Hebreu 4 - Bible

¹ Mɛni ma tãi núu liɛ ŋɔfii-tɔɔi su maa-kono-teei káa niî la naai, kwaa ku mɛi káa. À wàla kɛ́ tí da pâi káta-ni dímɛnii ŋá têei a gɛɛ ka fɛɣɛ a seriɛ ma.

² Kpɛ́ni fêi, Duŋ lɛ́lɛɛ è pà nɔ́ kúpɔ yɛ̂ɛ berei è pà la dípɔ̂i. Kɛ́lɛ, ŋorɛ-wooi dí mɛnii, dífe mɛni lɛ́lɛɛ kúla ní zu, kpɛ́ni fêi, fé laa-la káa ní mɛni-ƃelai kponôi.

³ Kúai kú làa lai, kú lɔ̀ vii-tɔɔi tí su, yɛ̂ɛ berei è mò la é pîlaŋ vii-tɔɔi kpîŋ ma, ǹyɛɛi, “Yɛ̂ɛ berei ŋá ḿvòo la ŋálii-ŋwanai sui, ‘Dífe pâi wɔ́lɔ liî ŋáfii-tɔɔi su.’ ” È mò tí berei máŋ ŋɔtíi è kpɛ̀ɛ la é síɣe ŋ̀énia-kɔɔ-pîlanii.

⁴ Kpɛ́ni fêi, a lóno kwaa da ma a pîlaŋ ŋele-kuui mɛi féerɛi ma bere-sii ŋí su, “Ɣâla è kpèra ŋɔtíi-ŋai kélee dîa a ŋele-kuui mɛi-feerɛ-ɣelei é vii tɔ́ɔ la.”

⁵ È mò ŋɔ́nɔ ƃɛ, nyɛɛi, “Dífe pâi wɔ́lɔ liî ŋáfii-tɔɔi su.”

⁶ Mɛni ma tãi nɔ́ gáa niî la a tɔ̃yâ a gɛɛ núu da-ni da pâi liî vii-tɔɔi sui, diai Duŋ Lɛ́lɛɛi mɛni a maa-ŋuŋ dí fɛ̀ɣɛ a díliɛ zu, kpɛ́ni fêi, wòo-mɛni fé kɛ́ ní íyeêi.

⁷ È tãi da kpɛni lɛ̀ ŋɔ́nɔ, ǹyɛɛ, “Sâa,” nyíi tãi su kôya tɛɛ pôlu ma è mò Deeƃé sârai ŋ̀óo-ŋai ŋí su, nyíi-ŋai è mò a maa-ŋuŋ, “Sâa, kà ŋ̀óo mɛ̀ni, káfe kálii kpanaŋ.”

⁸ Kpɛ́ni fêi, Zasua eêi fii-tɔɔ tɛ̀ɛ dípɔ Ɣâla fêi lono nàa pôlu ma é pîlaŋ tãi da kpɛni ma.

⁹ Mɛni ma, gɛ̀ ní fii-tɔɔ-ɣele a lɛ̂ɛ Ɣâla ŋɔnûai mɛni ma.

¹⁰ Kpɛ́ni fêi, ǹúui a lî Ɣâla ŋɔfii-tɔɔi sui, maa-nuui a kpèra máŋ ŋɔtíi-ŋai dîa yɛ̂ɛ berei Ɣâla è gɛ̀ lai.

¹¹ Mɛni ma, kwaa kɔ́ kpɔ́ a gbanaŋɔɔ a gɛɛ kú lí vii-tɔɔi tí su a gɛɛ kúfe kɛ̀ a ǹûai woo-mɛni fé díyêei, kú tóo yɛ̂ɛ berei ǹûai dí gɛ̀ lai.

¹² Kpɛ́ni fêi, Ɣâla ŋɔwóoi káa a vúlu gɛ́ tíi kɛ̀ ŋá liɣɛɛ é tɛ́ɛ ƃóa-sɔkpɔ ma nyíi ŋá káa gwaa feerɛ mai, gɛ́ lɔ́ fúlu-laa da mɔ̂leŋ díloai é lɛ́ɛ la zu é seri ƃɛi díŋa kɔlɛɛ̂i naai, gɛ ŋɔ́nɔ lɔ́ kpulɔ̂ŋ-ŋá da kpɔrɔ díloai é lɛ́ɛ la zu é seri ƃɛi díŋa kɔlɛɛ̂i naai. Ɣâla ŋɔwóoi a kúlii ŋɔkili-ŋa-siai da ŋɔmɛni-kpɛtɛɛi kɛ̀ a zu ponoɔ.

¹³ Fúlu-sɛŋ kélee da fé loo ní ma, kɛ́lɛ, gélee puɔɔ̂i fíyeŋ ŋá ŋ̀ɛi-tuɛ, nyíi gáa a ǹúui kwa dîa-ni kwa tíi kɛ̀i.

Zîsɛ ƃa zâla láa soŋ-nuu kɛ́tɛi

¹⁴ Mɛni ma tãi Ɣâla Ǹóŋ Zîsɛ Kôrai káa la kúyêei a sâla láa soŋ-nuu kɛ́tɛ nyíi tɛ̀ɛ ŋele-ŋai sui, kwaa kúlaa-lai sôŋ a gbanaŋɔɔ.

¹⁵ Kpɛ́ni fêi, zâla láa soŋ-nuui gáa kúyêei vé a zâla láa soŋ-nuui nyíi pɔ̂ri fé mì a gɛɛ é kúmalôŋ káa kúfii-kpɛɛi sui, kɛ́lɛ, gáa a zâla láa soŋ-nuui nyíi su-kɔɔŋ è pà bɔ̀ pere-sii kélee su yɛ̂ɛ kúai. É máŋ kɛ́ tí vé sɔnyɔ̂ŋ kɛ́ ní.

¹⁶ Mɛni ma kwaa lɛ́ɣɛ ƃɛlɛ-sêe see-sɛŋ kɔlɛ a laa-la a gɛɛ kú maloŋ kâa sɔlɔ ƃó kú ƃɛlɛ-sêe káa kpɔŋ maa mɛni ma tãi kwa kpɔŋ maa wɛ̀li lai.