Izikiɛ 11 - Bible

Mɛni-ŋa teɛɛ káa Zerusâlɛŋ nua-kpaya-kpaya mɛ̂ni ma

¹ Ɣâla ŋɔmɔ̂leŋ è ŋ́zîɣe é pá a ńyãa vóloi kulâi pere siaŋ-la Yâwɛɛ ŋɔpɛ́rɛ kɛ́tɛi-la. Tãi ŋá ziaŋ-laƃerei kàa lai, ŋá kpakolo buu-feerɛ kao-lɔ́ɔlu kâa naa. Azɔɔ ǹóŋ Zaazania da Benaya ǹóŋ Pelatia nyii-ŋai kɛ̀ a Eezuɛ-ŋai laa-tuɛ ƃelai díkɛ máŋ dísama.

² Yâwɛɛ è mò mâ ǹyɛɛi, “Núu-kpune ǹóŋ, ǹûai ŋí ni ƃé da ŋ̀wana-lɔɔ mɛni kpɛtɛ díkɛ lia-woo nyɔ́mɔɔ kɛ̀ daa-leei ŋí su.

³ Dí mò diɛi, ‘Kwa pá nâa pɛ́rɛ-ŋa tɔɔ̂i daai ŋí su. Daai ŋí káa nɔ́ yɛ̂ɛ leɣi ƃé ǹɛ́ŋ nîi, kú kɛ́ɛ yɛ̂ɛ sua ƃé da ŋ̀îlii.’

⁴ M̀ɛni ma núu-kpune ǹóŋ, Ɣâla-woo ƃó nyii dɔɔ̂i dîa.”

⁵ Nya ƃe Yâwɛɛ ŋɔmɔ̂leŋ è pà ḿɛi é mó ḿâ ǹyɛɛi, “Kɛ́ dîa Yâwɛɛ ǹyɛɛ ŋá mò kâa káai a Eezuɛ-ƃelai bere ƃé ka kákili-ŋa siai la. Kpɛ́ni fêi ŋá m̀ɛnii kɔ́lɔŋ ka kákili-ŋa siâi é pîlaŋ mai.

⁶ Ka núu támaa páa Zerusâlɛŋ daa-leei ŋí su nyii-ŋai dípoma a bere-leei mâ gwaa kélee ma siɣei.

⁷ “À kɛ̀ tí, m̀ɛnii ńyãai a ŋ̀wála-wala kélee Yâwɛɛi ŋa mòi kâai nya ká ŋí: Daa-leei ŋí káa a neɣi-ɣili leɣi a tɔ̃ya, kɛlɛ lé ƃa zuai? Dia ƃa ǹûai ka dípaâi. Ŋa pâi ká kulâi daa-leei ŋí su.

⁸ Ka yaôi ƃóa-sɔ̂kpɔ ma. Kɛ́lɛ ŋa pâi pâi kâa a ƃóa-sɔ̂kpɔ, ńyãai a ŋ́wala-wala kélee Yâwɛɛi ŋ́oo ká tí.

⁹ Ŋa pâi ká kulai daa-leei su ŋá ká tɛ́ɛ ŋɔ̃yâ-ŋa pɔ́ ŋa kákula maa kɛ́.

¹⁰ Ka pâi ƃóa-sɔ̂kpɔ sàa kɛ̂i kákpîŋ lɔii ŋɔ gɔ̀yaŋ-perei mâ. À kɛ̀ tí ká pâi gɔ́lɔnîi a gɛɛ ńyãa ƃa Yâwɛɛ.

¹¹ Daa-leei ŋí fé pâi kɛ̂i a leɣi ká maa mɛ̂ni ma, kpaa máŋ díkɛ ká ɣili zu a sua. Ŋa pâi ká kula maa kɛi kpɔ́ Eezuɛ-lɔii gwaa kélee ma ka pâi kɛ̂i naai.

¹² Gɛ̀ ní ka pâi gɔlɔnîi a gɛɛ ńyãa ƃa Yâwɛɛ. Kpɛ́ni fêi káfe sia ní a ŋátɔ̂ŋ lá-woo, kɛ́lɛ ká kɛ̀ siâi a ǹɔii-ŋuŋ da kpɛ́ni-ŋai ká kɔlɛ mai dítɔ̂ŋ lá-woo.”

¹³ Tãi ŋá kɛ̀ ŋâla-wooi ŋí ƃôi lai, Benaya ǹóŋ Pelatia è tòo é sáa. Nya ƃe ŋáŋuŋ ma pìlaŋ ǹɔii mâ ŋá láɣi ńyɛ̂ɛi, “Óo Ŋ́wala-wala kélee Ɣâlai, ya pâi ǹɛɛ̂i naa diai da lɛɛ ŋ̀ele mai Eezuɛi díkelee dísaa?”

Ɣâla è gono-tee gɔ-pu-ƃelai yêei

¹⁴ Yâwɛɛ è lono ḿbɔ ǹyɛɛi,

¹⁵ “Núu-kpune ǹóŋ, íkayɔɔ-ŋai nyii-ŋai díkaa Zerusâlɛŋ da môi diɛi, ‘Íkayɔɔ-ŋai díkaa kɔ-sôŋ laa sui díkɛi kôyaa dífa pɔri Yâwɛɛ fɛlii. M̀ɛni ma, a ǹɔii tɛɛ kú pɔ a kú pɔɔ.’

¹⁶ “M̀ɛni ma yê m̀ó íƃaraa kɔ-sôŋ ŋai dîa a gɛɛ ńyãa ƃe dítɛɛ ǹɔii su koyaa su. Ńyãa ƃe dítaa-taa ǹɔii ŋuŋ-ŋai su, ŋa pâi kɛ̂i díkɔlɛ ǹɔii kélee su ƃɛi díkaa naai.

¹⁷ “M̀ɛni ma mò gɔ-sôŋ-ŋai dîa yɛɛi, Ŋ̀wála-wâla kélee Yawɛɛi ǹyɛɛi, ‘Ŋa pâi ká kulai ǹûai sama, ŋá ká kákula ǹɔii-ŋai su ƃɛi kátaa-taai naai ŋá Eezuɛ-lɔii tɛ́ɛ ká pɔ.’

¹⁸ Ǹyaŋ tãi da pâi pâi la naai, da pâi m̀aa-tĩa sãai kélee kulâi naa.

¹⁹ À kɛ̀ tí, ŋa pâi kili-ŋa sia nina kɛ̂i dîa, ŋa mɔleŋ-nina tɛɛ dípɔ. Ŋa pâi lìi-su kpanaŋ-ŋai kulâi díyeêi, ŋa wòo mɛ̂ni-lii tɛɛ dípɔ.

²⁰ À kɛ̀ tí, da pâi ŋa tɔ̂ŋ-ŋai mɛi kaai a ténîŋ ƃó pere. Gɛ ni, da pâi kɛ̂i a ŋánûa, ǹyaŋ ŋ́gɛ ƃo a Díɣâla.

²¹ Kɛ́lɛ, ŋa pâi diai da zãa nyɔmɔ-ŋai da ŋâla-pɔɔkɔŋ-ŋai fɛlii, ŋa pâi díkula maa kɛ̂i. Ŋa pâi díkula maa kɛi mɛni nyɔmɔɔ-ŋai mɛ̂ni ma nyii ŋai dí gɛi.” Ńyãa Yâwɛɛ Ɣâla ƃe mò ti.

Ɣâla ŋɔfolo-laai è kula Zerusâlɛŋ

²² Nya ƃe ŋâla-taa kôoŋ-sãai dí dímu-siɣe garaŋ-ŋai kɛ ƃo díkɔlɛ. Eezuɛ Ɣâlai ŋɔfolo-laai è kɛ́ dímɛi.

²³ Yâwɛɛ ŋɔfólo-laai è tɛ̀ ŋ̀elei su é kúla daai mɛi é tɔ́ɔ ǹyée kɛtɛi mɛi nyii gáa vóloi kulâi perei.

²⁴ Nya ƃe Ɣâla ŋɔmɔ̂leŋ è ńzìɣe zĩ̂ai su é pá a ńyãa gɔ-sôŋ-ŋai pɔ naa Babelɔŋ. Gɛɛ tii, zĩ̂ai ŋa gaai è nâa kula ŋ̀ɛi.

²⁵ Ǹyaŋ ŋa nâa m̀ɛni kélee ƃo dîa nyii Yâwɛɛ è ǹɛ mai.