Hebreu 13 - Bible

Kôrai-ƃelai dítii

¹ Tɔɔ ŋwɛli-kɛ-maai káyêei kákîe ni mɛni mai, é lí nɔ́ tuɛ-pere.

² Káfe kpera ŋɔ̃yâ sonîi a ǹɛ́lɛɛ, kpɛ́ni fêi, ŋɔ̃yâ soŋɔɔ a ǹɛ́lɛɛ su, núu da-ni da ɣâla-taa-kela-ŋa soŋ a ǹɛ́lɛɛ dítɛ̂i-pere.

³ Ka kákili ŋá sia é pîlaŋ diai dîa díkaa kpini-pɛrɛ mui yɛ̂ɛ kà dîa-ni kà kɛ̀ naa. Ka kákili ŋá sia é pîlaŋ diai dîa da dísoŋ a nyɔ́mɔɔi, tãi nɔ káa máŋ kákaa la a ǹúu-kpune-ŋai.

⁴ Tɔɔ nɛnî-kula-mɛni é kɛ́ a ƃaa-kɛ-maa pere-sii kélee su. Nɛnî-kula-pɛrɛi mu fé kàra. Kpɛ́ni fêi, Ɣâla a pâi goyaŋ-wulu-wulu kɛ́-ƃelai da ŋwulu-wulu kɛ́-ƃelai dímɛnii ŋá têei.

⁵ Sɛŋ-kao-wɛli fé kɛ̀ káa káfulu-laai su. Zɛŋ nyíi gáa káyêei, kálii é láa mɛni ma. Kpɛ́ni fêi, Ɣâla è mò, nyɛɛi, “Fé pâi wɔ́lɔ têei yâ, kpaa máŋ fé pâi ńyee kulâi ímu.”

⁶ Mɛni ma kwa pɔ̂ri m̀ôi a lii-kpele-pere kuɛi, “Kúnuu-namui káa a ŋákpɔŋ maa-nuu, fé pâi yáôi. Le ƃe núu-kpune a pɔ̂ri gɛ̂i a ńyãa?”

⁷ Ka kákili ŋá sia é pîlaŋ kátuɛ-ƃelai dîa nyíi-ŋai Ɣâla ŋɔwóoi ƃò kâai. Ka kákili ŋá sia é pîlaŋ la m̀ɛni ma kɛ̀ a dífulu-laai, ka dílaa-lai pɔ́ɔ kɔɔ̂ŋ.

⁸ Zîsɛ Kôrai káa nɔ́ a ǹyaa Zîsɛ Kôrai wɛ́ɛ, sâa, da wɔlɔ-wɔlɔ.

⁹ Káfe nɛ̀ɛ naa sɛŋ-lɛɛ nina-sii da kpɛni-ŋa dífe kásiɣe pere ma. Kpɛ́ni fêi, ǹɛ́lɛɛ̂i a gɛɛ Ɣâla ŋɔƃɛlɛ-sêei é núu líi su kpanaŋ, kɛ́lɛ, zu fé kpànaŋ a mii-sɛŋ sii da miɛɛ, nyíi mii-ƃela dífa mɛni lɛ́lɛɛ kùla zui.

¹⁰ Ɣâla-teƃele káa kúyêei nyíi vé a sɛŋ a gɛɛ diai da sâla kùla Ŋ̀âla-pɛrɛi mui, dí dílaa míi mai.

¹¹ Kpɛ́ni fêi, zua-ŋai zâla láa soŋ-nuu kɛ́tɛi a pâ a díŋãa gwaa maa waai ma a sâla sɔnyɔ̂ŋ mɛni mai, da díkèreŋ daai kɔlɛ, dífa díkèreŋ daai su.

¹² Mɛni ma Zîsɛ ǹyaa máŋ è mɛni-soli káa ziɣãŋ pôlu-pere a gɛɛ é ǹûai maa waa a ǹyaa kpîŋ ŋãai.

¹³ Mɛni ma kwaa kúla daai sú kú lí bɔ dí kú ŋɔŋumɛi da sɔlɔ ƃó.

¹⁴ Kpɛ́ni fêi, taa-lêe fé kúyêei ƃɛ́ nyíi gáa wɔ́lɔ nɔ naai, kɛ́lɛ, kúkaa daa-leei kɔ́rîi nyíi pâi pâi.

¹⁵ Mɛni ma kwaa laa-maa-tɛ-sala kúla Ɣâla ma a tãi kélee zarâi, ǹyaa ƃa ǹáa tóli-wooi nyíi a kúla núu lái.

¹⁶ Káfii fé kpɛ̀ɛ a mɛni lɛ́lɛɛ kɛ́ɛ da zɛŋ gáa káyêei da tɛɛ nûa pɔ, kpɛ́ni fêi zâla-sii-ŋai tí a Ɣâla líi làa.

¹⁷ Ka kátuɛ-ƃelai wóo mɛni ká kɛ́ dímu. Kpɛ́ni fêi, díkaa kámɔ̂leŋ mɛi kâai yɛ̂ɛ ǹûai ƃe fɛ̂ɛ dí díkoraŋ ƃoi. Tɔɔ dí gɛ́ a lii-nɛ̃ɛ, dífe gɛ a lii-soli, kpɛ́ni fêi, à kɛ̀ da kɛ̀ a lii-soli, gɛ̀ ní káfe pâi mɛni lɛ́lɛɛ kulâi zu.

¹⁸ Ka Ɣâla fɛ́li kúmɛni ma, kpɛ́ni fêi, kúlaai kpɔ́ la a ǹɛ́lɛɛ a gɛɛ kúkili-ŋa-siai maa waâi, kúkɛ ŋ̀wɛli a gɛɛ kúmɛni kélee kɛ́ ƃaa-kɛ-maa-pere su.

¹⁹ Ŋa m̀ôi kâa kpɔ́ a gbanaŋɔɔ a gɛɛ ká nyíŋi kɛ́ a gɛɛ ŋá pá ŋɔ́nɔ kápɔ pôlu a maa félaa.

Ŋ̀âla fɛliɛɛi gbɛɛ-ŋái

²⁰ Ǹii-see-Ɣalai nyíi Zîsɛ Kôrai kùla saa yêei é pá la pôlu a ŋwɔlɔ-wɔlɔ kpanaŋ-woo-kɛɛi maa-ŋãai, nyíi gáa a m̀ála-ŋai mɛi-kaa-nuu kɛ́tɛi,

²¹ é zɛŋ lɛ́lɛɛi kélee tɛ́ɛ kápɔ a gɛɛ ká ǹîa-mɛni kɛ́. É tíi kɛ́ kákponôi a zɛŋ nyíi ǹɛ́lɛɛ̂i ŋ̀ɛi, Zîsɛ Kôrai sârai. Fólo-laa é kɛ́ ma wɔlɔ-wɔlɔ da wɔlɔ-wɔlɔ. É kɛ́ tí.

²² Ŋa kákpera fêi, ŋánûa, ka káwoli tɔ́ɔ ǹá-woo-ŋai ŋí dîa, kpɛ́ni fêi, ŋa kɔlɔ kpua-loŋ nɔ pɔ̃yɛ kápɔ naa.

²³ Fɛ̂ɛ ka táre zu a gɛɛ kúƃarâŋ Temete ŋuŋ ma a nâa ƃó. Tãi kpɔ́ nɔ́ a pâi lai, kwa ǹyaa kwa pâi pâi kú kákaa.

²⁴ Kú fáa kálaa tuɛ-ƃelai kélee dîa da Ŋ̀âla-ƃelai kélee. Diai kùla Etelei dí fàa kâa.

²⁵ Ƃɛlɛ-sêei é kɛ́ kákelee kâa. É kɛ́ tí.