Ifisiɛŋ 2 - Bible

Ɣâla a kúƃàlo ƃɛlɛ-sêe sârai

¹ E ká kɛ̀ a káfulu tãi ka kɛ̀ la a kasaa tɔ̂ŋ karaa sârai da sɔnyɔ̂ŋ.

² Ka sia tɔ̂ŋ karaa su da sɔnyɔ̂ŋ a maa-ŋuŋ. Ka pîlaŋ ŋ̀éniɛi ŋí su tua-perei pôlu, ka pîlaŋ nyînaŋ nyɔ́mɔɔ-ŋai díkâloŋ pôlu, nyíi gáa tíi kɛ̂i diai sama da Ɣâla wóo pìlii.

³ Ku kɛ̀ nyíi-ŋai ŋí sama a maa-ŋuŋ, diai díkɛ ɣeniɛi kɛ̀ a díkpîŋ-tua-pere-nyɔŋ maa-sɛŋ-wɛliɛi. Ku pîlaŋ kúkili-ŋa-siai da kúkponôi dísɛŋ wɛliɛi pôlu. Mɛni ma kúkpîŋ tua-perei su Ɣâla ŋɔtɔŋ-kpɛ́-maai è kɛ̀ kúmɛni ma nɔ́ yɛ̂ɛ núu kpeli-ŋai.

⁴ Kɛ́lɛ, Ɣâla ŋɔmaloŋ-kaai kɛ́tɛ̂i, kpɛ́ni fêi, wɛli-kɛ-maa kɛ́tɛ káa ǹyêei kúmɛni ma,

⁵ berei máŋ ku kɛ̀ a kúsaa la kútɔ̂ŋ karaai sârai. Ǹyaa ƃe kúkɛ̀ fulu-laa su kwa Kôrai-ni (ƃɛlɛ-sêe sârai ƃe ka ƃalo la),

⁶ e kúmu siɣe saa yêei gîe ma kwa Kôrai-ni. È kúkɛ̀ kwa dîa-ni ku see kwaa tɔnɔ ma Ɣâla-taa Zîsɛ Kôrai sârai.

⁷ È nyíŋi kɛ̀ a gɛ́ɛ tãi pâi pâi é ŋɔƃɛlɛ-sêe su kɛ́tɛi lɛ́ sɔŋ-lɛlɛ-pere su Zîsɛ Kôrai sârai.

⁸ Kpɛ́ni fêi, ƃɛlɛ-sêe sârai ƃe ka ƃálo la laa-la sârai. Kákpîŋ-mɛni kɛ́ɛ fei, gáa a Ɣâla ŋɔsama-sɛŋ

⁹ tíi kɛ́ɛ fei, a gɛ́ɛ núu e yoŋka tee la.

¹⁰ Kpɛ́ni fêi, kúkaa a Ɣâla ŋɔkpɛtɛ-sãa. È kúkpɛ̀tɛ Kôrai kponôi tíi lɛ́lɛɛ-ŋa kɛ́ mɛni ma, nyíi-ŋai Ɣâla e díkpɛ̀tɛ gíli ŋá nàa tuɛ a gɛ́ɛ ku díkɛi.

Ɣâla a pá a kúa pôlu zaa-wurii sârai

¹¹ Mɛni ma é lɛ́ɛ kákili ŋá a gɛ́ɛ kákaa-perei ma ka kɛ̂ a Zɛ̃tai-ŋa a maa-ŋuŋ, Zûu-ŋai nyíi-ŋai kɛ̀ a díkpɛ-tɛɛ a núu yeei, dí kátòli a ǹûai dífe kpɛtɛ níi,

¹² é lɛ́ɛ kákili ŋá a gɛ́ɛ ka kɛ̀ a kákulaa Kôrai maa a maa-tãi ti. Káfe kɛ́ ni a Eezuɛ-ŋai díta. Ka kɛ̀ a ŋɔ̃yâ-ŋa Ɣâla ŋɔkono-teei maa-mɛni kpɛtɛɛi mɛni ma. Kili-kɛ-zu fe kɛ́ ni káyêei, Ɣâla fe tela kɛ́ ni káyêei ŋ̀éniɛi su.

¹³ Ká kɛ̀ a kámaa kôya Ɣâla ma, kɛ́lɛ, ka nâa lɛɣɛ la Kôrai ŋɔŋãai sârai.

¹⁴ Kpɛ́ni fêi, ǹyaa ƃe gáa a kulii-sêei. A Zûu-ŋai da Zɛ̃tai-ŋai kɛ́ zu tɔnɔɔ. E gbɔara-getii wòlo díloai.

¹⁵ E Zûu-ŋai dítɔ̂ŋ-ŋai kpera da dísu-woo-ŋai kélee a ŋɔfúlu-laai tɛ̂ɛi, a gɛ́ɛ ǹyaa kpîŋ sârai é núu nina tɔnɔ kpɛtɛ núu feerɛ pɔ́ɔ ŋá. Berei ti ƃe a lii-sêe kɛ̀ la.

¹⁶ E nyíŋi kɛ̀ a gɛ́ɛ é pá a Zûu-ŋai da Zɛ̃tai-ŋai pôlu Ɣâla pɔ kpono tɔnɔ su zaa-wurii sârai, a gɛ́ɛ e kpɔara-mɛni kélee kpera.

¹⁷ E pà é lii-sêe maa-mɛni ƃó kâa, káai ká kɛ̀ kwaa kôya mai da káai ká kɛ̀ naa kɔlɛi;

¹⁸ kpɛ́ni fêi, zarâi ƃe Zûu-ŋai da Zɛ̃tai-ŋai da pere kâa naa a gɛ́ɛ dí pa Nàŋ-nuui pɔ kili-ŋa-sia tɔnɔ su.

¹⁹ Mɛni ma ŋɔ̃yâ fa ŋɔ́nɔ a káa lɔii da kpɛni su, kɛ́lɛ, ka Ɣâla ŋɔnûai kákaa a lɔii tɔnɔ su-ƃela, ka ƃo a Ɣâla ŋɔnuu-suui su-ƃelai da.

²⁰ Kákaa nɔ́ yɛ̂ɛ pɛ́rɛ nyíi dɔɔ̂i Zîsɛ ŋɔsia-ƃelai mɛi da Ɣâla ŋɔlóno kɛ́-ƃelai. Zîsɛ Kôrai ǹyaa kpîŋ káa a bɛ́rɛi zonoŋ-su-kɔnii.

²¹ Bɛ́rɛi gwaa kélee puɔɔ̂i gîe ma Kôrai kponôi, ǹyaŋ bɛ́rɛi a ƃɔ̂lɔ a gɛ́ɛ é kɛ́ a Ɣâla-pɛrɛ kɛ́tɛ maa waa Kúnuu-namui kponôi.

²² Kápuɔ̂i kákîe-ni ma Kôrai kponôi kwaa ma mɛni ma ƃɛi Ɣâla Ŋɔmɔ̂leŋ a kɛ̂ naai.