Hebreu 8 - Bible

Zîsɛ ƃa Zâla láa soŋ-nûu kɛ́tɛi

¹ M̀ɛnii kpîŋ gáa m̀ɛnii ŋí su kwa m̀ôi ǹyaa ká ŋí. Sâla láa soŋ-nuu kɛ́tɛ kɛ́ɛ ŋí káa kúyêei, nyíi gáa see ni Ŋ̀wála-wâla kélee Ɣalai ŋɔsee-sɛŋ láa-mii-yee mɛi-pere Ɣâla-taai.

² Gáa a tii-kɛ-nuu gwaa maa waai da dɔ̃yâ-pɛrɛi mu nyíi núu fé dɔɔ ni, kɛ́lɛ, Kúnuu-namui ƃe dɔ̀ɔi.

³ Ǹyaŋ da sâla láa soŋ-nuu kɛ́tɛ kélee lɛ̀ a gɛɛ é sama-sɛŋ tɛɛ é sala-ŋa kula. M̀ɛni ma, gáa a sɛŋ fɛ̂ɛ zâla láa soŋ-nuui ŋí máŋ é sɛŋ da tɛɛ.

⁴ Ǹyaŋ eêi kɛ̀ ǹɔii ma, vêi kɛ̀ a sâla láa soŋ-nuu tɔnɔ kpîŋ, kpɛ́ni fêi, sâla láa soŋ-ƃela díkaa naa nyíi-ŋai da sama-sãa tɛ̀ɛ yɛ̂ɛ berei dɔ̂ŋ káa lai.

⁵ Díi díkaa gɛ̂i gáa nɔ a gwaa maa waai gáa Ɣâla-taai ŋɔninîŋ da ŋɔpɔɔkɔ̂ŋ. Kpɛ́ni fêi, tãi Mose è kɛ̀ pâi bɛ́rɛi kɔ́ɔ pîlanii lai, Ɣâla è mò ma, nyɛɛi, “Gáa a gɛɛ mɛnii kélee ya pâi gɛ̂i é kɛ́ yɛ̂ɛ bɔɔkɔ̂ŋ ŋá ǹɛ la yâ ǹyéei mai.”

⁶ Kɛ́lɛ, yɛ̂ɛ berei gáa lai, Kôrai a tíi sɔlɔ ƃó nyíi ǹɛ́lɛɛi kpɔ́ a ŋánaa é tɛ́ɛ bɔlɔi ma, yɛ̂ɛ berei gbanaŋ-woo-kɛɛi a pâ lai ǹɛ́lɛɛ̂i lai. Kpɛ́ni fêi, gbanaŋ-woo-kɛɛi ŋí è kɛ̀ kono-tee lɛ́lɛɛ mɛi.

⁷ Eêi kɛ̀ ǹûai dîi gbanaŋ-woo-kɛɛi ŋí sòŋ a maa waa, vêi pɔ̂ri kɛ̂i a sɛŋ a gɛɛ Ɣâla é da kpɛ́ni kɛ́.

⁸ Kɛ́lɛ, è gàa a gɛɛ ǹûai dífe zoŋ ni a ǹɛ́lɛɛ, mɛni ƃe è mò la nyɛɛ, “Nuu-namui nyɛɛi, ŋele-ŋai da pâi pâi, tãi ŋa pâi kpanaŋ-woo nina kɛ̂i la Eezuɛ-ƃelai da Zudasi-ƃelai yêei.

⁹ Vé pâi kɛ̂i yɛ̂ɛ gbanaŋ-wooi ŋá gɛ̀ dínâŋ-pɔlɔ-ŋai yêei a ŋelei ŋá dísòŋ la a díyee ŋá díkula Ize-lɔii sui. Nuu-namui è ŋɔ́nɔ mò a gɛɛ, kpɛ́ni fêi, dífe lɛɛ ní ŋákpanaŋ-woo-kɛɛi su, mɛni ma fé ŋ̀wóli tɔɔ ní dîa.

¹⁰ Nuu-namui è mò a gɛɛ Gbanaŋ-wooi ká ŋí ŋa pâi gɛ̂i Eezuɛ-ŋai yêei ŋ̀ele-ŋai tí pôlu mai. Ŋa pâi ŋátɔ̂ŋ-ŋai pûi díkili ŋá, ŋá dípɔ̃yɛ̂ dílii su, ŋá kɛ́ a Díɣâla, díyaŋ dí kɛ́ a ŋánûa.

¹¹ Dífe pâi môi díkɔlɛ-ma-ƃelai dîa, kpaa máŋ díƃarâai, díyɛɛ diai, ‘Ka Kúnuu-namui kɔ́lɔŋ.’ Kpɛ́ni fêi, núu kélee a pâi ŋ́gɔlɔnîi é síɣe lôloŋ ma é seri núu kɛ́tɛ ma.

¹² Kpɛ́ni fêi, malôŋ a pâi toôi mâ díŋwana-lɔ̂ɔi mɛni ma, ŋá nia dísɔnyɔ̂ŋ ma.”

¹³ Ɣâla kɛ́ɛ lônoi gɛ pîlaŋ Gbanaŋ-woo Kɛɛ Ninai mai, è gbanaŋ-woo-kɛɛ pɔlɔi kâa a gɛɛ bɔlɔɔi nâa ŋɔtíi fé ŋɔ́nɔ naa. Ǹyaŋ sɛŋ nyíi bɔlɔɔi ŋɔtíi fé mai gara la nɛɛ̂i.