaa kɛ́ ƃò Eezuɛ-ŋai láa sáma, kpaa máŋ dí lí Eezuɛ lɔii su. À kɛ̀ tí, ká pâi gɔ́lɔnîi a gɛɛ ńyãa ƃa Ŋ̀wála-wâla kélee Yâwɛɛi.

¹⁰ “Kpɛ́ni fêi da kɛ̂ ŋánûai pɛlɛ̂i díke mò dîa dîyɛɛi, ‘Lii-sêe é kɛ́ kâa’ a tãi lii-sêe fé la naai. Kpɛ́ni fêi ŋánûa da siɣãŋ tɔ́ɔ nyii vé kpananii kɛ́lɛ ŋ̀âla-woo ƃó-ƃelai-ŋai ŋí da pá da wée-kole sia m̀a da m̀ɛi pɛ́lɛ gɛ́ ƃò yɛ̂ɛ ǹya ƃé gbanaŋɔ̂ɔi.

¹¹ M̀o ŋâla-woo ƃó ƃelai ŋí ziaŋ mɛi pɛlɛ a ŋ̀wée-kolei dîa a gɛɛ dísiaŋ tí a pâi tôoi ǹɔii ma. Tuna kɛ́tɛ a pâi pûi. Sãɔɔ kɛ́tɛ a pâi pûi. Fãa kɛ́tɛ é tɛ́ɛ.”

¹² Tãi ziaŋ a pâi tôoi lai, ǹûai dífe pâi kámarê kɛ̂i diɛi, “Ŋ̀wéei-kolei ká zìa ziaŋ mai káa mí?”

¹³ M̀ɛni ma m̀ɛnii Ŋ̀wála-wâla kélee Yâwɛɛi è mòi ká ŋí, “Ŋ̀a pâi ǹíi ŋwanai ŋá fãa-kɛtɛ tɛ́ɛ, ŋá tuna-kɛtɛ kɛ́ é pú, ŋá sãɔɔ-kɛtɛ kɛ é pú é ziaŋ wólo-wolo.

¹⁴ Ziaŋ tí ká ŋ̀wée-kolei sia mai, ŋa pâi ŋ̀woloi kpɔ́ é seri ǹɔii mâ ká kɛ gɔɔ-pilani kɔni-ŋai kâa. Tãi a pâi woloi lai, a pâi ká paâi. Ǹyaŋ a kɛ̀ tí, ká pâi gɔlɔni a gɛɛ ńyãa ƃa Yâwɛɛ.

¹⁵ “M̀ɛni ma, ŋa pâi ǹíi ŋwânai ziɣãŋ mâ da diai ŋwée-kolei sîa m̀ai. Ŋa pâi môi kâa a gɛɛ ziɣãŋ fé ŋɔ́nɔ naa da ǹûai ŋ̀wée-kôlei sîa m̀ai,

¹⁶ Ɣâla ŋɔlóno kɛ́-ƃelai nyii ŋai díkaa Eezuɛ nyii-ŋai kɛ̀ dîyɛɛ lii-sêe káa Zerusâlɛŋ ma, ǹyaŋ lii-sêe fé kɛ́ ní naai.” Ŋ̀wála-wâla kélee Yâwɛɛ ƃe mò tí.

Ŋâla-wooi nyii bîlaŋɔɔi ǹɛ́ɛ-ɣâla-woo ƃo ƃelai nyii-ŋai díkaa a nɛyãai diai

¹⁷ Yâwɛɛ è mò ǹyɛɛi, “Núu-kpune ǹóŋ, ye tinaŋ ílono nɛyãai pɔ́ naa pere nyii-ŋai dakɛ ɣâla-woo ƃoi díkpɔɔi yèe mai. Ɣâla-woo ƃó é pîlaŋ dia.

¹⁸ M̀ó dîa yɛ̂ɛi, Ŋ̀wála-wâla kélee Yâwɛɛ ǹyɛɛ: “Kpalo ƃelaai kâai a ǹɛyãai nyii-ŋai da ponîŋ-yèe kɔna-kɔli kpɛtɛ ǹûai kélee mɛ̂ni ma, kákɛ ǹúu-ŋuŋ mɛi pɛlɛ seɣe kpɛtɛ ǹúu-sĩi kélee mɛ̂ni ma a gɛɛ wála-wala laa é kɛ́ ká yêei dímɛi. Ka ŋ̀wɛlii a gɛɛ wála-wala laa é kɛ́ káyeêi ŋánûai dífulu-laai mɛi da dípaa mɛni mɛi a gɛɛ ká kánîa kɛ́ la.

¹⁹ Ka ƃaâ kula mâ ŋánûai sama balee ŋɔ-yèe-laa fɛɛ mɛni ma, é pɛlɛ kpolo-kpua-kpua ŋa dîa. Ka ǹûai paa nyii maa fé nɛ́ɛ ni ka dí pâai. Kakɛ́ diai maa fé nɛ́ɛ ni dílɛɛ ŋ̀ele mai kɛ̀ díkɛ lɛɛ ŋ̀ele ma a ǹɛɛ̂i ka kɛ́ gɛi ŋánûai dîa díkɛ díwoli tɔɔ lɛɛ́ mai.”

²⁰ Ŋ̀wála-wâla kélee Yâwɛɛi è mò ǹyɛɛi, “Ńdɔɔ̂i ká ponîŋ yèe-ma kɔli-ŋai dîa nyii-ŋai ka kɛ ǹûai kɔli lai. Ŋa pâi díkulâi káyee ma. Ŋa pâi ŋá ǹûai ŋuŋ-ma ƃoi yɛɛ ŋɔni-ŋa.

²¹ Ŋa pâi ká ŋ̀ɛi-mɛi pɛlɛ-sãai falaâi, ŋá ŋánûai ŋuŋ-ma ƃo ŋa díkula káyeei. Dífe ŋɔ́nɔ pâi kɛ̂i a káyee-ŋa sãa. A kɛ tí, ka pâi gɔlɔni a gɛɛ ńyãa ƃa Yâwɛɛ.

²² “Ka ŋánûai líi su kpanaŋ a ká lɛ́ɛi, berei máŋ ḿve dílii-su kpanaŋ ni lai. Ka ŋwana-lɔ̂ɔ ƃelai líi kula a gɛɛ dífe kpera dí-ŋwana-lɔɔ̂ tuai mâ dí díƃalo-laai sɔlɔ ƃo.

²³ M̀ɛni ma, ká lɛ́ɛ zĩ̂ai da ká lɛ́ɛ ɣâla-woo ƃoɔɔi a nâa kpɛɛ. Ŋa pâi ŋánûai kulâi káyeei. A kɛ tí, ka pâi gɔlɔni a gɛɛ ńyãa ƃa Yâwɛɛ.”