Hebreu 5 - Bible

¹ Sâla láa soŋ-nuui kélee da nɛ̀ ǹûai samai, da nɛ̀ a gɛɛ é tɔ́ɔ dípɔɔ ŋá da Ɣâla-ni díloai a gɛɛ é sama-sɛŋ tɛ̀ɛ é sâla kúla sɔnyɔ̂ŋ mɛni ma.

² A pɔ̂ri ǹíi kpelêi diai yêei dífe dísɔnyɔ̂ŋ kɔ́lɔŋ da bɔara-maa kɛ-ƃelai, tãi nɔ́ ǹyaa kpîŋ gáa la fii-kpɛɛ ŋɔwala-walai yée mui.

³ Nyíŋi mɛni ma, gáa a sɛŋ fɛ̂ɛ é sâla kula gbîŋ-sɔnyɔŋ mɛni ma da ǹûai díwɔ̂i.

⁴ Núu fa ƃâa kɛ̀ gbɔɔ̂i ḿâ, kɛ́lɛ, Ɣâla ƃa dòli yɛ̂ɛ berei è Eelɔŋ tòli lai.

⁵ Mɛni ma Kôrai máŋ fé gbîŋ maa tɛ́ ní a gɛɛ é kɛ́ a sâla láa soŋ-nuu kɛ́tɛ, kɛ́lɛ, Ɣâla ƃe ǹɛ, nyíi mò ma, ǹyɛɛ, “Íkaa a Ńoŋ, sâa ŋa ímaa sɔlɔ ƃó.”

⁶ Yɛ̂ɛ berei a mò la ŋɔ́nɔ kwaa da kpɛni ma, nyɛɛi, “Íkaa a sâla láa soŋ-nuu wɔlɔ-wɔlɔ da wɔlɔ-wɔlɔ yɛ̂ɛ berei Mɛkisɛdɛi è kɛ̀ la a sâla láa soŋ-nuui.”

⁷ Tãi Zîsɛ è kɛ̀ la ŋɔnúu-kpune-kɔlɔi sui, ǹúui pɔ̂ri è kɛ̀ mì a gɛɛ é gúla saa yêei, Zîsɛ è vɛ̀li é gbera fé a ŋ̀óo su kɛ́tɛ a ŋ́ɛi-ya, ǹyaŋ ŋ̀óo è sîŋ sòŋ, kpɛ́ni fêi, yao-maa è kɛ̀ ǹyêei Ɣâla mɛni ma.

⁸ Berei máŋ è kɛ̀ la a Ɣâla Ǹóŋ è woo-mɛni maa kɔ̂ri mɛni-soli-kaa sârai.

⁹ Gɛɛ kɛ̀ a núu maa waai è kɛ̀ a wɔlɔ-wɔlɔ fúlu-laa diai kélee mɛni mà ŋ̀óo mɛnii.

¹⁰ Ɣâla è ǹɛ a sâla láa soŋ-nuu kɛ́tɛ yɛ̂ɛ berei Mɛkisɛdɛi è kɛ̀ la a sâla láa soŋ-nuui.

Núu yée kúlaa ǹaa-laai ḿu maa-lia-woo

¹¹ Mɛni támaa káa kúla kú m̀ó é pîlaŋ m̀ɛnii ŋí mâ, kɛ́lɛ, ŋ̀á lɛ̂i kpanaŋɔɔ̂i, kpɛ́ni fêi kámɛni ŋá kâai kpanaŋɔɔ̂i.

¹² Tãi ŋí su kâi pɔ̂ri kɛ̂i a sɛŋ-lɛ-ƃela, kɛ́lɛ, fɛ̂ɛ núu da é Ɣâla ŋɔtɔ̃yâi maa-mɛni lɛ́ kâa gɔ́ɔ pîlanii ŋɔ́nɔ. Fɛ̂ɛ núu è ká ŋákɔ̂ŋ a ŋíni-ya, kɛ́lɛ mii-sɛŋ kpanaŋ fêi.

¹³ Kpɛ́ni fêi, ǹúui nɔ́ ŋɔmii-sɛŋ káa a ŋíni-yai vé táre ní Ɣâla ŋɔtɔ̃yâ-laa-wooi su, kpɛ́ni fêi, gáa nɔ́ a lôloŋ.

¹⁴ Kɛ́lɛ, mii-sɛŋ kpanaŋ káa núu kpaya-kpaya mɛni ma, diai da díkili ŋá kɔ̀ŋ a mɛni-kɛɛ a tãi kélee a gɛɛ dí mɛni lɛ́lɛɛ da mɛni nyɔ́mɔɔ loai kɔ́lɔŋ.