Ifisiɛŋ 5 - Bible

Ka sia yɛ̂ɛ kwaa-ponoɔ su-nia-pɛlɛɛ

¹ Mɛni ma ka kɛ́ a Ɣâla-pɔɔkɔ̂ŋ-ƃela yɛ̂ɛ wɛli-kɛ-maa nîa-pɛlɛɛ,

² ka sia wɛli-kɛ-maa su yɛ̂ɛ berei Kôrai máŋ e kúwɛli la a gbîŋ tɛɛ kúmɛni ma yɛ̂ɛ kereŋ-sɛŋ kúŋ nɛ̃ɛ da sâla kúlaa Ɣâla ma.

³ Kɛ́lɛ, núu fe wulu-wulu kɛ́ɛ da mɛni maa liƃiɛ kélee, kpaa máŋ sɛŋ maa-lii teɛɛ láa tòli kásama. Ɣâla-ƃela dífa nyíi-ŋai ŋí kɛ̀.

⁴ Lono maa liƃiɛ, ƃoo-lono, da ŋumɛ-lono fè kɛ̀ kásama, nyíi-ŋai dífe lɛlɛ níi. Kɛ́lɛ, sɛɣɛi-fei é kɛ́ káyêei.

⁵ Ka láa la a gɛ́ɛ goyaŋ-wulu-wulu kɛ-nuu, kpaa máŋ núu maa liƃiɛ, kpaa máŋ sɛŋ maa-lii-tee-nuu (nyíi gáa a ɣâla da kpɛni fɛliɛɛi), va Ɣâla da Kôrai díkâloŋ-laai su-sãai da sɔlɔ ƃo.

⁶ Núu da fé kápɛlɛ a wóo folo-ŋa. Kpɛ́ni fêi, nyíŋi-ŋai ƃe da pâ a Ɣâla ŋɔlii-ŋwanai nîa-pɛlɛɛi dîa dífa ŋ̀óo mɛ̀nii.

⁷ Mɛni ma ka dîa-ni káfe nɛ̀ɛ,

⁸ kpɛ́ni fêi, ká kɛ̀ a kpini a tãi da, kɛ́lɛ, kákaa nâa a kwaa-ponoɔ Kúnuu-namui kponôi; ka sia yɛ̂ɛ kwaa-ponoɔ su-nia-pɛlɛɛ.

⁹ Kpɛ́ni fêi, kwaa-ponoɔ ŋɔƃa káa mɛni lɛ́lɛɛ kélee su, da mɛni sã́a, e pɛ́lɛɛ tɔ̃yâ ma.

¹⁰ Ka kɔ ka mɛnii maa kɔri nyíi a Kúnuu-namui líi làai.

¹¹ Káfe gbínii ŋɔtíi-ŋai da kɛ̀, nyíi-ŋai dífa ƃâi, kɛ́lɛ, ka pá a maa-tii-ŋai ti fíeŋ ŋá.

¹² Kpɛ́ni fêi, gáa máŋ a ŋumɛ-mɛni a gɛ́ɛ núu é lóno e pîlaŋ mɛni-ŋai dîa da gɛ̀ loo-pere sui;

¹³ kɛ́lɛ, sɛŋ nyíi kélee fíeŋ a nɛ̀i núu a gàa, kpɛ́ni fêi, sɛŋ kélee nyíi núu a gàai, gáa a fíeŋ.

¹⁴ Mɛni ma m̀ôɔi, “Óo nyíi-nuu, íŋɛi lá ƃo í kúla saa yêei, Kôrai a pâi kwaa-ponoɔ tɛɛ̂i ípɔ.”

¹⁵ Mɛni ma ka kásia-pere maa kpɛɛ a ǹɛ́lɛɛ. Káfe sia yɛ̂ɛ ƃoo-ƃela, kɛ́lɛ, ka sia yɛ̂ɛ táre-ƃela.

¹⁶ Tãi gáa káyêeii ka tíi kɛ́ la a gbanaŋɔɔ. Kpɛ́ni fêi, ŋele-ŋai díkaa a sɔnyɔ̂ŋ-ɣele-ŋa.

¹⁷ Maa-mɛni ma káfe ƃoo. Kɛ́lɛ, ka táre Kúnuu-namui ŋɔnîa-mɛnii su.

¹⁸ Ŋwãai fe kákɛ̀, nyíi gáa a gɛ́-ɣeniɛ ŋuŋ fuloŋɔɔi; kɛ́lɛ, kálaa e fɛɛ a M̀ɔlêŋ,

¹⁹ ka lóno kákîe-ni pɔ wule-woo-ŋa su da Ɣâla-wule-ŋa, kakɛ wule too kakɛ pêle kɛ̀ Kúnuu-namui ma a kálii kélee,

²⁰ ka sɛɣɛi-fei tɛɛ Kúnâŋ Ɣâla pɔ a tãi kélee sɛŋ kélee mɛni ma Kúnuu-namui Zîsɛ Kôrai láai su.

Ka kɛ́ kákîe-ni mu

²¹ Ka kɛ́ kákîe-ni mu Kôrai ŋɔyao-maai su.

²² Nɛ-yâa, ka kɛ́ kásinâai mu, yɛ̂ɛ berei kákaa la Kúnuu-namui mui.

²³ Kpɛ́ni fêi, surɔ̂ŋ ƃe gáa a ŋɔnɛnîi tuɛ-nuu, yɛ̂ɛ berei Kôrai káa la a Kôrai-toli-kpɔŋ ŋuŋ, gbono kɛ́ ƃo a Kôrai-toli-kpɔŋ. Kôrai ǹyaa kpîŋ káa a Kôrai-toli-kpɔŋ ƃálo-nuu.

²⁴ Berei Kôrai-toli-kpɔŋ káa la Kôrai mui, tɔɔ ǹɛyâai máŋ dí kɛ́ ti dísinâai mu mɛni kélee su.

²⁵ Sinâa, ka kánɛyâai wɛ́li yɛ̂ɛ berei Kôrai e Kôrai-toli-kpɔŋ wɛ́li la e gbîŋ tɛɛ mɛni ma,

²⁶ a gɛ́ɛ e m̀aa waai. E m̀aa wâa a yá da ŋ̀óoi,

²⁷ a gɛ́ɛ e Kôrai-toli-kpɔŋ siɣe a ǹáa fɛɛ a folo-laa, nyíi pɔ́ɔ fe mà, kpaa máŋ milîŋ, kpaa máŋ sɛŋ kélee yɛ̂ɛ nyiti-ŋai, a gɛ́ɛ é kɛ́ a maa waa, kpɔlɔ̂ŋ fe ma.

²⁸ Bere ƃe máŋ fɛ̂ɛ sinâa dí dínɛyâai wɛli la yɛ̂ɛ díkpono kpîŋ. Ǹúui nyíi e ŋɔnɛnîi wɛli níi, e gbîŋ wɛli ni.

²⁹ Kpɛ́ni fêi, núu fa gbîŋ kponoi kpɔara, kɛ́lɛ, a ŋá kɔ̀ŋ e mɛi káa, yɛ̂ɛ berei Kôrai a gɛ̀ la a Kôrai-toli-kpɔŋ,

³⁰ kpɛ́ni fêi, kúkaa a gbonoi woŋo-ŋa.

³¹ “Sâpoi ŋí ma, surɔ̂ŋ a ǹâŋ lɛ̀ɛ da ǹee é kánaŋ ŋɔnɛnîi ma, dífeerɛ dí kɛ́ tɔnɔɔ.”

³² Nyíŋi ŋá káa la walai, kɛ́lɛ, ŋa lônoi e pîlaŋ Kôrai ma da Kôrai-toli-kpɔŋ.

³³ Kɛ́lɛ, kákelee ka kánɛyâai wɛli tɔnɔ́-tɔnɔ́ yɛ̂ɛ kákpîŋ. Fɛ̂ɛ ǹyaŋ ǹɛyâai dí gáa a gɛ́ɛ dí ƃaa kɛ́-maa tɛɛ dísinâai pɔ.