Ifisiɛŋ 4 - Bible

M̀ɔlêŋ ŋɔkɛ-zu-tɔnɔɔi

¹ Mɛni ma ńyãai ŋ́gaa a pelesinɛ Kúnuu-namui mɛni mai, ŋá m̀ó káa a gbanaŋɔɔ a gɛ́ɛ kátûa-perei é kɛ́ a maa nɛ̃ɛ dòlii mɛni ma Ɣâla è gɛ̀ a káai,

² da maa-yeŋ-pere, ƃɛlɛ-laa, e pɛlɛ lii-kpele ma, a gɛ́ɛ ka kálii kpele kákîe-ni yêei wɛli-kɛ-maa su.

³ Ka kɔ ká M̀ɔlêŋ ŋɔkɛ-zu-tɔnɔɔi kɛ́ nii-seei su nyíi a nûa kɛ̀ zu tɔnɔɔi.

⁴ Kpono tɔnɔ nɔ́ ƃe naa da M̀ɔlêŋ tɔnɔ, yɛ̂ɛ berei máŋ dí kátòli la kili-kɛ-zu tɔnɔ su kátoli-wooi sui.

⁵ Nuu-namu tɔnɔ nɔ́ ƃe naa, laa-la tɔnɔ, batâi tɔnɔ,

⁶ da Ɣâla tɔnɔ nyíi gáa kúkelee Kúnâŋ, nyíi gáa kúkelee kúmɛi, gɛ tíi kɛ̀ kúkelee kúkponôi, gɛ ƃo ŋɔ́nɔ kúkelee kúkponôi.

⁷ Kôrai a ŋɔƃɛlɛ-sêe kɛ́tɛi da tɛɛ kúpɔ tɛi-tɛi.

⁸ Mɛni ma m̀ôɔi, “Tãi e tɛ̀ la ŋ̀elei sui, e kɔ-soŋ támaa ŋuŋ ma ƃo, e sama-sɛŋ tɛɛ núu-kpune pɔ.”

⁹ Kwà mò kûɛ, “E tɛ̀ ŋ̀elei su,” zu-kulai ƃa a yeŋ máŋ ǹɔii mu-pere.

¹⁰ Ǹúui nyíi yèŋ ǹyaa ƃa ǹúui máŋ tɛ̀ ŋ̀elei su póŋ-póŋ, a gɛ́ɛ e sɛŋ kélee láa fɛɛi.

¹¹ E núu da-ni tɛ̀ɛ kúpɔ a gɛ́ɛ dí kɛ́ a sia-ƃela, da-ni a Ɣâla ŋɔlóno kɛ́-ƃela, da-ni a Ɣâla-woo taa-taa-ƃela, da-ni a pasɛ-ŋa, da-ni dí ƃo a sɛŋ-lɛ-ƃela,

¹² a gɛ́ɛ Ɣâla ŋɔnûai dí kɛ́ a díkpɛtɛɛ ŋɔtíi mɛni ma, a gɛ́ɛ Kôrai kponoi é tɔ́ɔ,

¹³ é lɛ́ɛ la zu kúkelee kúlaa-lai é kɛ́ tɔnɔɔ da Ɣâla Ǹóŋ maa-tarei, a gɛ́ɛ ku ƃɔlɔ kúmɔ̂leŋ su ku kɛ́ yɛ̂ɛ Kôrai.

¹⁴ Gɛ̀ ní kúfe ŋɔ́nɔ pâi kɛ̂i yɛ̂ɛ nîa-pɛlɛɛ. Sɛŋ-lɛɛ nina kélee maa-fãai fe pâi kulâi ƃɛ-pere kpaa manaa-pere, kpaa máŋ e kútinâŋ-tinaŋ. Zɛŋ-lɛɛ ninai ŋí a kûla nûa díwôya-pere su, dítare-kiri, da dínuu-pɛlɛ lɛɛ-ŋai.

¹⁵ Kúfe ǹɛɛ naa nyíi-ŋai ŋí dí kɛ́ a kúa, kɛ́lɛ, fɛ̂ɛ ku dɔ̃yâi ƃo wɛli-kɛ-maa su, ku ƃɔlɔ a pere-sii kélee Kôrai kponôi nyíi gáa a kúŋuŋ tuɛ-nuui.

¹⁶ Kúkponôi kélee puɔɔ̂i gîe ma, ŋoŋo-ŋai kélee díkaa mɛni mai díɣiriɛ ma, Kôrai sârai. Tãi kúkponôi ŋɔwoŋo-ŋai kélee da tíi kɛ̀ la gîe ma a ǹɛ-lɛɛi, gɛ̀ ní kúkponôi a ƃɔ̂lɔ, e gbîŋ tɔɔ wɛli-kɛ-maa su.

Vulu-laa ninai gáa Kôrai kponôi

¹⁷ Mɛni ma ŋá nyíŋi ƃó kâa ŋa sere-faa kɛ̀ Kúnuu-namui kponôi a gɛ́ɛ káfe ŋɔ́nɔ tua yɛ̂ɛ berei Zɛ̃tai-ŋai da tûa la díkili-ŋai su kɛ́ ƃo kpɛni-kpɛni;

¹⁸ díkaa kpinîi dímɛni ŋa-kaai su, dí kúlaa Ɣâla ŋɔfúlu-laai ma, kpɛ́ni fêi, maa-tare fe diɛ, kpɛ́ni fêi ŋɔ́nɔ dílii kpanaŋɔɔ̂i;

¹⁹ dífe kpaaŋ ni mɛni da kélee ma, da díkpîŋ kula a wolii-kpɔlɔ-ƃela díkɛ ŋ̀wɛli a gɛ́ɛ dí mɛni nyɔ́mɔɔ-sii kélee kɛ́.

²⁰ Kɛ́lɛ, káfe Kôrai mɛni maa kɔri ni a bere-sii-ŋai ti!

²¹ À kɛ̀ ká ŋ̀óo mɛ̀ni e sɛŋ lɛ kâa yɛ̂ɛ berei tɔ̃yâ káa la Zîsɛ kponôi,

²² a gɛ́ɛ ka tee kátûa-pere pɔlɔi ma, nyíi pâi karâi, kpɛ́ni fêi, ŋɔmɛni-wɛliɛi káa a pɛlɛ.

²³ Ka kɛ́ a núu nina kákili ŋɔmɔ̂leŋ su.

²⁴ Ka dua-pere ninâi siɣe, nyíi Ɣâla e gbɛ̀tɛ a molôŋ maa tɔ̃yâ laa-la sãa su da maa-waa-laai.

²⁵ Mɛni ma kà kɛ̀ teêi woya-pere ma, ka lóno a tɔ̃yâ kákɔlɛ-ma-ƃelai pɔ, kpɛ́ni fêi, kúkaa a kúkîe-ni pɔ́ɔ.

²⁶ Kálii à ŋwàna, káfe sɔnyɔ̂ŋ kɛ̀. Kálii-ŋwanai fe lɛɛ zu fólo e li.

²⁷ Kpaa máŋ káfe tãi tɛɛ Dɛ̂ƃele pɔ.

²⁸ Ŋuma-nuu fe ŋɔ́nɔ ŋuma kɛ̀. Tɔɔ é tíi kɛ́ a ǹyée tɔ̃yâ-pere su, a gɛ́ɛ sɛŋ da é kɛ́ ǹyêei é da tɛɛ ǹúui pɔ a da wɛlii.

²⁹ Káfe ǹɛɛ naa lono nyɔ́mɔɔ fe kula kála, kɛ́lɛ, lono nɔ́ a nyíi a lii-laa tɛ̀ɛ núu pɔi, nyíi ǹɛ́lɛɛ̂i mɛnii ka gɛ̂i mɛni mai, a gɛ́ɛ kálono-wooi e lûwa láa diai dîa da káwoo mɛnii.

³⁰ Káfe Ɣâla Ŋɔmɔ̂leŋ Maa Waai líi sòli, nyíi kálɛ-mɛnii su kpanaŋ ŋuŋ-ma-ƃo-ɣelei mɛni mai.

³¹ Ka ƃó lii-ŋwana ma, lii-nyɔŋ, sóoŋ, larâŋ, da ŋɛi-kpala-sii kélee.

³² Sɔŋ-lɛlɛ da lii-lɛlɛ dí kɛ́ káyêei kákîe-ni mɛni ma. Ka kákîe-ni su-mɛni lɛɛ nɔ́ yɛ̂ɛ berei Ɣâla e kasu-mɛni lɛɛ la Kôrai sârai.